Panangsapul iti Bukod a Talna
Ikararagko a makasarakkayo iti talna, mangtulong iti adu a dadduma pay a mangsapul, ken mangipasa iti daytoy.
Patpatgek a kakabsatko, naparaburantayo kadagiti naparegta a sursuro ken napintas a musika a nangsagid kadatayo iti daytoy panglukat a sesion ti sapasap a komperensia. Agyamankami iti pannakiramanyo ken iti pammatiyo.
Ita agsaritaak maipapan iti naadalko maipapan iti milagro ti panangsapul iti bukod a talna, ania man ti kasasaadtayo. Ammo ti Mangisalakan a tarigagay amin nga annak ti Nailangitan nga Ama ti talna, ket kinunana a maitedna daytoy kadatayo. Lagipenyo dagiti balikas ni Jesucristo a naisurat iti libro ni Juan: “Ti talna ibatik kadakayo, ti talna itdek kadakayo: saan a kas iti panangted ti lubong ti panangtedko kadakayo. Saan koma nga agpulkok ti pusoyo ken di agbuteng.”1
No ania ti kayatna a sawen iti talna ken no kasano a maitedna ket ipalgak dagiti kasasaad dagiti dimngeg Kenkuana a nagsao kadagita a balikas. Denggen ti pakaammuan iti Juan iti kangitingitan ti panagministro ni Cristo. Dagiti narungsot a puersa ti dakes ti nangsapsaplit Kenkuana ken iti di mabayag dumtengdanto kadagiti disipulona.
Adtoy dagiti balikas ti Mangisalakan:
“No ay-ayatendak, tungpalenyo dagiti bilinko;
“Ket agdawdawatakto ken Ama, ket ikkannakayto iti Manangliwliwa a sabali, tapno adda kadakayo nga agnanayon;
“Uray ti Espiritu ti kinapudno; a di maawat ti lubong, agsipud ta dina makita, ken dina am-ammo: ngem am-ammoyo isuna; ta agnaed kadakayo, ket addanto kadakayo.
“Dikayto baybay-an nga ul-ulila: umayakto kadakayo.
“Apagbiit laeng, ket saannak a makita ti lubong; ngem makitadak: agsipud ta sibibiagak, agbiagkayto met.
“Iti dayta nga aldaw, maammuanyonto nga addaak iti Amak, ken dakayo kaniak, ken siak kadakayo.
“Ti addaan kadagiti bilbilinko ket tungpalenna, ida isu dayta ti agayat kaniak, ket ti agayat kaniak, ayatento ni Amak, ken isu ayatekto, ket agparangakto kenkuana.
“Kinuna ni Judas kenkuana, saan a ni Iscariote, Apo, kasano a maiparangarangmo ti bagim kadakami, ket saan nga iti lubong?
“Simmungbat ni Jesus ket kinunana kenkuana, No ayatennak ti maysa a tao, tungpalenna dagiti saok: ket ayatennanto ni Amak, ket umaytayo kenkuana, ket agtaengtayo kenkuana.
“Ti saan nga agayat kaniak dina tungpalen dagiti saok: ket ti sao a mangngegyo saan a kukuak, no di ket kukua ti Ama a nangibaon kaniak.
“Dagitoy a banag nga insaok kadakayo, adda pay laeng kadakayo.
“Ngem ti Mangliwliwa, ti Espiritu Santo, nga ibaonto ni Ama iti naganko, isuronanto kadakayo ti amin a banag, ket ipalagipnanto kadakayo, dagiti amin nga imbagak kadakayo.
“Ti talna ibatik kadakayo, ti talnak itdek kadakayo: saan a kas iti panangted ti lubong ti panangtedko kadakayo. Saan koma nga agpulkok ti pusoyo ken di agbuteng.”1
Nasursurok ti lima a kinapudno iti dayta a pannursuro ti Mangisalakan.
Umuna, maited ti sagut ti talna kalpasan nga adda pammatitayo a mangtungpal iti bilbilinna. Kadagiti natulagan a miembro ti Simbaan ti Apo, ti panagtulnog ti inkaritayon nga aramiden.
Maikadua, umayto ti Espiritu Santo ket makipagnaed kadatayo. Kuna ti Apo a bayat ti panagtultuloytayo nga agbalin a napudno, agtaeng kadatayo ti Espiritu Santo. Dayta ti kari iti kararag ti sakramento a ti Espiritu ti kaduatayo ken mariknatayonto, iti puso ken panunottayo, ti liwliwana.
Maikatlo, ikari ti Mangisalakan a no agtungpaltayo kadagiti katulagantayo, mariknatayo ti ayat ti Ama ken Anak iti tunggal maysa ken para kadatayo. Mariknatayo ti kinasingedda iti mortal a biagtayo, kas iti mariknatayo inton maparaburantayo a makidenna Kadakuada iti agnanayon.
Maikapat, ti panangtungpal iti bilbilin ti Apo agkasapulan iti ad-adu ngem panagtulnog. Ayatentayo ti Dios iti amin a puso, pigsa, panunot, ken kararuatayo.3
Dagiti di agayat Kenkuana, dida agtungpal kadagiti bilinna. Ket ngarud, didanto maaddaan iti sagut ti talna iti daytoy a biag ken iti lubong nga umay.
Maikalima, nalawag nga inayatnatayo ti Apo a mangbayad iti gatad dagiti basoltayo tapno—babaen ti pammatitayo Kenkuana ken panagbabawitayo, babaen iti epekto ti Pannubbotna—maaddaantayo iti sagut ti talna a “mangrimbaw ti amin a pannakaawat,”4 ditoy a biag ken iti dennana iti agnanayon.
Adda kadakayo, nalabit adu, ti di makarikna iti talna nga inkari ti Apo. Mabalin nga inkararaganyo ti bukod a talna ken naespirituan a liwliwa. Ngem mabalin a mariknayo a naulimek dagiti langit iti panagpakaasiyo iti talna.
Adda maysa a kabusor ti kararuayo a dina kayat a makasarakkayo ken dagiti patpatgenyo iti talna. Di maragsakan iti daytoy. Itrabahona a lapdannakayo a mangsapul iti talna a tarigagayan ti Mangisalakan ken ti Nailangitan nga Amatayo a maaddaantayo.
Kasla umad-adu ti regget ni Satanas a mangimula iti gura ken supiat iti intero nga aglawlawtayo. Makitatayo ti ebidensia a mapaspasamak dayta kadagiti nasion ken siudad, iti sangakaarrubaan, iti elektronik media, ken iti intero a lubong.
Ngem adda rason ti optimismo: Naipan ti Lawag ni Cristo iti tunggal kappasngay nga ubing. Iti dayta a sapasap a sagut umay ti panagrikna no ania ti umno, ti tarigagay nga agayat ken maayat. Adda nainkasigudan a rikna ti hustisia ken kinapudno iti tunggal anak ti Dios iti yaayna iti mortalidad.
Ti optimismotayo iti bukod a talna para kadagiti ubbing ket adda kadagiti tao a mangay-aywan kadakuada. No nagtrabaho dagiti mangpatpatanor ken agserserbi kadakuada tapno umawat iti sagut ti talna iti Mangisalakan, babaen ti bukod a pagwadan ken regget, paregtaenda ti pammati ti ubing a maikari iti sagut ti talna.
Dayta ti kari ti nasantuan a kasuratan: “Iruammo ti ubing iti dalan a rebbengna a papanan: ket uray inton lakayen saannanto a pagpanawan.”5 Agkasapulanto, ti maysa nga agrebbeng a mangaywan ken mangpatanor iti ubing, a maikari iti sagut ti talna.
Nakalkaldaang ta nariknatayo ti saem no ti annak a pinadakkel ti nagannak—dadduma agsolsolo a nagannak—ket pilienda, kalpasan ti panagbiag a napnuan pammati ken talna, nga umaddang iti dana ti ladingit.
Uray no mapasamak dayta a ladingit, agsaad ti optimismok iti sabali a sagut manipud iti Apo. Isu daytoy: mangbangon Isuna iti adu a mamagkappia kadagiti mapagtalkan a disipulona. Nariknada ti talna ken ayat ti Dios. Adda ti Espiritu Santo iti pusoda, ket maiturong ida ti Apo a mangtulong kadagiti mayaw-awan a karnero.
Nakitakon dayta iti unos ti biagko ken iti intero a lubong. Nakitayo met dayta. No dadduma, no maiturongkayo a tumulong, mabalin nga aksidente dayta.
Naminsan, dinamagko iti naam-ammok iti biahek, “Saritaem kad biit maipapan ti pamiliam?” Ti saritaan inturongnak a nagkiddaw a kitaen ti ladawan ti nataengan a balasangna a kinunana a marigrigatan. Nagustuak ti kinaimbag a nakitak iti rupa dayta a balasitang iti ladawan. Naawisak a nagkiddaw no maitedna kaniak ti email addressna. Napukaw ti balasangna dayta a kanito, ket pampanunotenna no adda mensahe ti Dios kenkuana. Adda. Isu daytoy: “Patpatgennaka ti Apo. Kanayon nga adda. Kayat ti Apo nga agsublikayo. Adda pay laeng dagiti naikari a bendisionyo.”
Narikna dagiti miembro ti intero a Simbaan ti sagut ti Apo a bukod a talna. Allukoyenna iti tunggal maysa a tumulong iti dadduma a maaddaan iti gundaway nga umasideg Kenkuana ken maikari mismo iti kasta met laeng a talna. Kas supapak, agkiddawda iti inspirasion a mangammo no kasano a maitedda dayta a sagut iti dadduma.
Agbalinto ti tumantanor a kaputotan nga agpatpatanor iti sumangbay a kaputotan. Ti adu a panagkagumaan mangpataud iti milagro. Agsaknap ken dumur-asto iti panaglabas ti panawen, ket nakasagana ken sindadaanto ti pagarian ti Apo ditoy daga a mangkablaaw Kenkuana babaen iti ikkis ti hosana. Addanto talna ditoy daga.
Paneknekak nga agbibiag ti Mangisalakan ken idauluanna daytoy a Simbaan. Nariknak ti ayatna iti biagko ken ti ayat ken pannakaseknanna iti amin nga annak ti Nailangitan nga Ama. Ti awis ti Mangisalakan nga umay Kenkuana ket maysa a diaya ti talna.
Ni Presidente Russell M. Nelson ti sibibiag a propeta ti Dios iti amin a daga. Kinunana, “Itdek kadakayo ti pammatalgedko nga aniaman ti kasasaad ti lubong ken ti bukodyo a kasasaad, mabalinyo a sanguen ti masakbayan nga addaan optimismo ken rag-o.”6
Ipeksak ti ayatko kadakayo. Maidanon ti pammati ken ayatyo iti tattao ken mangpalugod iti Apo a mangbaliw iti puspuso ket makagun-od iti tarigagay a mangidiaya iti dadduma iti sagut ti talna a mangrimbaw iti amin a pannakaawat.
Ikararagko a makasarakkayo iti talna, mangtulong iti adu a dadduma pay a mangsapul, ken mangipasa iti daytoy. Addanto nakaskasdaaw a sangaribu a tawen ti talna inton umay manen ti Apo. Paneknekak a sirarag-o ken iti nagan ni Jesucristo, amen.