Tasi ia Keriso
Ua na o lo tatou faamaoni lava ma le alofa taitoatasi ia Iesu Keriso e mafai ai ona tatou faamoemoe ia tasi.
E pei ona ta’ua e Peresitene Dallin H. Oaks, o le asō o le Aso Sa o le Laupama, o le amataga o le Vaiaso Paia, e faailoga ai le ulufale mamalu atu o le Alii i Ierusalema, o Ona mafatiaga i Ketesemane ma le maliu i luga o le satauro i nai aso mulimuli ane, ma Lona Toetu mamalu i le Aso Sa o le Eseta. Inā tatou faia ia se faaiuga e le toe faagaloina lava le mea na onosa’ia e Keriso ina ia togiolaina ai i tatou.1 Ma ia aua lava ne’i galo ia i tatou le olioli lofituina o le a tatou toe lagonaina i le Eseta, a o tatou manatunatu i Lona manumalo i le tuugamau ma le meaalofa aoao o le toetutu.
O le afiafi a o lumanai faamasinoga ma le faasatauroga lea na faatalitali ia te Ia, sa i ai faatasi Iesu ma Ana Aposetolo i se tausamiga o le Paseka. I le faaiuga o le Tausamiga Mulimuli, i se Tatalo Faatoga paia, sa talosagaina ai e Iesu Lona Tama i upu nei: “Le Tama Paia e, ia e tausi ia i latou i lou suafa [o a’u Aposetolo] o e na e foai mai ia te au, ina ia tasi o i latou faapei o i ta’ua.”2
Ona faaopoopo atu lea ma le agavaivai, e le Faaola o Lana talosaga ia aofia ai i latou uma o e talitonu:
“E le faapito la’u tatalo mo i latou nei, a o i latou foi e faatuatua ia te au ona o la latou upu;
“Ina ia tasi i latou uma, faapei o oe le Tama o i totonu ia te au, o au foi o i totonu ia te oe, ina ia tasi i latou i totonu ia te i taua.”3
O le avea ia tasi o se autu faifaipea i le talalelei a Iesu Keriso ma i feutaga’iga a le Atua ma Ana fanau. Ma le faaaloalo i le aai o Siona i ona po o Enoka, o loo faapea mai ai “sa tasi o latou loto ma tasi le mafaufau.”4 Na tusia i le Feagaiga Fou e uiga i uluai Au Paia o le Ekalesia anamua a Iesu Keriso, “O le toatele o i latou o e na talitonu na tasi le loto ma tasi le agaga.”5
I la tatou lava tisipenisione, sa apoapoai mai ai le Alii, “Ou te fai atu ia te outou, ia tasi outou; ma afai tou te le tasi e le a a’u outou.”6 O se tasi o le mau pogai na tuuina mai e le Alii i le mafuaaga na le mafai ai e uluai Au Paia i Misuri ona faatuina se nofoaga o Siona e faapea, latou te “le’i autasi e tusa ai ma le lotogatasi e moomia e le tulafono o le malo selesitila.”7
Pe a manumalo le Atua i loto ma mafaufau uma, ua faamatalaina tagata “ua tasi i latou, o le fanau a Keriso.”8
Ina ua faaali atu le Faaola toetu i tagata anamua o le Tusi a Mamona, sa Ia matauina ma le lē taliaina faapea i le taimi ua tuanai sa i ai fefinauaiga i tagata e uiga i le papatisoga ma isi mataupu. Sa Ia poloaiina:
“Ia aua nei i ai ni finauga i totonu ia te outou, e pei ona sa i ai e oo mai i le taimi nei; pe i ai foi ni finauga i totonu ia te outou e uiga i matautu o la’u mataupu, e pei ona sa i ai e oo mai i le taimi nei.
“Aua e moni, e moni, ou te fai atu ia te outou, o le e i ai le agaga o le finauga ua le mai ia te au o ia, ae ua mai le tiapolo ia, o lē o le tamā o le finauga.”9
I lo tatou lalolagi ua matuai fefinauai lava, e mafai faapefea ona ausia le lotogatasi, ae maise lava i le Ekalesia lea e tatau ona i ai lo tatou “tasi le Alii, tasi le faatuatua, tasi le papatisoga”?10Ua tuuina mai e Paulo le ki:
“Aua o outou uma lava ua papatisoina ia Keriso, ua outou oofu ia Keriso.
“E le o i ai se Iutaia po o se Eleni, e le o i ai se pologa po o se saoloto, e le o i ai se tane po o se fafine, aua ua tasi lava outou uma ia Keriso Iesu.”11
Ua tatou matua’i valaeseese lava i tatou ma ua i ai foi taimi e matua’i leai se fealofani e mafai ai ona o mai faatasi ia tasi i soo se mea po o lalo o se isi igoa. E na o Iesu Keriso lava e mafai ai ona tasi i tatou.
E tupu le tasi ia Keriso i lea tasi ma lea tasi---tatou te taitasi ma amata ia i tatou lava. O i tatou o ni tagata itūlua o le tino ma le agaga ma o nisi taimi tatou te fetaua’i ai lava i tatou i totonu. E pei ona ta’ua e Paulo:
“Aua ou te fiafia i le tulafono a le Atua e tusa ma le tagata i totonu;
“Ae ua ou vaai i se isi tulafono [i] itutino [o lo’u tino], ua fetauai oʼu itutino e tetee i le tulafono a loʼu mafaufau, ma aumaia ai aʼu i le nofopologa i le tulafono o le agasala lea o loʼo i ai i vaega o loʼu itutino.”12
O Iesu foi o se tagata o le tino ma le agaga. Sa tofotofoina o Ia; e malamalama o Ia; e mafai ona fesoasoani o Ia ia i tatou e ausia le lotogatasi i totonu.13 O le mea lea, o le utuvai mai le malamalama ma le alofa tunoa o Keriso, tatou te taumafai ai e tuu atu i o tatou agaga— ma le Agaga Paia ia manumalo i le faaletino. Ma a oo ina tatou vaivai, ua tuuina mai ia i tatou e Keriso, e ala i Lana Togiola, le meaalofa o le salamo ma le avanoa e toe taumafai ai.
Afai tatou te taitasi ma “ofuina Keriso,” ona mafai lea faatasi ona tatou faamoemoe ia tasi, e pei ona fai mai Paulo, “o le tino o Keriso.”14 O le “ofuina o Keriso” e aofia moni ai lava ma le avea o Lana “poloaiga muamua ma le sili”15 o la tatou foi tautinoga muamua ma le aupito sili, ma afai tatou te alolofa i le Atua, o le a tatou tausia Ana poloaiga.16
O le tutu faatasi ma o tatou uso ma tuafafine i le tino o Keriso e faatupula’ia pe a tatou gauai atu i le poloaiga lona lua—e fesootai lelei i le muamua—ia alolofa atu i isi e faapei o i tatou lava.17 Ma ou te manatu foi o le a maua e i tatou se lotogatasi atoatoa e sili atu pe afai tatou te mulimuli i le faailoaga maualuga atu ma le pa’ia o lenei poloaiga lona lua—ia alofa le tasi i le isi e le gata e pei ona tatou alolofa ia i tatou lava, ae faapei ona Ia alofa mai ia i tatou.18 I lona aotelega, “e saili e tagata taitoatasi le lelei o lē la te tuaoi, ma faia mea uma ma le manatu tasi i le mamalu o le Atua.”19
I le faamalamalamaina e Peresitene Marion G. Romney, o se sa fesoasoani i le Au Peresitene Sili, le auala e maua ai le filemu tumau ma le lotogatasi, na saunoa ai:
“Afai o se tagata e toatasi, e gauai atu ia Satani, e faatumulia i galuega a le tino, e fetaua’i foi o ia ma ia lava i totonu. Afai e gauai atu se toalua, la te fetaua’i i totonu o i la’ua lava ma taua’ifusu ma le tasi ma le isi. Afai e gauai atu le toatele, e [maua] e se sosaiete le seleselega o le popolevale tele ma finauga. Afai e gauai atu taitai o se atunuu, e i ai le finauga i le lalolagi atoa.”
Na faaauau mai Peresitene Romney: “E faapei ona mafai ona aafia ai le lalolagi atoa i galuega a le tino ua faapea foi le talalelei o le filemu. A faapea ona ola se tasi e tusa ma le talalelei o le a faalogoina e ia le toafilemu i totonu ia te ia. A faapea o le a ola ni tagata se toalua, o le a faapea foi ona faalogoina e i laua le toafilemu i totonu ia te i laua ma i le va o le tasi ma le tasi. Afai o le a ola tagatanuu i le talalelei, o le a i ai le filemu i totonu o lea atunuu. A oo ina lava atunuu o le a ola e tusa ai ma fua o le Agaga e pulea ai mataupu i le va ma isi malo o le lalolagi, o le a le toe i ai ni taua i le lalolagi. … (Tagai Alfred Lord Tennyson, ‘Locksley Hall,’ The Complete Poetical Works of Tennyson, ed. W. J. Rolfe, Boston: Houghton-Mifflin Co., 1898, p. 93, lines 27–28.)”20
Pe a tatou “ofuina Keriso,” e mafai ona foia pe lafoa’i eseesega, feeseesea’iga, ma maseiga. O se faataitaiga maoae o le faatoilaloina o fevaevaea’iga o loo maua i le talafaasolopito o la tatou Ekalesia. Na soifua mai Elder Brigham Henry Roberts (e masani ona lauiloa ia B. H. Roberts), i Egelani i le 1857, sa avea o se tasi o le Aufono Muamua o Fitugafulu—lea ua tatou faasino i ai i aso nei o le Au Peresitene o Fitugafulu. O Elder Roberts o se puipui malosi ma le le faavaivai o le talalelei toefuataiina ma le Ekalesia i nisi o ona taimi sili ona faigata.
Peitai, i le 1895, sa ponatia ai le auaunaga a Elder Robert i le Ekalesia ona o finauga. Sa tofia B. H. o se sui i le tauaofiaga lea na tusia ai se faavae mo Iuta ina ua avea ma setete. Mulimuli ane, na ia filifili e avea ma se sui tauva mo le Konekeresi a le Iunaite Setete ae le’i faailoa atu pe sailia foi se faatagaga mai le Au Peresitene Sili. Na faitioina e Peresitene Iosefa F. Samita, o se fesoasoani i le Au Peresitene Sili ia B. H. mo lona le’i faailoaina atu i se sauniga aofai a le au perisitua o le siteki. Sa faia’ina Elder Roberts i le palota ma sa lagonaina o le tele o lona toilalo na mafua ona o se vaega o saunoaga a Peresitene Samita. Sa faitio o ia i taitai o le Ekalesia i nisi o lauga faapolotiki ma faatalanoaga. Sa faase’etuāgalu mai le toaga i le galuega a le Ekalesia. I se fonotaga umi i le Malumalu o Sate Leki ma uso o le Au Peresitene Sili ma le Aufono a le Toasefululua, sa faama’a’a pea B. H. i le ta’uamiotonuina o ia lava. Mulimuli ane, “na tuuina atu ai e Peresitene [Uilifoti] Uitilafi ia [Elder Roberts] le tolu vaiaso e toe mafaufau ai i lona tulaga. Afai e tumau pea lona lē salamo, o le a latou faamalolo o ia mai le avea ai ma Fitugafulu.”21
I se fonotaga patino na sosoo ai ma Aposetolo Heber J. Grant ma Francis Lyman, sa mua’i lē gauai atu B.H. peitai o le alofa ma le Agaga Paia na iu ina manumalo. Na maligi ona loimata. Sa mafai e Aposetolo e toalua ona tali atu i lape ma faatiga na vaaia, ia na popole ai B. H., ma sa latou tuumuli ma se ‘aioiga mai le loto mo se faaleleiga. O le taeao na sosoo ai, i le mavae ai o se tatalo umi, na auina atu ai e Elder Roberts se feau ia Elders Grant ma Lyman ua saunia o ia e toetuufaatasia ma ona uso.22
Ina ua feiloai o ia mulimuli ane ma le Au Peresitene Sili, sa saunoa Elder Roberts, “Sa ou alu i le Alii ma sa ou maua mai ai se malamalama ma se faatonuga e ala mai le Agaga Paia ia ou gaua’i atu i le pule a le Atua.”23 I le faaosofia ai e lona alofa i le Atua, sa tumau B.H. Roberts o se taitai faamaoni ma le malosi o le Ekalesia seia iu lona soifua.24
E mafai foi ona tatou vaaia i lenei faataitaiga o le lotogatasi e le faapea e na o le ioe e ao i tagata uma ona faia lona lava loto pe alu i lona lava ala. E le mafai ona tasi i tatou sei vagana ua lolo’u uma a tatou taumafaiga i le faamoemoega e tasi. O lona uiga, i upu a B.H. Roberts, gauai atu i le pule a le Atua. O i tatou o itutino eseese o le tino o Keriso, e faataunuuina galuega eseese i taimi eseese—o le taliga, o le mata, o le ulu, o le lima, o vae—ae o itutino uma o le tino e tasi.25 O le mea lea, o la tatou sini o le “ia le i ai i le tino se maseiga, a ia fetausiai faatasi uma itu tino.”26
O le lotogatasi e le manaomia ai le tutusa, ae e manaomia ai le ogatusa. E mafai ona lalagaina faatasi o tatou loto i le alofa, ia tasi i le faatuatua ma le aoaoga faavae, ma mafai lava ona tapuai mo ni ‘au eseese, feeseesea’i i mataupu faapolotiki, felafolafoa’i e uiga i sini ma le ala sa’o e ausia ai, ma le tele o isi mea faapena. Ae e le mafai lava ona tatou feeseesea’i pe finau ma le ita po o le inoino o le tasi i le isi. Na fetalai mai le Faaola:
“Aua e moni, e moni, ou te fai atu ia te outou, o le e i ai le agaga o le finauga ua le mai ia te au o ia, ae ua mai le tiapolo ia, o le tamā o le finauga, ma ua faaoso e ia loto o tagata ia fefinauai ma le ita, o le tasi i le isi.
“Faauta, e le o lau mataupu lea, le faaoso o loto o tagata i le ita, o le tasi e faasaga i le isi; ae o lau mataupu lenei, ia aveesea mea faapena.”27
I le tausaga talu ai, sa aioi mai ai Peresitene Russell M. Nelson ia i tatou i upu nei: “E leai ma se tasi o i tatou e mafai ona puleaina malo po o amioga a isi e oo lava i tagata o o tatou lava aiga. Ae e mafai ona tatou puleaina i tatou lava. O la’u valaau i le asō, o’u uso e ma tuafafine pele, o le faamutaina lea o fetauaiga o loo sasao i totonu o lou loto, lou aiga, ma lou olaga. Tanu soo se faufauga ma faufauga uma e faamanua isi—pe o na faufauga o se maitaitagofie, se laulaufaiva maai, po o se lototiga i se tasi ua ia faatiga ia te oe. Sa poloaiina i tatou e le Faaola ia liliu atu le isi alafau [tagai 3 Nifae 12:39], ia alolofa i o tatou fili, ma ia tatalo mo i latou e tuua’ifuaina i tatou [tagai 3 Nifae 12:44].”28
Ou te toe fai atu ua na o lo tatou tuuto faamaoni lava ma le alofa ia Iesu Keriso e mafai ai ona tatou faamoemoe ia tasi—tasi i totonu, tasi i le aiga, tasi i le Ekalesia, ma i’u ai ina tasi i Siona, ma e sili atu i mea uma, tasi ma le Tama ma le Alo ma le Agaga Paia.
Se’i ou toe foi i le Vaiaso Paia ma le manumalo silisili o lo tatou Togiola. O le Toetu o Iesu Keriso ua molimauina ai Lona paia ma ua Ia faatoilaloina mea uma. O Lona Toetu ua molimauina ai faapea, o le noatia ia te Ia i feagaiga, e mafai ai foi e i tatou ona faatoilaloina mea uma ma tasi ai. O Lona Toetu ua molimauina ai e ala mai ia te Ia, o le tino ola pea ma le ola e faavavau o ni mea moni.
O le taeao nei, ou te molimau atu i Lona Toetu moni mai, ma mea uma e faatatau i ai, i le suafa o Iesu Keriso, amene.