O Se Leo o le Fiafia!
O le fausiaina o malumalu o se tasi lea o faamuamua aupito maualuga o perofeta uma talu mai le Perofeta o Iosefa Samita.
“O lenei, o le a le mea ua tatou faalogo i ai i le talalelei ua tatou maua? O se leo o le fiafia! O se leo o le alofa mutimutivale mai le lagi; ma o se leo o le upumoni mai le eleele;… o se leo o le fiafia mo e o ola ma e ua oti; o tala fiafia o le olioli tele.”1
Uso e ma tuafafine, e toetoe lava a le mafai ona logona upu nei mai le Perofeta o Iosefa Samita ma lē pa mai se ataata tele!
O le tala fiafia a Iosefa ua maua tonu ai le olioli atoatoa ma malualii o loo maua i le fuafuaga sili o le fiafia a le Atua lo tatou Tama Faalelagi, ona e pei ona Ia faamautinoa mai ia i tatou, “ua i ai tagata, ina ia latou maua le olioli.”2
Sa tatou alalaga uma i le olioli3 i lo tatou olaga i le muai olaga ina ua tatou faalogo i le fuafuaga o le fiafia a le Atua, ma faaauau pea ona tatou alalaga i le olioli iinei ao tatou ola e tusa ai ma Lana fuafuaga. Ae o le a tonu le tulaga mo lenei folafolaga fiafia mai le Perofeta? O le a se mea na faaosofiaina nei lagona loloto ma le faamaoni?
Sa aoao atu le Perofeta o Iosefa Samita e uiga i le papatisoga mo e ua maliliu. E moni lava o se faaaliga mamalu lenei na mauaina ma le olioli tele. O le taimi muamua na iloa ai e tagata o le Ekalesia e mafai ona latou papatiso mo e pele ia i latou ua maliliu, sa latou olioli. Na saunoa Uilifoti Uitilafi, “O le taimi na ou faalogo ai i ai, sa osooso lo’u agaga [mo] le olioli!”4
O le papatisoga mo e pele ia i tatou ua maliliu sa le na’o le pau lea o le upumoni o le a faaali ma toefuatai mai e le Alii. Sa tele isi meaalofa, po o faaeega, sa naunau le Atua e faaee mai i luga o Ona atalii ma afafine.
O isi nei meaalofa na aofia ai le pule o le perisitua, feagaiga ma sauniga, faaipoipoga o le a oo i le faavavau, o le faamauina o fanau i o latou matua i totonu o le aiga o le Atua, ma le mea tupito o le faamanuiaga o le toe foi atu i le aiga i le afioaga o le Atua lo tatou Tama Faalelagi ma Lona Alo, o Iesu Keriso. O nei faamanuiaga uma na mafai e ala mai i le Togiola a Iesu Keriso.
Ona na faitaulia e le Atua ia nei [faamanuiaga] faatasi ma Ana faamanuiaga aupito maualuluga ma aupito paia,5 ua Ia poloai mai ai ia atiae ni maota paia ia e mafai ona Ia faaee mai ai nei meaalofa faapelepele i luga o Ana fanau.6 O nei maota o le a avea ma Ona maota i luga o le fogaeleele. O nei maota o le a avea ma malumalu e faapea o mea ua faamaufaailogaina ai i luga o le fogaeleele i Lona suafa, e ala i Lana upu, ma i Lana pule o le a faamaufaailogaina i le lagi.7
I le avea ai ma tagata o le Ekalesia i aso nei, atonu e faigofie i nisi o i tatou le faia pei o le mea fua ia nei upumoni matagofie paia. Ua avea i latou ma natura lona lua ia i tatou. O nisi taimi e aoga pe a tatou vaai i ai e ala i fofoga o i latou o e aoao e uiga i ai mo le taimi muamua lava. Sa oo ina manino lelei lenei mea ia te au e ala i se aafiaga lata mai nei.
I le tausaga ua tea, i le latalata ai i le toe-faapaiaga o le Malumalu o Tokyo Iapani, sa toatele malo sa le o ni tagata o le tatou ekalesia sa maimoaina lena malumalu. O se tasi o na maimoaga na aofia ai se taitai faalelotu magafagafa o se isi ekalesia. Sa matou aoao atu la matou malo e uiga i le fuafuaga o le fiafia a le Tama Faalelagi, le matafaioi togiola a Iesu Keriso i lena fuafuaga, ma le aoaoga faavae e mafai ona faatasia aiga e faavavau e ala i le sauniga o faamauga.
I le faaiuga o le maimoaga, sa ou valaaulia la matou uo e faasoa mai ona lagona. E faatatau la i le tuufaatasia o aiga—i le tuanai, taimi nei, ma le lumanai—sa fesili mai ai lenei tamalii lelei ma le faamaoni a’ia’i, “Pe malamalama moni tagata o lo outou faatuatuaga i le maoae o lenei aoaoga faavae?” Sa ia faaopoopo mai, “Atonu e pau lava lea o le aoaoga e mafai ona soofaatasia lenei lalolagi ua matua mavaevae.”
Oka se matauga ina a mamana. Sa le’i uunaia lenei tamaalii i le na o le maoae o faiva alofilima o le malumalu, ae o le ma’eu ma le maoa’e o le aoaoga faavae faapea e tuufaatasia aiga ma noatia faatasi i le Tama Faalelagi ma Iesu Keriso e faavavau.8
E le tatau la ona tatou ofo ai, pe a faailoa mai e se tagata e le o se tasi o le tatou faatuatuaga le malualii o mea o loo tutupu i totonu o le malumalu. O mea e mafai ona avea ma mea ua tatou masani ai, po o faiga masani mo i tatou, e mafai ona vaaia i nisi taimi i lona maoae ma le malualii e i latou o e faatoa faalogo pe lagonaina mo le uluai taimi.
E ui na i ai lava malumalu i aso anamua, o le Toefuataiga o le talalelei a Iesu Keriso, o le fauina o malumalu o se tasi lea o faamuamua aupito maualuga a perofeta uma talu mai le Perofeta o Iosefa Samita. Ma e faigofie ona malamalama i le pogai.
Ina ua aoao mai le Perofeta o Iosefa Samita e uiga i le papatisoga mo e ua maliliu, sa ia faaalia mai foi se isi upumoni maoae. Sa ia aoao mai: “Tuu mai ia te aʼu e tauina atu ia te outou o mataupu autu nei e faatatau i e ua maliliu ma e o ola e lē mafai ona tatou ala māmā atu ai i luga, e faatatau i lo tatou olataga. Ona o lo latou olataga ua tatau ma taua tele mo lo tatou olataga, … e lē mafai ona faaatoatoaina o i latou e aunoa ma i tatou—pe mafai foi ona faaatoatoaina i tatou e aunoa ma o tatou tagata maliliu.”9
E pei ona tatou vaai i ai, o le manaomia o malumalu ma galuega o loo faia ai mo e o soifua ma e ua maliliu ua matua manino lava.
Ua nofo sauni foi le fili. Ua faamataʼuina lona mana e sauniga ma feagaiga e faia i totonu o malumalu, ma na te faia soo se mea na te mafaia e taumafai ai e taofi le galuega. Aisea? Aua ua ia iloa le mana lea e sau mai lenei galuega paia. A o faapaiaina malumalu taitasi, o le a faalautele atu le mana faaola o Iesu Keriso i le lalolagi atoa e faafetaiaia ai taumafaiga a le fili ma togiola ai i tatou a o tatou o mai ia te Ia. A o faatupulaia le aofai o malumalu ma tagata tausi feagaiga, o le a faasolo ina vaivai le fili.
I aso popofou o le Ekalesia, sa popole nisi pe a fofogaina se malumalu fou, ona latou te fai mai, “Tatou te le amata fauina se malumalu e aunoa ma le amata tatagi mai o logo o seoli.” Ae sa tali atu ma le lototele ia Polika Iaga, “Ou te fia faalogo i le latou toe tatagi mai.”10
I lenei olaga, o le a tatou le sao lava mai le taua, ae e mafai ona tatou maua le mana e faafetaui ai le fili. O lena mana ma le malosi e sau mai ia Iesu Keriso a o tatou osia ma tausia feagaiga o le malumalu.
Ua aoao mai Peresitene Russell M. Nelson: “O le a oo mai le taimi o le a vavae ese ai i latou e le usiusitai i le Alii mai ia i latou o e usitai. O lo tatou inisiua sili ona saogalemu o le faaauau pea ona agavaa mo le ulufale atu i Lona maota paia.”11
O nisi nei o faamanuiaga faaopoopo ua folafola mai e le Atua ia i tatou e ala mai i Lana perofeta.
E te manaomia ni vavega? Na saunoa mai lo tatou perofeta: “Ou te folafola atu ia te outou o le a aumai e le Alii ni vavega ua Ia silafia tou te manaomiaina a o outou faia ni osigataulaga e auauna atu ma tapuai atu i totonu o Ona malumalu.”12
E te manaomia le mana faamalolo ma le faamalosi o le Faaola o Iesu Keriso? E pei ona faamautinoa mai ia i tatou e Peresitene Nelson e faapea “o mea uma e aoaoina i totonu o le malumalu … [o le a] faateleina lo tatou malamalama ia Iesu Keriso. … A o tatou tausia a tatou feagaiga, Na te faaee mai ia i tatou Lona mana faamalolo ma faamalosiau. Ma ioe, oka so tatou manaomiaina o Lona mana i aso o i luma atu.”13
I le Aso Sa muamua o le Laupama, a o ulufale atu ma le manumalo Iesu Keriso i Ierusalema, sa olioli le anoano o [Ona soo] ma vivii atu i le Atua ma le leo tetele ma faapea atu, Ia manuia le Tupu o loo maliu mai i le suafa o le Alii.”14
E maeu le fetaui ma le Aso Sa o le Laupama o le 1836, sa faapaiaina ai le Malumalu o Katelani. I lena taimi na olioli ai foi le au soo o Iesu Keriso. I lena tatalo o le faapaiaga, na folafola atu ai e le Perofeta o Iosefa Samita nei upu o le viiga:
“E le Alii e le Atua Malosi Aoao, faafofoga mai ia te i matou … ma tali ia i matou mai le lagi, … i le mea o loo e afio ai i lou nofoalii, ma le mamalu, viiga, mana, malualii, [ma le] malosi. …
“… Fesoasoani mai ia te i matou i le mana o lou Agaga, ina ia matou tuufaatasi o matou leo ma i latou o serafi pupula ma susulu na o loo siomia ai lou nofoalii, ma alaga o viiga, o pepese atu Osana i le Atua ma le Tamai Mamoe!
“Ma ia tuu mai ia i latou nei … [ia] alalaga leotetele lau au paia i le olioli.”15
Uso e ma tuafafine, o le asō i lenei Aso Sa o le Laupama, i le avea ai ma ni soo o Iesu Keriso ia tatou vivii atu foi i lo tatou Atua paia ma olioli i Lona agalelei ia i tatou. “O le a le mea ua tatou faalogo i ai i le talalelei ua tatou maua?” E moni lava “o se leo o le fiafia!”16
Ou te molimau atu o le a faateleina ona outou lagonaina le olioli ao o outou ulu atu i malumalu paia o le Alii. Ou te molimau atu o le a outou lagona ai le olioli o loo i ai ia te Ia mo outou, i le suafa o Iesu Keriso, amene.