Apendiks B

Para iti Primary—Panangisagana kadagiti Ubbing para iti Tungpal Biag iti Dana ti Katulagan ti Dios

Kadagiti bulan nga addaan iti lima a Domingo, maallukoy a sukatan dagiti mannursuro iti Primary ti naiskediul nga Umaykayo, Sumurot Kaniak a balabala iti maikalima a Domingo iti maysa wenno ad-adu pay kadagitoy nga aktibidad iti panagsursuro.

Dagiti Pagbatayan ken Ordinansa ti Ebanghelio ni Jesucristo

Isuro ti doktrina ni Cristo kadatayo no kasano a makasublitayo iti Dios.

Idi nagpakita ni Jesucristo kadagiti tao iti America, insurona kadakuada ti doktrinana. Kinunana a mabalintayo a sumrek iti pagarian ti Dios no addaantayo iti pammati, agbabawi, agbuniag, umawat iti Espiritu Santo, ken agibtur agingga iti panungpalan (kitaen iti 3 Nephi 11:31–40; Doktrina ken Katulagan 20:29). Makatulong kadakayo a mangisuro kadagiti ubbing dagiti aktibidad iti baba ta dagitoy a pagbatayan ken ordinansa ti mangtulong kadatayo nga umasideg iti Mangisalakan iti unos ti panagbiagtayo.

Tapno masursuro ti ad-adu pay maipapan iti doktrina ni Cristo, kitaen iti 2 Nephi 31.

Dagiti Mabalin nga Aktibidad

• Ikkan dagiti ubbing kadagiti ladawan a mangibagi iti pammati ken ni Jesucristo, panagbabawi, panagbuniag ken kumpirmasion (kitaen iti Libro ti Arte ti Ebanghelio, dagiti num. 1, 111, 103, ken 105). Basaen wenno yulo a kadua dagiti annakyo ti maikapat a pagannurotan ti pammati, ket idawat kadakuada a mangingato kadagiti ladawanda no madakamat dayta a pagbatayan wenno ordinansa. Tulongan dagiti ubbing a makaawat no kasano a matulongannatayo ti tunggal maysa kadagitoy a pagbatayan wenno ordinansa nga agbalin nga ad-adda a kas iti Nailangitan nga Ama ken ni Jesucristo.

  

• Kasano a matulonganyo dagiti ubbing a makaawat a ti pammati, panagbabawi, panagbuniag, ken kumpirmasion ket saan a maminsan laeng a pasamak no di ket makaimpluensia iti naespirituan a panagdur-astayo iti unos ti panagbiagtayo? Kas pagarigan, mabalinyo nga ipakita kadakuada ti ladawan ti maysa a bukel ken maysa a dakkel a kayo (wenno idrowing dagitoy a banag iti pisarra). Tulongan ida a mangpanunot kadagiti banag a makatulong a mangpatubo iti bukel tapno dumakkel daytoy iti maysa a dakkel a kayo, kas koma iti danum, daga, ken init. Tulongan ida a mangkita a dagitoy ket kapada dagiti banag nga aramidentayo tapno umas-asidegtayo iti Dios iti unos ti panagbiagtayo—panangpatibker iti pammatitayo ken ni Jesucristo, panagbabawi iti tunggal aldaw, panagtungpal kadagiti katulagan iti panagbuniagtayo, pannakiranud iti sakramento, ken panangdengngeg iti Espiritu Santo.

• Ibinglay kadagiti ubbing ti estoria maipapan iti paputok [firecracker] manipud iti mensahe ni Elder Dale G. Renlund “How Can Repenting Help Me Feel Happy?” (Friend, Dis. 2017, 12–13, wenno Liahona, Dis. 2017, 70–71; kitaen met iti video a “Repentance: A Joyful Choice” [Gospel Library]). Iti nadumaduma a punto bayat ti estoria, awisen dagiti ubbing a mangpanunot maipapan iti mabalin a narikna koma ni Elder Renlund. Apay a mariknatayo ti rag-o no agbabawitayo? Iburay kadagiti ubbing ti rag-o ken ayat a nariknayo idi kiniddawyo a pakawanennakayo ti Nailangitan nga Ama.

Repentance: A Joyful Choice

Elder Dale G. Renlund tells a childhood story of lighting a firecracker in the chapel right before church began. He relates his story to the joy of repentance.

Panagbuniag

Impakita ni Jesucristo ti pagwadan kaniak idi nabuniagan Isuna.

Nupay awan ti basol ni Jesus, nabuniagan Isuna tapno mangipakita iti naan-anay a pagwadan ti panagtungpal iti Nailangitan nga Ama (kitaen iti 2 Nephi 31:6–10).

Tapno masursuro ti ad-adu pay maipapan iti panagbuniag, kitaen iti Doktrina ken Katulagan 20:37; Topics and Questions, “Baptism,” Gospel Library.

Dagiti Mabalin nga Aktibidad

• Ipakita ti maysa a ladawan ti panagbuniag ti Mangisalakan ken ti panagbuniag ti sabali pay a tao (wenno kitaen iti Libro ti Arte ti Ebanghelio, num. 35 ken num. 103 wenno num. 104). Kiddawem kadagiti ubbing a mangibinglay iti no ania ti pagdumaan ken no ania ti pagpadaan dagiti dua a ladawan. Aggigiddan a basaen ti Mateo 3:13–17 wenno “Kapitulo 10: Nabuniagan ni Jesus” iti Dagiti Estoria iti Baro a Tulag, 26–29, wenno iti katupagna a video iti Gospel Library. Paitudo kadagiti ubbing dagiti banag iti ladawan a nadakamat iti panagbasa wenno iti video. Ibagayo kadagiti ubbing maipapan iti ayatyo iti Mangisalakan ken ti targigagayyo a mangsurot Kenkuana.

  Chapter 10: Jesus Is Baptized

  

• Dumngeg wenno agkansion iti maysa a kanta maipapan iti panagbuniag, kas iti “When Jesus Christ Was Baptized” (Children’s Songbook, 102). Ania ti masursurotayo maipapan iti panagbuniag manipud iti daytoy a kanta? Basaen ti 2 Nephi 31:9–10, ket awisen dagiti ubbing a dumngeg no apay a nabuniagan ni Jesucristo. Awisen dagiti ubbing a mangidrowing iti ladawan ti bagbagida iti aldaw ti panagbuniagda.

Mapilik ti agaramid iti katulagan iti Dios ken mabuniagan.

Ti panagsagana iti panagbuniag ket napatpateg ngem iti panagsagana para iti maysa a pasken. Kayatna a sawen daytoy ti panagsagana nga agaramid iti katulagan ket kalpasanna panagtungpal iti dayta a katulagan iti tungpal biag. Utobenyo no kasano a matulonganyo dagiti ubbing a makaawat iti katulagan nga aramidendanto iti Nailangitan nga Ama no mabuniaganda, a mairaman dagiti kari nga aramidenna kadakuada ken dagiti kari nga aramidenda Kenkuana.

Dagiti Mabalin nga Aktibidad

• Ilawlawag a ti katulagan ket maysa a kari iti nagbaetan ti maysa a tao ken ti Nailangitan nga Ama. Bayat ti panagkagumaantayo a mangtungpal kadagiti karitayo iti Dios, ikari ti Dios a bendisionannatayo. Isurat iti pisarra ti Dagiti Karik iti Dios ken Dagiti Kari ti Dios Kaniak. Aggigiddan a basaen ti Mosiah 18:10, 13 ken Doktrina ken Katulagan 20:37, ket tulonganyo dagiti ubbing a mangilista kadagiti kari a masarakanda iti babaen dagiti maitutop a paulo (kitaen iti Dallin H. Oaks, “Your Baptism Covenant,” Friend, Peb. 2021, 2–3). Iburay no kasano a pinaraburannakayo ti Nailangitan nga Ama bayat ti panagkagumaanyo nga agtungpal iti katulaganyo iti panagbuniag.

• Ipakita kadagiti ubbing dagiti ladawan dagiti banag nga inaramid ni Jesucristo bayat ti panagministrona (para iti sumagmamano a pagarigan, kitaen iti Libro ti Arte ti Ebanghelio, dagiti num. 33–49). Bay-an a pagsasaritaan dagiti ubbing no ania ti ar-aramiden ni Jesus iti tunggal ladawan. Basaen ti Mosiah 18:8–10, 13, ken awisenyo dagiti ubbing a dumngeg kadagiti banag nga ikarida nga aramiden no mabuniaganda (kitaen met iti “The Baptism Covenant,” Friend, Peb. 2019, 7, wenno Liahona, Peb. 2019, F3). Kasano nga impluensiaanto dagitoy a kari dagiti tignaytayo iti inaldaw? Awisem dagiti ubbing a mangidrowing iti ladawan ti bagbagida a mangtultulong iti maysa a tao a kas iti wagas a panangtulong ni Jesus.

  

Ilawlawag a no mabuniagantayo, agaramidtayo kadagiti kari iti Dios ken agaramid Isuna kadagiti karina kadatayo.

Kumpirmasion

No makumpirmaanak, agbalinak a maysa a miembro ti Ti Simbaan ni Jesucristo dagiti Santo iti Ud-udina nga Aldaw.

Ti panagbalin a miembro ti Ti Simbaan ni Jesucristo dagiti Santo iti Ud-udina nga Aldaw ket mangyeg iti adu a bendision, karaman dagiti gundaway para kadagiti ubbing tapno agbalin nga aktibo a makiramraman iti aramid ti Dios.

Tapno masursuro ti ad-adu pay maipapan iti kumpirmasion ken ti sagut ti Espiritu Santo, kitaen iti Gary E. Stevenson, “How Does the Holy Ghost Help You?,” Liahona, Mayo 2017, 117–20; Topics and Questions, “Holy Ghost,” Gospel Library.

Dagiti Mabalin nga Aktibidad

• Awisen nga umay iti klase ti maysa a tao a nabiit pay a nabuniagan ken nakumpirmaan tapno mangiburay no ania ti rikna ti makumpirmaan. Idawat iti daytoy a tao a mangisarita no ania ti kayat a sawen kenkuana ti agbalin a maysa a miembro ti Ti Simbaan ni Jesucristo dagiti Santo iti Ud-udina nga Aldaw. Tulongan dagiti ubbing nga agpanunot kadagiti wagas a pakatungpalanda iti katulaganda iti panagbuniag kas miembro ti Simbaan (kas iti panagserbi iti dadduma, panangawis iti dadduma nga agsursuro iti ad-adu pay maipapan ken ni Jesus, panagkararag kadagiti miting, ken dadduma pay). Iburayyo no kasano a nakatulong kadakayo ti panangaramidyo kadagitoy a banag a makarikna iti rag-o ti panagbalin a maysa a miembro ti Simbaan ni Cristo.

• Ipakita ti maysa a ladawan dagiti tao iti Dandanum ti Mormon (kitaen iti Libro ti Arte ti Ebanghelio, num. 76), ket awisen dagiti ubbing a mangiladawan no ania ti makitada iti ladawan. Isarita ti estoria ni Alma ken dagiti taona a mabumbuniagan idiay (kitaen iti Mosiah 18:1–17; “Kapitulo 15: Mangisuro ken Mamuniag ni Alma,” Dagiti Estoria iti Libro ni Mormon, 43–44, wenno ti katupagna a video iti Gospel Library). Irebyu ti Mosiah 18:8–9 ket kiddawen kadagiti ubbing nga agaramid kadagiti tignay a mangtulong kadakuada a manglagip kadagiti banag a sitatallugod nga aramiden dagiti tao kas miembro ti Simbaan ni Cristo. Kas pagarigan, kasano a matulongantayo dagiti dadduma nga “umaddang iti panagaramid kadagiti katulagan iti Dios”? (Russell M. Nelson, “Hope of Israel” [worldwide youth devotional, Hunio 3, 2018], Gospel Library). Mangiburay iti maysa a padas idi nasaksianyo dagiti miembro ti Simbaan nga agserserbi kadagitoy a wagas.

  

  Chapter 15: Alma Teaches and Baptizes

No makumpirmaanak, awatek ti sagut ti Espiritu Santo.

No mabuniagan ken makumpirmaantayo, ikari ti Nailangitan nga Ama a “kanayon nga agtaeng [kadatayo] ti Espirituna’ [Doktrina ken Katulagan 20:77). Maawagan daytoy a nakaskasdaaw a sagut ti Dios iti sagut ti Espiritu Santo.

Dagiti Mabalin nga Aktibidad

• Basaen ti Doktrina ken Katulagan 33:15, ket kiddawem kadagiti ubbing a dumngeg iti naisangsangayan a sagut nga ited ti Nailangitan nga Ama kadatayo no mabuniagan ken makumpirmaantayo. Tapno matulongan ida a makasursuro iti ad-adu pay maipapan iti no kasano a makatulongto kadakuada ti sagut ti Espiritu Santo, aggigiddan a mangrebyu iti Juan 14:26; Taga Galacia 5:22–23; 2 Nephi 32:5; 3 Nephi 27:20. Mabalinyo pay nga irebyu ti artikulo a “The Holy Ghost Is …” (Friend, Hunio 2019, 24–25; wenno Liahona, Hunio 2019, F12–F13).

• Sakbay ti klase, awisenyo dagiti nagannak ti maysa wenno ad-adu pay kadagiti ubbing tapno mangiburay no kasano a nabendisionanda gapu ta adda kadakuada ti sagut ti Espiritu Santo. Kasano a tulonganna ida? Kasano a mangngeganda ti timekna?

• Aggigiddan nga agkansion iti maysa a kanta maipapan iti Espiritu Santo, kas iti “The Holy Ghost” (Children’s Songbook, 105). Tulongan dagiti ubbing a makaawat no ania ti isuro ti kanta maipapan no kasano a matulongannatayo ti Espiritu Santo.

Makasaritanak ti Espiritu Santo iti adu a wagas.

Maisagananto dagiti ubbing a makailasin iti timek ti Espiritu tapno umawat iti bukod a paltiing a mangtarabay kadakuada iti unos ti panagbiagda. Tulongan ida a makaawat nga adu dagiti wagas a mabalin a makisarita ti Espiritu Santo kadatayo.

Dagiti Mabalin nga Aktibidad

• Tulongan dagiti ubbing nga agpanunot kadagiti nadumaduma a wagas a mabalin a makasaritatayo ti maysa a gayyem nga agnanaed iti adayo, kas iti panangsurat, panangipatulod iti email, wenno pannakisarita iti telepono. Isuro kadakuada a mabalin a makisao kadatayo ti Nailangitan nga Ama iti nadumaduma a wagas babaen ti Espiritu Santo. Usaren ti mensahe ni Presidente Dallin H. Oaks “How Does Heavenly Father Speak to Us?’ tapno matulongan dagiti ubbing a makaawat iti nadumaduma a wagas a makasaritanatayo ti Espiritu Santo iti panunot ken pusotayo (Friend, Mar. 2020, 2–3, wenno Liahona, Mar. 2020, F2–F3).

• Mangiburay iti maysa a padas no kaano a nakisarita kadakayo ti Espiritu Santo, mabalin a babaen iti kapanunotan a simmangbay wenno babaen iti maysa a rikna iti pusoyo (kitaen iti Doktrina ken Katulagan 6:22–23; 8:2–3; kitaen met iti Henry B. Eyring, “Open Your Heart to the Holy Ghost,” Friend, Ago. 2019, 2–3, wenno Liahona, Ago. 2019, F2–F3). Paneknekan kadagiti ubbing a matulongan ti Espiritu Santo ida iti kasta met la a wagwagas.

• Tulongan dagiti ubbing a mangbigbig kadagiti panawen a mariknada ti Espiritu—kas pagarigan, no agkankansion iti kanta maipapan iti Mangisalakan wenno no agar-aramid iti maysa a nasayaat a banag para iti dadduma. Tulongan ida a mangilasin kadagiti naespirituan a rikna nga isangbay ti Espiritu Santo, nangruna kadagiti pariknana nga agtignay. Apay iti panagkunayo nga ited ti Espiritu Santo kadatayo dagitoy a rikna? Tulongan dagiti ubbing nga agpanunot kadagiti banag a masapul nga aramidentayo tapno mangngegantayo ti Espiritu Santo a makisarita kadatayo. Isarita no ania ti ar-aramidenyo tapno mangngeganyo a nalawlawag ti Espiritu.

Ti Sakramento

No makiranudak iti sakramento, malagipko ti sakripisio ti Mangisalakan ken mapabaro dagiti katulagak.

Inted ti Mangisalakan ti sakramento kadatayo a mangtulong kadatayo a manglagip iti panagsakripisiona para kadatayo ken mangpabaro kadagiti katulagantayo.

Tapno masursuro ti ad-adu pay, kitaen iti Mateo 26:26–30; 3 Nephi 18:1–12; Doktrina ken Katulagan 20:77, 79.

Dagiti Mabalin nga Aktibidad

• Awisen dagiti ubbing a mangkolor iti “Jesus Introduced the Sacrament to the Nephites” iti Scripture Stories Coloring Book: Book of Mormon (2019), 26. Awisen ida a mangitudo no ania iti pampanunoten dagiti tao iti ladawan. Ibasa kadagiti ubbing dagiti paset ti 3 Nephi 18:1–12 wenno “Kapitulo 45: Isuro ni Jesucristo maipapan iti Sakramento ken Kararag,” iti Dagiti Estoria iti Libro ni Mormon, 126–27, (wenno buyaen ti katupagna a video iti Gospel Library). Ania ti maaramidtayo a panglaglagip ken ni Jesucristo kabayatan ti sakramento?

  Chapter 45: Jesus Christ Teaches About The Sacrament And Prayer

• Kiddawen kadagiti ubbing a mangibaga kadakayo iti sumagmamano a banag a nasken a laglagipenda nga aramiden, kas iti panangikurdon ti sapatosda wenno panangbuggo kadagiti imada sakbay a manganda. Apay a napateg a laglagipentayo dagitoy a banag? Ibasa ti Moroni 4:3 kadagiti ubbing, ken kiddawem kadakuada a dumngeg iti no ania ti ikaritayo a kanayon a laglagipen no umawattayo iti sakramento. Apay a napateg a laglagipentayo ni Jesucristo? Tulonganyo dagiti ubbing a makaawat no kasano a matulongannatayo ti tinapay ken danum ti sakramento a manglaglagip no ania ti inaramid ni Jesus para kadatayo (kitaen iti Moroni 4:3; 5:2).

• Isurat iti pisarra ti “Ikarik a …” Ibasayo kadagiti ubbing dagiti kararag iti sakramento (kitaen iti Doktrina ken Katulagan 20:77, 79). No mangngeganda ti maysa a kari nga aramidentayo iti Dios, agsardengkayo ket tulongan ida a mangileppas ti binatog iti pisarra iti kari a nangngeganda. Tulongan ida a makaawat a no umawattayo iti sakramento, ar-aramidentayo dagiti isu met la a kari nga inaramidtayo iti panagbuniag.

• Ania ti kayatna a sawen ti panangawat iti bagitayo ti nagan ni Jesucristo? Tapno matulongan a sungbatan dagiti ubbing daytoy a saludsod, mangiburay iti pagarigan ti maysa a banag a pangikabilantayo kadagiti nagantayo. Apay nga ikabiltayo dagiti nagantayo kadagitoy a banag? Apay a kayat ni Jesucristo nga ikabilna ti naganna kadatayo? Ibilang ti panangibinglay iti daytoy a palawag manipud ken ni Presidente Russell M. Nelson: “Ti panangawattayo iti nagan ti Mangisalakan ket iramanna ti panangipakdaar ken panangipaneknek iti dadduma—babaen kadagiti tignay ken balikastayo—a ni Jesus ti Cristo” (“The Correct Name of the Church,” Liahona, Nob. 2018, 88).

Ti Bileg, Turay, ken dagiti Tulbek ti Priesthood

Bendisionan ti Dios dagiti annakna babaen iti bileg ti priesthood.

Amin nga annak ti Dios—babai ken lalaki, ubing ken nataengan—ket umawat iti bileg ti Dios bayat ti panagtungpalda kadagiti katulagan nga inaramidda Kenkuana. Aramidentayo dagitoy a katulagan no umawattayo kadagiti ordinansa ti priesthood kas iti panagbuniag (kitaen iti Sapasap a Handbook: Panagserbi iti Ti Simbaan ni Jesucristo dagiti Santo iti Ud-udina nga Aldaw, 3.5, 3.6, Gospel Library). Tapno masursuro ti ad-adu pay, kitaen iti Russell M. Nelson, “Spiritual Treasures,” Liahona, Nob. 2019, 76–79; “Dagiti Pagbatayan ti Priesthood,” kapitulo 3 iti Sapasap a Handbook.

Dagiti Mabalin nga Aktibidad

• Tulonganyo dagiti ubbing a mangilasin kadagiti bendision a maawatda gapu iti priesthood. Tapno maikkan ida iti sumagmamano a kapanunotan, mabalinyo nga ipabuya ti video a “Blessings of the Priesthood” (Gospel Library). Ibilang ti panangilista kadagitoy a bendision iti pisarra. Apay a napateg kadatayo dagitoy a bendision? Paneknekan a sumangbay dagitoy a bendision kadatayo gapu ken ni Jesucristo ken ti bileg ti priesthoodna.

  Blessings of the Priesthood

  The priesthood is the power of God, which is given to man to act in His name.

• Tulongan dagiti ubbing a mangsapul kadagiti ladawan a mangipakita nga usaren ti Dios ti bilegna a mangbendision kadatayo. Kas pagarigan, mabalinda ti mangsapul iti maysa a ladawan ti lubong a pinarsuana para kadatayo, dagiti pagarigan iti panangagas iti masakit, ken dagiti sagrado nga ordinansa nga impaayna kadatayo (kitaen iti Libro ti Arte ti Ebanghelio, dagiti num. 3, 46, 104, 105, 107, 120). Ibinglay no apay nga agyamyamankayo iti priesthood ken kadagiti bendision nga isangbayna. Tulongan dagiti ubbing nga agpanunot kadagiti padas a nakabendisionanda iti bileg ti priesthood ti Dios.

  

• Maysa kadagiti kangrunaan a wagas a pangawatantayo kadagiti bendision ti bileg ti Dios iti panagbiagtayo ket babaen kadagiti ordinansa ti priesthood (kitaen iti Doktrina ken Katulagan 84:20). Tapno matulongan dagiti ubbing a mangsursuro iti daytoy a kinapudno, mabalinyo nga ilista dagiti sumaganad a nasantuan a kasuratan iti pisarra: 3 Nephi 11:21–26, 33 (panagbuniag); Moroni 2 (kumpirmasion); Moroni 4–5 (sakramento). Mabalin dagiti ubbing a saggaysa a pumili iti maysa kadagitoy a binatog ket mangilasin iti ordinansa nga iladawan daytoy. Awisen dagiti ubbing a mangibinglay no kasano a nabendisionanda mismo babaen iti panangawatda kadagiti ordinansa ti priesthood.

• Tulongan dagiti ubbing a makaawat nga awatendanto ti bileg manipud iti Dios bayat ti panagbuniag ken panagtungpalda iti katulaganda iti panagbuniag. Saludsoden kadagiti ubbing no kasano a makatulong daytoy a bileg kadakuada.

Maiturong ti aramid ti Dios babaen kadagiti tulbek ti priesthood ken maipatungpal babaen iti turay ti priesthood.

No mai-set apart ti maysa a tao para iti maysa a calling wenno matudingan a tumulong iti aramid ti Dios, maaramatna ti naitalek a turay ti priesthood kenkuana. Mainayon pay, mabalin a maordenan dagiti maikari a lallaki ti Simbaan iti maysa a saad [office] iti priesthood. Ti pannakausar ti amin a turay ti priesthood iti Simbaan ket iturong dagiti indibidual nga agiggem kadagiti tulbek ti priesthood, kas iti stake president, ti bishop, ken dagiti presidente dagiti korum. Dagiti tulbek ti priesthood ket ti turay a mangiturong iti pannakausar ti priesthood iti panangaramid iti trabaho ti Apo.

Dagiti Mabalin nga Aktibidad

• Kaduayo dagiti ubbing a mangbasa iti Marcos 3:14–15, ket ipakita kadakuada ti ladawan ti maysa a pasamak a nailadawan idiay (kas iti Libro ti Arte ti Ebanghelio, num. 38). Saludsoden kadagiti ubbing no nakakitadan iti maysa a tao a mai-set apart iti maysa a calling wenno maordenan iti maysa a saad [office] ti priesthood (wenno isarita kadakuada ti maipapan kadagiti padas a napasaranyon). Kasano a mayarig dayta iti no ania ti inaramid ti Mangisalakan kadagiti Apostolna? Tulongan dagiti ubbing a mangilista iti pisarra dagiti calling wenno saad [office] ti priesthood a maited kadagiti miembro iti Simbaan, kas iti mannursuro wenno lider iti maysa nga organisasion. Iti abay ti tunggal calling wenno saad [office], mabalinyo nga isurat no ania ti aramiden ti maysa a tao iti dayta a calling wenno saad [office]. Isarita kadagiti ubbing no kasano a nakatulong kadakayo iti panagserbiyo ti pannaka-set apartyo ti maysa a tao babaen ti panangiturong dagiti tulbek ti priesthood.

  

• Awisenyo dagiti ubbing a mangpanunot iti maysa a banag a kasapulanyo ti tulbek iti daytoy, kas iti maysa a kotse wenno maysa a ridaw. Ania ti mapasamak no awan kadakayo ti tulbek? Aggigidddan a basaenyo ti Doktrina ken Katulagan 65:2, ken ibinglayyo ti pammaneknekyo maipapan iti kinapateg ti kaadda dagiti tulbek ti priesthood. Mabalinyo pay a buyaen ti video a “Where Are the Keys?” (Gospel Library) ket kitaen no ania ti isuro ni Elder Gary E. Stevenson maipanggep kadagiti tulbek ti priesthood.

  Where Are the Keys?

  Priesthood authority and keys start the engine, open the gates of heaven, facilitate heavenly power, and pave the covenant pathway back to our Heavenly Father.

Ti Templo ken ti Plano ti Kinaragsak

Ti templo ket ti balay ti Apo.

Dagiti templo ket paset ti plano ti Nailangitan nga Ama para kadagiti annakna. Kadagiti templo, agaramidtayo kadagiti sagrado a katulagan Kenkuana, maisagutan iti bileg ti priesthood, umawat iti paltiing, mangannong kadagiti ordinansa para kadagiti pimmusayen a kapuonantayo, ken mailantip a sangkamaysa iti pamiliatayo para iti kinaagnanayon. Maaramid amin daytoy gapu ken ni Jesucristo ken ti pangsubbot a sakripisiona.

Kasano a matulonganyo dagiti ubbing a sursuruanyo a mangbigbig iti kinasagrado ti balay ti Apo ken maisagana ti bagbagida nga agbalin a maikari a makiraman kadagiti ordinansa iti templo? Ibilang ti panangrebyu kadagitoy a resources: Doktrina ken Katulagan 97:15–17; Russell M. Nelson, “Closing Remarks,” Liahona, Nov. 2019, 120–22; “Why Latter-day Saints Build Temples,” temples.ChurchofJesusChrist.org.

Dagiti templo ket paset ti plano ti Nailangitan nga Ama para kadagiti annakna.

Dagiti Mabalin nga Aktibidad

• Ipakita ti maysa wenno ad-adu pay a ladawan dagiti templo. Saludsoden kadagiti ubbing no ania ti mamagbalin iti templo a maysa a naisangsangayan a lugar. Ilawlawag nga iti tunggal templo naisurat ti: “Kinasantuan iti Apo—Ti Balay ti Apo.” Saludsoden kadagiti ubbing no ania iti panagkunanda ti mabalin a kaipapanan ti “Kinasantuan iti Apo”. Apay a maawagan ti templo a balay ti Apo? Ania ti isuro daytoy kadatayo maipapan iti templo? No adda kadagiti ubbing ti nakapanen iti templo, mabalinda pay nga iburay no ania ti nariknada idi addada idiay. No nakapankayon iti templo, iburayyo no kasano ti nariknayo iti kaadda ti Apo idiay, ken isaritayo no apay a sagrado a lugar ti templo kadakayo.

• Aggigiddan a basaen ti Doktrina ken Katulagan 97:15–17. Idawatyo kadagiti ubbing a mangsapul no ania ti namnamaen ti Apo kadagiti sumrek iti nasantuan a balayna. Apay a kasapulan a maikaritayo a sumrek iti balayna? Kas paset daytoy a panagsasarita, ibagayo kadagiti ubbing maipapan kadagiti temple recommend, agraman no kasano nga umawat iti maysa. Mabalinyo nga awisen ti maysa a miembro iti bishopric a mangibinglay kadakuada no ania ti interbyu iti temple recommend ken dagiti saludsod a madamag iti maysa a tao.

Iti templo, agaramidtayo kadagiti katulagan iti Dios.

Insuro ni Presidente Russell M. Nelson, “Awisennatayo ni Jesucristo a magna iti dana ti katulagan nga agsubli iti pagtaengan kadagiti Nailangitan a Nagannaktayo ken makadenna dagiti ay-ayatentayo” (“Come, Follow Me,” Liahona, Mayo 2019, 91). Tulongan dagiti ubbing a makaawat a ti dana ti katulagan iramanna ti panagbuniag, kumpirmasion, ken ti endowment ken pannakailantip iti templo.

Dagiti Mabalin nga Aktibidad

• Kiddawen kadagiti ubbing a tulongandakayo a mangrebyu iti katulagan nga aramidentayo iti Dios no mabuniagantayo ken pabaruentayo no makiranudtayo iti sakramento (kitaen iti Mosiah 18:10; Doktrina ken Katulagan 20:77, 79). Ipakita ti maysa a ladawan ti templo, ket ilawlawag nga ad-adu pay ti bendision a tarigagayan nga ited ti Nailangitan nga Ama kadatayo iti templo.

• Mangidrowing iti maysa a ruangan nga agturong iti maysa a dana. Saludsoden kadagiti ubbing no apay iti panagkunada a makatulong nga adda maysa a dana a pagnaan. Aggigiddan a basaen ti 2 Nephi 31:17–20, a nangidasigan ni Nephi ti katulagan ti panagbuniag iti maysa a ruangan ket awisennatayo nga agtultuloy iti dana kalpasan ti panagbuniag. Ad-adu pay dagiti katulagan nga aramiden kalpasan ti panagbuniag, agraman dagiti katulagan a maaramid iti templo. Ilawlawag nga inawagan ni Presidente Nelson daytoy a dana iti “dana ti katulagan.”

Iti templo, mabalintayo ti mabuniagan ken makumpirmaan para kadagiti kapuonan a pimmusayen.

Inaramid ti ebanghelio ni Jesucristo a makapagsubli ti amin a makipagnaed Kenkuana, uray no pumusayda nga awan ti pannakaammoda iti ebanghelio. Iti templo, mabalintayo a mabuniagan ken makumpirmaan kas miembro ti Simbaan ni Jesucristo nga agpaay kadakuada.

Dagiti Mabalin nga Aktibidad

• Isarita maipapan iti maysa a panawen nga adda inaramid ti maysa a tao para kadakayo a diyo naaramid para iti bagiyo. Awisen dagiti ubbing a mangibinglay kadagiti kasta met laeng a padas. Ilawlawag a no mapantayo iti templo, maawattayo dagiti sagrado nga ordinansa kas iti panagbuniag para iti dadduma a pimmusayen. Kasano nga agbalintayo a kas ken ni Jesus no ar-aramidentayo dagiti trabaho para kadagiti pimmusayen? Ania ti inaramidna para kadatayo a ditayo maaramid para iti bagbagitayo?

• Awisen ti maysa wenno ad-adu pay nga agtutubo a nabuniaganen para kadagiti kapuonanda tapno mangibinglay iti padasda. Saludsoden kadakuada no ania ti rikna ti adda iti templo. Allukoyen ida a mangibinglay no ania ti nariknada bayat ti panangaramidda iti daytoy a trabaho para kadagiti kapuonanda.

• Mangidrowing iti maysa a kayo iti pisarra, nga adda dagiti ramut ken sanga. Idawat kadagiti ubbing a mangpanunot no kasano a mayarig ti maysa a pamilia iti maysa a kayo. Imarkayo dagiti ramut a Kapuonan, imarkayo dagiti sanga nga An-annabo, ken imarkayo ti puon ti kayo a Dakayo. Aggigiddan a basaen daytoy a binatog manipud iti Doktrina ken Katulagan 128:18: “Ta datayo no awanda [dagiti kapuonantayo] saantayo nga agbalin a naan-anay; wenno isuda no awantayo saanda nga agbalin a naan-anay.” Agsaludsod kas iti sumaganad: “Apay a kasapulantayo dagiti kapuonantayo? Apay a kasapulandatayo dagiti an-anabotayo? Kasano a natulongandatayo dagiti nagannaktayo, dagiti lelong ken lelangtayo, ken dadduma pay a kapuonantayo?” Awisen dagiti ubbing a mangsukisok iti nabati pay a paset ti Doktrina ken Katulagan 128:18 para iti ragup ti balikas a mangiladawan no kasano a matulongantayo dagiti kapuonantayo.

• Ibilang ti pannakitinnulong kadagiti nagannak ti tunggal ubing a mangsapul iti nagan ti maysa a kapuonan nga agkasapulan kadagiti ordinansa iti templo (kitaen iti FamilySearch.org).