Megopolo ya go Tokafatsa go Ithuta kwa Gae le kwa Kerekeng

Jaaka o ithutuntsha efangele ya Mmoloki kwa gae le kwa kerekeng, sekaseka dipotso tse di latelang:

• O ka laletsa jang Mowa mo ithutuntshong ya gago.

• O ka tlhoma mogopolo jang go Mmoloki mo ithutuntshong ya gago?

• O ka tsaya jang menyetla ya go ithuta letsatsi le letsatsi?

• O ka rotloetsa jang maloko a lelwapa le maloko a tlelase go ithutuntsha dikwalo tse di boitshepo ka bo bone le go abelana se ba se ithutang?

Fano ke ditsela dingwe tse di motlhofo tsa go oketsa boleng jwa go ithutuntsha lefoko la Modimo.

Rapelela Tlhotlheletso

Dikwalo tse di boitshepo ke lefoko la Modimo, ka jalo Mo lope thuso go ditlhaloganya.

Batla boammaaruri ka ga Jeso Keresete

Dilo tsotlhe di paka ka ga Keresete (bona 2 Nefi 11:4; Mošhe 6:63), ka jalo akanyetsa ka go kwala kgotsa go tshwaya ditemana tse di pakang ka Mmoloki, Mo rate thata, mme o rute ka fa o ka mo salang morago ka teng. Nako dingwe boammaaruri ka ga Mmoloki le efangele ya Gagwe di buiwa go tlhamaletswe, mme nako tse dingwe di kaiwa ka dikai kgotsa polelo. Ipotse, “Ke bofe boammaaruri jwa bosakhutleng jo bo rutiwang mo ditemaneng tse? Boammaaruri jo bo nthuta eng ka ga Mmoloki?”

Reetsa Mowa

Ela tlhoko dikakanyo tsa gago le maikutlo, le fa e kare ga di amane le se o se balang. Dikakanyo tseo e ka nna dilo tota tse Rara wa gago wa Legodimo a batlang o di ithuta.

Kwala dikakanyo tsa gago

Go na le ditsela tse dintsi tsa go kwala dikakanyo tse di tlang jaaka o ithutuntsha. Sekai, o ka fitlhela gore mafoko mangwe le dipolelwana mo dikwalong tse di boitshepo di a go kgatlha mme o ka di kwala le dikakanyo tsa gago e le mokwalonyana mo dikwalong tse di boitshepo. Gape o ka boloka jenale ya diponatshego, maikutlo le dikakanyo tse o di amogelang.

Abelana seo se ithutang le ba bangwe

Go buisana ka megopolo go tswa mo go ithutuntsheng ga gago ke tsela e e siameng go ruta ba bangwe, mme e thusa go nonotsha go tlhaloganya ga gago ka se o se badileng. Abelana se o se ithutang le maloko a lelwapa le ditsala (ka bowena kgotsa maranyane), mme o ba laletse go dira mo go tshwanang.

Tshwantshanya dikwalo tse di boitshepo le botshelo jwa gago

Sekaseka ka fa dipolelo le dithuto tse o di balang di amanang le botshelo jwa gago ka teng. Sekai, o ka ipotsa, “Ke maitemogelo afe a ke kileng ka nna le one a a tshwanang le se ke se balang?”

Botsa dipotso jaaka o ithutuntsha

Jaaka o ithutuntsha dikwalo tse di boitshepo, dipotso di ka tla mo tlhaloganyong. Dipotso tse di ka amana le se o se balang kgotsa botshelo jwa gago ka kakaretso. Akanya dipotso tse, mme o batle dikarabo jaaka o tswelela o ithutuntsha dikwalo tse di boitshepo.

Dirisa dithuso tsa go Ithutuntsha dikwalo tse di boitshepo

Go amogela diponatshego tse dingwe tsa tlaleletso mo ditemaneng tse o di balang, dirisa mekwalo e e kwa bofelong jwa tsebe, Topical Guide, le Bible Dictionary, le Guide to the Scriptures, le dithuso tse dingwe tsa ithutuntsho.

Akanya ka se dikwalo tse di boitshepo di buang ka sone

O ka bona megopolo ka ga dikwalo tse di boitshepo fa o akanya ka se di buang ka sone, go akaretsa maemo kgotsa lefelo le a tswang mo go lone. Sekai, go itse tlholego le ditumelo tsa batho ba Modimo a buang le bone go ka go thusa go tlhaloganya maikaelelo a melaetsa ya Gagwe. O ka ithuta ka tsone mo go Saints, Revelations in Context, ditlhogo tsa dikarolo mo go Dithuto le Dikgolagano, le di dirisiwa tse dingwe.

Ithutuntshe mafoko a baporofeti le baaposetole ba malatsi a bofelo

Bala se baporofeti le baaposetole ba malatsi a bofelo ba se rutang ka ga melawana e o e bonang mo dikwalong tse di boitshepo.

Tshela ka se o se ithutang

Ithutuntsho ya dikwalo tse di boitshepo e ka re tlhotlheletsa le go re gogela go fetola ka fa re tshelang ka teng. Reetsa se Mowa o go rotloetsang go se dira fa o bala, mme ke gone ineele go dira dithotloetso tseo.

Dirisa moopelo

Difela tse di tlhopilweng, dipina tsa bana di bonwa mo go Tlayang, Ntshalang Morago. Dirisa moopelo o o boitshepo go laletsa Mowa le go nonotsha tumelo ya gago le bopaki jwa boammaaruri jwa efangele.

Tshwara dikwalo tse di boitshepo ka tlhogo

Tlhopha bontlha jwa lekwalo le le boitshepo jo bo nang le bokao mo go wena, lelwapeng la gago, tlelase ya gago,mme le e tshware ka tlhogo ka go e boeletsa letsatsi le letsatsi kgotsa go tshameka motshameko wa go le tshwara ka tlhogo.

Abelana dithuto tsa sedirisiwa

Batla di dirisiwa tse di amanang le dikgaolo le ditemana tse o di balang. Akanya ka fa sedirisiwa sengwe le sengwe se amanang le dithuto tse di mo dikwalong tse di boitshepo.

Tshwantsha, batla, kgotsa tsaya senepe

Bala ditemana di se kae, mme jalo tshwantsha sengwe se se amanang le se o se balang. Kgotsa o ka lebelela setshwantsho mo go Buka ya Ditshwantsho tsa Efangele kgotsa gongwe go sele mo Motlobong wa Efangele. O ka tsaya senepe se se supang se o se ithutileng.

Diragatsa polelo

Morago ga go bala polelo, laletsa maloko a lelwapa kgotsa a tlelase go e diragatsa. Morago ga moo, buisanang ka fa polelo e amanang ka gone le dilo tse lo di itemogelang ka bongwe le jaaka lelwapa.

Phuthulogang kwa gae

Fa o na le maloko a lelwapa a a sa eletseng go tsaya karolo mo ithutuntshong ya dikwalo tse di boitshepo ya lelwapa, batla ditsela tse dingwe go ikgolaganya le bone. Ka sekai, a o ka abelana boammaaruri jwa bosakhutleng mo go gololesegileng mo dipuisanong tsa gago kgotsa go abelana dikwalo tse di boitshepo ka tsela e e keteng ga o rere kgotsa o pateletsa? Ithutuntsho ya dikwalo tse di boitshepo ga e a tshwanela go tshwana mo lelwapeng lengwe le lengwe. Bana bangwe ba ka nna botoka mo go ithutuntsheng dikwalo tse di boitshepo bongwe ka bongwe. O rapele le go sala morago tlhotlheletso ya Mowa.

Phuthego ya khansele ya baruti ya batsadi. Fa o tlhoka thuso ya tlaleletso mo maikaelelong a gago go ruta bana ba gago, batla go itse gore a wate ya gago e tshegetsa phuthego ya khansele ya baruti ya batsadi (bona General Handbook, 17.5). Diphuthego tse ke menyetla go batsadi go gakololana le go ithuta mmogo ka fa ba ka tokafatsang dithuto tsa bone. Ba ka buisana ka melawana mo go Teaching in the Savior’s Way, megopolo mo ditsebeng tse go tokafatsa ithutuntsho ya dikwalo tse di boitshepo ya lelwapa, le dikakanyo tsa go ithuta le go ruta di ka bonwa mo go Tlayang, Ntshalang Morago.