‟3–9 Fepuari: ‘O Le Agaga Lenei o Faaaliga’: Mataupu Faavae ma Feagaiga 6–9,” Sau, Mulimuli Mai ia te A’u—Mo le Aiga ma le Ekalesia: Mataupu Faavae ma Feagaiga 2025 (2025)

‟Mataupu Faavae ma Feagaiga 6–9,” Sau, Mulimuli Mai ia te A’u—Mo le Aiga ma le Ekalesia: 2025

3–9 Fepuari: “O Le Agaga Lenei o Faaaliga”

Mataupu Faavae ma Feagaiga 6–9

I le tautoulu o le 1828, sa faia ai e se faiaoga talavou e igoa ia Oliva Kaotui se galuega faafaiaoga i Manaseta, Niu Ioka, ma nonofo faatasi ai ma le aiga o Lusi ma Iosefa Samita le Matua. Sa faalogo Oliva e uiga i lo la atalii o Iosefa ma ona aafiaga ofoofogia, ma o Oliva, o lē sa manatu ia te ia lava o se tagata saili i le upumoni, sa fia iloa atili. Ua faamatalaina e le au Samita asiasiga a agelu, se faamaumauga anamua, ma le meaalofa e faaliliu ai e ala i le mana o le Atua. Na maofa Oliva. Faamata e moni? Na tuuina atu i ai e Lusi ma Iosefa le Matua, le fautuaga e faatatau i soo se tasi o saili i le mea moni: tatalo ma fesili atu i le Alii.

Sa faia e Oliva, ma sa tali mai le Alii, ma fetalai mai ‟le filemu i lona mafaufau” (Mataupu Faavae ma Feagaiga 6:23). O faaaliga, na iloa e Oliva, e le mo na o perofeta e pei o Iosefa Samita. E mo soo se tasi e manao i ai ma sailia ma le filiga. Sa tele pea mea sa tatau ona aoaoina e Oliva, ae sa lava mea na ia iloa e fai ai le isi ana laa. Na ia iloa sa faia e le Alii se mea taua e ala atu ia Iosefa Samita, ma na mana’o Oliva ia i ai o ia.

Tagai foi i le Au Paia, 1:58–64; ‟Days of Harmony” (vitiō), Gospel Library.

Aso o le Filemu
Molimau i le aafiaga o Oliva Kaotui ao avea o se tusiupu ia Iosefa Samita i le faaliliuga o le Tusi a Mamona.

Manatu mo le Aoaoina i le Aiga ma i le Lotu

Mataupu Faavae ma Feagaiga 6; 8–9

E fetalai mai le Tama Faalelagi ia te a’u e ala i le Agaga Paia.

I le tautotogo o le 1829, sa volenitia ai Oliva Kaotui e avea ma tusiupu a Iosefa Samita a o faaauau pea ona ia faaliliuina le Tusi a Mamona. Sa faagaeetia o ia e lea aafiaga, ma na ia manatunatu ai pe le mafai foi ona ia mauaina faaaliga ma le meaalofa e faaliliu ai. Ae ui i lea, o lana taumafaiga muamua lava, sa lei lelei.

Afai na e tauivi e maua pe malamalama i faaaliga, atonu e mafai ona e fesootai i le aafiaga o Oliva—ma aoao mai ai. A o e faitauina le Mataupu Faavae ma Feagaiga 6, 8, ma le9, maitau mea na aoao atu e le Alii ia Oliva e uiga i faaaliga faaletagata lava ia. Mo se faataitaiga:

O a mea o loo fautua mai i le Mataupu Faavae ma Feagaiga 6:5–7; 8:1; 9:7–8 e uiga i le mea o loo manaomia mai ia te oe e le Alii a o le’i faaalia mai Lona finagalo?
O le a se mea ua e aoaoina mai le Mataupu Faavae ma Feagaiga 6:14–17, 22–24; 8:2–3; 9:7–9 e uiga i ala eseese e ono oo mai ai faaaliga? E mafai faapefea ona e iloaina?
O a isi mea e te aoaoina e uiga i faaaliga mai nei vaega?

O aafiaga o Oliva e ono mafua ai ona e ‟mafaufau” i taimi na e lagonaina ai le fetalai mai o le Alii ia te oe (Mataupu Faavae ma Feagaiga 6:22). Pe ua e faamaumauina ea ou manatu po o lagona e uiga i nei aafiaga? Afai o lea, mafaufau e faitau mea na e tusia. Afai e leai, faaalu sina taimi e tusi ai i lalo mea e te manatua. Mafaufau pe mafai faapefea ona e faaauau pea ona maua le malosi mai nei aafiaga. Mo nisi manatu, tagai i le sāvali a Elder Neil L. Andersen “O Manatuaga Musuia Faaleagaga,” (Liahona, Me. 2020,18–22).

Ua faasoa mai e nisi o taitai o le Ekalesia o latou aafiaga i faaaliga i le aotelega o vitiō o le “Faalogo ia te Ia.” A uma ona matamata se tasi pe sili atu o nei vitiō, atonu e te lagona le musuia e tusifaamaumau ou lava aafiaga, ma faasoa atu le ala na fetalai mai ai le Alii ia te oe.

Tagai foi i Autu ma Fesili, ‟Faaaliga Faaletagata Lava Ia,” Gospel Library; “Meaalofa a Oliva Kaotui,” i le Revelations in Context, 15–19.

Mataupu Faavae ma Feagaiga 6:18–21, 29–37

Vaai atu ia Keriso i mafaufauga uma.

Sa silafia e le Alii o le a oo Iosefa Samita i ‟tulaga faigata” i tausaga a sau (Mataupu Faavae ma Feagaiga 6:18). Na te silafia foi tofotofoga i lou lumanai. O le a se mea e te maua i Lana fautuaga ia Iosefa ma Oliva i le Mataupu Faavae ma Feagaiga 6:18–21, 29–37 e fesoasoani e te faatuatuaina ai o Ia?

O le a sou lagona o le a le uiga o le “vaai mai ia [Keriso] i mafaufauga uma”? (fuaiupu 36). E mafai faapefea ona e faia pea lava pea lenei mea—i taimi lelei ma ‟ulaga faigata”? Mafaufau i le fautuaga lenei mai ia Peresitene Russell M. Nelson: ‟E malosi faalemafaufau le taumafai e vaai atu ia te Ia i mafaufauga uma . Ae a tatou faia, ona sosola ese lea o o tatou masalosaloga ma le fefefe” (“Mauaina o le Mana o Iesu Keriso i o Tatou Olaga,” Liahona, 41).

Tagai foi i le Neil L. Andersen, “Sa Maua Lo’u Mafaufau i Lenei Manatu ia Iesu Keriso,” Liahona, Me 2023, 91–94.

o se ata o le aao o le Faaola, ma se faailoga fao i Lana alofilima o loo matala — Faamatalaga o le Vaai i Lo’u Lima, saunia e Jeffrey Ward

Mataupu Faavae ma Feagaiga 6:29–37

“Aua le fefe e fai mea lelei.”

Aisea e i ai taimi tatou te “fefefe … e fai mea lelei”? (fuaiupu 33). O le a se mea e te maua i le Mataupu Faavae ma Feagaiga 6:29–37 e avatu ai ia te oe le lototele e fai ai mea lelei? Mafaufau e usu pe faalogologo i se viiga e musuia ai oe ia e maua le lototele ia Keriso, e pei o le “Fa’amalosi ia i le Galuega Nei” (Viiga, no. 152).

Mataupu Faavae ma Feagaiga 6–7; 9:3, 7–14

“E pei ona e manao mai ai ia te a’u, o le a faapea lava ona tuu atu ia te oe.”

Ia mātau le aofaiga o taimi o loo faaali mai ai upu e pei o le “manao” po o “manaoga” i totonu o le vaega 6 ma le 7. O a mea ua e aoaoina mai i nei vaega e uiga i le taua o loo tuu atu e le Alii i ou manaoga? Fesili ia te oe lava ia le fesili a le Alii i le Mataupu Faavae ma Feagaiga 7:1: “O le a le mea e te mana’o i ai?”

O se tasi o manaoga amiotonu a Oliva Kaotui—ia faaliliu e pei na faia e Iosefa Samita—e lei faataunuuina. A o e faitau i le Mataupu Faavae ma Feagaiga 9:3, 7–14, o a lagona uunai e te maua e ono fesoasoani ia te oe pe a le faataunuuina ou manaoga amiotonu mo le taimi nei?

Tagai foi i le Mataupu Faavae ma Feagaiga 11:8; Dallin H. Oaks, “Manao,” Liahona, Me 2011, 42–45.

Mo nisi manatu, tagai i lomiga o lenei masina o mekasini Liahona ma le Mo Le Malosi o le Autalavou .

Tagata, Nofoaga, Mea e Tutupu

Kiliki e vaai i isi mea

Fautuaga mo le Aoaoina o Tamaiti

Mataupu Faavae ma Feagaiga 6:5, 15–16, 22–23; 8:2; 9:7–9

E fetalai mai le Tama Faalelagi ia te a’u e ala i le Agaga Paia.

O upumoni na aoaoina e Oliva Kaotui e uiga i faaaliga faaletagata lava ia e mafai ona fesoasoani i lau fanau a o latou atiina a’e lo latou tomai e iloa ai le Agaga Paia. E mafai ona e faaaogaina le “Mataupu 5: Iosefa Samita ma Oliva Kaotui” (i le Tala o le Mataupu Faavae ma Feagaiga, 22–25, po o le vitiō e fesootai iai i le Gospel Library) e aoao ai i latou e uiga ia Oliva ma mea sa ia aoaoina. Faasoa atu i le tasi ma le isi vaega e sili ona e fiafia i ai o le tala. A o e faia, faamamafa atu mea na aoao atu e le Alii ia Oliva e uiga i le ala e faalogo ai i le siufofoga o le Atua, ma faitau fuaiupu talafeagai, e pei o le Mataupu Faavae ma Feagaiga 6:23 po o le 9:7–9.

2:49
Chapter 5: Joseph Smith and Oliver Cowdery: February–April 1829

Sa aoao Oliva Kaotui e uiga i faaaliga a o fesoasoani ia Iosefa Samita e faaliliu le Tusi a Mamona.
E mafai fo’i ona e valaauliaina lau fanau e paʻi i o latou ulu ma o latou fatafata ao e faitauina upu “mafaufau” ma le “loto” i totonu o le Mataupu Faavae ma Feagaiga 8:2. Ta’u atu i tamaiti, mai ou aafiaga, pe faape’i pe a talanoa le Agaga Paia i lou mafaufau ma lou loto. Fesoasoani ia i latou e sue tali i le fesili ‟E faapefea ona talanoa mai le Agaga Paia ia i tatou?” i fuaiupu nei: Mataupu Faavae ma Feagaiga 6:15–16, 22–23; 8:2; 9:7–9.

Faaaoga tala. O tala e fesoasoani i tamaiti ia malamalama ai i mataupu faavae o le talalelei aua latou te faaalia pe faapefea ona ola isi i nei mataupu faavae. A o e aoao atu, saili auala e faaaofia ai ni tala—mai tusitusiga paia, mai talafaasolopito o le Ekalesia, pe mai lou oe lava olaga—lea e faamatalaina ai aoaoga faavae o loo i totonu o tusitusiga paia.

Mataupu Faavae ma Feagaiga 6:34

Ona o Iesu Keriso, e mafai ai ona ou “le fefe.”

Na ta’u atu e le Alii ia Iosefa ma Oliva, ‟Aua le matatau, le lafu mamoe itiiti e” (Mataupu Faavae ma Feagaiga 6:34). E mafai ona e valaaulia lau fanau e toe fai faatasi ma oe lena fasifuaitau mo ni nai taimi. Atonu foi latou te fiafia e faafoliga i se lafu mamoe fefefe. O le a le mea e ono fefefe ai mamoe? Ona mafai lea e oe ma lau fanau ona tilotilo i se ata o le Faaola o se leoleo mamoe (o loo i ai se tasi i le faaiuga o lenei otootoga) ma talanoa e uiga i le auala o loo Ia leoleoina ai i tatou e pei vaai e se leoleo mamoe ia Ana mamoe.
Mafaufau e ta pe usu se pese e faatatau i le mauaina o le lototele ia Keriso, e pei o le “Ia Fai Le Mea Tonu,” (Tusipese a Tamaiti, 80) po o le “Fa‘amalosi ia i le Galuega Nei” (Viiga, nu. 152). O le a se mea o aoao mai e le pese e uiga i le ala e fesoasoani ai le Faaola ia i tatou ia aua nei fefefe?

Mataupu Faavae ma Feagaiga 6:36

E mafai ona ou vaai atu ia Iesu Keriso i mafaufauga uma.

A uma ona faitau faatasi le Mataupu Faavae ma Feagaiga 6:36, e mafai e oe ma lau fanau ona faia ni ata e fesoasoani ia te oe e manatua ai ia ‟vaai atu ia [Iesu Keriso] i mafaufauga uma.” Faasoa atu i le tasi ma le isi au ata, ma fesoasoani i lau fanau e mafaufau i ni nofoaga e mafai ona latou tuu ai ina ia latou vaai soo i ai.

Mo nisi manatu, tagai i le lomiga o lenei masina o le mekasini o le Uo .

O Keriso ma se lafu mamoe — O Ieova o Lo’u Leoleo Mamoe o Ia, saunia e Yongsung Kim