Agtultuloykayo Laeng—iti Pammati
Ti panangaramat iti pammati iti Mangisalakantayo, ni Jesucristo, matulongannatayo a mangparmek iti pannakaupay ania man dagiti tubeng a pakaipasanguantayo.
Immawat ni Elder George A. Smith, maysa nga Apostol, iti balakad ni Propeta Joseph Smith iti panawen ti nakaro a rigat: “Imbagana a nasken a diak maupay, ania man dagiti rigat iti aglawlawko. No matnagak iti kaunggan nga abut ti Nova Scotia ken iti Rocky Mountains a nangbunton kaniak, nasken a diak maupay ket agkapetak, ken agtalinaedak a natured, ket rummuarak iti rabaw ti bunton iti kamaudiananna.”1
Kasano a maibaga ti Propeta Joseph dayta—iti maysa a tao nga agsagsagaba? Gapu ta ammona a pudno dayta. Tinungpalna dayta. Namin-adu a napasaran ni Joseph dagiti nakaro a rigat iti biagna. Nupay kasta, idi aramatenna ti pammatina ken Jesucristo ken iti Pannubbotna ken nagtultuloy laeng, pinarmekna ti kasla di marimbawan a tubeng.2
Ita, kayatko a pabaruen ti dawat ni Joseph a ditayo palugodan ti pannakaupay a mangrimbaw kadatayo no mapasarantayo ti pannakaupay, nasaem a padas, bukodtayo a pagkurangan, wenno dadduma pay a karit.
No kunak a pannakaupay, diak saritaen dagiti ad-adda a makapakapuy a karit iti clinical depression, sakit ti panagdanag, wenno dagiti sakit a kasapulan ti espesial a panagagas.3 Isaritak laeng maipapan iti gagangay a sigud a pannakaupay a dumteng nga adda dagiti naimbag ken dakes a padas ti biag.
Paregtaendak dagiti bannuarko nga agtultuloy laeng—iti pammati—ania man ti mapasamak.4 Iti Libro ni Mormon, mabasatayo maipapan ken Zoram, ti adipen ni Laban. Idi nagun-od ni Nephi dagiti gambang a pinanid, masapul nga agpili ni Zoram no surotenna ni Nephi ken dagiti kabsatna iti let-ang wenno mapukawna ti biagna.
Anian a pili! Ti umuna a tarigagay ni Zoram ket agtaray, ngem inggawid isuna ni Nephi ken nagkari a no sumurot kadakuada, mawayawayaan ken maaddaan iti lugar kadua ti pamiliada. Nagtured ni Zoram ket simmurot kadakuada.5
Nagsagaba iti adu a rigat ni Zoram iti baro a biagna, ngem nagtultuloy iti pammati. Awan ti pakakitaantayo no nagkapet ni Zoram iti napalabasna wenno nagsakit ti nakemna iti Dios wenno iti sabali.6 Isu ti pudno a gayyem ni Nephi, maysa a propeta, ket nagnaed isuna ken ti kaputotanna iti wayawaya ken rang-ay iti naikari a daga. Nagbalin a nalabon a parabur ti dakkel a tubeng iti dana ni Zoram gapu iti panagtalek ken kinatallugodna nga agtultuloy laeng—iti pammati.7
Nabiit pay a nangngegak ti natured a sister a nangibinglay no kasano a nagpursigi kadagiti rigat.8 Adda dagiti karit a nakaipasanguanna, ket iti maysa a Domingo, agtugtugaw iti Relief Society, dumdumngeg iti maysa a mannursuro nga ipagarupna a perpekton ti biagna—a naiduma unay iti bukodna. Nabannog ken naupay isuna. Nariknana a kasla di maikari—wenno di maibilang—isu a timmakder ket pimmanaw, a planona a di agsublin iti simbaan. Idi magmagna a mapan iti luganna, nakarikna iti naidumduma nga impresion: “Mapanka iti chapel ket dumngeg iti agsarita iti sacrament miting.” Nagduduaanna dayta a parikna ngem napigsa ti pannakariknana manen kadaytoy ket napan iti miting.
Dayta a mensahe ti husto unay a kasapulanna. Nariknana ti Espiritu. Ammona a kayat ti Apo nga agtalinaed isuna Kenkuana, agbalin a disipulona, ken makimisa, ket inaramidna.
Ammoyo kadi no ania ti pagyamyamananna? Saan a simmuko isuna. Nagtultuloy laeng—iti pammati ken ni Jesucristo, nupay narigat kenkuana, ket nabuslon ti pannakaparaburna ken ti pamiliana iti panagtultuloyna.
Tulongannatayto ti Dios ti langit ken daga a mangparmek iti pannakaupay ken ania man a lapped a mapasarantayo no kumitatayo Kenkuana, sumurot iti parikna ti Espiritu Santo,9 ken agtultuloy laeng—iti pammati.
Agyamantayo, ta no nakapuy wenno awan kabaelantayo, mapapigsa ti Apo ti pammatitayo. Padur-asenna ti kabaelantayo iti labes ti bukodtayo. Napadasakon dayta. Nasurok a 20 a tawen ti naglabas, diak ninamnama a maawaganak a kas Area Seventy, ket nariknak a nakapuyak. Kalpasan ti training assignmentko, indauluak ti umuna a komperensiak iti stake.10 Sipapasnek a plinanomi iti stake president ti tunggal detalye. Sakbay la unay ti komperensia, timmawag ni President Boyd K. Packer, Acting President idi iti korum dagiti Sangapulo-ket-dua nga Apostol, no mabalin a kuyogennak. Nasdaawak ket, siempre, immanamongak. Dinamagko no kasano ti kayatna a mapasamak gapu ta isu ti mangidaulo. Insingasingna a dimi usaren ti napagplanuanmi ket agsagana a mangsurot iti Espiritu. Pagyamanak ta adda pay 10 nga aldawko nga agadal, agkararag, ken agsagana.
Addaan iti open agenda, addakamin iti sango 20 minuto sakbay a rugian ti leadership meeting. Inasitgak ti stake president ket inyarasaasko, “Nagkaskasdaaw daytoy a stake.”
Sinikonak a siaannad ni President Packer ket nagkuna, “Awan koma ti agsasao.”
Nagsardengak nga agsao, ket nalagipko ti mensahena iti sapasap a komperensia nga “Ti Panagraem Mangyawis iti Paltiing”11 . Napaliiwko nga isursurat ni President Packer dagiti reperensia iti nasantuan a kasuratan. Impatalged ti Espiritu kaniak nga umaw-awat isuna kadagiti impresion para iti miting. Karugrugi laeng ti padasko nga agsursuro.
Nagsarita ni President Packer iti umuna 15 a minuto ket inyunay-unayna ti pateg ti panag-conduct iti amin a miting kas iwanwan ti Nasantuan nga Espiritu.12 Kalpasanna kinunana, “Denggentayo itan ni Elder Cook.”
Iti ipapanko iti pulpito, dinamagko no kasano ti kayatna a kaatiddog ti isaritak ken no adda topiko a kayatna nga isaritak. Kinunana, “Agsaritaka iti 15 minuto ken no ania ti mariknam a mangparegta kenka.” Nagsaritaak iti 14 minuto ket imbinglayko ti amin nga adda iti panunotko.
Timmakder manen ni President Packer ket nagsarita iti sabali pay a 15 minuto. Imbinglayna daytoy a nasantuan a kasuratan:
“Isaoyo dagiti kapanunotan nga imulakto iti puspusoyo, ket dikayto matikaw iti sango dagiti tao;
“Ta maitedto kadakayo … iti mismo a kanito, no anianto ti sawenyo.”13
Kalpasanna kinunana, “Denggentayo itan ni Elder Cook.”
Naklaatak. Diak pulos imbilang a makiddawak nga agsarita iti mamindua a gundaway iti maysa a miting. Awan ti mapanunotkon nga isarita pay. Ti napasnek a panagkararag ken panagpannuray iti tulong ti Apo, no kaskasano, nabendisionannak iti kapanunotan, maysa a nasantuan a kasuratan, ket nakapagsaritaak manen iti 15 minuto. Nagtugawak ket nabannogak.
Nagsarita manen ni President Packer iti 15 minuto maipapan iti panangsurot iti Espiritu ket imbinglayna ti pannursuro ni Pablo a ditay koma agsarita “iti balikas nga isuro ti sirib ti tao, ngem iti isuro ti Espiritu Santo.”14 Kas iti mapanunotyo, nalapunos ti riknak idi adda impresionna a mangisao iti maikatlo a gundaway, “Denggentayo itan ni Elder Cook.”
Nabannogakon. Diak ammo ti isaritak pay. Ammok nga orasen nga aramaten ti napigpigsa a pammati. Naginnayadak a napan iti pulpito, nga umar-araraw iti tulong ti Dios. Idi iniggamak ti mikropono, simimilagro a binendisionannak ti Apo tapno makaitedak iti mensahe iti sabali pay a 15 minuto.15
Nalpas ti miting, ngem dagus a naamirisko a maysa nga oras laengen ket mangrugin ti adult session. Ayna! Kas ken Zoram, kayatko ti tumaray, ngem kas ti panangigawid ni Nephi kenkuana, ammok a maigawidnak ni President Packer. Nasurot ti kasta a pagtuladan iti simmaruno nga adult meeting. Namitlo pay a nagsaritaak. Ti simmaruno nga aldaw ti general session, naminsan a nagsaritaak.
Kalpasan ti komperensia, kinuna ni President Packer a siaayat, “Aramidentanto manen.” Patpatgek ni President Boyd K. Packer ken pagyamanak ti amin a nasursurok.
Ammoyo kadi no ania ti pagyamyamanak? A diak simmuko—wenno nagkedked. No simmukoak iti tarigagayko a mangliklik kadagita a miting, napukawko koma ti gundaway a mapabileg ti pammatik ken umawat iti napnuan ayat ken suporta manipud iti Nailangitan nga Amak. Nasursurok maipapan ti asina, ti namilagruan a makabael a bileg ni Jesucristo ken ti Pannubbotna, ken ti nabileg nga impluensia ti Espiritu Santo. Iti laksid ti kinakapuyko,16 nasursurok a makapagserbiak; makatulongak no adda ti Apo iti sibayko no agtultuloyak laeng—iti pammati.
Ania man ti kadakkel, sakup, ken kinakaro dagiti karit a mapasarantayo iti biag, addaantayo amin iti kanito a kasla kayattayon ti agsardeng, pumanaw, aglibas, wenno sumuko. Ngem ti panangipakita iti pammati iti Mangisalakantayo, ni Jesucristo, matulongannatayo a mangparmek iti pannakaupay ania man dagiti lapped a pakaipasanguantayo.
Kas iti panangileppas ti Mangisalakan iti aramid a naited Kenkuana, adda bilegna a mangtulong kadatayo a mangileppas iti aramid a naited kadatayo.17 Mabendisionantayo nga agtultuloy iti dana ti katulagan, kasano man ti karigatna, ket iti kamaudianan maawattayo ti agnanayon a biag.18
Kas ti kinuna ni Propeta Joseph Smith, “Agtakderkayo a sititibker, dakayo a Santo ti Dios, agibturkayo pay, ket agpatingganto dagiti rigat iti daytoy a biag, ket gunggonaannakayto ti Dios a pagserserbianyo.”19 Iti nagan ni Jesucristo, amen.