Auiliiliga mai le Ala o Ketesemane, saunia e Steve McGinty

3–9 Mati: ‟Aoao mai ia te A’u”

Mataupu Faavae ma Feagaiga 19

E tele tausaga na faaaluina e Matini ma Lusi Harisi ina ia maua ai se tasi o faatoaga sili ona manaia i Palamaira, Niu Ioka. A e i le 1829, na amata manino mai ai pau le ala o le a mafai ai ona lomia le Tusi a Mamona o le, pe a mokesi e Matini lana faatoaga e totogi ai le lomitusi. Na i ai le molimau a Matini Harisi i le Tusi a Mamona, a o Lusi, e leai. Afai e faaauau e Matini ona mokesi lana faatoaga ae lē lelei le faatauina atu o le Tusi a Mamona, e ono aveesea ai lana faatoaga, faaletonu ai lana faaipoipoga, ma tauleagaina ai o ia i le nuu. E ui e ese o tatou tulaga mai ia Matini, ae i nisi taimi tatou te feagai uma lava ma fesili faigata e pei o fesili na feagai ma ia: O le a le taua o le talalelei a Iesu Keriso ia te a’u? O le a le mea o loo o’u naunau e ositaulaga e fesoasoani ai e fausia le malo o le Atua? Na iu lava ina filifili Matini Harisi o le a ia mokesiina lana faatoaga ina ia mafai ona lolomiina uluai kopi e 5,000 o le Tusi a Mamona. Ae e oo lava i lenei osigataulaga—ma soo se osigataulaga e mafai ona tatou faia—e laitiiti pe a faatusatusa i le taulaga a Iesu Keriso, ‟o le ua silisili i tagata uma” (Mataupu Faavae ma Feagaiga 19:18), o lē na tafe toto mai i pu afu uma ina ia faasaoina ai e ua salamo.

Mo faamatalaga faaopoopo e uiga i le lomiga o le Tusi a Mamona, tagai i le Au Paia, 1:76–84.

Manatu mo le Aoaoina i le Aiga ma i le Lotu

Mataupu Faavae ma Feagaiga 19:1–12

‟O A’u, o le Atua, e lē gata.”

Na faamalamalama mai e Iosefa Samita o le faaaliga i le vaega 19 o ‟…se poloaiga ia Matini Harisi, na tuuina mai e ia o lē e Faavavau” (faaulutala o le vaega). Vaavaai mo nofoaga i fuaiupu 1–12 o loo faamamafa mai ai e le Alii Lona natura e faavavau. Aisea e te manatu ai sa taua mo Matini Harisi ona iloa lenei mea e uiga i le Alii? Aisea e taua ai ia oe lou iloa o lenei mea?

Aisea e te manatu ai ua ta’ua Iesu Keriso ‟o le amataga ma le gataaga”? (fuaiupu 1).

Mataupu Faavae ma Feagaiga 19:15–20

Na mafatia Iesu Keriso ina ia mafai ai ona ou salamo ma sau ia te Ia.

O loo faamatalaina e le Feagaiga Fou mafatiaga a le Faaola i Ketesemane mai le vaaiga a i latou o e na vaai i ai. I le Mataupu Faavae ma Feagaiga 19:15–20, na fetalai mai ai Iesu Keriso e uiga i Ona mafatiaga mai i Lana lava vaaiga. A o e faitauina lenei tala patino paia, vaavaai pe na faapefea ona faamatala e le Faaola Ona puapuaga. Manatunatu po o a mea o loo aoao ai oe e ia upu ma fasifuaitau taitasi. Aisea na naunautai ai le Faaola e mafatia? E mafai ona e maua nisi faamatalaga i le Ioane 15:13; Mosaea 3:7; Alema 7:11–12; Mataupu Faavae ma Feagaiga 18:10–13.

O lagona o ia te oe a o e suesue i puapuaga o le Faaola e ono uunaia ai fesili e pei o nei: Aisea na puapuagatia ai le Faaola mo a’u agasala? Aisea e manaomia ai ona ou salamo ina ia maua ai faamanuiaga atoatoa o Lana taulaga? Atonu e te maua ni malamalamaaga e uiga i nei fesili ma isi i le sāvali a Elder Ulisses Soares “O Iesu Keriso: O Le Tausisoifua o o Tatou Agaga” (Liahona, Me 2021, 82–84). A o e suesue, o a ni uunaiga e oo mai i lou mafaufau? Manatunatu e tusifaamaumau ou lagona e uiga ia Iesu Keriso ma Lana taulaga mo oe.

I le avea ai ma se vaega o au suesuega ma tapuaiga, e mafai ona e vaavaai mo se viiga e mafai ona e faalogo i ai pe usuina e faaalia ai lou lotofaafetai i le Faaola mo Lona puapuagatia mo oe. ‟Ou Te Tu ma Ofo” (Viiga, nu. 107) o se faataitaiga lelei.

O le a sou lagona i le mea e finagalo le Tama Faalelagi ma Iesu Keriso e te faia o se taunuuga o ou lagona ma suesuega?

Tagai foi i le ‟O le a fesoasoani Iesu Keriso ia te oe,” Mo Le Malosi o le Autalavou: O Se Taiala mo le Faia o Filifiliga (2022), 6–9; Autu ma Fesili, ‟Togiola a Iesu Keriso,” ‟Salamo,” Gospel Library; D. Todd Christofferson, ‟O Le Meaalofa Paia o le Salamo,” Liahona, Nov. 2011, 38–41; ‟Ua Puapuagatia Iesu i Ketesemane” (vitiō), Gospel Library.

Ua Puapuagatia le Faaola i Ketesemane

Ua malolo atu Iesu, Peteru, Iakopo ma Ioane i le Faatoaga i Ketesemane. Ua gauai atu Iesu i le finagalo o le Tama ma amata ona tigaina mo agasala ma puapuaga o tagata. Ona faalataina ma pueina ai lea o Ia. Mataio 26:36-57

Mataupu Faavae ma Feagaiga 19:23

E oo mai le filemu mai le aoao e uiga ia Iesu Keriso ma mulimuli ia te Ia.

Manatunatu i le valaaulia a le Faaola “A’oa’o mai ia te a’u.” O le a le mea ua e aoao mai e uiga ia Iesu Keriso mai le Mataupu Faavae ma Feagaiga 19? Faamaumau ou mafaufauga, ma mafaufau loloto pe faapefea e nei upumoni e uiga ia Iesu Keriso ona fesoasoani ia te oe ia maua le filemu. O le a le uiga ia te oe o le “sāvali i le agamalu o [Lona] Agaga”?

Tagai foi i le Henry B. Eyring, ‟Mauaina o le Filemu o le Tagata Lava Ia,” Liahona, Me 2023, 29–31; ‟Peace in Christ” (vitiō), Gospel Library.

Peace in Christ

Mataupu Faavae ma Feagaiga 19:26–41

O faamanuiaga a le Atua e sili atu nai lo oa o le lalolagi.

E le’i lelei le faatauina atu o le Tusi a Mamona i Palamaira. O le taunuuga, na i’u ina faatau atu e Matini Harisi se vaega tele o lana faatoaga e totogi ai le aitalafu i le lomitusi (tagai i le ‟The Contributions of Martin Harris,” i le Revelations in Context, 7–8). Mafaufau loloto i le taulaga a Matini—ma faamanuiaga ua e mauaina ona o lena mea—a o e faitauina le Mataupu Faavae ma Feagaiga 19:26–41. E mafai foi ona e mafaufau e uiga i mea ua talosagaina oe e le Alii e ositaulaga. O a ni mea ua e maua i nei fuaiupu ua musuia ai oe e faia nei osigataulaga ma le “olioli” ma le “fiafia”? (tagai foi fuaiupu 15–20).

Auiliiliga mai le Faatoaga a Matini Harisi, saunia e Al Rounds

Mo nisi manatu, tagai i lomiga o lenei masina o mekasini o le Liahona ma le Mo Le Malosi o le Autalavou .

Tagata, Nofoaga, Mea e Tutupu

• Faatoaga a Matini ma Lusi Harisi

• O le Fale Grandin : Nofoaga na Lolomiina ai le Tusi a Mamona

Kiliki e vaai i isi mea

Fautuaga mo le Aoaoina o Tamaiti

Mataupu Faavae ma Feagaiga 19:16–19

Na puapuagatia Iesu Keriso mo a’u.

• E mafai ona e fesoasoani i lau fanau ia lagona le migao ma le lotofaafetai mo le Faaola e ala i le faitauina faatasi o le Mataupu Faavae ma Feagaiga 19:16–19 po o le “Mataupu 51: Ua Puapuagatia Iesu i le Faatoaga o Ketesemane,” i tala o le Feagaiga Fou, 129–32, po o le vitiō talafeagai i le Gospel Library. Mafaufau e taofi ina ia mautinoa ua malamalama lau fanau ma tuu atu ia i latou e faailoa mai o latou lagona. Mo se faataitaiga, i le fuaiupu 16, o a ‟nei mea” na puapuagatia ai Iesu mo i tatou? (tagai i le Mosaea 3:7; Alema 7:11–12). O a mea tatou te aʻoaʻoina mai i Lana faamatalaga o Ona puapuaga? E mafai faapefea ona tatou faaalia lo tatou loto faafetai mo le mea sa Ia faia mo i tatou?

Chapter 51: Jesus Suffers in the Garden of Gethsemane

Fesoasoani i tamaiti e aoao mai tusitusiga paia. O nisi tamaiti e faigata ona faitauina tusitusiga paia. Taulai atu i se fuaiupu se tasi po o se fasifuaitau e mafai ona fesoasoani ia i latou.

• Fesoasoani i tamaiti e sue i totonu o Viiga po o le Tusipese a Tamaiti mo pese e fesoasoani ia i latou e faaalia ai o latou lagona e uiga ia Iesu Keriso (tagai i le faasino upu o igoa autu i nei tusi).

Mataupu Faavae ma Feagaiga 19:18–19, 24

Na usitai Iesu Keriso i le Tama Faalelagi, e oo lava i le taimi na matuā faigata ai.

• O le puapuagatia mo a tatou agasala sa matuai faigata lava, ae sa naunau Iesu Keriso e faia e usitai ai i Lona Tama ma faaali atu ai Lona alofa mo Ia ma mo i tatou. E mafai ona outou vaavaai faatasi i se ata o Iesu Keriso o puapuagatia i Ketesemane (e pei o na o loo i le otootoga lenei) ma fai atu i lau fanau e ta’u atu ia te oe mea latou te iloa e uiga i le mea o loo tupu i le ata. E mafai ona tou faitauina faatasi le Mataupu Faavae ma Feagaiga 19:18–19, 24 e faamamafa atu ai o puapuaga mo a tatou agasala o le mea aupito faigata lea e lei faia lava e se tasi, ae ona sa alofa Iesu i Lona Tama ma i tatou, sa Ia usiusitai i le finagalo o le Atua (tagai foi i le Mosaea 3:7). O a mea faigata ua poloai mai le Atua tatou te faia? E mafai faapefea ona tatou maua le lototele e usitai ai ia te Ia?

Mataupu Faavae ma Feagaiga 19:23

“Aoao mai ia te aʼu, ma faalogo mai i aʼu upu.”

• Atonu e mafai ona e fesoasoani i lau fanau e mafaufau i taga faigofie e o faatasi ma fuaitau i totonu o le Mataupu Faavae ma Feagaiga 19:23. Faitau faatele le fuaiupu ao faia e i latou ia taga. O a nisi auala e mafai ai ona tatou aoao e uiga ia Keriso ma faalogo i Ana afioga?

Mataupu Faavae ma Feagaiga 19:38

O faamanuiaga a le Atua e sili atu nai lo oa o le lalolagi.

• E mafai e oe ma lau fanau ona feauauai i le uuina o se kopi o le Tusi a Mamona ma faasoa mea e te fiafia e uiga i ai. Talanoa puupuu e uiga i le ositaulaga a Matini Harisi ina ia mafai ai ona lolomi le Tusi a Mamona (tagai i le Tala o le Mataupu Faavae ma Feagaiga, 33). O le a le fetalaiga a le Alii ia Matini i le Mataupu Faavae ma Feagaiga 19:38 atonu na fesoasoani ia te ia ia faamaoni ma usiusitai? Fesoasoani i lau fanau e mafaufau i se mea e mafai ona latou ositaulagaina e usitai ai i le Atua pe fesoasoani ai i Lana galuega.

  Chapter 7: Witnesses See the Gold Plates: 1829–1830

Mo nisi manatu, tagai i le lomiga o lenei masina o le mekasini o le Uo .

Keriso o loo Tatalo i le Faatoaga o Ketesemane, saunia e Hermann Clementz