Detalye manipud iti Ti Pannakayanak iti Tanso ken Umber, ni J.Kirk Richards

Disiembre 22–28: Ti Awan Kapadana a Sagut ti Nadiosan nga Anak ti Dios

Paskua

Impakdaar ni Propeta Joseph Smith, “Dagiti kangrunaan a pagbatayan ti relihiontayo ket ti pammaneknek dagiti Apostol ken Propeta, maipanggep ken ni Jesucristo, nga Isu ket natay, naitanem, ken nagungar iti maikatlo nga aldaw, ket immuli sadi langit; ken amin a dadduma pay a bambanag a mainaig iti pammatitayo ket nayon laeng dagitoy” (Teachings of Presidents of the Church: Joseph Smith [2011], 49). Nasurok a 160 a tawen kalpasanna, daytoy a balikas ti nangparegta iti Umuna a Panguluen ken Korum dagiti Sangapulo-ket-dua nga Apostol tapno mangipablaak iti “Ti Sibibiag a Cristo: Ti Pammaneknek dagiti Apostol” kas pammadayaw iti maika-2,000 nga anibersario ti pannakayanak ti Mangisalakan (kitaen iti Russell M. Nelson, “Drawing the Power of Jesus Christ into Our Lives,” Liahona, Mayo 2017, 40).

Kas Santo iti Ud-udina nga Aldaw, agrag-otayo iti bendision ti agtultuloy a paltiing babaen kadagiti kabaruanan a propeta ken apostol. Pagyamanantayo dagiti naparegta a balikasda a pammagbaga, ballaag, ken pammaregta. Ngem kangrunaan ti amin, naparaburantayo kadagiti nabileg a pammaneknekda ken ni Jesucristo—iti panawen ti Paskua ken iti unos ti tawen. Dagitoy ti ad-adda pay ngem dagiti sugsog a balikas dagiti nalalaing a mannurat wenno mannarita iti publiko wenno dagiti nalawag a pannakaammo ken pannakawat manipud kadagiti eksperto iti nasantuan a kasuratan. Isuda dagiti balikas dagiti pinili, inawagan, ken pinusgan ti Dios a “dagiti naisangsangayan a saksi ti nagan ni Cristo iti intero a lubong” (Doktrina ken Katulagan 107:23).

Dagiti Kapanunotan iti Panagsursuro iti Pagtaengan ken iti Simbaan

“Awan ti sabali pay a kaindaklanan nga impluensia.”

Ania ti panagkunayo a pangsuporta iti palawag nga “awan ti sabali pay a kaindaklanan nga impluensia [a kas ken Jesucristo] iti amin a nagbiag ken agbiagto pay laeng iti daga”? Sapulenyo dagiti binatog iti “Ti Sibibiag a Cristo” a mangipaneknek iti kaindaklanan nga impluensia ti Mangisalakan. Kasano nga inimpluensiaannakayo?

Ipapan nga adda saan a pamiliar iti Kristianismo a nagsaludsod kadakayo no apay a rambakanyo ti Paskua. Kasano koma ti isusungbatyo? Irebyu ti “Ti Sibibiag a Cristo” a sipapanunot iti daytoy a saludsod, ket ibilangyo nga isurat ti aniaman a kapanunotan wenno impresion a dumteng kadakayo.

Kitaen met iti “Why We Need a Savior” (video), Gospel Library.

Why We Need a Savior

What would life be like without a Savior? There would be no joy, no forgiveness, no hope for the future. This Christmas, learn more about the hope, peace and happiness our Savior Jesus Christ can bring into our lives at christmas.mormon.org.

“Nagungar manipud iti tanem.”

Iti “Ti Sibibiag a Cristo,” nagpaneknek dagiti Apostol maipapan iti Panagungar ti Mangisalakan, a mangdakdakamat iti tallo a panagparang ti nagungar nga Apo (kitaen iti parapo 5). Ibilangyo ti panangbasa iti sumagmamano a pakaammuan maipapan kadagitoy nga isasarungkar iti Juan 20; 3 Nephi 11; ken Joseph Smith—Pakasaritaan 1:14–20. Ania ti masursuroyo maipapan iti Mangisalakan manipud kadagiti balikas ken tignayna kabayatan dagitoy a panagparang?

Agpokustayo iti Mangisalakan. “Ti nainkararagan a panagbasa iti ‘Ti Sibibiag A Cristo’ ket maipada iti panagbasa kadagiti pammaneknek da Mateo, Marcos, Lucas, Juan, ken dagiti propeta ti Libro ni Mormon. Papigsaennanto ti pammatiyo iti Mangisalakan ken tulongannakayo nga agtalinaed a nakapokus Kenkuana” (M. Russell Ballard,“Return and Receive,” Liahona,Mayo 2017, 65).

“Naisubli ti Priesthoodna ken ti Simbaanna.”

Kabayatan ti panagadalyo iti Doktrina ken Katulagan iti daytoy a tawen, naaddaankayo iti gundaway a nakasursuro iti ad-adu pay maipapan iti no kasano a “naipasubli ti priesthood ken ti Simbaan ti Mangisalakan.” Ania kadagitoy naipasubli a kinapudno wenno pagbatayan ti naipangpangruna a napnuan kaipapananna kadakayo? Ibilang ti panangrebyu iti sumagmamano a sumaganad a nasantuan a kasuratan a mangisuro maipapan iti Pannakaisubli: Doktrina ken Katulagan 1:17–23; 13; 20:1–12; 65; 110; 112:30–32; 124:39–42; 128:19–21. Utobenyo no kasano a matulongannakayo dagiti kinapudno ti naisubli nga ebanghelio a mangam-ammo ken agayat ken ni Jesucristo.

“Maysa nga aldaw agsublinto Isuna iti daga.”

Ti Paskua ket maysa a panawen a pananglagip iti aldaw a pannakayanak ni Jesucristo ken panangpadpadaan iti aldaw a yaaynanto manen. Ania ti masursuroyo maipanggep iti panagsublina manipud iti maikadua iti maudi a parapo ti “Ti Sibibiag a Cristo”? Mabalin pay nga ibilangyo ti panangbasa, panagkansion, wenno panangdengngeg kadagiti himno ti Paskua a mangisuro maipapan iti Maikadua a Yaay, kas iti “Joy to the World” wenno “It Came upon the Midnight Clear” (Hymns, dagiti num. 201, 207).

“Isu ti silaw, ti biag, ken ti namnama ti lubong.”

Iti maudi a parapo ti “Ti Sibibiag a Cristo,” ilistayo dagiti kababalin ken pangawag a naited para iti Mangisalakan. Ibilang ti panangbubos iti panawen a mangsursuro maipapan iti sumagmamano kadagitoy. Kas pagarigan:

Silaw: Kasano a maipada ni Jesucristo iti maysa a silaw? Mabalinyo nga ibilang ti agdrowing iti ladawan wenno mangala iti ladawan a, para kadakayo, mangibagi iti silaw nga itedna kadakayo. Ania ti mariknayo a makaparegta nga aramidenyo a mangibinglay iti silawna? (Kitaen met iti Juan 8:12; 3 Nephi 18:24; Doktrina ken Katulagan 50:24.)

Biag: Apay iti panagkunayo a ti biag ket nasayaat a balikas a mangiladawan ken ni Jesucristo? Iti ania a kaipapanan nga itedna kadakayo ti biag? Kasano a maiduma koma ti biagyo no awan Isuna ken ti ebangheliona? (Kitaen met iti Juan 10:10; 1 Taga Corinto 15:19–23; Doktrina ken Katulagan 66:2.)

Namnama: Ania ti namnamaenyo gapu ken ni Jesus ken ti ebangheliona? Adda kadi maysa a tao nga am-ammoyo a makarikna nga awanan iti namnma maipapan iti masakbayan? Utobenyo no kasano a maibinglayyo iti dayta a tao ti namnama a mariknayo ken ni Jesucristo. (Kitaen met iti Taga Roma 8:24–25; Ether 12:4; Moroni 7:41.)

Kitaen met iti Topics and Questions, “Jesus Christ,” Gospel Library.

“Agyamantayo iti Dios para iti awan kapadana a sagut[na].”

Iti “Ti Sibibiag a Cristo,” itudo dagiti Apostol iti Mangisalakan kas maysa a “sagut” a naggapu iti Nailangitan nga Amatayo. Batay iti no ania ti masarakanyo iti “Ti Sibbiag a Cristo,” kasano a makompletoyo daytoy a binatog: “Babaen ken ni Jesucristo, ited kaniak ti Dios dagiti sagut ti …” Utobenyo no ania ti maaramidanyo tapno ad-adda a naan-anay nga awatenyo dagitoy a sagut.

Kasano a naapektuan ti panagadalyo iti “Ti Sibibiag a Cristo” ti pammati ken ayatyo para iti Mangisalakan?

Kitaen met iti Russell M. Nelson, “Four Gifts That Jesus Christ Offers to You” (First Presidency Christmas devotional, Dis. 2, 2018), Gospel Library; “Dagiti naadaw manipud iti ‘The Living Christ: The Testimony of the Apostles’” (video), ChurchofJesusChrist.org.

Excerpts from "The Living Christ: The Testimony of the Apostles"

As special witnesses of Jesus Christ, the First Presidency and the Quorum of the Twelve shared their testimony of Christ by recording excerpts from the original document, "The Living Christ: The Testimony of the Apostles."

Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.

Dagiti Kapanunotan para iti Panangisuro kadagiti Ubbing

Mabalinko nga “ipaay ti pammaneknek[ko]” a kas panangrambak iti pannakaiyanak ni Jesus.

• Ibilangyo no kasano a mabalin a mayam-ammoyo kadagiti annakyo ti “Ti Sibibiag a Cristo.” Mabalin a matulonganyo ida a mangitudo iti nagan a Cristo iti paulo ken dagiti pirma ti Umuna a Panguluen ken Sangapulo-ket-dua. Mabalinyo nga ilawlawag a daytoy ti pammaneknekda ken ni Jesucristo a kayatda nga ibinglay iti lubong.

• Mabalinyo nga ikkan ti tunggal ubing iti ragup ti balikas manipud iti “Ti Sibibiag a Cristo” ket kiddawen kadakuada a mangbirok wenno mangidrowing iti ladawan dayta a ragup ti balikas. Kalpasanna mabalin a matulonganyo ida a mangbirok iti ragup ti balikas iti “Ti Sibibiag a Cristo.” Mabalinyo nga urnosen dagiti ladawan ken ragup ti balikas nga agbalin a maysa a libro.

• Ibinglayyo iti tunggal maysa no kasano a nagun-odyo ti pammaneknekyo maipapan ken ni Jesucristo. Nalabit a mabalinyo nga ipasa iti aglawlaw ti maysa a ladawan ti Mangisalakan ket agsisinnublatkayo a mangibinglay iti maysa a banag nga ammoyo maipapan Kenkuana (agraman dagiti kinapudno a maisuro iti “Ti Sibibiag a Cristo”).

“Isu a namagpagna a nagar-aramid iti naimbag.”

• Bayat ti panangbasayo ken dagiti annakyo iti maikadua a parapo ti “Ti Sibibiag a Cristo,” ibagayo kadakuada maipapan iti sumagmamano a banag nga inaramid ni Jesus. Mabalinyo pay a kitaen dagiti ladawan manipud iti biagna (kitaen iti panid ti aktibidad ken ti Libro ti Arte ti Ebanghelio). Awisenyo dagiti annakyo a mangisarita no ania ti ar-aramiden ti Mangisaklan kadagiti ladawan. Kasano a makapagserbitayo iti dadduma kas iti inaramidna? Mabalin a mangted kadakayo kadagiti kapanunotan dagiti video a “Light the World” iti Gospel Library.

“Isu ti silaw, ti biag, ken ti namnama ti lubong.”

• Tulonganyo dagiti annakyo nga agsapul kadagiti himno ti Paskua a mangibaga iti silaw, biag, ken namnama nga inyeg ditoy lubong ti pannakayanak ti Mangisalakan, kas iti, “O Little Town of Bethlehem” (Hymns, no. 208). Aggigiddan a kantaen dagiti himno, ket paibinglayyo kadagiti annakyo no kasano a nangyeg ni Jesus iti silaw, biag, ken namnama iti biagda.

“Agyamantayo iti Dios para iti awan kapadana a sagut ti nasantuan nga Anakna.”

• Ania dagiti naawattayo a sagut gapu ken ni Jesucristo? Nalabit a mabalinyo ken dagiti annakyo ti agsapul kadagitoy a sagut iti “Ti Sibibiag a Cristo” wenno iti maysa a kanta kas iti “He Sent His Son” (Children’s Songbook, 34–35). Kalpasanna, mabalinda a bungonen a sagut ti maysa a banag a mangibagi kadagita a sagut. Mabalinyo nga isingasing a luktan dagiti annakyo dagiti sagut iti Aldaw ti Paskua tapno matulonganda a manglagip iti Mangisalakan ken dagiti sagutna kadatayo.

Para iti ad-adu pay a kapanunotan, kitaen iti isyu ti magasin a Friend iti daytoy a bulan.