Go dirisa Tlayang, Ntshalang Morago—Ya Legae le Kereke

Didirisiwa tse ke tsa bo mang?

Didirisiwa tse ke tsa mongwe le mongwe yo o batlang go ithutuntsha Dithuto le Dikgolagano—ka bongwe, e le lelwapa, le mo tlelaseng ya Kereke. Fa o ise o thutuntshe dikwalo ka tlwaelesego mo dipakeng tse di fetileng, sedirisiwa se se ka go thusa go simolola. Fa o setse o na le mokgwa o montle wa go ithutuntsha lokwalo, sedirisiwa se se ka go thusa go nna le maitemogelo a a nang le bokao.

Batho le Malwapa kwa Gae

Lefelo le le siameng go ithuta efangele ke kwa gae. Morutuntshi wa gago kwa kerekeng o ka go tshegetsa, mme o ka bona kgothatso go tswa mo malokong a mangwe a kereke. Mme go fenya semowa, mongwe le mongwe wa rona o tlhoka kotlo ya letsatsi le letsatsi go tswa “mo lefokong le le molemo la Modimo” (Moroni 6:4; bona le gone Russell M. Nelson, “Opening Remarks; Liahona, Nov. 2018, 6–8).

Dirisa di dirisiwa tse ka tsela epe e e go thusang. Tshoboko e bonatsa dingwe tsa boammaaruri jwa bosakhutleng tse di bonwang mo Dithuto le Dikgolagano. Di kaya le gone megopolo le ditiro go go thusa go ithutuntsha dikwalo ka bongwe, le maloko a lelwapa, kgotsa ditsala. Fa o ntse o ithutuntsha, sala morago kaelo ya Mowa go bona boammaaruri jwa bosakhutleng jo bo nang le bokao mo go wena. Batla melaetsa ya Modimo, mme o sale morago ditlhotlheletso tse o di amogelang.

Barutuntshi le baithuti kwa Kerekeng

Fa o ruta tlelase ya Poraemari, tlelase ya banana kgotsa ya Sekolo sa Sontaga ya bagolo, khoramo ya boperesiti jwa ga Arone, kgotsa tlelase ya Makgarejwana, o rotloediwa go dirisa ditshoboko mo sedirisiweng se fa o ntse o ipaakanyetsa go ruta. Tlayang, Ntshalang Morago—Ya Legae le Kereke ke karikulamo ya tlelase ya gago ya Sontaga. Megopolo ya go ithuta mo sedirisiweng se di diretswe go ithuta kwa gae le kwa kerekeng. Fa o ipaakanyetsa go ruta, simolola ka go nna le maitemogelo a gago a dikwalo. Go ipaakanya ga gago mo go botlhokwa thata go tlaa diragala fa o sekaseka dikwalo mme o batla thotoetso ya Mowa o o Boitshepo. Le gone o ka ithutuntsha ka matlhoko a batho ba o ba rutang mo tlhaloganyong. Batla boammaaruri jwa bosakhutleng Tlayang, Ntshalang Morago e ka go thusa go supa bongwe jwa boammaaruri jo mme o ithute ka fa dikwalo di ka dirisiwang ka teng mo botshelong jwa gago.

O gopole gore go ithuta efangele, ka gotlhe, ke boremelelo jwa legae le tshegetso ya Kereke. Ka mafoko a mangwe, boikarabelo jwa gago jwa ntlha ke go tshegetsa batho ba o ba rutang mo maitekong a bone a go ithuta le go tshela efangele kwa lwapeng. O se ka wa tshwenyega ka go nna le diteng tse di farologanyeng tse o ka di ba nayang mo tlelaseng. Mo boemong, ba neele menyatla ya go abelana maitemogelo a bone, dikakanyo, le dipotso ka ditemana tsa dikwalo tse ba di badileng kwa gae. Ba laletse go abelana boammaaruri jwa bosakhutleng jo ba bo boneng. Se se botlhokwa go fetisa go na le go ama selekanyo sengwe sa didirisiwa.

Ditlelase tsa Sontaga tsa Banana le Bagolo

Lebaka le le lengwe la konokono le ka lone re phutheganelang mo ditlelaseng tsa Sekolo sa Sontaga ke go tshegetsana le go kgothatsana jaaka re ntse re leka go itse le go sala morago Jeso Keresete. Tsela e bonolo ya go dira sena ke go botsa potso e tshwanang le “Mowa o o Boitshepo o go rutile eng bekeng e fa o ntse o ithuta dikwalo ka Tlayang, Ntshalang Morago?” Dikarabo tsa potso ena di ka gogela kwa dipuisanong tse di nang le bokao tse diagang tumelo mo go Jeso Keresete le efangele ya Gagwe.

Ke gone o ka laletsang puisano e e remeletse mo ditlhagisong tsa go ithuta mo Tlayang, Ntshalang Morago. Sekai, mogopolo wa go ithutuntsha o ka kaya go sekaseka Dithuto le Dikgolagano 19:15–20, go batla ka fa Mmoloki a tlhalositseng go boga ga Gagwe. O ka kopa maloko a tlelase go abelana ka fa ba neng ba ikutlwa ka teng ga ba bala tlhaloso ya Gagwe le go bua ka gore sena se ama jang tsela e ba akanyang ka ga Ene. Kgotsa le ka dirisa nako le ithuta ditemana tsena le le tlelase.

Dikhoramo tsa Boperesiti jwa ga Arone le Ditlelase tsa Makgarejwana.

Fa dikhoramo tsa Boperesiti jwa ga Arone le Ditlelase tsa Makgarejwana di kopana ka Sontaga, boikaelelo jwa bone bo farologanye go le gonnye mo tlaseng ya Sekole sa Sontaga. Mo tlaleletsong ya go thusana go ithuta efangele ya ga Jeso Keresete, ditlhopha tse gape di kopana go gakololana mmogo mabapi le go diragatsa tiro ya poloko le go godisiwa (bona Buka ya Kakaretso: Go direla mo Kerekeng ya ga Jeso Keresete ya Baitshepi ba Malatsi a Bofelo, 1.2), jaaka go kaelwa ke bopresidente ba tlelase ya bone kgotsa ba khoramo

Ka lebaka lena, bokopano bongwe le bongwe jwa khoramo kgotsa tlelase bo tshwanetse go simolola ka leloko la Khoramo kgotsa boporesidente ba tlelase ba eteletse pele puisano mabapi le maiteko a bona. Sekai, ba ka gakololana ka maiteko a bone a go tshela efangele, go direla batho ba ba tlhokang, go abelana efangele, kgotsa go tsaya karolo mo tirong ya tempele le ya ditso tsa lelwapa.

Morago ga nako ena ya go gakololana, mokaedi o etelela pele tlelase kgotsa khoramo mo go ithuteng efangele mmogo. Baeteledipele ba bagolo kgotsa maloko a tlelase kgotsa khoramo ba ka neelwa go ruta Boporesidente ba tlelase kgotsa Khoramo, ba buisana le baeteledipele ba bagolo, ba naya tiro tsena.

Batho ba ba neetsweng go ruta ba tshwanetseng go ipaakanya ka go dirisa megopolo ya go ithuta mo tshobokong ya beke le beke ya Tlayang, Ntshalang Morago. Mo tshobokong nngwe le nngwe, aekhone ena e bontsha tiro e e bogolo segolo e amanang le banana e bile e tsamaelanang le se ba se ithutang mo seminaring. Le fa go ntse jalo, megopolo e e mo tshobokong e ka dirisiwa e le tiro ya go ithuta ya banana.

Sesupo sa lenaneo la dikopano tsa Khoramo le tlelase, bona aphentikisi

Poraemari

Ipaakanyetso ya gago ya go ruta Poraemari e simolola fa o ntse o ithutuntsha dikwalo ka bo wena le ba lelwapa la gago. Fa o ntse o dira jalo, bulegela ditlhotlheletso tsa semowa le ditshedimosetso go tswa mo Moweng o o Boitshepo ka bana mo tlelaseng ya gago ya Poraemari. Nna o rapela Mowa o ka go tlhotlheletsa ka megopolo go ba thusa go ithuta efangele ya ga Jeso Keresete.

Fa o ntse o ipaakanyetsa go ruta, o ka amogela tlhotlheletso e nngwe fa o sekaseka megopolo ya go ruta mo sedirisiweng se. Tshoboko nngwe le nngwe mo Tlayang, Ntshalang Morago—Ya mo Gae le Kereke e na le dikarolo tse di reng “Megopolo ya go Ruta Bana.” Akanya ka megopolo e jaaka e kailwe go tsibosa tlhotlheletso ya gago. O itse bana mo tlelaseng ya gago ya Poraemari—mme o tlaa ba itse mo go botoka jaaka o amana le bone mo tlelaseng. Modimo o a ba itse le ene, mme O tlaa go tlhotlheletsa ka ditsela tse di botoka go ba ruta le go ba segofatsa.

Bana mo tlelaseng ya gago ba ka tswa ba setse ba dirile dingwe tsa ditiro mo Tlayang, Ntshalang Morago le ba malwapa a bone. Go Siame. Poeletso e molemo. Akanyetsa go laletsa bana go abelelana se ba se ithutileng kwa gae. O tshwanetse go dira lenaneo la ditsela tsa gore bana ba tseye karolo le fa ba rutiwe kwa gae. Bana ba ithuta boammaaruri jwa efangele thata ka natla fa boammaaruri jo bo rutiwa ka poeletso ka ditiro tse di farologanyeng. Fa o bona gore tiro ya go ithuta e a kgatlhisa mo baneng, akanyetsa go e boeletsa, segolo bogolo fa o ruta bana ba bannye.

Mo dikgweding tse di nang le bo Sontaga tse tlhano, Barutuntshi ba Poraemari ba rotloediwa go emisetsa lenaane Tlayang, Ntshalang Morago tshoboko ka Sontaga wa botlhano ka ditiro tsa go ithuta e lenngwe kgotsa go feta mo “Appendix B: For Primary—Preparing Children for a Lifetime on God’s Covenant Path.”