Faatuatuaina o le Mataupu Faavae a Keriso

Saunia e Elder Evan A. Schmutz

O Le Fitugafulu

Pe a tatou fauina o tatou fale i luga o le faavae o se sootaga faalefeagaiga ma Keriso, o loo tatou faatuatuaina le mataupu faavae a Keriso.

I lo’u mafaufau, ou te vaai atu i le perofeta toeaina o Nifae i lana kesi, ma papatusi auro o fofola i ona luma, ma lana penitusi i lona lima.

Sa i ai Nifae i le faagasologa o lana tusiga faai’u i talafaamaumau. Sa ia tusia, “Ma o lenei, oʼu uso pele e, ua ou faaiu aʼu upu.”¹ Ae le’i pine mulimuli ane, sa uuna’ia Nifae e le Agaga e toe foi i lana talafaamaumau ma tusia ai se savali faai’u. I lalo o le tosinaga mamana a le Agaga Paia, na toe tago ai lena perofeta maoae i lana penitusi ma tusia, “O le mea lea, o mea ua ou tusia, ua lava lea ia te au, vagana ai ni nai upu itiiti e tatau ona ou tautala atu ai … E tatau ona ou tautala atu e uiga i le mataupu faavae a Keriso.”²

E maeu lo tatou faafetai e faavavau mo na “upu itiiti”³ ma le Agaga na uunaia Nifae e tusia. O le galuega tusitusia aloa’ia a Nifae e uiga i le mataupu faavae a Keriso o se ‘oa taua ia i latou o ē taumamafa ai. O loo i ai se vaaiga mamao i le papatisoga o le Faaola⁴ ma le siufofoga o le Alo, o loo valaaulia ai tagata uma e mulimuli atu ia te Ia⁵ ma “faia mea ua [tatou] vaai ia te [Ia] o fai.”⁶ O loo i ai le molimau a Nifae faapea, o i latou o ē, salamo faamaoni ia latou agasala, ma le faatuatua ia Keriso, ma mulimuli i le Faaola i le vai papatiso o le a “maua le Agaga Paia; ioe, … le papatisoga o le afi ma le Agaga Paia.”⁷ Tatou te faalogoina le siufofoga o le Tama o loo molimau mai: “Ioe, ua tonu ma faamaoni upu a la’u Pele. O ia o lē e tumau e oo i le iuga, o ia lava lea o le a faaolaina.”⁸

Na faamamafa mai ai e Peresitene Russell M. Nelson se taua tulaga ese o le mataupu faavae a Keriso i le taimi o lana saunoaga i taitai misiona faatoa valaauina: “E sili atu i lo se isi lava mea, matou te mananao i o tatou faifeautalai … ia vaneina le mataupu faavae a Keriso i o latou loto—ia maua’a … i su o o latou ponaivi.”⁹

O leTala’i La’u Talalelei o loo aotele ai elemene taua e lima o le aoaoga faavae a Keriso. O loo faapea mai, “[Tatou te] valaaulia isi e o mai ia Keriso e ala i le fesoasoani atu ia i latou ia maua le talalelei toefuataiina e ala i le faatuatua ia Iesu Keriso ma Lana Togiola, salamo, papatisoga, mauaina o le meaalofa o le Agaga Paia, ma tumau e oo i le iuga.”¹⁰

Ae o le taua o le mataupu faavae a Keriso e le mo na o faifeautalai! Ma e sili atu le maoae nai lo le na o se aotelega faalua o ona elemene autu e lima. E aofia ai le tulafono o le talalelei. O le fuafuaga sili lea mo le ola e faavavau.

Uso e ma tuafafine, afai tatou te mananao e talia le valaaulia a Peresitene Nelson ia maua’a le mataupu faavae a Keriso i su o o tatou ponaivi, e tatau ona loloto lo tatou liua i le Alii e ala i le su’esu’e, tatalo, ola faamaoni ma le salamo faifai pea. E tatau ona tatou valaaulia le Agaga Paia e tusivane le mataupu faavae a Keriso i le “papa aano o o [tatou] loto”¹¹ ia matua o’oo’o ma tumau e faapei ona sa vaneina e Nifae i luga o papatusi auro.

Ia Oketopa talu ai, sa fesili ai Peresitene Nelson, “O le a le uiga o le manumalo i le lalolagi?” Faatasi ai ma isi mea, na ia saunoa “O lona uiga o le faatuatuaina o le mataupu faavae a Keriso e sili atu i lo filosofia o tagata.”¹²

O le upu faatuatuaina ua faauigaina “o se faalagolago mautinoa lea i le uiga, tomai, malosiaga, po o le moni o se tasi po o se mea.”¹³ O lena se tasi o Iesu Keriso, ma o lena mea o Lana mataupu lea.

E faapefea e le faatuatuaina ma le loto i ai o le mataupu faavae a Keriso ona suia le ala tatou te ola ai i o tatou olaga?

Afai tatou te faatuatuaina le mataupu faavae a Keriso, o le a lava lo tatou talitonuina o Keriso e ola ai i Ana afioga uma.¹⁴ O le a tatou faia se suesuega i le olaga atoa o Iesu Keriso,¹⁵ o Lana galuega, o Ana aoaoga, ma Lana Togiola e le iu, e aofia ai Lona Toetu mamalu. O le a tatou suesueina Ana folafolaga ma tulaga o loo tuuina mai ai Ana folafolaga.¹⁶ A o tatou suesueina, o le a faatumulia i tatou i le alofa sili atu mo le Alii.

Afai tatou te faatuatuaina le mataupu faavae a Keriso, o le a tatou o atu i tatou Tama Faalelagi i aso uma i tatalo faamaualalo, faalilolilo, lea e mafai ona tatou faaali atu ai le lotofaafetai mo le meaalofa o Lona Alo ma mo o tatou faamanuiaga uma.¹⁷ E mafai ona tatou tatalo mo le mafutaga faafaaaliga a le Agaga Paia,¹⁸ tatalo ia faaogatusa o tatou loto ma Lona,¹⁹ tatalo e manatunatu ai i a tatou feagaiga ma faafou a tatou tautinoga e tausi feagaiga.²⁰ E mafai ona tatou tatalo e lagolago ma faaali atu le alofa mo o tatou perofeta, tagatavaai, ma talifaaaliga;²¹ tatalo mo le mana faamama o le faamagaloga;²² ma tatalo mo le malosi e tetee atu ai i faaosoosoga.²³ Ou te valaaulia outou ia avea le tatalo o se faamuamua i lou olaga, saili i aso taitasi e faaleleia atili a outou fesootaiga ma le Atua.

Afai tatou te faatuatuaina le mataupu faavae a Keriso, o le a tatou tuu ese mea fe’ilafi o le lalolagi ina ia mafai ai ona tatou taulai atu i le Togiola o le lalolagi.²⁴ O le a tatou faaitiitia pe le toe faaaluina se taimi i faasalalauga faaagafesootai; taaloga i le initoneti, faafiafiaga faamaimau taimi, soona fai, pe le talafeagai; o le faatosina o ‘oa o lenei lalolagi ma mea lē aoga; ma soo se gaoioiga e tauala mai ai tumasani sesē ma filosofia taufaasese a tagata. Ua na o Keriso lava tatou te maua ai le upumoni ma le faamalieina e tumau.

O le salamo faamaoni²⁵ o le a avea ma se vaega fiafia²⁶ o o tatou olaga—ina ia faamagaloina mo agasala ma ia suia i le faatusa o Keriso.²⁷ O le salamo ma le faatuatua ia Keriso tatou te maua ai le Togiola a Keriso. Na aoao mai Peresitene Dallin H. Oaks e faapea pe a faamagalo e le Faaola, Na Te “faia ma isi mea nai lo le na ona faamamaina o i [tatou] mai le agasala. Na Te aumaia foi ia i tatou se malosiaga fou.”²⁸ E manaomia e i tatou taitoatasi lenei malosi e tausi ai poloaiga a le Atua ma faataunuu ai le faamoemoega e faavavau o o tatou olaga.

Ia Iesu ma i Lana mataupu faavae, tatou te maua ai le malosi. Na Ia fetalai, “E moni, e moni, ou te fai atu ia te outou, o la’u mataupu lenei, ma o soo se tasi e atiae i luga o lenei mataupu ua atia’e i luga o la’u papa, ma o le a le manumalo faitotoa o seoli e faasaga ia te i latou.”²⁹

Ua tatou vaaia le faataunuuina o lenei folafolaga i olaga o tagata faamaoni. Ua silia teisi se tausaga talu ai sa ou feiloai ai ia Travis ma Kacie. Sa faaipoipo faalemalo i la’ua i le 2007. I le taimi lena, e le o se tagata o le Ekalesia ia Travis. O Kacie, e ui ina sa ola a’e i se aiga toaaga o le Au Paia o Aso e Gata Ai, sa le’i toe ola o ia i lona faatuatuaga i lona talavou ma sa sē ese mai lona faavae.

I le 2018, sa feiloai ai Travis ma faifeautalai ma sa papatiso ai o ia i le 2019. Sa avea Travis o se faifeautalai ia Kacie, o lē sa oo foi ina liua mo le olaga atoa. Na faamauina i laua i le malumalu ia Setema 2020. Pe tusa o le lua tausaga ina ua uma ona papatiso, sa valaau ai Travis e galue i le au epikopo.

Sa i ai ia Travis se faama’i uiga ese lea na tutupu mai ai ni potopotoi o patu i ona totoga i totonu. Sa fai ona mau taotoga e aveese ai patu sa tulioso mai pea, ae e lē mafai ona fo’ia le faama’i. I ni nai tausaga talu ai, sa le atoa se 10 tausaga na tuuina atu ia Travis e ola ai.

O Kacie sa faaletonu ’afu’afu lanu o mata, o se faama’i e sosolo i le toto ma e lē taatele, e lē matogafitia foi ma e afua ai ona pūiti le vaaiga seia i’u ai lava ina po le vaai.

Sa talanoa mai Kacie ia te a’u e uiga i lona lumanai. Sa faatalitali o ia i le taimi, e le o toe mamao, o le taimi o le a oti ai lana tane, tauaso, leai se mea e lagolago ai o ia i mea tautupe, ma tuua ai na o ia e tausia le fanau ua faasolo matutua. Sa ou fesili ia Kacie pe mafai faapefea ona ia taulimaina sea ituaiga lumanai e foliga ua leai se faamoemoe. Sa ataata ma le toafimalie ma fai mai, “E le’i i ai se taimi na sili ai ona ou fiafia pe sili ona mau ai le faamoemoe i lo’u olaga. Matou te taofimau i folafolaga sa matou maua i le malumalu.”

Ua epikopo nei Travis. Lua masina talu ai, sa faia ai foi se isi ona ta’otoga tele. Ae o la lava e tumu i le faamoemoe ma le toafilemu. Ua atili ona leaga le vaaiga a Kacie. Ua i ai nei sana ta’ifau tomai e ta’ita’ia o ia ae e le mafai ona avetaavale. Ae o la e fiafia o ia, tausi lana fanau ma galue o se fesoasoani i le au peresitene o Tamaitai Talavou.

Sa fausia e Travis ma Kacie lo la’ua fale i luga o le papa. E faatuatuaina e Travis ma Kacie le mataupu faavae a Keriso ma le folafolaga faapea “o le a faapaiaina [e le Atua] [o latou] mafatiaga mo lo [latou] lelei.”³⁰ I le fuafuaga atoatoa a le Atua, o le puapuagatia ma le faatuatua ia Keriso e fesootai i lo tatou faaatoatoaina ia Keriso.³¹ Faapei o le tagata poto i le faataoto na fausia lona fale i luga o se papa,³² a to mai uaga, ma oo mai lologa, ma agi mai matagi, ma taia lena fale na fausia e Travis ma Kacie; ma sa le’i pa’ū lava, ona sa faavaeina i luga o se papa.³³

E le’i fetalai Iesu e uiga i le ono i ai o timuga ma lologa ma matagi i o tatou olaga; Na fetalai o Ia i le mautinoa o le a tula’i mai afa. O le fetuunaiga i lenei faataoto e le o le pe oo mai ni afa, ae o le pe faapefea ona tatou tali atu i Lana valaaulia ia faalogo ma faia mea sa Ia aoao mai.³⁴ E leai lava se isi auala e ola ai.

Pe a tatou fauina o tatou fale i luga o le faavae o se sootaga faalefeagaiga ma Keriso, o loo tatou faatuatuaina le mataupu faavae a Keriso, ma a o tatou o mai ia te Ia, ua tatou maua Lana folafolaga o le ola e faavavau. O tagata o ē faatuatuaina le mataupu faavae a Keriso e fetaomi atu i luma ma le tumau ia Keriso ma tumau e oo i le iuga. E leai lava se isi auala e faaolaina ai i le malo o le lagi.³⁵

Ou te tuuina atu la’u molimau patino e uiga i le moni toetu o Iesu Keriso soifua. Ou te molimau atu faapea aua ua alofa tele mai le Atua i le lalolagi na Ia auina mai ai Lona Alo e togiolaina i tatou mai le agasala³⁶ ma faamaloloina i tatou mai faanoanoaga.³⁷ Ou te molimau atu na Ia tofia se perofeta a le Atua i o tatou taimi, o Peresitene Russell M. Nelson, lea o loo Ia tulei i ai ma taialaina i tatou.

Faatasi ai ma lo’u loto atoa, ou te valaaulia outou e faatuatuaina le mataupu faavae a Keriso ma fausia o outou olaga i luga o le papa o le Togiola. Na te lē tuulafoaia lava oe. I le suafa o Iesu Keriso, amene.