Mauaina o le Filemu Patino
Ou te tatalo ina ia outou maua le filemu, fesoasoani i ni tagata e toatele ina ia mauaina, ma ia faasoa atu.
Ou uso e ma tuafafine pele, ua faamanuiaina i tatou i aoaoga musuia ma musika matagofie ua faagaeetiaina ai i tatou i lenei sauniga amata o le konafesi aoao. Matou te faafetai atu mo lo outou auai mai ma mo lo outou faatuatua.
O le asō o le a ou tautala ai i mea ua ou aoaoina e uiga i le vavega o le mauaina o le filemu patino, po o le a lava o tatou tulaga e iai. Ua silafia e le Faaola le momoo o fanau uma a le Tama Faalelagi mo le filemu, ma na Ia fetalai e mafai ona Ia tuuina mai ia i tatou. Tou te manatua fetalaiga a Iesu Keriso o loo tusia i le tusi a Ioane: “Ou te tuuina atu ia te outou le [filemu], o loʻu [filemu] ou te avatu ai ia te outou: ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau.”1
O le uiga o Lana fetalaiga i le filemu ma le ala e mafai ona Ia aumaia ai ua faaalia mai e tulaga a i latou o e na faalogo o Ia fetalaia na upu. Faafofoga i le tala i le Ioane e uiga i le faaiuiuga o le galuega a Keriso. O au malolosi a le tiapolo na taumafai e faasalaveia o Ia ma o le a le umi ae oo ane i luga o Ona soo.
O fetalaiga nei a le Faaola:
“Afai tou te alofa mai ia te aʼu, ia outou tausi mai i aʼu poloaiga.
“Ou te fai atu foi i le Tama, ona foai mai ai lea e ia ia te outou le tasi Fesoasoani, ina ia tumau pea o ia ia te outou e faavavau;
“O le Agaga lea … [o] le upu moni, e le mafai e le lalolagi ona talia o ia, aua ua le vaaia o ia, ua le iloa foi o ia; a o outou, ua outou iloa o ia, aua e tumau pea ia ia te outou, e i ai foi o ia i totonu ia te outou.
“Ou te le tuua outou o matuaoti: ou te sau ia te outou.
“E toe itiiti ona le vaai mai lea o le lalolagi ia te au; a e vaai mai pea outou ia te au: ou te ola a’u o le mea lea e ola ai outou.
“O lea aso e iloa ai e outou, ou te i totonu o lo’u Tama, o outou foi o i totonu ia te a’u, o a’u foi o i totonu ia te outou.
“O lē ua ia te ia a’u poloaiga ma tausi i ai, o ia lea e alofa mai ia te a’u: o lē alofa mai foi ia te a’u e alofaina o ia e lo’u Tama, ou te alofa foi ia te ia, ma ou faaali ia te ia.
“Ua fai mai ia te ia Iuta e le o le Sekara lea, Le Alii e, pe se a le mea o le a e faaali mai ai oe ia te i matou, a e le o le lalolagi?
“Ona tali atu lea o Iesu, ua faapea atu ia te ia, Afai e alofa mai se alii [po o se tamaitai] ia te au, e tausia e ia la’u upu: e alofa foi lo’u Tama ia te ia; e o mai foi i maua ia te ia, matou te nonofo ma ia.
“O le le alofa ia te au, e le tausia e ia au upu: o le upu foi tou te faalogologo i ai, e le sa’u lea, a o le upu a le Tama ua auina mai a’u.
“O mea ia ou te fai atu ai ia te outou manu o tatou nonofo.
“A o le Fesoasoani, o le Agaga Paia lea, e auina mai e le Tama i lo’u igoa, o ia lava na te aoao ia te outou i mea uma lava, e faamanatu mai foi o ia ia te outou i mea uma ua ou fai atu ai ia te outou.
“Ou te tuuina atu ia te outou le [filemu], o lo’u [filemu] ou te avatu ai ia te outou; ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau.”2
E tusa ma le lima upumoni ua ou aoaoina mai lena aoaoga a le Faaola.
Muamua, o le meaalofa o le filemu e tuuina mai i le mavae ai o le i ai o lo tatou faatuatua e tausi ai Ana poloaiga. Mo i latou o tagata o le feagaiga o le Ekalesia a le Alii, o le usiusitai ua uma ona tatou folafola atu e fai.
Lona lua, o le a afio mai le Agaga Paia ma nofo faatasi ma i tatou. Ua fetalai le Alii e faapea a o faaauau ona tatou faamaoni, o le a nofo le Agaga Paia i totonu ia i tatou. O le folafolaga lena i le tatalo o le faamanatuga, o le a avea le Agaga ma a tatou soa ma o le a tatou lagona, i o tatou loto ma mafaufau, Lana faamafanafanaga.
Lona tolu, ua folafola mai e le Faaola a o tatou tausia a tatou feagaiga, e mafai ona tatou lagona le alofa o le Tama ma le Alo mo le tasi ma le isi ma mo tatou. E mafai ona tatou lagona lo La’ua latalata mai i o tatou olaga i le tino, e pei lava o le a tatou lagonaina pe a faamanuiaina i tatou e faatasi ma i La’ua e faavavau.
Lona fa, o le tausia o poloaiga a le Alii e tele atu mea e manaomia ai nai lo na o le usiusitai. E tatau ona tatou alolofa i le Atua ma o tatou loto, malosi, mafaufau, ma agaga atoa.3
O i latou o e le alolofa ia te Ia e le tausia foi Ana poloaiga. Ma o lea, latou te le maua ai le meaalofa o le filemu i le olaga lenei ma i le olaga a sau.
Lona lima, e manino lava ua lava ma totoe le alofa o le Alii mo i tatou ua totogi ai le tau o a tatou agasala ina ia tatou mafai ai—e ala i lo tatou faatuatua ia te Ia ma lo tatou salamo, e ala atu i aafiaga o Lana Togiola—ona maua le meaalofa o le filemu lea e “silisili lava i mea uma e manatu i ai,”4 i le olaga nei ma faatasi ma Ia e faavavau.
O ni isi o outou, atonu e toatele, e le o lagonaina le filemu na folafola mai e le Alii. Atonu na outou tatalo mo le filemu patino ma le faamafanafanaga faaleagaga. Peitai atonu e te lagona o loo sāō le lagi i au aioiga mo le filemu.
O loo i ai se fili i lou agaga e le o manao e te maua ma maua e i latou e te alofa i ai, le filemu. E le mafai ona ia fiafia ai. E galue o ia e taofi oe mai le manao ia [e] maua le filemu lea e finagalo le Faaola ma lo tatou Tama Faalelagi e te maua.
O taumafaiga a Satani e totō le feitagai ma finauga ia i tatou e foliga mai ua faateteleina. Ua tatou vaai i faamaoniga o le tupu o lena mea i atunuu ma nuu, i pitonuu, i ala o faasalalauga faaagafesootai, ma le salafa atoa o le lalolagi.
E ui i lea, e i ai le pogai mo le talitonu o le a lelei mea uma: o le Malamalama o Keriso lea ua tuuina i totonu o tamaiti uma faatoa fananau mai. Faatasi ai ma lena meaalofa aoao e aumaia ai se lagona o le mea e sa’o, o se manao ia alofa atu ma ia alofaina. E i ai se lagona o le faamasinotonu ma le moni i totonu o atalii/afafine uma o le Atua a o sau o ia i le olaga nei.
O lo tatou talitonu o le a lelei mea uma mo le filemu patino mo na fanau e taoto lea i tagata o e tausia i latou. Afai o i latou na tausia ma auauna atu ia i latou na galulue ia maua le meaalofa o le filemu mai le Faaola, o le a latou uunaia, e ala i faataitaiga ma taumafaiga patino, le faatuatua o le tamaitiiti ia agavaa ai mo le meaalofa faalelagi o le filemu.
O le mea lena ua folafola mai e tusitusiga paia, “Aoao ia i le tama e tusa ma lona ala; a oo ina toeaina lava o ia, e le te’a ese ai.”5 O le a manaomia e le tagata e nafa ma le tausiga ma le faafaileleina o le tamaitiiti ina ia agavaa i le meaalofa o le filemu.
O le mea e faanoanoa ai, ua tatou lagonaina uma le tiga pe afai o fanau na tausia e ni matua musuia—o nisi taimi e na’o se matua e toatasi—ua filifili, i le mavae ai o se olaga atoa o le faatuatua ma le filemu, e ui i le ala o le faanoanoa.
E tusa lava pe tupu lena faanoanoa, e taoto lava lo’u talitonuga o le a lelei mea uma i se isi meaalofa mai le Alii. O le mea lenei: Na te faatutuina a’e ni faatupu filemu se toatele i Ona soo faatuatuaina. Ua latou lagonaina le filemu ma le alofa o le Atua. Ua i ai le Agaga Paia i o latou loto, ma e mafai ona taiala i latou e le Alii ia aapa atu i le mamoe ua se.
Ua ou vaai i ai i lo’u olaga ma i le salafa o le lalolagi. Ua outou vaai foi i ai. E i ai taimi, ina ua taitaiina atu oe i le laveai, e foliga mai e faafuaseia.
Sa i ai se taimi, sa na ona ou fesili ai i se tasi sa ou fetaui ai i se malaga, “E mafai ona e faamatala mai sina mea e uiga i lou aiga?” O le talanoaga na oo ina ou fai atu i ai sei ou vaai i se ata o lana tama teine matua, o lē sa ia fai mai o loo tauivi. Sa ou maofa i le agalelei i foliga o lena teineitiiti i le ata. Sa uunaia au e fesili pe mafai ona aumai lana tuatusi imeli. O le afafine i lena taimi sa leiloa ma sa taumanatunatu pe na i ai se savali a le Atua mo ia. Sa i ai. O le savali lenei: “E alofa le Alii ia te oe. Na Ia alofa lava e le aunoa. E finagalo le Alii e te foi mai. O loo i ai lava ou faamanuiaga folafolaina.”
Ua lagona e tagata o le au paia i le Ekalesia aoao le meaalofa a le Alii o le filemu patino. Ua ia uunaia tagata uma ia fesoasoani i isi ia maua avanoa e toe o mai ai ia te Ia ma ia agavaa mo lena lava filemu mo i latou lava. Ma, o le mea e sosoo ai, o le a latou filifili e saili musumusuga ina ia iloa ai le ala e mafai ona latou tufa atu ai lena meaalofa i isi.
O lenei tupulaga faia’e o le a avea ma faafailele o tupulaga e mulimuli mai. O le aafiaga faateleina o le a tulai mai ai se vavega. O le a salalau ma tuputupu ae i le aluga o taimi, ma o le a tapena ma saunia le malo o le Atua i luga o le fogaeleele e faafeiloai o Ia ma alalaga o le osana. O le a i ai le filemu i le lalolagi.
E tuuina atu la’u molimau mautinoa o loo soifua le Faaola ma o loo Ia taitaia lenei Ekalesia. Sa ou lagonaina Lona alofa i lo’u olaga ma Lona alofa ma le popole mo fanau uma a le Tama Faalelagi. O le valaaulia a le Faaola e o mai ia te Ia o se ofo o le filemu.
O Peresitene Russell M. Nelson o le perofeta soifua a le Atua i le lalolagi atoa. Na ia saunoa mai, “Ou te tuu atu ia te outou la’u faamautinoaga e faapea, e ui lava i le tulaga o le lalolagi ma ou tulaga patino, e mafai ona e faasaga atu i le lumanai ma le talitonu o le a lelei mea uma ma le olioli.”6
E faailoa atu lo’u alofa ia te outou. O lo outou faatuatua ma le alofa maoae ua oo atu i tagata ma mafai ai e le Alii ona suia loto ma faapea ona maua ai se manao e ofo atu i isi le meaalofa o le filemu lea e silisili lava i mea uma e manatu i ai.
Ou te tatalo ina ia outou maua le filemu, fesoasoani i ni tagata e toatele ina ia mauaina, ma ia faasoa atu. O le a i ai ni tausaga matagofie e afe o le filemu pe a toe afio mai le Alii. Ou te molimau atu ai i le suafa o Iesu Keriso, amene.