17–23 Mati: “Saili mo Mea o se Lalolagi Sili Atu Ona Lelei”

Mataupu Faavae ma Feagaiga 23–26

Mo le toatele o tagata, o le papatisoina o se aafiaga migao ma le toafilemu. Peitai, o le papatisoga o Ema Samita ma isi, sa faalavelaveina e se au faatupu faalavelave o e sa tauemuina i latou, faamata’u i latou, ma faamalosia i latou e sosola ese. Mulimuli ane, i le taimi lava na sauni ai Iosefa e faamau tagata fou, sa pu’eina ai loa o ia mo le faatiga i le nuu i ana talaiga. I nei faafeagai uma, na mafai faapefea e Ema ona maua le faamautinoaga o loo ia faia le mea sa’o? O le nofoaga lava lea e tasi e mafai ona tatou maua uma ai—e ala i faaaliga mai le Alii. Sa ia talanoa atu ia Ema e uiga i ‟mea o se [lalolagi] sili atu”—Lona malo—ma lona tulaga e i ai. Sa ia fai atu ia te ia e aua le fefe, ia ‟sii a’e [lona] loto ma olioli,” ma ia ‟pipii i feagaiga sa [ia] faia.” Ma o nei upu o le faamalosiauga ma fautuaga o Lona ‟siufofoga lea i tagata uma” (Mataupu Faavae ma Feagaiga 25:9–10, 13, 16).

Tagai foi i le Au Paia, 1:89–90, 94–97.

Manatu mo le Aoaoina i le Aiga ma i le Lotu

Mataupu Faavae ma Feagaiga 24

E mafai e le Faaola ona siitia a’u “i luga i fafo o [o’u] puapuaga.”

O le faaaliga i le Mataupu Faavae ma Feagaiga 24 na tuuina mai e “faamalosi, faalototele, ma faatonu” ai Iosefa Samita ma Oliva Kaotui i se taimi o tofotofoga (ulutala o le vaega; tagai foi i le Au Paia, 1:94–96). Vaavaai mo upu i le Mataupu Faavae ma Feagaiga 24 e te lagona e ono faamalosia ma faamalosiauina ai i la’ua.

O a mea o loo i mau nei o loo ta’u mai ai ia te oe le ala e mafai ai e le Faaola ona fesoasoani ia te oe i ou puapuaga?

Mataupu Faavae ma Feagaiga 24:1–3

Mataupu Faavae ma Feagaiga 24:8

Mataupu Faavae ma Feagaiga 121:7-8

Isaia 40:28–31

Mosaea 24:14–15

Auiliiliga mai le Sa Ia Faamaloloina le Tele o Ma’i Eseese, saunia e J. Kirk Richards

Mataupu Faavae ma Feagaiga 25

E i ai sa’u matafaioi taua e faia i le malo o le Atua.

A o vaavaai atu Ema Samita i le Toefuataiga o tatala mai e ala mai i lana tane, o Iosefa Samita, atonu na ia mafaufau po o le a lana matafaioi. Vaavaai mo tali na tuuina mai e le Alii i le Mataupu Faavae ma Feagaiga 25. O e maua se mea i lenei vaega e te lagona o Lona ‟siufofoga lea ia te [oe]”? (fuaiupu 16).

Tagai foi i le “O se Tamaitai Filifilia” (vitiō), Gospel Library; “Thou Art an Elect Lady,” i le Revelations in Context, 33–39; Joy D. Jones, “O Se Valaauga e Faapitoa Lona Tamalii,” Liahona, May 2020, 15–18.

"An Elect Lady"

(D&C 25:2-3) Video portraying events in the life of Emma Smith.

Mataupu Faavae ma Feagaiga 25:5, 14

‟Tumau pea i le agaga o le agamalu.”

O le a le uiga o le fuaitau o le “agaga o le agamalu” ia te oe? Mafaufau e suesue le vaega 25 mo upu ma fasifuaitau e fesoasoani ia te oe e malamalama ai i le uiga o le agamalu. O le sāvali a Elder Bednar “Agamalu ma Maualalo o le Loto” e mafai fo’i ona fesoasoani (Liahona, Me 2018, 30–33). E faapefea ona avea Iesu Keriso ma faataitaiga o le agamalu ia te oe? (tagai i le Mataio 11:28–30). Mafaufau i mea i lou olaga e mafai ona e faia ‟i le agaga o le agamalu.”

Mataupu Faavae ma Feagaiga 25:10, 13

“Tuu ese mea o lenei lalolagi, ma saili mo mea a se lalolagi sili atu ona lelei.”

A o e mafaufau loloto i le fautuaga a le Alii i le Mataupu Faavae ma Feagaiga 25:10, atonu e fesoasoani le faia o se lisi o ‟mea o lenei lalolagi” e finagalo o Ia ia te oe e ‟tuu ese.” Ona mafai lea ona e faia se lisi o ‟mea o se [lalolagi] sili atu” e finagalo o Ia e te sailia. E mafai ona e filifili ia lē itiiti ifo ma le tasi se mea mai le lisi muamua o le a e tuu ese ma le mea e tasi mai le lisi lona lua o le a e sailia.

Ua tuuina mai e Peresitene Russell M. Nelson ia fautuaga ma folafolaga e uiga i le ‟tuu ese o mea e tele o lenei lalolagi.” Vaavaai i ai i le itulau e 77 o lana sāvali “O Oa Faaleagaga” (Liahona, Nov. 2019). E faapefea ona e mulimuli i lana fautuaga?

A o e faitauina le fuaiupu 13, mafaufau e uiga i feagaiga na e osia ma le Tama Faalelagi ma Iesu Keriso. O le a le uiga o le “pipii atu” i nei feagaiga? E faapefea ona fesoasoani au feagaiga ia te oe e “tuu ese mea o lenei lalolagi, ma saili mo mea o se lalolagi sili atu ona lelei.”

O nisi nei o mau e mafai ona fesoasoani ia te oe e iloatino ai ‟mea o lenei lalolagi” ma ‟mea o se lalolagi sili atu ona lelei”: Mataio 6:19, 21, 25–34; Luka 10:39–42; 2 Nifae 9:51.

Tagai foi i Autu ma Fesili, ‟Ositaulaga,” Gospel Library.

Valaaulia le fefaasoaai. Afai o loo e aoaoina isi e uiga i le auala e ‟tuu ese ai mea o le lalolagi,” mafaufau i ni auala e valaaulia ai i latou e faasoa mai mea o loo latou faia e mulimuli ai i lenei fautuaga. E mafai ona tatou maua le malosi tele ma le lototele mai le faalogo atu i manatu ma aafiaga o le tasi ma le isi.

Mataupu Faavae ma Feagaiga 25:11–12

E fiafia le Alii i la’u ‟pese o le loto.”

O a nisi o au ‟pese o le loto”—o pese e faaalia ai ou lagona e uiga i le Tama Faalelagi po o Iesu Keriso? Mafaufau e usu pe faalogologo i nisi o na pese. O le a se mea e uiga i nei pese e faapitoa ai i latou ia te oe?

Atonu foi e te mafaufau loloto pe faapefea ona pei nei viiga o se tatalo. O a mea e tutusa ai musika paia ma tatalo? Na faapefea ona ‟taliina au pese paia i se faamanuiaga”?

Tagai foi i le ‟Oh, What Songs of the Heart,” Hymns, no. 286.

Mataupu Faavae ma Feagaiga 26:2

“O mea uma lava i le ekalesia ia faia i le finagalo autasi”

O le fasifuaitau ‟finagalo autasi” i le fuaiupu lenei e faasino i le faatinoga o le sii o o tatou lima e faaali atu ai tatou te taliaina ma lagolagoina se tagata o loo mauaina se valaauga po o se faauuga i le perisitua. E faapefea ona e faamalamalama atu i se tagata asiasi i se sauniga a le Ekalesia le uiga pe a tatou lagolagoina se tasi? O a tali ua e maua i le sāvali a Peresitene Henry B. Eyring ‟O Le Mana o le Faatuatua Lagolago”? (Liahona, Me 2019, 58–60).

Mo nisi manatu, tagai i lomiga o lenei masina o mekasini o le Liahona ma le Mo Le Malosi o le Autalavou .

Tagata, Nofoaga, Mea e Tutupu

• Ema Hale Samita

• Viiga

• Finagalo Autasi

Kiliki e vaai i isi mea

Fautuaga mo le Aoaoina o Tamaiti

Mataupu Faavae ma Feagaiga 24:1, 8

E mafai e le Faaola ona sii a’u “i luga i fafo o [oʻu] puapuaga.”

• Ina ia aoao e uiga i nisi o puapuaga po o luitau na feagai ma Iosefa Samita ma uluai Au Paia, e mafai ona e iloiloina le “Mataupu 11: Ua Toatele Atu Tagata ua Auai i le Ekalesia,” i le Tala o le Mataupu Faavae ma Feagaiga, 46–47, po o le vitiō e faatatau i ai i le Gospel Library. Ona mafai lea e oe ma lau fanau ona iloa le mea na fetalai mai ai le Alii ia Iosefa e uiga i ona puapuaga i le Mataupu Faavae ma Feagaiga 24:1, 8. E mafai foi ona e faasoa atu i le tasi ma le isi le auala e fesoasoani ai le Alii ia te oe i taimi faigata.

  Chapter 11: More People Join the Church: April–June 1830

• Ina ia aoao i le uiga o le ‟onosai i [o tatou] puapuaga,” e mafai e oe ma lau fanau ona toe fatu le faataitaiga i le vitiō ‟Continue in Patience” (Gospel Library). O le a le mea ua aoao mai e le Mataupu Faavae ma Feagaiga 24:8 ia i tatou e uiga i le onosai? E faapefea ona faailoa mai e le Faaola ia i tatou o loo Ia “faatasi ma [tatou]” i taimi o o tatou puapuaga?

  Faaauau i le Onosai

  O le onosai e manaomia ai lo tatou usitaia o poloaiga a le Atua, ma faatalitali ma le faamaoni i le faataunuuina o Lona finagalo.

Mataupu Faavae ma Feagaiga 25:11–12

E fiafia Iesu “i le pese a le loto.”

• A uma ona faitau le Mataupu Faavae ma Feagaiga 25:12, e mafai ona e ta’u atu i le tasi ma le isi e uiga i le viiga po o le pese a le Ekalesia e sili ona fiafia i ai—lau “pese o le loto”—ma usu faatasi. Faasoa atu i le tasi ma le isi le mafuaaga e te fiafia ai i nei pese. Aisea e fiafia ai le Alii pe a tatou usuina nei pese? E faapefea ona pei la tatou pepese ‟o se tatalo ia te [Ia]”?

Mataupu Faavae ma Feagaiga 25:13, 15.

O a’u feagaiga ma le Tama Faalelagi e aumaia ia te a’u le olioli.

• Ina ia malamalama i le uiga o le “pipii atu i feagaiga” (Mataupu Faavae ma Feagaiga 25:13), e mafai e lau fanau ona feauauai e pipiimau i se mea i le malosi latou te mafaia. Ona mafai lea e oe ma lau fanau ona talanoa e uiga i le ala e te ‟pipii” ai pe pipiimau i au feagaiga. Afai e manaomia, toe iloilo ma lau fanau feagaiga tatou te osia (tagai i le Mosaea 18:8–10; Mataupu Faavae ma Feagaiga 20:37; ma le itulau o gaoioiga o lenei vaiaso).

• Ina ia tuuina atu i lau fanau le talaaga mo le Mataupu Faavae ma Feagaiga 25:13, e mafai ona e faailoa atu o se mea lenei na ta’u atu e le Alii ia Ema Samita i le taimi lava ina ua uma ona papatiso. Aisea o le a avea ai lenei mea ma fautuaga lelei mo se tasi na papatisoina talu ai nei?

Mo nisi manatu, tagai i le lomiga o lenei masina o le mekasini o le Uo .

O Viiga a Ema, saunia e Liz Lemon Swindle