Apendiks A

Para kadagiti Nagannak—Panangisagana kadagiti Annakyo para iti Tungpal Biag iti Dana ti Katulagan ti Dios

Gapu ta ay-ayatennakayo, agtalek kadakayo, ken ammona ti potensialyo, inikkannakayo ti Nailangitan nga Ama iti gundaway a tumulong kadagiti annakyo a sumrek ken dumur-as iti dana ti katulaganna, ti dalan nga agturong iti biag nga agnanayon (kitaen iti Doktrina ken Katulagan 68:25–28). Iraman daytoy ti panangtulong kadakuada nga agsagana a mangaramid ken agtungpal kadagiti sagrado a katulagan, kas iti katulagan ti panagbuniag ken dagiti katulagan a naaramid iti templo. Babaen kadagitoy a katulagan, ibegkesto dagiti annakyo ti bagbagida iti Mangisalakan, ni Jesucristo.

Adu dagiti wagas a mangisagana kadagiti annakyo para iti daytoy a panagdaliasat iti dana ti katulagan, ket tulongannakayto ti Nailangitan nga Ama a mangtakuat iti kasayaatan a wagas a tumulong kadakuada. Bayat ti panagsapulyo iti inspirasion, laglagipen a saan nga amin a panagsursuro ket mapasamak bayat dagiti nayiskediul nga adalen. Kinapudnona, paset ti mamagbalin iti panagsursuro iti pagtaengan a nabileg unay ket ti gundaway nga agsursuro babaen ti pagwadan ken babaen kadagiti babassit, simple a kanito—ti kita a mapasamak a gagangay iti panagayus ti inaldaw a panagbiag. Kas iti panagtultuloy, tungpal biag a proseso ti panangsurot iti dana ti katulagan, kasta met ti panagsursuro maipapan iti dana ti katulagan. (Kitaen iti “Home and Family,” Teaching in the Savior’s Way [2022], 30–31.)

Iti baba ti sumagmamano a kapanunotan a mangiturong iti nayon pay nga inspirasion. Mabalinyo a sapulen dagiti mainayon a kapanunotan para iti panangisuro kadagiti ubbing nga agtawen iti Primary iti “Apendiks B: Para iti Primary—Panangisagana kadagiti Ubbing para iti Tungpal Biag iti Dana ti Katulagan ti Dios.”

Panagbuniag ken Kumpirmasion

Insuro ni Nephi a “ti ruangan a nasken a pagserkan[tayo]” iti dana ti katulagan “ket panagbabawi ken panagbuniag babaen ti danum” (2 Nephi 31:17). Dagiti panagkagumaanyo a tumulong kadagiti annakyo nga agsagana para iti panagbuniag ken kumpirmasion ket mabalinda nga ipaddak ti sakada a sititibker iti dayta a dana. Mangrugi dagitoy a panagkagumaan iti panangisuro maipapan iti pammati ken ni Jesucristo ken panagbabawi. Iramanda pay ti panangisuro maipapan iti no kasano a pabaruentayo dagiti katulagantayo iti panagbuniag babaen ti pannakiranudtayo iti sakramento iti tunggal lawas.

Insuro ni Nephi a “ti ruangan a nasken a pagserkan[tayo]” iti dana ti katulagan “ket panagbabawi ken panagbuniag babaen ti danum” (2 Nephi 31:17).

Adtoy ti sumagmamano a resources a makatulong kadakayo: 2 Nephi 31; special issue ti Friend a magasin maipapan iti panagbuniag; Topics and Questions, “Baptism,” Gospel Library.

• Tunggal adda padasyo a mangpapigsa iti pammatiyo iti Nailangitan nga Ama ken ni Jesucristo, ibinglayyo daytoy iti anakyo. Tulongan ida a makaawat a ti pammati ket maysa a banag a mabalin a dumakkel ken pumigpigsa iti unos ti panagbiag. Ania dagiti sumagmamano a banag a mabalin nga aramiden ti anakyo tapno mapatanor ti napigpigsa a pammati ken ni Cristo sakbay a mabuniagan?

• No di umisu ti pili ti anakyo, agsao a siraragsak maipapan iti sagut a panagbabawi. Ket no agaramidkayo iti biddut a pili, ibinglayyo ti rag-o a dumteng no agbabawikayo. Paneknekan a gapu ta nagsagaba ken natay ni Jesucristo gapu kadagiti basoltayo, mabalintayo ti agbabawi iti inaldaw, mapakawan, ken umawat iti bileg nga agbalbaliw. No agkiddaw ti anakyo iti pammakawan, siwayawaya ken siraragsak a pakawanenyo.

• Ibagayo iti anakyo ti maipapan iti panagbuniagyo. Ipakitayo dagiti ladawan ken ibinglay dagiti lagip. Isaritayo maipapan iti no kasano ti nariknayo, no kasano a dagiti katulaganyo iti panagbuniag ket nakatulong kadakayo a mangam-ammo a nasaysayaat ken ni Jesucristo, ken no kasano nga agtultuloy a bendisionan dagiti katulaganyo ti biagyo. Allukoyenyo ti anakyo nga agdamag kadagiti saludsod.

• No adda panagbuniag iti pamiliayo wenno iti wardyo, itugotyo ti anakyo tapno kitaenna daytoy. Pagsaritaanyo maipapan iti nakita ken nariknayo iti anakyo. No mabalin, kasaritayo iti tao a mabuniagan ken agsaludsodkayo a kas iti sumaganad: “Kasano nga inaramidmo daytoy a pangngeddeng? Kasano a nagsaganaka?”

• Tunggal madlawyo nga ar-aramiden ti anakyo ti maysa a banag nga inkarida nga aramidenda, mangted iti napudno a pammadayaw. Ilawlawag a ti panangtungpal kadagiti panagkumit ket mangtulong kadatayo nga agsagana nga agtungpal kadagiti katulagan nga aramidentayo no mabuniagantayo. Ania ti ikaritayo iti Dios no mabuniagantayo? Ania dagiti ikarina kadatayo? (Kitaen iti Mosiah 18:8–10, 13.)

• Isaritayo maipapan no kasano a nangbendision kadakayo ti pannakakumpirma ken panagbalin a miembro ti Ti Simbaan ni Jesucristo dagiti Santo iti Ud-udina nga Aldaw. Kas pagarigan, kasano a nakaasidegkayo iti Nailangitan nga Ama ken ni Jesucristo bayat ti panagserbiyo kadagiti dadduma ken kas iti panagserbi kadakayo dagiti dadduma? Tulonganyo ti anakyo a mangpanunot kadagiti wagas a makapagserbi ken mangpapigsa kadagiti dadduma kas miembro ti Simbaan. Tulongan pay ida a mangpadas ken mangbigbig iti rag-o nga aggapu iti panagserbi.

• No adda sagrado a padasyo ken ti anakyo nga agpada (kas iti simbaan, bayat ti panagbasa kadagiti nasantuan a kasuratan, wenno bayat ti panagserbi iti maysa a tao), ibagayo kadakuada ti maipapan kadagiti naespirituan a rikna wenno impresion nga adda kadakayo. Awisenyo ti anakyo a mangibinglay no kasano ti riknada. Kitaen dagiti nadumaduma a wagas a mabalin a makisarita ti Espiritu kadagiti tao, agraman dagiti wagas a pannakisaritana kadakayo a personal. Tulonganyo ti anakyo a mangbigbig ken mangibinglay kadakayo kadagiti kanito no mapadpadasanda ti impluensia ti Espiritu Santo.

• Aggigiddan a buyaen ti sumagmamano kadagiti video iti Gospel Library collection a napauluan iti “Hear Him!” Pagsasaritaan maipapan kadagiti nadumaduma a wagas a pannakangngeg dagiti katulongan ti Apo iti timekna. Awisenyo ti anakyo a mangidrowing iti ladawan wenno agaramid iti video maipapan iti no kasano a mangngegna ti timek ti Mangisalakan.

• Aramidenyo ti sakramento a sagrado ken naragsak a pasamak iti pamiliayo. Ibinglayyo iti anakyo no kasano nga ipamaysayo ken ni Jesucristo bayat ti sakramento. Tulonganyo ti anakyo a mangplano a mangipakita a sagrado kadakuada ti sakramento. Kas pagarigan, ti panagdengngeg kadagiti balikas dagiti kararag ti sakramento ket makaipalagip kadatayo kadagiti katulagantayo iti panagbuniag.

• Adu nga isyu ti magasin a Friend ti mangiraman kadagiti artikulo, estoria, ken aktibidad a tumulong kadagiti ubbing nga agsagana para iti panagbuniag ken kumpirmasion. Bay-an a pilien ti anakyo ti sumagmamano a basaen ken magustuanna a kaduanakayo. (Kitaen met iti collection “Preparing for Baptism” iti benneg dagiti ubbing iti Gospel Library.)

Ti Bileg, Turay, ken dagiti Tulbek ti Priesthood

Ti priesthood isu ti turay ken bileg ti Dios a pangbendisionanna kadagiti annakna. Adda ditoy daga ti priesthood ti Dios ita iti Ti Simbaan ni Jesucristo dagiti Santo iti Ud-udina nga Aldaw. “Amin a miembro ti Simbaan nga agtungpal kadagiti katulaganda—babbai, lallaki, ken ubbing—ket maparaburan iti bileg ti priesthood ti Dios kadagiti pagtaenganda a mangpapigsa iti bagbagida ken ti pamiliada” (kitaen iti (Sapasap a Handbook: Panagserbi iti Ti Simbaan ni Jesucristo dagiti Santo iti Ud-udina nga Aldaw, 3.6, Gospel Library). Daytoy a bileg ti tumulongto kadagiti miembro iti panangaramid iti trabaho ti Dios iti pannakaisalakan ken pannakaitan-ok iti bukodda a biag ken dagiti pamiliada (kitaen iti Sapasap a Handbook, 2.2).

No agserbi dagiti lallaki ken babbai kadagiti calling iti Simbaan, aramidenda dayta babaen ti turay ti priesthood, iti babaen ti panangiturong dagidiay agig-iggem kadagiti tulbek ti priesthood. Amin nga annak ti Nailangitan nga Ama—dagiti annakna a lallaki ken babbai—ket mabendisionandanto bayat ti nasaysayaat a pannakaawatda iti priesthood.

Umawattayo kadagiti ordinansa babaen ti turay ti priesthood. “Umawat dagiti maikari a lallaki a miembro ti Simbaan iti turay ti priesthood babaen ti panangi-confer ken panangorden kadagiti saad [offices] iti priesthood” (Sapasap a Handbook, 3.4). Dagidiay addaan iti saad [office] ti priesthood ket mabalin a pusgan ti maysa nga addaan kadagiti tulbek ti priesthood a mangaramid kadagiti ordinansa ti priesthood.

Tapno masursuro ti ad-adu pay maipapan iti priesthood, kitaen iti Russell M. Nelson, “Spiritual Treasures,” Liahona, Nob. 2019, 76–79; Russell M. Nelson, “The Price of Priesthood Power,” Liahona, Mayo 2016, 66–69; “Dagiti Pagbatayan iti Priesthood,” chapter 3 iti Sapasap a Handbook.

• Aramidenyo dagiti ordinansa ti priesthood a naan-anay a paset ti biag ti pamiliayo. Kas pagarigan, tulonganyo ti anakyo nga agsagana iti naespirituan para iti sakramento iti tunggal lawas. Paregtaenyo ti anakyo nga agkalikagum a manggun-od kadagiti bendision ti priesthood no masakit wenno kasapulanna ti liwliwa wenno direksion. Ugalienyo ti mangilawlawag kadagiti wagas a pangbendisionan ti Apo iti pamiliayo babaen ti bileg ti priesthood.

• Bayat ti aggigiddan a panagbasayo kadagiti nasantuan a kasuratan, kitaenyo dagiti gundaway a pagsasaritaan no kasano a bendisionan ti Dios dagiti tao babaen iti bilegna. Iburayyo dagiti bukodyo a padas idi pinaraburannakayo ti Dios babaen iti priesthoodna. Para kadagiti pagarigan dagiti bendision nga awatentayo manipud iti Dios babaen iti priesthood, kitaen iti Sapasap a Handbook, 3.2, 3.5.

• Isuroyo ti anakyo a kalpasan ti panagbuniag, mabalinna ti umawat iti bileg ti priesthood babaen ti panagtungpalna iti katulagan ti panagbuniag. Aggigiddan nga irebyu ti mensahe ni Presidente Russell M. Nelson “Spiritual Treasures” (Liahona, Nob. 2019, 76–79). Isaritayo iti anakyo no kasano nga inyeg dagiti ordinansa ti priesthood ti bileg ti Dios iti biagyo. Para iti listaan dagiti sumagmamano a wagas a pannakabendisiontayo babaen iti bileg ti priesthood, kitaen iti Sapasap a Handbook, 3.5.

• Paglilinnawagan ti saludsod nga “Ania ti kayarigan ti maysa a katulongan ti Apo?” Aggigiddan a basaen ti Doktrina ken Katulagan 121: 36–42, ket agsapul kadagiti sungbat. Tunggal madlawyo ti anakyo (wenno sabali a tao) a mangyaplikar iti maysa kadagiti pagbatayan wenno kababalin kadagitoy a bersikulo, ilawlawagyo daytoy.

• No agus-usarkayo wenno ti anakyo kadagiti tulbek a manglukat iti maysa a ruangan wenno mangpaandar iti maysa a kotse, maaddaankayo iti kanito a mangidilig kadagita a tulbek kadagiti tulbek nga iggem dagiti lider ti priesthood. Para iti depinision dagiti tulbek ti priesthood, kitaen iti Sapasap a Handbook, 3.4.1). Ania ti “luktan” wenno “pagandaren” dagiti tulbek ti priesthood para kadatayo? Kitaen met iti Gary E. Stevenson, “Where Are the Keys and Authority of the Priesthood?,” Liahona, Mayo 2016, 29–32; “Where Are the Keys?” (video), Gospel Library.

  Where Are the Keys?

  Priesthood authority and keys start the engine, open the gates of heaven, facilitate heavenly power, and pave the covenant pathway back to our Heavenly Father.

• No mai-set apartkayo para iti maysa a calling, awisenyo ti anakyo a mangimatang, no mabalin. Bay-an a makita ti anakyo nga ipatpatungpalyo ti callingyo. Mabalin nga agsapulkayo pay kadagiti maitutop a wagas a matulongandakayo. Iladawan no kasano a mariknayo ti bileg ti Apo iti callingyo.

Pannakabuniag ken Pannakumpirma para Kadagiti Kapuonan

Dagiti templo ti paset ti plano ti Nailangitan nga Ama para kadagiti annakna. Iti balay ti Apo, agaramidtayo kadagiti sagrado a katulagan iti Nailangitan nga Ama bayat ti pannakipasettayo kadagiti sagrado nga ordinansa, nga amin dagitoy ket mangitudo ken ni Jesucristo. Nangipaay ti Nailangitan nga Ama iti wagas para iti amin nga annakna a mangaramid kadagiti katulagan ken makipaset kadagiti ordinansa, agraman dagiti saan a nakaawat kadagitoy ditoy a biag. Iti rugi ti tawen nga agtawen ti anakyo iti 12, umdasen ti tawenda tapno mabuniagan ken makumpirmaan iti templo para kadagiti pimmusay a kapuonan (kitaen met iti 1 Taga Corinto 15:29).

• Mapankayo a masansan iti balay ti Apo no ipalubos dagiti kasasaadyo. Kasaritayo ti anakyo maipapan no apay a mapmapankayo ken no kasano a tulongannakayo ti templo a makarikna a nasingsingedkayo iti Nailangitan nga Ama ken ni Jesucristo.

• Irebyu ken paglilinnawagan dagiti saludsod iti temple recommend a sangkamaysa. Masarakanyo dagitoy kadagiti panid 36–37 ti Para iti Pigsa dagiti Agtutubo: Maysa a Pangiwanwan iti Panagpili (2022). Kasaritayo ti anakyo maipapan iti no ania ti mapasamak iti maysa nga interbyu iti temple recommend. Ibinglayyo no apay a napateg kadakayo ti kaadda ti maysa a temple recommend.

• Aggigiddan a basaen ti Malakias 4:6. Pagsaritaan no kasano a maiturong dagiti pusoyo kadagiti kapuonanyo. Masursuroyo ti ad-adu pay maipapan kadagiti kapuonanyo babaen ti aggigiddan a panangsukisok iti pakasaritaan ti pamiliayo iti FamilySearch.org. Sapulenyo dagiti kapuonan nga agkasapulan a mabuniagan ken makumpirmaan. Matulongannakayo ti consultant iti temple and family history iti ward.

• Aggigiddan nga irebyu ti sumagmamano kadagiti resources iti koleksion a napauluan iti “Temple” iti benneg dagiti ubbing iti Gospel Library. (Kitaen met iti “Preparing Your Child for Temple Baptisms and Confirmations” on ChurchofJesusChrist.org.)

Panangawat iti maysa a Bendision ti Patriarka

Ti maysa a bendision ti patriarka ket mabalin a pagtaudan ti pannarabay, liwliwa, ken inspirasion. Naglaon daytoy iti personal a balakad manipud iti Nailangitan nga Ama kadatayo ken tumulong kadatayo a makaawat iti agnanayon a pakabigbigan ken panggeptayo. Tulonganyo ti anakyo nga agsagana nga umawat iti bendision ti patriarka babaen ti panangisuro kadakuada iti kinapateg ken sagrado a kasasaad dagiti bendision ti patriarka.

Tapno masursuro ti ad-adu pay, kitaen iti Topics and Questions, “Patriarchal Blessings,” Gospel Library; Julie B. Beck, “You Have a Noble Birthright,” Liahona, Mayo 2006, 106–8.

• Ibinglayyo iti anakyo ti padasyo nga umawat iti maysa a patriarchal blessing. Mabalinyo nga ibinglay dagiti banag a kas iti no kasano a nagsaganakayo nga umawat iti daytoy, no kasano a nakatulong kadakayo nga umas-asideg iti Dios, ken no kasano nga agtultuloy a mangiwanwan kadakayo babaen daytoy a bendision. Mabalinyo pay nga awisen ti anakyo a makisarita kadagiti dadduma a miembro ti pamilia a nakaawat kadagiti bendisionda iti patriarka.

• Aggigiddan nga irebyu ti mensahe ni Elder Randall K. Bennett a “Your Patriarchal Blessing—Inspired Direction from Heavenly Father” ken ti mensahe ni Elder Kazuhiko Yamashita a “When to Receive Your Patriarchal Blessing” (Liahona, Mayo 2023, 42–43, 88–90). Ibinglayyo iti tunggal maysa no ania ti masursuroyo kadagitoy a mensahe maipapan no apay a kayat ti Nailangitan nga Ama nga umawattayo iti bendision ti patriarka. Tapno maammuan ti maipapan iti proseso ti panangawat iti maysa a bendision ti patriarka, kitaen iti Sapasap a Handbook, 18.17.

• No adda dagiti kapuonanyo a nakaawat kadagiti bendision ti patriarka, mabalin a makaparegta a basaen ti sumagmamano kadagitoy a kadua ti anakyo. Tapno agkiddaw kadagiti bendision dagiti kapuonan a natayen, ag-log in iti ChurchofJesusChrist.org, iklik ti Tools iti ngato a kanawan a suli ti screen, ket pilien ti Patriarchal Blessing.

• Kalpasan a nakaawat ti anakyo iti maysa a bendision ti patriarka, awisenyo ti asino man a miembro ti pamilia a nakaimatang tapno mangisurat kadagiti riknada ken mangibinglay kadagitoy iti anakyo.

Panangawat iti Endowment

Kayat ti Dios nga ipaayan, wenno bendisionan, dagiti amin nga annakna iti “bileg nga aggapu iti ngato” (Doktrina ken Katulagan 95:8). Mapantayo iti templo tapno maminsan laeng nga awatentayo ti bukodtayo nga endowment, ngem dagiti katulagan nga aramidentayo iti Dios ken ti naespirituan a bileg nga itedna kadatayo a kas paset ti endowment ket mabalin a mangbendision kadatayo iti inaldaw a panagbiagtayo.

• I-display ti ladawan ti maysa a templo iti pagtaenganyo. Isaritayo iti anakyo maipapan kadagiti rikna a mapadasanyo iti balay ti Apo. Masansan a pagsaritaanyo ti maipapan iti ayatyo para iti Apo ken iti balayna ken dagiti katulagan nga inaramidyo sadiay. Agsapul kadagiti gundaway a mapan iti templo a kaduayo ti anakyo tapno mangannong kadagiti panagbuniag ken kumpirmasion para kadagiti kapuonanda.

• Aggigiddan nga agsukisok iti temples.ChurchofJesusChrist.org. Basaen nga aggiddan dagiti artikulo kas iti “About the Temple Endowment” ken “Prepare for the House of the Lord.” Bay-an nga agdamag ti anakyo kadagiti ania man a saludsod maipapan iti templo. Para iti panangiwanwan maipapan iti no ania ti mabalinyo a pagsasaritaan iti ruar ti templo, kitaen iti mensahe ni Elder David A. Bednar “Prepared to Obtain Every Needful Thing” (Liahona, Mayo 2019, 101–4; kitaen nangnangruna iti benneg a napauluan iti “Home-Centered and Church-Supported Learning and Temple Preparation”).

• Bayat ti pannakipasetyo iti anakyo wenno panangsaksi kadagiti dadduma pay nga ordinansa (kas iti sakramento wenno maysa a bendision ti pannakaagas), maaddaankayo iti kanito a mangilawlawag iti simbolismo a nairaman iti ordinansa. Ania ti ibagi dagiti simbolo? Kasano a paneknekanda ni Jesucristo? Makatulong daytoy iti anakyo nga agsagana a mangutob iti simboliko a kaipapanan dagiti ordinansa iti templo, a mangipaneknek pay ken ni Jesucristo.

• Tulonganyo ti anakyo a mangpaliiw no kasano a tungtungpalenda ti katulagan ti panagbuniag a nailadawan iti Mosiah 18:8–10, 13. Tulonganyo pay ti anakyo a mangpaliiw no kasano a bembendisionan ti Apo ida. Mangbangon iti panagtalek ti anakyo iti kabaelanna a mangtungpal kadagiti katulagan.

• Agsaritakayo a sipapanayag ken masansan maipapan iti no kasano a mangiwanwan dagiti katulaganyo iti templo kadagiti piliyo ken mangtulong kadakayo nga umas-asideg ken ni Jesucristo. Mabalinyo nga usaren ti Sapasap a Handbook, 27.2, tapno mangrebyu kadagiti katulagan nga aramidentayo iti templo. No naawatyon ti endowment, ibagayo kadagiti annakyo maipapan no kasano a tulongannakayo ti garment iti templo a manglagip kadagiti katulaganyo ken ni Jesucristo (kitaen iti “Sacred Temple Clothing” [video], Gospel Library).

Sacred Temple Clothing

From ancient times, men and women have embraced sacred music, different forms of prayer, religious vestments full of symbolism, gestures and rituals to express their innermost feelings of devotion to God.

Panagserbi ti Mision

Insuro ni Elder David A. Bednar: “Ti maysa a kapatgan a banag a mabalinyo nga aramiden tapno agsagana para iti awag nga agserbi ket ti agbalin a misionario iti mabayag sakbay a mapankayo iti mision. … Saan a mapan iti mision ti isyu; ketdi, ti isyu ket panagbalin a misionario ken panagserbi iti unos ti panagbiagtayo iti amin a puso, kabaelan, panunot, ken pigsatayo. … Agsagsaganakayo para iti tungpal biag nga aramid a panagmisionario” (“Becoming a Missionary,” Liahona, Nob. 2005, 45–46). Ti adda a padas ti anakyo a panagbalin a misionario ket mangbendisionto kadakuada iti agnanayon, saan laeng a para iti panawen a mabalin nga agserbi a kas maysa a misionario.

Tapno masursuro ti ad-adu pay, kitaen iti Russell M. Nelson, “Preaching the Gospel of Peace,” Liahona, Mayo 2022, 6–7; M. Russell Ballard, “Missionary Service Blessed My Life Forever,” Liahona, Mayo 2022, 8–10; “Missionary Preparation: Adjusting to Missionary Life,” Gospel Library.

• Imodelo no kasano nga ibinglay ti ebanghelio kadagiti gagangay a wagas. Kanayon nga agbalinkayo nga alerto kadagiti gundaway a mangibinglay iti dadduma kadagiti riknayo maipapan iti Nailangitan nga Ama ken ti Mangisalakan ken dagiti bendision nga awatenyo kas maysa a miembro ti Simbaanna. Awisenyo dagiti dadduma a makikadua iti pamiliayo kadagiti aktibidad a mainaig iti Simbaan ken pamilia.

• Agsapulkayo kadagiti gundaway a pakilangenan ti pamiliayo kadagiti misionario. Awisen ida a mangisuro kadagiti gagayyemyo, wenno idiayayo a palubosan ida a mangisuro kadagiti tao iti pagtaenganyo. Saludsoden kadagiti misionario maipapan kadagiti padasda ken no kasano a ti panagserbi kas misionario ket tumultulong kadakuada nga umas-asideg ken ni Jesucristo. Saludsoden pay no ania ti inaramidda (wenno tinarigagayanda nga inaramid koma) tapno agsaganada nga agbalin a misionario.

• No nagserbikayo iti maysa a mision, agsaritakayo a sipapanayag ken masansan maipapan kadagiti padasyo. Wenno awisenyo dagiti gagayyem wenno miembro ti pamilia a nagserbi kadagiti mision tapno agsaritada maipapan iti misionda. Mabalinyo pay nga isarita dagiti wagas a nakaibinglayanyo iti ebanghelio kadagiti dadduma iti unos ti panagbiagyo. Tulonganyo ti anakyo a mangpanunot kadagiti wagas a mabalinna nga ibinglay ti ebanghelio.

• Ikkanyo ti anakyo kadagiti gundaway a mangisuro kadagiti pagbatayan ti ebanghelio iti pamiliayo. Mabalin met nga agsanay ti anakyo a mangibinglay kadagiti pammatina iti dadduma. Kas pagarigan, mabalinyo nga ilawlawag dagiti saludsod a kas iti “Kasano a yam-ammotayo ti Libro ni Mormon iti maysa a tao a di pay pulos nakangngeg iti daytoy?” wenno “Kasano nga iladawantayo ti panagkasapulan iti Mangisalakan iti maysa a tao a saan a Kristiano?”

• Tulonganyo ti anakyo nga agbalin a komportable a makisarita kadagiti tao. Ania dagiti sumagmamano a nasayaat a wagas a pangirugi iti maysa a panagsasarita? Allukoyenyo ti anakyo a mangsursuro no kasano ti dumngeg iti no ania ti isao dagiti dadduma, maawatan no ania ti adda iti pusoda, ken mangibinglay kadagiti kinapudno ti ebanghelio a mabalin a mangbendision iti biagda.

• Agsapulkayo kadagiti gundaway a masursuruan ti anakyo maipapan kadagiti dadduma a kultura ken pammati. Tulongan ida a mangbigbig ken mangraem kadagiti nasayaat ken pudno a pagbatayan kadagiti pammati dagiti dadduma.

Panangawat iti Ordinansa a Mangilantip

Iti templo, mabalin nga agkallaysa ti agassawa para iti kinaagnanayon. Mapasamak daytoy iti maysa nga ordinansa a maawagan iti “pannakailantip.” Uray no mabalin nga adu pay a tawen daytoy nga ordinansa para iti anakyo a lalaki wenno babai, dagiti babassit, simple, agtultuloy a banag nga aggigiddan nga aramidenyo kabayatan dagita a tawen ket makatulong kadakuada nga agsagana para iti daytoy nakaskasdaaw a bendision.

• Aggiddan a basaen ti “The Family: A Proclamation to the World” (Gospel Library). Ania ti isuro daytoy a waragawag maipapan iti kinaragsak iti biag ti pamilia ken maipapan kadagiti naballigian a panagasawa? Kaduayo ti anakyo, mangpilikayo iti maysa kadagiti pagbatayan a nailista iti waragawag nga adalen. Mabalinyo a kitaen dagiti nasantuan a kasuratan a mainaig iti dayta a pagbatayan iti Pangiwanwan iti Nasantuan a Kasuratan. Mabalinyo pay ti mangituding kadagiti panggep a tun-oyen tapno naan-anay a mayaplikar dayta a pagbatayan iti pamiliayo. Bayat ti panangaramidyo kadagiti pangepyo a tun-oyen, pagsasaritaan a sangkamaysa ti epekto ti panagbiag iti dayta a pagbatayan iti biag ti pamilia.

• Kaduayo ti anakyo, basaen ti mensahe ni Presidente Dieter F. Uchtdorf nga “In Praise of Those Who Save” (Liahona, Mayo 2016, 77–80). No makadanonkayo iti benneg a napauluan iti “A Society of Disposables, mabalinyo a sapulen dagiti banag iti pagtaenganyo a maibelleng ken dadduma pay a banag a saan. Pagsasaritaan no kasano a naiduma ti panangtratoyo kadagiti banag no kayatyo nga agpaut dagitoy. Ania ti isingasing daytoy maipapan iti no kasano ti nasken a panangtratotayo kadagiti relasion iti panagasawa ken pamilia? Ania pay ti masursurotayo manipud iti mensahe ni Presidente Uchtdorf maipapan iti no kasano a matulongannatayo ti Mangisalakan a mangbangon kadagiti natibker a panagasawa ken pamilia?

• Agbalin a sipapannayagkayo iti anakyo maipapan kadagiti banag a masursuroyo kas agassawa maipapan iti agnanayon a panagasawa a naisentro ken ni Cristo, ken dagiti wagas nga ikagkagumaanyo a pasayaaten. No nailantipkayo ken ti asawayo iti templo, ipakitayo iti anakyo babaen ti pagwadan no kasano nga ikagkagumaanyo a tungpalen dagiti katulaganyo iti Apo. Ibagayo iti anakyo no kasano nga ikagkagumaanyo a pagbalinen ti Nailangitan nga Ama ken ti Mangisalakan a sentro ti relasionyo ken no kasano a tultulongandakayo (kitaen met iti Ulisses Soares, “In Partnership with the Lord,” Liahona, Nob. 2022, 42–45).

• No kasapulan a maaramid dagiti pangngeddeng ti pamilia, mangangay kadagiti konseho ti pamilia ken panaglilinnawag. Siguraduenyo a mangngeg ken maipatpateg ti amin nga opinion dagiti miembro ti pamilia. Usaren dagitoy a panaglilinnawag kas gundaway a mangmodelo iti nasalun-at a komunikasion ken kinaimbag kadagiti relasion ti pamilia, uray no saan nga agpapada ti panangkita ti tunggal maysa kadagiti banag. (Kitaen iti M. Russell Ballard, “Family Councils,” Liahona, Mayo 2016, 63–65.)

• No adda saan a panagtutunos wenno panagsusuppiat iti pamilia, ipakitayo ti kinaanus ken pannakipagrikna. Tulonganyo ti anakyo a makakita no kasano a ti panangtaming iti panagsusuppiat kadagiti wagas a kas ken ni Cristo ket makatulong kadakuada nga agsagana para iti naragsak a panagasawa. Aggigiddan a basaen ti Doktrina ken Katulagan 121:41–42, ket pagsaritaan no kasano a mayaplikar dagiti pagbatayan kadagitoy a bersikulo iti panagasawa.