Maysa a Sibibiag a Propeta para iti Ud-udina nga Aldaw

Ni Elder Allen D. Haynie

Ti Pitupulo

Pinili ti Ama iti Langit ti pagtuladan ti panangipalgak iti kinapudno iti annakna babaen ti maysa a propeta.

Idi ubingak pay, pagay-ayatko ti Sabado ta kasla adbentura ti amin nga inaramidko iti dayta nga aldaw. Ngem ania man nga aramidek, kanayon nga umun-una ngem iti kapatgan iti amin—ti panagbuya iti cartoon iti telebision. Maysa a kasta nga agsapa ti Sabado, idi nagtakderak iti abay ti telebision ken pinagsusublatko dagiti channel, natakuatak a ti cartoon a ninamnamak a masarakan ket nasukatan iti brodkast ti sapasap a komperensia ti Ti Simbaan ni Jesucristo dagiti Santo iti Ud-udina nga Aldaw. Bayat ti panangkitak iti telebision ken panaglidayko nga awan ti cartoon, nakitak ti ubanan a lalaki a nakaterno ken kurbata a nakatugaw.

Adda naiduma kenkuana, isu a dinamagko iti inauna a manongko, “Siasino dayta?”

Kinunana, “Dayta ni President David O. McKay; maysa a propeta.”

Malagipko nga adda nariknak ken uray kaskasano naammuak a maysa isuna a propeta. Kalpasanna, gapu ta ubingak a naayat iti cartoon, binaliwak ti channel. Ngem diak pulos nalipatan ti nariknak bayat dayta ababa, di ninamnama a kanito ti paltiing. Babaen iti propeta, no dadduma kasapulan laeng ti apagkanito a mangammo.¹

Ti pannakaammo babaen ti paltiing nga adda sibibiag a propeta ditoy daga balbaliwanna ti amin.² Daytoy ti gapu iti maysa a di interesado iti debate no kaano nga agsasao ti propeta kas mammadto wenno no nainkalintegan ti maysa a mapili iti panangsupring iti balakad ti propeta.³ Ti kasta a naipalgak a pannakaammo awisenna ti maysa nga agtalek iti balakad ti sibibiag a propeta, nupay ditay naan-anay a maawatan.⁴ Ngamin, pinili ti naan-anay ken naayat nga Ama idiay Langit ti pagtuladan ti panangipalgak iti kinapudno iti annakna babaen ti propeta, maysa a di pulos nagkalikagum iti kasta a sagrado nga awag ken dina kasapulan ti tulongtayo a mangammo iti bukodna a kinaimperpekto.⁵ Ti propeta ket maysa a tao a personal nga insagana, inawagan, inatur, pinaregta, tinubngar, pinasanto, ken sinuportaran ti Dios.⁶ Dayta ti gapu a ditay pulos agpeggad iti naespirituan iti panangsurot iti balakad ti propeta.

Kayattayo man wenno saan, napilitayo amin iti sumagmamano a wagas iti biag sakbay ti daga tapno mayanak kadagitoy ud-udina nga aldaw. Adda dua a kinapudno a mainaig kadagiti ud-udina nga aldaw: Ti umuna a kinapudno ket maipasdek manen ti Simbaan ni Cristo ditoy daga. Ti maikadua a kinapudno ket talaga a mapannubokto dagiti banag. Ipalgak ti scriptures nga iti maudi nga aldaw addanto “maibaon a napigsa a bagyo ti uraro a mangdadael kadagiti mula ti daga,”⁷ salot,⁸ “gubat ken damdamag ti gubat, ket mariribukanto ti sibubukel a lubong, … ket rumsuanto ti basbasol.”⁹

Idi ubingak pay, dagita a padto ti maudi nga al-aldaw ti nangbutbuteng ken nangtignay kaniak tapno agkararagak a di koma dumteng ti Maikadua a Yaay iti unos ti biagko—nga adda balligi a mainayonko. Ngem ita, ikararagko ti kasungani, uray no masigurado dagiti naipadto a karit,¹⁰ gapu ta inton agsubli ni Cristo nga agturay, amin dagiti pinarsuana “agiddanto a sitatalged.”¹²

Dagiti agdama a kasasaad iti lubong ti nakaigapuan ti panagbuteng ti dadduma. Kas natulagan nga annak ti Dios, ditay nasken a kalikaguman daytoy wenno dayta tapno maammuan no kasano ti aglayag kadagitoy nariribuk a panawen. Nasken a ditay agbuteng.¹² Masarakan kadagiti balikas ti sibibiag a propeta ti doktrina ken pagbatayan a nasken a surotentayo tapno agbiagtayo a naespirituan ken agibtur iti bagi.¹³ Dayta ti gapu nga impakdaar ni Presidente M. Russell Ballard a “saan a bassit a banag … ti kaadda ti propeta ti Dios iti baettayo.”¹⁴

Pinaneknekan ni President Russell M. Nelson a “ti nabayagen a naipasdek a pagtuladan ti Dios a mangisuro iti annakna babaen dagiti propeta ket mangipanamnama kadatayo a bendisionanna ti tunggal propeta ken bendisionannanto dagiti dumgneg iti balakad ti propeta.”¹⁵ Isu a ti tulbek ket suroten ti sibibiag a propeta.¹⁶ Kakabsat, saan a kas iti daan a komiks ken klasik a kotse, saan nga agbalin a napatpateg dagiti pannursuro ti propeta no agbayag. Dayta ti gapu a ditay koma usaren dagiti balikas dagiti napalabas a propeta tapno ilaksid dagiti pannursuro dagiti sibibiag a propeta.¹⁷

Magustuak dagiti pangngarig nga inusar ni Jesucristo a mangisuro kadagiti pagbatayan ti ebanghelio. Kayatko nga ibinglay kadakayo ti maysa a kita ti pangngarig iti pudno a biag ita nga agsapa.

Maysa nga aldaw nagnaak a simrek iti kafeteria iti headquarter ti Simbaan tapno mangan iti pangngaldaw. Kalpasan a nakaalaak iti bandeha ti taraon, simrekak iti panganan ket nadlawko ti maysa a lamisaan a nakatugaw amin a tallo a miembro ti Umuna a Panguluen, agraman ti maysa a bakante a tugaw. Ti diak pannakatalged ti gapu ti alisto a panagliklikko nga umadayo iti dayta a lamisaan, ket kalpasanna nangngegko ti timek ti propetatayo, ni Presidente Russell M. Nelson, a kunana, “Allen, adda bakante a tugaw ditoy. Umayka makitugaw kadakami.” Ket inaramidko.

Iti dumani malpaskami a mangan, nasdaawak a nakangngeg iti napigsa a karasakas, ket idi a nakitak nga impatakder ni Presidente Nelson ti plastik a botelia ti danumna sa pinitpitna ket sinuktanna ti kalub.

Kalpasanna, dinamag ni Presidente Dallin H. Oaks ti saludsod a kayatko nga isaludsod, “Presidente Nelson, apay a pinitpitmo ti plastik a botelia ti danummo?”

Insungbatna, “Pagbalinenna a nalaklaka dagiti agiggem kadagiti ma-recycle a materiales gapu ta saan a kas iti kaadu ti espasio iti recycling container.”

Bayat ti panangutobko iti dayta a sungbat, nangngegko manen ti isu met laeng a karasakas nga uni. Kimmitaak iti kannawanko, ket pinitpit ni Presidente Oaks ti plastik a botelia ti danumna a kas ken Presidente Nelson. Sa adda nangngegak a karasakas iti kannigidko, ket pitpitpiten ni Presidente Henry B. Eyring ti plastik a botelia ti danumna, nupay sursurotenna ti sabali nga estratehia ti panangaramidna a paidda ti botelia, a kasapulan ti ad-adu a panagkarigatan ngem ti botelia a deretso nga agpangato. Gapu ta nadlawna daytoy, siaayat nga impakita kenkuana ni Presidente Nelson ti teknik a mangideretso iti botelia tapno nalaklaka a mapitpit.

Iti dayta, inasitgak ni Presidente Oaks ket siuulimek a dinamagko, “Ti kadi panangpitpit iti plastik a botelia ti danummo ket baro a kasapulan ti kafeteria iti recycle?”

Simmungbat ni Presidente Oaks, a siisem iti rupana, “Bueno, Allen, kasapulan a surotem ti propeta.”

Agtalekak a di ipakdaar ni Presidente Nelson ti dadduma a baro a doktrina a naibatay iti recycle iti kafeteria iti dayta nga aldaw. Makasursurotayo iti dagus a sungbat¹⁸ da Presidente Oaks ken Presidente Eyring iti pagwadan ni Presidente Nelson ken kinamanagtulong ni Presidente Nelson kadagiti nairaman iti nasaysayaat a wagas.¹⁹

Mano a tawenen ti naglabas, imbinglay ni Elder Neal A. Maxwell ti sumagmamano a pammaliiw ken balakad a naimpadtuan iti punto maipapan iti aldawtayo:

“Kadagiti sumaganad a bulan ken tawen, dagiti pasamak ket nalabit a kasapulan ti tunggal miembro nga ikeddengna no surotenna wenno saan ti Umuna a Panguluen. Narigrigatto kadagiti miembro ti agkedked a mangpili iti dua nga opinion. …

“… Mangibatitayo iti rekord tapno nalawag dagiti pili, a bay-an nga aramiden ti dadduma ti kayatda no maawatda ti balakad ti propeta. …

“Kinuna ni Jesus nga idi nagrusing ti bulong dagiti kayo ti igos, ‘asidegen ti kalgaw.’ … Kastoy a napakdaaran nga umay kadatayo ti kalgaw, ditay ngarud agreklamo iti pudot!”²⁰

Umad-adu ti tumantanor a kaputotan iti panawen nga ad-adu dagiti bulong ti igos ken napudpudot. Dayta a kinapudno ti mangipataw iti nadagdagsen a pagrebbengan iti sigud a tumantanor a kaputotan, nangruna no maipapan iti panangsurot iti balakad ti propeta. No di ikankano dagiti nagannak ti balakad ti sibibiag a propeta, dida laeng mapukaw dagiti naikari a bendision para iti bagida no di ket ad-adda pay a nakalkaldaang nga isuroda iti annakda nga awan pateg ti sao ti propeta wenno panangpili a suroten wenno saan ti balakad ti propeta a di maseknan iti resulta ti naespirituan a malnutrision.

Naminsan a napaliiw ni Elder Richard L. Evans: “Sibibiddut a marikna ti dadduma a nagannak a makapagrelaks bassit no maipapan iti galad ken tunos … a mapalag-anda bassit dagiti pamunganayan a dida apektuan ti pamiliada wenno ti masakbayan ti pamiliada. Ngem, no kumayakay ti maysa a nagannak, nalabit nga ad-adda pay a kumayakay dagiti annak.”²¹

Kas kaputotan nga addaan sagrado a rebbengen a mangisagana iti tumantanor a kaputotan para iti naipadto nga akemna iti ud-udina nga aldaw,²² akem a nasken a matungpal iti kangitingitan ti impluensia ti kabusor,²³ ditay makapagbalin a pagtaudan ti tikaw maipapan iti pateg ti panagsurot iti balakad ti propeta. Dayta a mismo a balakad ti mangpalugod iti tumantanor a kaputotan a makakita “iti kabusor bayat ti kaaddana pay laeng iti adayo; kalpasanna [makapagsaganada]” a mangsarked iti darup ti kabusor.²⁴ Dagiti kasla babassit a pannakaisiasitayo, naulimek a panangbaybay-a, wenno naisawang a kritisismo kas sungbat iti balakad ti propeta ket makapagbunga iti napeggad a pannagnatayo laeng iti asideg ti dana ti katulagan; ngem no padaklen ti kabusor iti biag ti tumantanor a kaputotan, maimpluensiaan ida dagiti kasta a tignay a panawanda dayta a dana. Ti kasta a bunga ket nangato unay ti gatadna.²⁵

Marikna ti dadduma kadakayo a nagkurangkayo iti panagreggetyo a mangsurot iti balakad ni Presidente Russell M. Nelson. No kasta, ngarud agbabawikayo, rugian manen a suroten ti balakad ti propeta a pinili ti Dios. Lipatenyo ti pannakasinga kadagiti cartoon ket agtalekkayo iti pinulotan ti Apo. Agrag-okayo ta maminsan manen nga “adda propeta idiay Israel.”²⁶

Uray no dikayo sigurado, masaksiak a maibturantayo ti pudot dagiti ud-udina nga aldaw ken uray pay agtalinaed kadagitoy. Datayo dagiti Santo iti ud-udina nga aldaw, ken naindaklan nga aldaw dagitoy. Naggagartayo nga umay ditoy daga itoy a panawen, nga agtalek a ditay mabaybay-an a madaleb no maipasangotayo iti umad-adu a nasipnget ken makatikaw nga angep ti kabusor²⁷ ngem ketdi umawat iti balakad ken direksion ti maysa a napusgan nga agsao kadatayo ken iti intero a lubong, “Kastoy ti kuna ti Apo a Dios.”²⁸ Iti sagrado a nagan ti propeta a pinatanor ti Dios, ti Nasantuan ti Israel,²⁹ nga isu ni Jesucristo, amen.

Dagiti Nagadawan

1. Nabiit pay nga inawis ni Presidente Russell M. Nelson dagiti estudiante iti Brigham Young University a maaddaan iti isu met laeng a personal a paltiing a padas: “Saludsodenyo iti Nailangitan nga Amayo no pudno a dakami dagiti apostol ken propeta ti Apo. Saludsodenyo no nakaawatkami iti paltiing maipapan iti daytoy ken dadduma pay a banag” (“Ti Ayat ken Linteg ti Dios” [Brigham Young University devotional, Sept. 17, 2019], speeches.byu.edu). Kitaen met iti Neil L. Andersen, “The Prophet of God,” Liahona, Mayo 2018, 26: “Addaantayo iti pribilehio kas Santo iti Ud-udina nga Aldaw nga umawat iti personal a saksi a ti awag ni Presidente Nelson ket naggapu iti Dios.” Ti estoria ti pannakapasurot ni Alma manipud iti panagdengngegna ken propeta Abinadi ket mangipaay iti nayon a pammaneknek a ti paltiing maipapan iti maysa a propeta ket magun-od kadatayo amin (kitaen iti Mosiah 13:5; 17:2).

2. “Adda man propetatotayo wenno awanantayo; ken ti kaadda ti propeta, adda kadatayo ti amin a banag; (Gordon B. Hinckley, “We Thank Thee, O God, for a Prophet,” Ensign, Ene. 1974, 122).

3. “Nangrugida a di mamati iti espiritu ti padto ken iti espiritu ti paltiing; ket dagiti panangukom ti Dios ti nangmatmat kadakuada iti rupada” (Helaman 4:23; kitaen met iti Doktrina ken Katulagan 11:25). “Agkantatayo ken kanayon nga inaramidtayo dayta, ‘Agyamankami Kenka, O Dios, gapu iti Propeta a mangiwanwan kadakami kadagitoy ud-udina nga aldaw.’ Adu unay dagiti [rebbeng] a mangikabil iti postscript iti dayta ket kunada: ‘No la ket ta iwanwannatayo a maibagay kadagiti bukodtayo a pagayatan ken kadagiti bukodtayo a kapritso’” (Teachings of Presidents of the Church: Heber J. Grant [2002], 80).

4. “No dadduma makaawattayo iti balakad a ditay maawatan wenno kasla saan nga agaplikar kadatayo, uray kalpasan ti naannad a panagkararag ken panagpanunot. Diyo iwaksi ti balakad, no di ket ikutanyo a nasayaat. .No adda nagtalkanyo a nangyawat kadakayo iti kasla awan sabali no di ti darat nga addaan kari a naglaon dayta iti balitok, mabalin a nainsiriban nga iggamanyo dayta iti imayo iti apagbiit, nga iyugyugyogyo daytoy a siaannad. Tunggal inaramidko dayta babaen ti balakad ti maysa a propeta, kalpasan ti sumagmamano a panawen nangrugin nga agparang dagiti balitok a flakes ket nagyamanak” (Henry B. Eyring, “Finding Safety in Counsel,” Ensign, Mayo 1997, 26; kitaen met iti 3 Nephi 1:13; Doktrina ken Katulagan 1:14).

5. Kitaen iti 2 Nephi 4:17–18. “Saandak a babalawen gapu kadagiti pagkurangak, wenno ti amak, gapu iti pagkuranganna,… ngem ketdi agyamankayo iti Dios nga isu ti nangiparang kadakayo iti pagkuranganmi, tapno masursuroyo ti agbalin a nasirsirib ngem dakami” (Mormon 9:31).

6. Kitaen iti Doktrina ken Katulagan 3:6–8; kitaen met iti Doktrina ken Katulagan 93:47.

7. Doktrina ken Katulagan 29:16.

8. Kitaen iti Doktrina ken Katulagan 84:97; kitaen met iti Doktrina ken Katulagan 87:6.

9. Doktrina ken Katulagan 45:26, 27.

10. Kitaen iti Doktrina ken Katulagan 1:38.

11. Oseas 2:18. “Ta ipalgakkonto ti bagik manipud iti langit nga addaan bileg ken naindaklan a dayag, nga adda amin dagiti pangen sadiay, ket makipagnaed iti kinalinteg kadagiti tao iti daga iti sangaribu a tawen, ket saanto a tumakder dagiti nadangkes” (Doktrina ken Katulagan 29:11).

12. Kitaen iti 1 Nephi 22:16–17; kitaen met iti Doktrina ken Katulagan 59:23.

13. “Ta adtoy, saanda a namati kadagiti balikas dagiti propeta. Gapuna, no agnaed ti amak iti dayta a daga kalpasan ti naibilin nga ipapanawna adtoy, mapukawto met” (1 Nephi 3:18; kitaen met iti 2 Nephi 26:3; Doktrina ken Katulagan 90:5).

14. M. Russell Ballard, “His Word Ye Shall Receive,” Liahona, Hulio 2001, 65.

15. Russell M. Nelson, “Ask, Seek, Knock,” Liahona, Nob. 2009, 82. “Awan ti tao a naragragsak ngem iti panagtulnog iti balakad ti sibibiag a mammadto” (The Teachings of Lorenzo Snow, ed. Clyde J. Williams [1996], 86).

16. “Kumitakayo kadagidiay mangidadaulo iti Simbaan ita, wenno inton bigat, ket ituladyo ti biagyo kadakuada imbes nga agtalinaedkayo no kasano ti panagkita wenno panagpanunot wenno panagsao dagiti nagkauna a propeta” (The Teachings of Harold B. Lee [1996], 525).

17. Naminsan napaliiw ni Presidente Spencer W. Kimball a “dagidiay mangarkos kadagiti tanem dagiti natay a propeta mangrugida itan babaen ti panangbato kadagiti sibibiag” . (The Teachings of Spencer W. Kimball, ed. Edward L. Kimball [1982], 462). “Ti kapatgan a balikas a mabalintayo a denggen, utoben, ken suroten ket isu dagiti naipaltiing babaen iti sibibiag a propetatayo” (Ronald A. Rasband, “The Things of My Soul,” Liahona, Nob. 2021, 40).

18. “No mangngegtayo ti balakad ti Apo a nayebkas babaen kadagiti balikas ti Presidente ti Simbaan, positibo ken madagdagus koma ti sungbattayo” (M. Russell Ballard, “His Word Ye Shall Receive,” Liahona, Hulio 2001, 65).

19. Ti Simbaan ni Jesucristo dagiti Santo iti Ud-udina nga Aldaw ket kanayon nga idadauluan dagiti sibibiag a propeta ken apostol. Nupay mortal ken maipaulog iti nataoan a kinaimperpekto, napaltiingan dagiti katulongan ti Apo a tumulong kadatayo a mangliklik kadagiti lapped a mamagpeggad iti biag iti naespirituan ken tumulong kadatayo a lumasat a sitatalged iti mortalidad agingga iti maudi, ultimo, nailangitan a destinasiontayo” (M. Russell Ballard, “God Is at the Helm,” Liahona, Nob. 2015, 24).

20. Neal A. Maxwell, “A More Determined Discipleship,” Ensign, Peb. 1979, 69, 70.

21. Richard L. Evans, “Foundations of a Happy Home,” iti Conference Report, Okt. 1964, 135–36.

22. Kitaen iti Doktrina ken Katulagan 123:11; kitaen met iti Robert D. Hales, “Our Duty to God: The Mission of Parents and Leaders to the Rising Generation,” Liahona, Mayo 2010, 95–98.

23. Kitaen iti Doktrina ken Katulagan 52:14.

24. Doktrina ken Katulagan 101:54.

25. Kitaen iti Mosiah 26:1–4.

26. 2 Ar-ari 5:8.

27. “Imdengamto amin a balikasna ken bilbilinna nga itednanto kenka bayat ti panangawatna kadakuada,”… ta babaen ti panangaramidmo kadagitoy a banag … paksiatento ti Apo a Dios dagiti bileg ti kasipngetan iti imatangmo, ket padayyegennanto dagiti langit nga agpaay iti pagimbagam, ken iti dayag ti naganna” (Doktrina ken Katulagan 21: 4, 6). “Awan ti tao a nangsurot kadagiti pannursuro wenno immawat iti balakad wenno mamagbaga manipud iti daydiay agtakder kas pannakabagi ti Apo” (Doctrines of Salvation: Sermons and Writings of Joseph Fielding Smith, ed. Bruce R. McConkie [1998], 243).

28. Ezequiel 3:27. “Ta maawatmonto ti balikasna, a kasla agtaud iti ngiwatko, iti amin a kinaanus ken pammati” (Doktrina ken Katulagan 21:5).

29. Kitaen iti 1 Nephi 22:20–21; kitaen met iti 3 Nephi 20:23.