Mabalinna ti Mangagas Kaniak!
Mayaramat ti bileg ti Mangisalakan a mangagas ken mangsubbot kadagiti aksidente a biddut, nakapuy a pangngeddeng, karit, ken pannubok iti tunggal kita—ken kasta met kadagiti basoltayo.
Ikari ni Moroni a no basaentayo ti Libro ni Mormon ket kalpasanna damagentayo iti Dios nga Agnanayon nga Ama, a naimpusuan, addaan iti pudno a panggep, addaan iti pammati ken Cristo no pudno daytoy, iparangarang ti Dios ti kinapudnona babaen ti pannakabalin ti Espiritu Santo.1 Minilion a tattao ti nangyaplikar iti daytoy a kari ken nakaawat iti makapatalged a saksi ti Pannakaisubli ti pakabuklan ti ebanghelio ni Jesucristo.
Balakadannatayo ni Moroni, a basaentayo ti Libro ni Mormon, tapno “manglagip no kasano ti kinamanangngaasi ti Apo iti annak ti tao, manipud iti pannakaparsua ni Adan agingga itoy a panawen, … ket usigen iti puspusotayo.”2 Dagiti estoria ken pannursuro iti Libro ni Mormon ti mangipalagip ken mangpaneknek iti ayat, kinamanangngaasi, ken asi ti Mangisalakan.
Pimmusay ni tatangko idi Abril 2013. Bayat ti panagsaganak nga agsao iti pumponna, naamirisko no kasano a naparaburanak a mangammo ken mangayat iti paboritona a nasantuan a kasuratan. Imbinglayna ida iti panaguummong ti pamilia, ken imbasana ida idi kasapulak ti balakad, pannarabay wenno pangpapigsa iti pammatik Nangngegko nga imbinglayna ida kadagiti bitla ken annongen. Di laeng nga am-ammok ida, ngem malagipko pay laeng ti timekna ken ti naespirituan a riknak idi ibinglayna ida. Babaen ti panangibinglay kadagiti nasantuan a kasuratan ken rikna, tinulongannak ni tatang a nangipasdek iti natibker a pundasion ti pammati ken ni Apo Jesucristo.
Nangnangruna a pagay-ayat ni tatangko ti pakaammuan ti isasarungkar ti Mangisalakan iti tattao ni Nephi.3 Daytoy ti sagrado a pakaammuan ti nagungar ken naitan-ok nga Apo Jesucristo. Ininumnan ti napait a kopa ket sinagabana ti amin tapno saantayo nga agsagaba no agbabawitayo.4 Simmarungkar iti lubong dagiti espiritu ken binukelna ti pannakaikasaba ti ebanghelio sadiay.5 Nagungar Isuna manipud kadagiti natay, ket kaduana ken immawat kadagiti bilin manipud iti Ama a mangibinglay iti nasantuan a kasuratan kadagiti Nephite a mangbendision kadagiti sumaruno a kaputotan.6 Naitan-ok ken addaan iti amin nga agnanayon a bileg ken kabaelanna. Makasursurotayo iti tunggal detalye dagiti pannursurona.
Iti 3 Nephi 11, mabasatayo no kasano a bimmaba ti Mangisalakan iti langit tapno isurona dagiti Nephite nga Isu ni Jesucristo, a pinaneknekan dagiti propeta nga umayto ditoy lubong. Impakdaarna nga Isu ti Silaw ti Lubong ken indaydayawna ti Ama iti panangawatna iti basbasol ti lubong. Inawisna dagiti tao nga umay nga idapadapda dagiti imada iti bakrangna, ken riknaenda ti lamma ti lansa iti ima ken sakana; Kayatna a maammuanda nga Isu ti Dios ti Israel a napapatay gapu iti basbasol ti lubong. Siraragsak a simmungbat dagiti tao, a saggaysa a rimmuar agingga a nakitada amin ken nariknada a pudno nga Isu, a maipapan kenkuana insurat dagiti propeta a rumbeng nga umay.7
Insuro ni Jesus dagiti Nephite maipapan iti kinapateg ti panagbabawi, maipapan iti panagbalin a kas iti bassit nga ubing, ken maipapan iti kasapulan a panagbuniag babaen ti maysa nga addaan iti turayna. Kalpasanna, insurona ti adu a doktrina nga ad-adalentayo ita a tawen iti Baro a Tulag.
Iti 3 Nephi 17, mabasatayo nga imbaga ni Jesus kadagiti tao a panawenen tapno mapan iti Ama ken kasta met nga ipakitana ti Bagina kadagiti napukaw a tribu ti Israel .8 Idi iturongna dagiti matana iti ummong, nadlawna nga agsangsangitda, a sititibker a kumitkitada Kenkuana a kasla kiddawenda Kenkuana nga agtalinaed iti napapaut pay bassit.9
Agpada a makasagid rikna ken makaisuro ti sungbat ti Mangisalakan kadagiti Nephite Kinunana, “Adtoy, umukuok ti asik kadakayo.”10
Patiek a ti panangngaasina ket ad-adda nga amang ngem sungbat kadagiti lua dagiti tao. Kasla makitana ida babaen kadagiti mata ti pangsubbot a sakripisiona. Nakitana ti tunggal ut-ot, rigat, ken sulisogda. Nakitana dagiti sakitda. Nakitana dagiti kinakapuyda, ket ammona manipud iti napalalo a panagsagabana idiay Getsemani ken idiay Golgota no kasano a tulonganna ida segun iti kinakapuyda.11
Kasta met, no kumita kadatayo ti Mangisalakantayo a ni Jesucristo, makitana ken maawatanna ti saem ken dadagsen dagiti basoltayo. Makitana dagiti bisio ken karittayo. Makitana dagiti kagumaan ken rigattayo iti ania man a kita—ket napno iti panangngaasina kadatayo.
Simmaruno ti naayat nga awisna kadagiti Nephite: “Adda kadi masakit kadakayo? Yasidegyo ida. Adda kadi kadakayo lugpi, wenno bulsek, wenno pilay, wenno pukol, wenno agkukutel, wenno napakapsutan, wenno umel, wenno marigatan iti uray ania a kita? Yasidegyo ida ta agasak, gapu ta adda asik kadakayo; napno ti lalaemko iti panangngaasi.”12
Ket immasideg dagiti tao “ken dagiti amin a marigatan iti ania man a kita ket inagasanna ida tunggal maysa bayat ti yaasidegda kenkuana.”13
Idi 1990 agnanaedkami idi iti bassit nga ili ti Sale, idiay Victoria, Australia. Siraragsak nga okupadokami kadagiti panagkumit iti pamilia, Simbaan, ken trabaho. Iti napintas a Sabado ti kalgaw sakbay la unay ti Paskua, inkeddengmi ti agpasiar iti parke ken iti paboritomi nga aplaya. Kalpasan ti napintas nga aldaw a panagay-ayam kas pamilia, inimpakemi ti amin iti lugan ket nagawidkamin. Bayat ti panagmanehok, apagbiit a nakaturogak a nakaigapuan ti head-on car accident. Kalpasan ti sumagmamano a kanito a panagsubli ti riknak, kimmitaak iti aglawlaw ti lugan. Ni Maxine, nakaro ti pannakadangran ti luppona ken marigatan nga aganges. Naburak ti sternumna. Nakigtot dagiti tallo nga annakmi a babbai ngem agyamankami ta nasayaatda met lang. Adda babassit a dunorko. Ngem saan a makagaraw ti lima a bulan nga anakmi.
Iti baet ti stress ken pannakatikaw iti dayta nga aksidente, kinuna ti inauna nga anakmi a ni Kate nga agtawen iti 11, “Tatang, masapul a bendisonam ni Jarom.” Kalpasan ti panagkarigatanmi a rummuar, nabalinanmi met lang kadagiti annakko a babbai ti bimmaba iti lugan. Saan a mabalin nga iyalis ni Maxine. Siaannad a binagkatko ni Jarom; kalpasanna bayat ti panagiddak iti daga, siaannad nga inkabilko iti barukongko ket intedko kenkuana ti bendision ti priesthood. Idi simmangpet ti ambulansia agarup 40 a minuto kalpasanna, nakapuot ni Jarom.
Iti dayta a rabii, pinanawak ti tallo a miembro ti pamiliak iti ospital ket nagluganak iti taksi nga agawid a kaduak ti dua nga annakko a babbai. Iti dayta a napaut a rabii, nagpakaasiak iti Nailangitan nga Ama nga umimbag ti pamiliak ken dagiti nasugatan iti sabali a lugan. Kaasi ti Apo, nasungbatan dagiti kararagko ken dagiti napasnek a kararag nga indaton dagiti dadduma pay. Naagasan ti amin iti panaglabas ti panawen, dakkel daytoy a bendision ken nadungngo nga asi.
Ngem nagtultuloy a nauneg ti pannakakonsensiak ken panagbabawik gapu iti panangpataudko iti kasta a nakaro nga aksidente. Mariingak iti rabii ket malagipko manen dagiti nakaam-amak a pasamak. Adu a tawen a nagrigatak tapno lang mapakawanko ti bagik ken masarakak ti talna. Kalpasanna, kas maysa a priesthood leader, bayat ti panangtulongko iti dadduma nga agbabawi ken makarikna iti asi, ken ayat ti Mangisalakan, naamirisko a maagasannak.
Mayaramat ti bileg ti Mangisalakan a mangagas ken mangsubbot kadagiti aksidente a biddut, nakapuy a pangngeddeng, karit, ken pannubok iti tunggal kita—ken kasta met iti basbasoltayo. Iti yaasidegko Kenkuana, in-inut a nasukatan ti riknak iti basol ken panagbabawi iti talna ken panaginana.
Insuro ni Presidente Russel M. Nelson: “Idi sinubbot ti Mangisalakan ti amin a sangkataw-an, linuktanna ti maysa a wagas tapno dagiti sumursurot Kenkuana ket makagun-od iti bilegna a mangagas, mangpapigsa, ken mangsubbot. Sidadaan a magun-od dagitoy a naespirituan a pribilehio ti amin nga agkalikagum a dumngeg ken sumurot Kenkuana.”14
Kakabsat, awityo man ti dadagsen ti di narisut a basol, agsagsagabakayo man gapu iti basol a naaramid kadakayo iti nabayagen, wenno ikarkarigatanyo a pakawanen ti bagiyo iti maysa nga aksidente a biddut, magun-odyo ti makaagas ken mangsubbot a pannakabalin ti Mangisalakan a ni Jesucristo.
Paneknekak a sibibiag Isuna. Isu ti Mangisalakan ken Mannubbottayo. Ay-ayatennatayo. Kaasiannatayo, napno iti asi, ken mapaimbagnakayo. Iti nagan ni Jesucristo, amen.