“E Leai Se Mea e Faapea ona Silisili ona Logolelei ma Suamalie e Pei o Lo’u Olioli”
O le salamo i aso taitasi ma o mai ia Iesu Keriso o le ala lea e maua ai le olioli—olioli i talaatu o le mea tatou te mafaufauina.
I Lana galuega i le olaga nei, sa faaalia e le Faaola se mutimuti alofa tele mo fanau uma a le Atua—aemaise mo i latou o e sa pagatia pe ua pauu ese atu. Pe a faitioina e le au Faresaio mo le mafuta ai ma aai faatasi ma e agasala, sa tali atu Iesu e ala i le aoao atu o faataoto masani e tolu.1 I nei faataoto taitasi, sa Ia faamamafaina ai le taua o le sailia o i latou o e sa taase ma le olioli na lagonaina pe a latou toe foi mai. Mo se faataitaiga, i le faataoto i le mamoe na se, na Ia fetalai ai, “E tele le olioli i le lagi i le tagata agasala e toatasi e salamo.”2
O lo’u manao i le asō o le faamalosia o le sootaga i le va o le olioli ma le salamo—ae patino, i le olioli e maua mai pe a tatou salamo ma lagona o le olioli tatou te oo i ai pe a tatou valaaulia isi e o mai ia Keriso ma maua Lana taulaga togiola i o latou olaga.
Ua Tatou I Ai Ina Ia Tatou Maua le Olioli
I tusitusiga paia, o le upu olioli e matuai tele atu lona faauigaga nai lo taimi pupuu o le lotomalie po o lagona foi o le fiafia. O le olioli i le matalalaga lea o se uiga faaleatua, e maua i lona atoaga pe a tatou toe foi e mau i le afioaga o le Atua.3 E sili atu ona maoae, siitia, tumau, ma suia ai le olaga nai lo soo se mea faamalieloto po o le toafimalie e mafai ona ofo mai e le lalolagi.
Na foafoaina i tatou ina ia maua le olioli. O lo tatou taunuuga faamoemoeina o ni fanau a se Tama Faalelagi alofa. E finagalo o Ia e faasoa mai Lona olioli ma i tatou. Na aoao mai le perofeta o Liae e faapea o le fuafuaga a le Atua mo i tatou taitoatasi ia “tatou maua le olioli.”4 Ona ua tatou ola i se lalolagi pa’ū, e foliga mai ai o le olioli tumau po o le olioli faavavau e tatou te le āu i ai. Ae i le fuaiupu lava e sosoo ai, sa faaauau ai pea le faamatalaina e Liae e faapea, “na [afio mai] le Mesia … ina ia togiolaina [i tatou] mai le pa’ū.”5 O le togiolaina, e le Faaola o Iesu Keriso ma ala mai ia te Ia, ua mafai ai ona maua le olioli.
O le savali o le talalelei o se savali o le faamoemoe, o “le tala lelei o le olioli sili,”6 ma o le auala lea e mafai ai e tagata uma ona maua le filemu ma tulaga o le olioli i lenei olaga ma maua ai se atoaga o le olioli i le olaga a sau.7
O le olioli tatou te tautalagia o se meaalofa lea mo e faamaoni, ae e oo mai ma se totogi. E le taugofie le olioli pe tuuina mai foi faasamasamanoa. Ae, sa faatauina “i le toto taua o [Iesu] Keriso.”8 Afai tatou te malamalama lelei i le taua o le olioli moni, faaleatua, o le a tatou le faatuatuai e taulagaina soo se ‘oa o le lalolagi pe faia soo se suiga e tatau ai o le olaga ina ia maua ai.
Na malamalama se tupu mamana ae lotomaualalo i le Tusi a Mamona i lenei mea. “Se a ea se mea ou te faia,” na ia fesili ai, “ina ia fanauina a’u i la le Atua, ma ia aveeseina lenei agaga leaga ai lo’u fatafata, ia ou maua ai foi lona Agaga, ina ia faatumuina a’u i le olioli … ? Faauta, ua fai mai o ia, o le a ou tuu atu mea uma ua ou maua, ioe, o le a ou lafoai i lou malo, ina ia mafai ona ou maua lenei olioli tele.”9
I le tali atu i le fesili a le tupu, na fai atu ai le faifeautalai o Arona, “Afai ua e naunau i lenei mea, … e te ifo i lalo i luma o le Atua … [ma] salamo i au agasala uma.”10 O le salamo o le taunuuga o le olioli,11 aua o le ala lea e tau atu ai i le Faaola o Iesu Keriso.12
O Le Olioli e O’o Mai e ala i le Salamo Faamaoni
Mo nisi, a mafaufau i le salamo faapea o le ala i le olioli e foliga mai e fete’ena’i. O le salamo, i nisi taimi, e mafai ona tiga ma faigata. E manaomia ai le tausa’o atu faapea o nisi o o tatou mafaufauga ma faatinoga—e oo lava i nisi o o tatou talitonuga—e sese. O le salamo foi e manaomia ai le suiga, lea e mafai ona lē taugamalie i nisi o taimi. Ae o le olioli ma le to’afimalie e le tutusa. O le agasala—e aofia ai le agasala o lou lava faamalieina—e tuuitiitia ai lo tatou olioli.
E pei ona ta’ua e le faisalamo, “E afe ane le tagi i le afiafi, a o le alaga fiafia i le taeao.”13 A tatou salamo i a tatou agasala, e tatau ona tatou taula’i atu i le olioli sili e mulimuli mai ai. Atonu e uumi po, ae e oo mai lava le taeao, ma oi, oka se matagofie o le filemu ma le mamalu o le olioli tatou te lagonaina a o faasa’olotoina i tatou e le Togiola a le Faaola mai agasala ma mafatiaga.
E Leai Se Mea e Faapea ona Silisili ona Logolelei ma Suamalie
Mafaufau i le aafiaga o Alema i le Tusi a Mamona. “Sa falo tigaina [o ia] i le mafatia faavavau” ma o lona agaga foi sa “laga atuatuvale” ona o ana agasala. Peitai o le taimi lava na ia liliu atu ai i le Faaola mo le alofa mutimutivale, sa “le mafai ona ia toe manatua [ona] tiga.”14
Ma ʼoi, le olioli e,” na ia ta’utino mai ai, “ma le malamalama ofoofogia tele na ou vaaia; ioe, … e leai se mea e faapea ona silisili ona logoleleia ma suamalie e pei o lo’u olioli.”15
O le ituaiga olioli lea e maua e i latou o ē o mai ia Iesu Keriso e ala i le salamo.16 E pei ona aoao mai Peresitene Russell M. Nelson:
“E tatala e le salamo lo tatou faitotoa e maua ai le mana o le Togiola a Iesu Keriso. …
“A tatou filifili e salamo, ua tatou filifili e suia! Ua tatou faatagaina le Faaola e suia i tatou i o tatou lava ituaiga tagata silisili. Tatou te filifili e tuputupu a’e faaleagaga ma maua le olioli—le olioli o le togiolaina ia te Ia. Pe a tatou filifili e salamo, ua tatou filifili ia avea atili e faapei o Iesu Keriso!”17
O le salamo e aumaia ai le olioli aua e saunia ai o tatou loto e maua le tosinaga a le Agaga Paia. Ina ia faatumuina i le Agaga Paia o lona uiga ia faatumuina i le olioli. Ma ina ia faatumuina i le olioli o lona uiga ia faatumuina i le Agaga Paia.18 E faateleina lo tatou olioli a o tatou galulue i aso taitasi e aumaia le Agaga i o tatou olaga. E pei ona sa aoao mai e le perofeta o Mamona, “E ui o lea sa latou anapopogi ma tatalo soo, ma sa faasolo malolosi ma atili malolosi ai i lo [latou] lotomaualalalo, ma mausali ma atili mausali ai i le faatuatua [ia] Keriso, seia oo ina faatutumuina o latou agaga i le olioli ma le faamafanafanaga.”19 Ua folafola mai e le Alii ia i latou uma o ē galulue e mulimuli ia te Ia, “O le a ou faaali atu ia te oe ai lo’u Agaga, lea o le a faapupula ai lou mafaufau, lea o le a faatumulia ai lou agaga i le olioli.”20
O Le Olioli o le Fesoasoani i Isi ia Salamo
I le mavae ai o lo tatou lagonaina o le olioli lea e sau mai le salamo faamaoni, ua tatou mananao loa faalenatura e faasoa atu lena olioli i isi. Ma a oo ina tatou faia, e faateleina lo tatou olioli. O le mea tonu lena na tupu ia Alema.
“O lo’u mitamitaga lenei,” na ia fai mai ai, “atonu e avea a’u o se auupega i aao o le Atua e aumai ai se agaga i le salamo; ma o lo’u olioli lea.
“Ma faauta, a ou vaai atu i le toatele o ou uso ua salamo faamaoni, ma ua o mai i le Alii lo latou Atua, ona faatumulia lea o lou agaga i le olioli; ona ou manatua lea o mea na faia e le Alii mo au, … ioe, ona ou manatua lea o lona aao alofa mutimutivale na ia faaloaloa [mai] ia te au.”21
O le fesoasoani i isi ia salamo, o se faailoaga natura lea o lo tatou lotofaafetai i le Faaola, ma o se faapogai foi o le olioli tele. Ua folafola mai le Alii:
“Ma afai e faapea lua te … aumai, na o se agaga e toatasi ia te au, e matua tele lava lo oulua olioli faatasi ma ia i le malo o lo’u Tama!
“Ma o lenei, afai o le a tele lo oulua olioli faatasi ma se agaga e toatasi na oulua aumai ia te a’u … e matua tele atu lo oulua olioli pe afai lua te aumai ni agaga e toatele ia te a’u!”22
Ua Matua Tele Lava Lona Olioli i le Agaga e Salamo
Ua ou iloaina le aoga o le taumafai e vaai faalemafaufau i le olioli e lagonaina e le Faaola i taimi taitasi tatou te maua ai faamanuiaga o Lana taulaga togiola i o tatou olaga.23 E pei ona ta’ua e Peresitene Nelson,24 le Aposetolo o Paulo i lana tusi i tagata Eperu sa faasoa atu ai ona lagona faananau: “Ina tuu ese ia o, … agasala uma o faalavelavegofie ai i tatou, … ma vaavaai atu ia Iesu o le na te taitaiina ma faaatoatoaina lo tatou faatuatua; o lē ona o le olioli sa i ona luma na onosa’ia ai le satauro … ua nofo foi o ia i le itu taumatau o le nofoalii o le Atua.”25 E tele ona tatou talanoa i tiga ma mafatiaga i Ketesemane ma Kalevario, ae seāseā ona tatou talanoa i le olioli sili sa faamoemoe i ai le Faaola a o Ia ofoina atu Lona soifua mo i tatou. E manino, o Ona tiga ma Ona mafatiaga sa faia mo i tatou, ina ia mafai ai ona tatou maua le olioli o le toefoi atu faatasi ma Ia i le afioaga o le Atua.
Ina ua mae’a ona aoao atu tagata Amerika anamua, sa faailoa atu e le Faaola Lona alofa tele mo i latou i le fetalai atu:
“O lenei, faauta, ua tele lo’u olioli, ua oo lava ina atoa, ona o outou … ; ioe, e oo lava i le Tama ua olioli, ma faapea foi agelu paia …
“… Ia te [outou] ua i ai se atoatoaga o le olioli.”26
O mai ia Keriso ma Maua Lona Olioli
Uso e ma tuafafine, ou te faaiu atu i le faasoa atu o la’u molimau patino, lea ou te manatu i ai o se meaalofa paia. Ou te molimau atu o Iesu Keriso o le Faaola ma le Togiola o le lalolagi. Ou te iloa e alofa o Ia ia i tatou taitoatasi. O Lana tulimata’iga autu, o Lana “galuega ma [Lona] mamalu,”27 o le fesoasoani lea ia tatou maua se atoaga o le olioli ia te Ia. O a’u o se molimau patino faapea o le salamo i aso taitasi ma o mai ia Iesu Keriso o le ala lea e maua ai le olioli—olioli i talaatu o le mea tatou te mafaufauina.28 O le mafuaaga lena ua tatou i ai iinei i le lalolagi. O le mafuaaga lena na saunia ai e le Atua Lana fuafuaga sili o le fiafia mo i tatou. E moni lava o Iesu Keriso “o le ala moni lea, o le upumoni, ma le ola”29 ma na o le “pau foi lea o le igoa i lalo o le lagi e mafai ona faaolaina ai tagata i le malo o le Atua.”30 O lea ou te molimau atu ai i le suafa paia o Iesu Keriso, amene.