Dagiti Kapanunotan a Magpasayaat iti Panagsursuro iti Pagtaengan ken iti Simbaan

Bayat ti panagadalmo iti ebanghelio ti Mangisalakan iti pagtaengan ken iti simbaan, ibilangmo dagiti sumaganad a saludsod:

• Kasano a maawismo ti Espiritu iti panagadalmo?

• Kasano a maipamaysam ti Mangisalakan iti panagadalmo?

• Kasano a magundawayam dagiti inaldaw a kanito ti panagsursuro?

• Kasano a maparegtam dagiti miembro ti pamilia ken klase nga agadal a bukodda kadagiti nasantuan a kasuratan ken mangibinglay no ania ti masursuroda?

Adtoy ti sumagmamano a simple a wagas a mangpadur-as iti panagadalmo iti balikas ti Dios.

Agkararag para iti inspirasion

Dagiti nasantuan a kasuratan ti balikas ti Dios, isu nga agpatulong Kenkuana tapno maawatan ida.

Sapulem dagiti kinapudno maipapan ken ni Jesucristo

Amin a banag ket mangpaneknek ken ni Cristo (kitaen iti 2 Nephi 11:4; Moises 6:63), isu nga ibilangmo ti panangisurat wenno panangmarka kadagiti bersikulo nga agpaneknek iti Mangisalakan, mangpauneg iti panagayatmo Kenkuana, ken mangisuro no kasano ti sumurot Kenkuana. No dadduma madakamat a direkta dagiti kinapudno maipapan iti Mangisalakan ken iti ebangheliona ken no dadduma mailadawanda babaen iti maysa a pagarigan wenno estoria. Saludsodem iti bagim, “Ania dagiti agnanayon a kinapudno a maisuro kadagitoy a bersikulo? Ania ti isuro kadatayo dagitoy a kinapudno maipapan iti Mangisalakan?”

Dumngeg iti Espiritu

Imdengam dagiti kapanunotam ken riknam, uray no awan pakainaiganna iti no ania ti basbasaem. Mabalin a dagitoy nga impresion ti kayat ti Nailangitan nga Amayo a masursurom.

Isuratmo dagiti impresionmo

Adu a wagas ti panangisurat kadagiti sumangbay nga impresion bayat ti panagadalmo. Kas pagarigan, mabalin a masarakam ti sumagmamano a balikas ken ragup ti balikas kadagiti nasantuan a kasuratan a makaawis iti riknam; mabalinmo a markaan ida ken isuratmo dagiti kapanunotam kas maysa a note kadagiti nasantuan a kasuratam. Mabalinmo met nga isurat iti journal dagiti nalawag a pannakaammo ken pannakaawat, rikna, ken impresion a maawatmo.

Ibinglaymo no ania dagiti masursurom kadagiti dadduma

Ti panangilawlawag kadagiti nalawag a pannakaammo ken pannakaawat manipud iti bukodmo a panagadal ket maysa a nasayaat a wagas a pangisuro kadagiti dadduma, ken mangtulong pay a mangpapigsa iti pannakaawatmo maipapan iti no ania ti nabasamon. Ibinglaymo dagiti masursurom kadagiti miembro ti pamilia ken gagayyem (iti personal wenno digital), ken awisem ida nga agaramid met iti kasta.

Inaigmo dagiti nasantuan a kasuratan iti biagmo

Ibilangmo no kasano a mayaplikar iti biagmo dagiti estoria ken pannursuro a basbasaem. Kas pagarigan, mabalinmo a saludsoden iti bagim, “Ania dagiti padasko a maipada iti basbasaek?”

Agdamag kadagiti saludsod bayat ti panagadalmo.

Bayat ti panagadalmo kadagiti nasantuan a kasuratan, mabalin a sumangbay dagiti saludsod iti panunotmo. Mabalin a mainaig dagitoy a saludsod ti no ania ti basbasaem wenno iti biagmo iti sapasap. Utobem dagitoy a saludsod ken sapulem dagiti sungbat bayat ti panagtultuloymo iti panagadal kadagiti nasantuan a kasuratan.

Usarem dagiti tulong iti panagadal iti nasantuan a kasuratan.

Tapno magun-od dagiti nayon a nalawag a pannakaammo ken pannakaawat kadagiti bersikulo a basaem, usarem dagiti footnote, ti Topical Guide, ti Bible Dictionary, ti Pangiwanwan iti Nasantuan a Kasuratan, ken dadduma pay a tulong iti panagadal.

Ibilang ti konteksto dagiti nasantuan a kasuratan

Mabalin a masarakam dagiti napapateg a nalawag a pannakaammo ken pannakaawat maipapan iti maysa a binatog ti nasantuan a kasuratan bayat iti panangibilangmo iti kontekstona, agramanan dagiti kasasaad wenno lugar a naggapuanna. Kas pagarigan, ti panangammo iti nagtaudan ken dagiti pammati ti tattao a kinasao ti Dios ket makatulong kenka a makaawat a nasayaat iti panggep dagiti balikasna. Mabalinmo nga ammuen ti maipapan kadakuada iti Saints, Revelations in Context, dagiti paulo ti benneg iti Doktrina ken Katulagan, ken dadduma pay a resources.

Adalen dagiti balikas dagiti propeta ken apostol iti ud-udina nga aldaw.

Basaem ti insuro dagiti propeta ken apostol iti ud-udina nga aldaw maipapan kadagiti pagbatayan a masarakam kadagiti nasantuan a kasuratan.

Agbiag babaen iti no ania ti masursurom

Saan laeng koma a mangparegta kadatayo ti panagadal iti nasantuan a kasuratan no di ketdi iturongnatayo pay a mangbalbaliw iti wagas a panagbiagtayo. Dumngeg no ania ti iparikna kenka ti Espiritu nga aramidem bayat ti panagbasam, ket kalpasanna agtignay kadagitoy a parikna.

Agusar iti musika

Masarakan dagiti naisingasing a himno ken kanta dagiti ubbing iti intero nga Umaykayo, Sumurot Kaniak. Usarem ti sagrado a musika a mangawis iti Espiritu ken mangpauneg iti pammatim ken pammaneknekmo kadagiti kinapudno ti ebanghelio.

Mangyulo kadagiti nasantuan a kasuratan

Pumilika iti maysa a binatog iti nasantuan a kasuratan a napnuan kaipapanan kenka, iti pamiliam, wenno iti klasem, ket mangyulo iti daytoy babaen ti inaldaw a panangulit iti daytoy wenno babaen ti panagay-ayam iti memorization game.

Ibinglay dagiti adalen a banag [object lesson]

Agsapul kadagiti banag a mainaig kadagiti kapitulo ken bersikulo a basbasaem. Ibilang no kasano a mainaig iti tunggal banag kadagiti pannursuro iti nasantuan a kasuratan.

Agdrowing, agsapul, wenno mangala iti ladawan

Basaen ti sumagmamano a bersikulo, ket kalpasanna mangidrowing iti maysa a banag a mainaig iti no ania ti nabasam. Wenno mabalinmo ti agsapul iti ladawan iti Gospel Art Book wenno sadino man iti Gospel Library. Mabalinmo pay ti mangala iti ladawan a mangiladawan iti no ania ti nasursurom.

Mangidrama iti maysa nga estoria

Kalpasan ti panangbasam iti maysa nga estoria, mangawis kadagiti miembro ti pamilia wenno klase a mangyakem iti daytoy. Kalpasanna, isaritam maipapan iti no kasano a mainaig ti estoria kadagiti banag a mapadpadasam.

Agbalin a nalaka a mannakibagay iti pagtaengan

No addaanka kadagiti miembro ti pamilia a saan a natallugod a makiraman iti sangapamiliaan a panagadal iti nasantuan a kasuratan, sapulem dagiti dadduma pay a wagas a makikonekta kadakuada. Kas pagarigan, mabalinmo nga ibinglay ti agnanayon a kinapudno a gagangay kadagiti pannakisarsaritam wenno mangibinglayka iti maysa a napateg a nasantuan a kasuratan iti wagas a saan a kaska la mangaskasaba wenno mangibabbaba? Saan a nasken nga agpapada ti wagas ti panagadal iti nasantuan a kasuratan iti tunggal pamilia. Mabalin a sumungbat a nasaysayaat ti sumagmamano nga ubbing iti panagadal a saggaysa iti nasantuan a kasuratan. Agbalinka a managkararag ken agtungpalka kadagiti parikna ti Espiritu.

Dagiti miting ti konseho ti mannursuro para kadagiti nagannak. No kayatmo ti nayon a tulong iti panagkagumanmo a mangisuro kadagiti annakmo, ammuem no ti wardyo ket mangangay kadagiti miting ti konseho ti mannursuro para kadagiti nagannak (kitaen iti Sapasap a Handbook, 17.5). Dagitoy a miting ti maysa a gundaway dagiti nagannak nga aggiinnuman ken aggigiddan nga agsursuro maipapan iti no kasano a mapasayaat ti panangisuroda. Mabalinda a pagsasaritaan dagiti pagbatayan iti Panangisuro iti Wagas ti Mangisalakan, dagiti kapanunotan kadagitoy a panid para iti panangpasayaat iti sangapamiliaan a panagadal iti nasantuan a kasuratan, ken dagiti singasing iti panagsursuro ken panangisuro a masarakan iti intero nga Umaykayo, Sumurot Kaniak.