Panangusar iti Umaykayo, Sumurot Kaniak—Para iti Pagtaengan ken Simbaan

Para iti Siasino Daytoy a Resource?

Agpaay daytoy a resource iti asino man nga agtarigagay nga agadal iti Doktrina ken Katulagan—kas indibidual, kas sangapamiliaan, ken kadagiti klase iti Simbaan. No saan a masansan ti panagadalmo iti nasantuan a kasuratan iti napalabas, makatulong kenka a mangirugi daytoy a resource. No addaankan iti nasayaat a kadawyan ti panagbasa iti ebanghelio, makatulong kenka daytoy a resource a maaddaan iti ad-adu pay a napapateg a padas.

Dagiti Indibidual ken Pamilia iti Pagtaengan

Ti nasayaat a lugar a pakasursuruan iti ebanghelio ket iti pagtaengan. Mabalin a suportarannaka dagiti mannursurom iti simbaan, ken makagun-odka iti pammaregta manipud kadagiti dadduma pay a miembro ti ward. Ngem tapno agbiag a naespirituan, kasapulan ti tunggal maysa kadatayo ti pannakataraon “iti nasayaat a balikas ti Dios” (Moroni 6:4; kitaen met iti Russell M. Nelson, “Opening Remarks,” Liahona, Nob. 2018, 6–8).

Usarem daytoy a resource iti ania man a wagas a makatulong kenka. Dagiti balabala ti mangitampok iti sumagmamano a kinapudno a masarakan iti Doktrina ken Katulagan: Mangisingasingda pay kadagiti kapanunotan ken aktibidad a tumulong kenka a mangadal kadagiti nasantuan a kasuratan kas indibidual, kadua dagiti miembro ti pamilia, wenno kadua ti gagayyem. Bayat ti panagadalmo, surotem ti panangiwanwan ti Espiritu tapno makasarakka kadagiti agnanayon a kinapudno nga addaan kaipapanan kenka. Sapulem dagiti mensahe ti Dios para kenka, ken surotem dagiti parikna a maawatmo.

Dagiti Mannursuro ken Agsursuro iti Simbaan

No mangisurokayo iti klase ti Primary, klase ti Sunday School dagiti agtutubo wenno nataengan, korum ti Aaronic Priesthood, wenno klase ti Agtutubo a Babai, maallukoykayo nga agusar kadagiti balabala iti daytoy a resource bayat ti panagsaganayo a mangisuro. Ti Umaykayo, Sumurot Kaniak—Para iti Pagtaengan ken Simbaan ket ti kurikulum para iti klaseyo iti Domingo. Naisangrat dagiti kapanunotan iti panagadal iti daytoy a resource para iti panagsursuro iti pagtaengan ken iti simbaan. Bayat ti panagsaganayo a mangisuro, rugian babaen ti kaadda dagiti bukodyo a padas kadagiti nasantuan a kasuratan. Mapasamakto ti kapatgan a panagsaganayo bayat ti panagsukisokyo kadagiti nasantuan a kasuratan ken panagkalikagumyo a manggun-od iti inspirasion manipud ti Espiritu Santo. Mabalinyo met ti agadal a pampanunotenyo dagiti kasapulan dagiti tao a sursuruanyo. Sapulenyo dagiti agnanayon a kinapudno. Ti Umaykayo, Sumurot Kaniak ket makatulong kadakayo a mangilasin iti sumagmamano kadagitoy a kinapudno ken mangsursuro no kasano a mayaplikar dagiti nasantuan a kasuratan iti biagyo.

Laglagipen a ti panagsursuro iti ebanghelio, iti kasayaatan a kasasaadna, ket naisentro iti pagtaengan ken suportado ti Simbaan. Iti sabali a pannao, kangrunaan a pagrebbengam ti mangsuporta kadagiti tao a sursuruam iti panangikagumaanda nga agsursuro ken agbiag iti ebanghelio iti pagtaengan Dika madanagan maipapan iti naidumduma a linaon a mangipaay para kadakuada iti klase. Ikkam ida kadagiti gundaway a mangibinglay kadagiti padas, kapanunotan, ken saludsodda maipapan kadagiti binatog iti nasantuan a kasuratan a nabasada iti pagtaengan. Awisem ida a mangibinglay kadagiti agnanayon a kinapudno a nasarakanda. Napatpateg daytoy ngem ti panangsakup iti masinunuo a kaadu ti material.

Dagiti Klase dagiti Agtutubo ken Adult Sunday School

Maysa a kangrunaan a gapu ti panagguummongtayo kadagiti klase ti Sunday School ket mangsuporta ken mangparegta iti tunggal maysa bayat ti panangikagumaantayo a mangsurot ken ni Jesucristo. Ti simple a wagas tapno maaramid daytoy ket ti panagdamag iti saludsod a kas iti “Ania ti insuro kenka ti Espiritu Santo iti daytoy a lawas bayat ti panagadalmo kadagiti nasantuan a kasuratan iti Umaykayo, Sumurot Kaniak?” Dagiti sungbat iti daytoy a saludsod ket mabalin a mangiturong kadagiti napapateg a panaglilinnawag a mangbangon iti pammati ken ni Jesucristo ken iti ebangheliona.

Kalpasanna mabalinmo ti mangyawis iti panaglilinnawag a naibatay kadagiti singasing iti Umaykayo, Sumurot Kaniak. Kas pagarigan, mabalin nga isingasing ti maysa a kapanunotan iti panagadal ti panagsukisok iti Doktrina ken Katulagan 19:15–20, a mangsapsapul no kasano nga inladawan ti Mangisalakan ti panagsagabana. Mabalinmo a kiddawen kadagiti miembro ti klase a mangibinglay no kasano ti riknada bayat ti panangbasbasada iti panangiladawanna ken pagsaritaan no kasano nga apektuan daytoy ti wagas a panangpanunotda maipapan Kenkuana. Wenno mabalinyo a bubosen ti sumagmamano nga oras iti panagadal kadagitoy a bersikulo kas maysa a klase.

Dagiti Korum ti Aaronic Priesthood ken Klase ti Young Women

No agmiting dagiti Korum ti Aaronic Priesthood ken klase ti Young Women kadagiti Domingo, medio naiduma ti panggepda iti klase ti Sunday School. Malaksid iti panagtitinnulongda a mangsursuro iti ebanghelio ni Jesucristo, agmimiting pay dagitoy a grupo tapno aggiinnumanda maipapan iti panangipatungpal iti aramid ti pannakaisalakan ken pannakaitan-ok (kitaen iti Sapasap a Handbook: Panagserbi iti Ti Simbaan ni Jesucristo dagiti Santo iti Ud-udina nga Aldaw, 1.2), kas iturong ti panguluen ti klase wenno korum.

Gapu iti daytoy a rason, nasken a mangrugi ti tunggal miting ti korum wenno klase iti maysa a miembro ti korum wenno panguluen ti klase a mangidaulo iti panaglilinnawag maipapan kadagiti panagkagumaanda. Kas pagarigan, mabalinda ti aggiinnuman maipapan kadagiti panagkagumaanda nga agbiag iti ebanghelio, agministro kadagiti tao nga agkasapulan, mangibinglay iti ebanghelio, wenno makiraman iti aramid iti templo ken family history.

Kalpasan daytoy a gundaway para iti panagiinnuman, idauluan ti maysa nga instruktor ti klase wenno korum iti aggigiddan a panagsursuro iti ebanghelio. Mabalin a matudingan a mangisuro dagiti adult leader wenno miembro ti klase wenno korum. Ti panguluen ti klase wenno korum, iti pannakiuman kadagiti adult leader, ti mangaramid kadagitoy naidutok nga aramiden.

Nasken nga agsagana dagiti tao a nadutokan a mangisuro babaen ti panangusar kadagiti singasing iti panagsursuro iti linawas a balabala ti Umaykayo, Sumurot Kaniak. Iti tunggal balabala, ipakita daytoy nga icon ti maysa nga aktibidad a nangnangruna a mainaig kadagiti masursuroda iti seminary. Nupay kasta, ania man kadagiti singasing iti balabala mabalin nga usaren a kas maysa nga aktibidad ti panagsursuro para kadagiti agtutubo.

Para iti maysa a pagarigan nga adyenda para kadagiti miting ti korum ken klase, kitaen iti apendiks D.

Primary

Mangrugi ti panagsaganam a mangisuro iti Primary bayat ti panagadalmo kadagiti nasantuan a kasuratan a bukodmo ken kaduam ti pamiliam. No aramidem, silulukatka kadagiti naespirituan nga impresion ken pannakaammo ken pannakaawat manipud iti Espiritu Santo maipapan kadagiti ubbing iti klasem iti Primary. Agbalin a managkararag. Maparegtanaka ti Espiritu kadagiti kapanunotan a tumulong kadakuada a mangsursuro iti ebanghelio ni Jesucristo.

Bayat ti panagsaganam a mangisuro, mabalin a magun-odmo ti nayon a pammaregta babaen ti panagsukisok kadagiti balabala iti panangisuro iti daytoy a resource. Tunggal balabala iti Umaykayo, Sumurot Kaniak—Para iti Pagtaengan ken Simbaan ket addaan iti maysa a benneg a napauluan iti “Dagiti Kapanunotan para iti Panangisuro kadagiti Ubbing.” Panunotem dagitoy a kapanunotan a kas singasing tapno mangpataud iti bukodmo nga inspirasion. Am-ammom dagiti ubbing iti klasem iti Primary—ken maam-ammomto ida a nasaysayaat pay bayat ti pannakipulapolmo kadakuada iti klase. Am-ammo met ida ti Apo, ken paregtaennakanto kadagiti kasayaatan a wagas a pangisuruam ken pangbendisionam kadakuada.

Posible a naaramiden dagiti ubbing iti klasem ti sumagmamano nga aktibidad iti Umaykayo, Sumurot Kaniak a kadua dagiti pamiliada. OK dayta. Nasayaat ti panangulit. Ibilang ti panangawis kadagiti ubbing a mangibinglay iti tunggal maysa no ania ti nasursuroda iti pagtaengan. Nasken pay a planuem dagiti wagas tapno makiraman dagiti ubbing uray no saanda a masursuruan iti pagtaengan. Nasamsamay ti panagsursuro dagiti ubbing iti kinapudno ti ebanghelio no maulit a maisuro dagitoy a kinapudno babaen iti nadumaduma nga aktibidad. No maammuam a nasamay ti maysa nga aktibidad iti panagsursuro para kadagiti ubbing, ibilangmo ti panangulit iti daytoy, nangnangruna no mangisursuroka kadagiti in-inaudi nga ubbing.

Kadagiti bulan nga addaan iti lima a Domingo, maallukoy dagiti mannursuro iti Primary a mangsukat iti naiskediul a balabala ti Umaykayo, Sumurot Kaniak iti maikalima a Domingo iti maysa wenno ad-adu pay kadagiti aktibidad iti panagsursuro iti “Apendiks B: Para iti Primary—Panangisagana kadagiti Ubbing iti Dana ti Katulagan ti Dios para iti Tungpal Biag.”