Detalye manipud iti Iti Amin a Maikari a Lallaki a Miembro, ni Emma Allebes

Disiembre 8–14: “Mamatikami”

Ti Pagannurotan ti Pammati ken Opisial a Palawag 1 ken 2

Manipud idi Umuna a Parmata ni Joseph Smith, intuloy ti Dios nga inwanwan ti Simbaanna babaen ti paltiing. Iti dadduma a kaso, inraman dayta a paltiing dagiti panagbalbaliw kadagiti paglintegan ken kannawidan ti Simbaan. Impakaammo dagitiOpisial a Palawag 1 ken2 daytoy a kita ti paltiing—maysa ti nangibanag iti panakaisardeng iti panagkallaysa iti ad-adu ngem maysa, ket ti maysa pay ti nangpabalin kadagiti bendision ti priesthood a sidadaan a magun-od dagiti tao ti amin a puli. Dagitoy a panagbalbaliw ket paset ti no ania ti kayat a sawen ti maaddaan iti “pudno ken sibibiag a simbaan” (Doktrina ken Katulagan 1:30), nga addaan iti pudno ken sibibiag a propeta, nga idauluan ti pudno ken sibibiag a Dios.

Ngem saan nga agbaliw ti agnanayon a kinapudno, nupay agbaliw ti pannakaawattayo iti daytoy. Ket no dadduma ti paltiing ket mangted iti nayon a lawag iti kinapudno. Ti Pagannurotan ti Pammati agserbi iti daytoy a panangilawlawag a panggep. Natibker ti pannakaipasdek ti Simbaan iti agnanayon a kinapudno ngem mabalin a dumakkel ken agbaliw “a maibatay iti pagayatan ti Apo, a mainugot iti kinamanangngaasina maibatay iti kasasaad dagiti annak ti tattao” (Doktrina ken Katulagan 46:15). Iti sabali a pannao, “Mamatikami iti amin nga impalgak ti Dios, amin nga ipalpalgakna, ken mamatikami nga adu pay ti ipalgakna a naindaklan ken napateg a banag maipapan iti Pagarian ti Dios” (Pagannurotan ti Pammati 1:9).

Dagiti Kapanunotan iti Panagsursuro iti Pagtaengan ken iti Simbaan

Ti Pagannurotan ti Pammati

Naglaon ti Pagannurotan ti Pammati kadagiti kinapudno a mainaig iti pundasion iti naisubli nga ebanghelio.

Panunotenyo daytoy a wagas ti panagadal iti Pagannurotan ti Pammati: Para iti tunggal pagannurotan ti pammati, mangaramid iti “mini-lesson” a mangilawlawag no ania ti patpatienyo. Mabalin nga iraman ti mini-lesson-yo ti mainaig a nasantuan a kasuratan, ladawan, himno wenno kanta dagiti ubbing, wenno personal a padas maipapan iti panagbiag iti kinapudno nga isuro ti pagannurotan ti pammati.

Ania dagiti pagdudumaan dagitoy a kinapudno iti relasionyo iti Nailangitan nga Amatayo ken ni Jesucristo? Kasano a pinasayaat ti Pagannurotan ti Pammati ti panagadalyo iti ebanghelio wenno nakatulong kadakayo a mangibinglay iti ebanghelio kadagiti dadduma?

Kitaen met iti Pangiwanwan iti Nasantuan a Kasuratan, “Pagannurotan ti Pammati,” Gospel Library; L. Tom Perry, “The Doctrines and Principles Contained in the Articles of Faith,” Liahona, Nob. 2013, 46–48; “Chapter 38: The Wentworth Letter,” iti Teachings of Presidents of the Church: Joseph Smith (2011), 435–47.

Pagannurotan ti Pammati 1:9; Opisial a Palawag 1 ken 2

Maiwanwan ti Simbaan ni Jesucristo babaen iti paltiing.

“Mamatikami nga adu pay ti ipalgak [ti Dios] a napateg ken naindaklan a banag a maipanggep iti Pagarian ti Dios” (Pagannurotan ti Pammati 1:9). Sipapanunot iti daytoy a pagbatayan, irebyu dagiti Opisial a Palawag 1 ken 2, ket sapulen dagiti balikas ken ragup ti balikas a mangpapigsa iti pammatiyo iti agtultuloy a paltiing. Kasano nga inapektuan dagitoy a paltiing ti biagyo? Kasano a nakatulongda iti panangdur-as iti aramid iti pagarian ti Nailangitan nga Ama?

Ania ti pakakitaan a makitayo a maidauluan ti Simbaan “babaen ti inspirasion ti Mannakabalin a Dios” iti agdama? (Opisial a Palawag 1). Nalabit a mabalinyo nga irebyu ti maysa wenno ad-adu pay dagiti kaudian a mensahe ti sapasap a komperensia, a sapsapulen no kasano nga iwanwanwan ti Apo ti Simbaanna—ken ti biagyo. Ti kaudian a mensahe manipud iti Presidente ti Simbaan ket mabalin a nasayaat a pangrugian.

Ania ti maaramidyo no dakayo wenno ti maysa nga ay-ayatenyo ket mangikarkarigatan a makaawat wenno mangawat iti isuro ti Apo babaen kadagiti propetana? Apay nga agyamankayo iti maysa a propeta?

Kitaen met iti Amos 3:7; 2 Nephi 28:30; Allen D. Haynie, “A Living Prophet for the Latter Days,” Liahona, Mayo 2023, 25–28; Topics and Questions, “Prophets,” Gospel Library; “We Thank Thee, O God, for a Prophet,” Hymns, no. 19.

Opisial a Palawag 1

Nasken nga agtultuloy a dumur-as ti aramid ti Dios.

Iti “Dagiti Naadaw manipud iti Tallo a Mensahe ni Presidente Wilford Woodruff maipapan iti Manipesto” (iti gibus ti Opisial a Palawag 1), ania dagiti gapu a nangtedan ti propeta para iti Apo tapno aggibus ti kannawidan a panagkallaysa iti ad-adu ngem maysa? Ania ti isuro kadakayo daytoy maipapan iti aramid ti Dios?

Para iti ad-adu pay nga impormasion maipapan iti nagtaudan ti pakasaritaan ti Opisial a Palawag 1, kitaen iti Saints, 2:602–15; “The Messenger and the Manifesto,” iti Revelations in Context, 323–31; Topics and Questions, “Plural Marriage and Families in Early Utah,” Gospel Library.

Wilford Woodruff, ni H. E. Peterson

Opisial a Palawag 2

Makapagtalekak iti Apo, uray no awanantayo iti naan-anay a pannakaawat.

Ditayo ammo no apay a ti ordinasion iti priesthood ken ordinansa iti templo ket saan a magun-odan dagiti miembro ti Simbaan a nagtaud iti Africa iti sumagmamano a panawen. Uray idi maipasangoda kadagiti narigat a di masungbatan a saludsod maipapan iti dayta nga annuroten, adu a Nangisit a Santo iti Ud-udina nga Aldaw ti nagtalek iti Apo (kitaen iti Proverbios 3:5) ket nagtalinaedda a napudno Kenkuana iti unos ti panagbiagda. Mabalin a mangparegta kadakayo ti panagsursuro maipanggep iti pammati ken padpadasda. Dagitoy ti sumagmamano a pakaammuanda, a masarakan iti: history.ChurchofJesusChrist.org:

• “Jane Elizabeth Manning James”

• “In My Father’s House Are Many Mansions” (estoria ni Green Flake)

• “You Have Come at Last” (estoria ni Anthony Obinna)

• “Break the Soil of Bitterness” (estoria ni Julia Mavimbela)

• “I Will Take It in Faith” (estoria ni George Rickford)

• “Long-Promised Day” (estoria ni Joseph W. B. Johnson)

Bayat ti panangbasayo iti Opisial a Palawag 2, ania ti masursuroyo maipapan iti proseso ti Apo a mangiwanwan kadagiti annuroten ti Simbaanna? Utobenyo no kasano a nasursuroyo ti agtalek iti Apo uray no awanankayo iti naan-anay a pannakaawat.

Kitaen met iti 2 Nephi 26:33; “Witnessing the Faithfulness,” iti Revelations in Context, 332–41; Topics and Questions, “Race and the Priesthood,” Gospel Library; Ahmad Corbitt, “A Personal Essay on Race and the Priesthood,” paset 1–4, history.ChurchofJesusChrist.org; BeOne.ChurchofJesusChrist.org.

OK laeng nga isao ti “Diak ammo.” Idinto a nasken nga aramidenyo ti amin a kabaelanyo a makatulong kadagiti tao a sursuruanyo a mangsungbat kadagiti saludsodda maipapan iti ebanghelio, saan a namnamaen ti Apo nga ammoyo ti amin a banag. No saanyo nga ammo no kasano a sungbatan ti maysa a banag, akuenyo daytoy. Kalpasanna itudoyo kadagiti agad-adal ti naipalgak a doktrina, ket iburayyo ti napudno a pammaneknek maipapan iti no ania ti ammoyo.

Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.

Dagiti Kapanunotan para iti Panangisuro kadagiti Ubbing

Ti Pagannurotan ti Pammati

Mamatiak iti ebanghelio ni Jesucristo.

• Ibilangyo ti panangsapul ken panangkanta kadagiti himno wenno kanta dagiti ubbing a makatulong kadagiti annakyo a makaawat iti maysa wenno ad-adu pay iti Pagannurotan ti Pammati. Nalabit makatulongda kadakayo a mangpili kadagiti himno ken kanta. Tulonganyo dagiti annakyo a mangkita no kasano a mainaig dagiti kanta iti Pagannurotan ti Pammati.

• Mabalinyo ken dagiti annakyo ti agtitinnulong a mangisurat kadagiti saludsod a mabalin nga adda kadagiti tao maipapan iti ebanghelio ni Jesucristo wenno ti Simbaanna. Kalpasanna mabalinyo ti agtitinnulong a mangsungbat kadagita a saludsod babaen ti panangusar iti Pagannurotan ti Pammati. Ania pay ti maaramidantayo no addaantayo kadagiti saludsod maipapan iti ebanghelio?

Pagannurotan ti Pammati 1:9; Opisial a Palawag 1 ken 2

Iwanwan ti Apo ti Simbaanna babaen ti propetana.

• Tapno matulonganyo dagiti annakyo a makaawat iti maikasiam a pagannurotan ti pammati, nalabit a mabalinyo nga ited kadakuada ti maysa a set ti nasantuan a kasuratan ken ladawan ti sibibiag a propeta (wenno maysa a kaudian nga isyu ti komperensia ti Liahona). Idawatyo kadakuada a mangitag-ay kadagiti nasantuan a kasuratan bayat ti panangbasayo kadagiti balikas nga “amin nga impalgak ti Dios” ken ti ladawan wenno ti magasin no basaenyo ti “amin nga ipalpalgakna ita” (Pagannurotan ti Pammati 1:9). Apay a kasapulantayo dagiti agpada a nagkauna ken moderno a propeta?

• Mabalin a masursuro dagiti annakyo no kasano nga iwanwannatayo dagiti balikas dagiti propeta babaen ti panangsurot kadagiti instruksion nga agaramid iti maysa a banag, kas iti taraon wenno ay-ayam. Mabalinyo nga idilig daytoy kadagiti instruksion nga ited kadatayo ni Jesucristo babaen ti propeta. Ania ti sumagmamano a banag nga insuro kadatayo ti Apo babaen ti sibibiag a propeta iti agdama?

Awagan ti Dios dagiti propeta a mangidaulo iti Simbaanna.

Dagiti Opisial a Palawag 1 ken 2

Tulongannatayo dagiti propeta a mangammo iti pagayatan ti Nailangitan nga Ama.

• Nalabit a ti pannakakita no kasano a mainaig dagiti nagkauna a nasantuan a kasuratan iti moderno a paltiing ket makatulong kadagiti annakyo a makaawat kadagiti Opisial a Palawag. Mabalinyo nga idawat kadakuada a mangbasa iti Dagiti Aramid 10:34–35 ken Jacob 2:27–30 ket awisenyo ida a mangikeddeng no ania a nasantuan a kasuratan ti mainaig iti Opisial a Palawag 1 (a nangibanag iti panangpasardeng iti panagkallaysa iti ad-adu ngem maysa) ken mainaig iti Opisial a Palawag 2 (a nangipakaammo a sidadaan a magun-od dagiti bendision ti priesthood ken dagiti ordinansa iti templo dagiti tao iti amin a puli). Paneknekanyo nga ipalgak ti Apo ti pagayatanna kadagiti nagkauna ken moderno a propeta.

Para iti ad-adu pay a kapanunotan, kitaen iti isyu ti magasin a Friend iti daytoy a bulan.