Di Kaano Man Isuko ti Gundaway a Mangpaneknek ken ni Cristo
Ti pudno a rag-o agpannuray iti kinatuloktayo nga umasideg ken Cristo ken mangpaneknek iti bagbagitayo.
Lima a tawenen ti napalabas ita, idi intag-aytayo dagiti imatayo a mangkanunong iti patpatgentayo a propeta, ni Presidente Russel M. Nelson, kas Presidente Ti Simbaan ni Jesucristo Dagiti Santo iti Ud-udina nga Aldaw―kas pannakangiwat ti Apo iti daytoy naisangsangayan a panawen ti panagdur-as ken panangipaltiing. Babaen kenkuana, naawattayo dagiti di mabilang nga awis ken naikari kadatayo dagiti nagloriaan a bendision no pagbalinentayo a sentro iti biagtayo ti Mangisalakantayo, ni Jesucristo.
Idi 2011, bayat ti panagserbimi iti asawak kas mission leader iti napintas a Curitiba, Brazil, nagkiriring ti teleponok bayat ti maysa a miting. Nagdardarasak a mangpasardeng, ngem nakitak a ni tatangko ti tumawtawag. Dagus a pinanawak ti miting tapno sungbatak: “Hi, Dad!”
Diak ninamnama, napunno iti emosion ti timekna: “Hi, Bonnie. Adda nasken nga ibagak kenka. Nadayagnos nga addaanak iti ALS.”
Matikaw ti panunotko, “Agurayka! Ania ti ALS?”
Inlawlawag ni Tatang, “Agtalinaed nga alerto ti panunotko idinto nga in-inut nga agkapuy ti bagik.”
Nariknak ti dakkel nga epektona iti panangawatko ti kaipapanan daytoy nakalkaldaang a damag. Ngem iti dayta nakallalagip nga aldaw, ti naudi nga imbagana ti diak tu pulos malipatan. Kuna ti patpatgek nga amak a sigaganat, “Bonnie, dimo kaano man isuko ti gundaway a mangpaneknek ken ni Cristo.”
Inutobko ken inkararagak ti balakad ni Tatang. Masansan a dinamagko iti bagik no naan-anay nga ammok ti kaipapanan ti di kaano man isuko ti gundaway a mangpaneknek ken ni Jesucristo.
Kas kadakayo, masansan a timmakderak iti umuna a Domingo ti bulan ket impaneknekko ni Cristo. Adun a daras a pinaneknekak dagiti kinapudno ti ebanghelio kas paset ti adalen. Situtured nga insurok ken impakdaarko ti kinadios ni Cristo kas maysa a misionario.
Ngem ad-adda a personal kaniak daytoy nga araraw! Kasla kunkunana, “Bonnie, dika koma masinga kadagiti nailubongan a banag! Agtalinaedka a napudno kadagiti katulagam iti Mangisalakan. Agkalikagum a mangpadas kadagiti bendisionna iti inaldaw, ken paneknekam ti bilegna ken ti kaaddana iti biagmo babaen iti Espiritu Santo!”
Agbibiagtayo iti dakes a lubong, a mangallukoy kadagiti mata ken pusotayo a kumita iti baba imbes a kumita iti langit. Kas kadagiti Nephite iti 3 Nephi 11, kasapulantayo ni Jesucristo. Mapanunotyo kadi nga addakayo idiay, kadagiti tao a nakapadas iti kasta unay a riribuk ken pannakadadael? Ania ngata ti riknayo a makangngeg iti personal nga awis ti Apo:
“Bumangonkayo ket umaykayo kaniak, tapno maidapadapyo dagiti imayo iti bakrangko, ken mariknayo pay ti lamma ti lansa kadagiti imak ken sakak, tapno ammuenyo a siak … ti Dios ti sangalubongan, ket napapatay gapu iti basbasol ti lubong.
“Ket … immasideg ti ummong … saggaysada … ket nakitada kadagiti matada ken nariknada kadagiti imada, ket naammuanda … ket napaneknekanda amin.”1
Nagagar dagitoy a Nephite a nagtultuloy nga indapadap dagiti imada iti bakrangna ken riknaen dagiti lamma ti lansa iti ima ken sakana, tapno mapaneknekanda a daytoy ti Cristo. Kasta met, adu kadagti napudno a tao a naadaltayo iti Baro a Tulag ita a tawen a sigagagar nga agur-uray iti yaay ni Cristo. Ket pimmanawda kadagiti talonda, tugawda, ken lamisaan a pangananda ket sinurotda, naguummongda iti yanna, nagaaribongbongda, ken nakikatugawda Kenkuana. Nagagartayo kadi a mangpaneknek iti bagbagitayo kas iti adu a tattao kadagiti nasantuan a kasuratan? Nasnasken kadi dagiti bendisiontayo ngem dagiti bendisionda?
Idi sarungkaran mismo ni Cristo dagiti Nephite iti temploda, inyawisna a dida agtakder iti adayo ken kumita Kenkuana, no di ket sagidenda Isuna, tapno riknaenda mismo ti kinapudno ti Mangisalakan ti sangkataw-an. Kasano a makaasidegtayo tapno magun-odtayo ti bukod a panagsaksi ken ni Jesucristo? Mabalin a paset daytoy ti padpadasen nga isuro ni tatangko kaniak. Nupay ditay mapasaran ti umasping a pisikal a kinaasideg dagiti nakipagna ken ni Cristo bayat ti panagserbina ditoy daga, babaen ti Espiritu Santo mapadasantayo ti bilegna iti inaldaw! Agingga a kasapulantayo!
Adu ti nasursurok manipud kadagiti babbalasitang iti sangalubongan maipapan iti panangbirok ken Cristo ken pananggun-od iti inaldaw, bukod a panagsaksi Kenkuana. Ibinglayko man ti pagsiriban ti dua kadagitoy:
Nabuyan niLivvy ti sapasap a komperensia iti intero a biagna. Kinapudnona, buyaenda a sangapamiliaan ti amin a lima sesion iti balayda. Iti naglabas, ti kaipapanan ti komperensia ken Liwy ket panagdrowing wenno sagpaminsan a di naigagara a panagridep. Ngem naiduma daytoy napalabas a sapasap a komperensia ti Oktubre. Nagbalin a personal daytoy.
Ita a gundaway, inkeddeng ni Liwy nga agbalin nga aktibo a recipient. In-silent-na dagiti notification ti teleponona ket insuratna dagiti impresion manipud iti Espiritu. Nasdaaw ta nariknana dagiti masinunuo a banag a kayat nga ipangngeg ken ipaaramid kenkuana ti Dios. Daytoy a desision nakaaramid iti naidumaduma a panagbalbaliw iti biagna.
Kalpasan ti mano nga aldaw inawis dagiti gagayyemna a mapan agbuya iti di maitutop a sine. Kinunana, “Nariknak a nagsubli dagiti balikas ken espiritu ti komperensia iti pusok, ket nangngegak ti bagik a mangkedkedked iti awisda.” Nagtured pay a nangipaneknek iti Mangisalakan iti ward-na.
Kalpasan dagitoy a pasamak, kinunana, “ Nakaskasdaaw idi mangngegak ti bagik nga agpampaneknek a ni Jesus ti Cristo, nariknak nga impatalged manen ti Espiritu Santo kaniak daytoy.”
Di laeng bassit a panagregget ti impaay ni Livvy iti komperensia ti weekend; ad-adu ti panagreggetna, iti panunot ken espiritu, ket nasarakanna ti Mangisalakan idiay.
Ken adda met ni Maddy. Idi nagsardeng ti pamiliana a makimisa, natikaw ni Maddy ken di sigurado iti aramidenna. Naamirisna nga adda kurang a napateg a banag. Idi nagtawen iti 13, napan nakimisa a maymaysa. Uray no narigat ken di komportable ti agmaymaysa no dadduma, ammona a masarakanna ti Mangisalakan iti simbaan ket kayatna a mapan iti ayanna. Kinunana, “Iti simbaan, mariknak a kasla adda ti kararuak iti pagtaengan.”
Nangnamnama ni Maddy iti kinapudno a nailantip ti pamiliana a sangkamaysa iti kinaagnanayon. Inrugina nga intugot dagiti in-inaudi a kakabsatna a lallaki iti simbaan ken nagadal iti nasantuan a kasuratan a kaduana ida iti balayda. Idi agangay nakikadua ni nanangna kadakuada. Imbaga ni Maddy iti inana ti tarigagayna nga agserbi iti mision ken dinamagna no nakasagana ni nanangna a dumar-aay iti templo a kaduana.
Ita addan ni Maddy iti MTC. Agserserbi. Agpampaneknek ken ni Cristo. Nakatulong ti pagwadanna a nangiturong nga agpada kadagiti dadakkelna nga agsubli iti templo ken ni Cristo.
Kas kada Livvy ken Maddy, no pilientayo a biroken ni Cristo, ti Espiritu ti mangpaneknek Kenkuana iti adu nga agduduma a kasasaad. Mapasamak dagitoy a panagsaksi ti Espiritu no agayuno, agkararag, aguray, ken agtultuloytayo. Nasingsingedtayo ken Cristo babaen ti masansan a panagdaydayaw iti templo, inaldaw a panagbabawi, panagadal kadagiti nasantuan a kasuratan, pannakimisa ken seminary, panangutob iti patriarchal blessing-tayo, maikari nga umawat iti ordinansa, ken panangdayaw iti sagrado a katulagan. Mangawis amin dagitoy iti Espiritu a manglawlawag iti panunottayo, ken mangyegda iti nayon a talna ken saluad. Ngem dayawentayo kadi dagitoy kas sagrado a gundaway a mangpaneknek ken ni Cristo?
Namin-adun a dimmar-ayak iti templo, ngem no agdaydayawak iti balay ti Apo, mabalbaliwannak. No dadduma bayat ti panagayunok, mariknak ti bisinko, ngem no dadduma, agbussogak iti Espiritu nga addaan panggep. No dadduma agtanamitimak nga agkararag a maulit-ulit, ngem nagagar nga agpabalakadak met iti Apo babaen ti kararag.
Adda bileg iti panangaramid kadagitoy a nasantuan nga ugali a saanda a tseklist no di ket panagsaksi. In-inutto ti proseso ngem dumur-asto iti inaldaw nga aktibo a pannakipaset ken napanggepan a padas ken Cristo. No agtultuloytayo nga agtignay iti pannursurona, magun-odtayo ti pammaneknek Kenkuana; mapatanortayo ti relasiontayo Kenkuana ken iti Nailangitan nga Amatayo. Agbalintayo a kas Kadakuada.
Mangbukel ti kabusor iti kasta unay a ringgor ket narigat a mangngeg ti timek ti Apo. Dinto naulimek ti lubongtayo, dagiti karit ken kasasaadtayo, ngem kabaelantayo ken nasken a mabisin ken mawawtayo kadagiti banag ni Cristo tapno “dumngeg Kenkuana” a nalawag.2 Kayattayo a parnuayen dagiti ugali ti kinadisipulo ken pammaneknek a mangipokus iti panagpannuraytayo iti Mangisalakan iti inaldaw.
Awanen ni tatangko nasurok a 11 a tawen ti naglabas, ngem sibibiag dagiti balikasna kaniak. “Bonnie, dimo kaano man isuko ti gundaway a mangpaneknek ken ni Cristo.” Awisenkayo a kaduaendak a mangawat iti awisna. Birokenyo ni Cristo iti aglawlaw―ikarik nga adda Isuna!3 Ti pudno a rag-o agpannuray iti kinatuloktayo nga umasideg ken Cristo ken agsaksi iti bagbagitayo.
Ammotayo nga iti maudi nga al-aldaw, “agparintumengto amin a tumeng, ket agpudnonto kenkuana amin a dila” a ni Jesus ti Cristo.4 Ikararagko nga agbalinto daytoy a panagsaksi a normal ken natural a padas kadatayo ita—nga usarentayo ti tunggal gundaway a sirarag-o a mangpaneknek: Sibibiag ni Jesucristo!
O, Ipatpategko la unay Isuna. Agyamantayo iti agnanayon a Pannubbotna, a “namagbalin a posible ti agnanayon a biag ken ti kinapudno ti imortalidad para iti amin [kadatayo].”5 Paneknekak ti kinaimbag ti Mangisalakantayo ken ti naindaklan a dayagna iti sagrado a naganna, uray ni Jesucristo, amen.