14:20

Ti Kadaklan Pay Lang a Pakasaritaan ti Paskua ti Panagungar a Naisarita

Ni Elder Gary E. Stevenson

Ti Korum dagiti Sangapulo-ket-dua nga Apostol

Kitaenyo ti Libro ni Mormon iti baro a wagas ken ibilang ti nabileg a pammaneknek nga iburayna maipapan iti kinapudno ti napagungar a Cristo.

Surat ti Umuna a Panguluen iti Paskua ti Panagungar

Nalabit a malagipyo a nangngegyo ti naibasa a surat ti Umuna a Panguluen iti ward wenno branchyo manon a lawas ti naglabas. Impakaammo dayta a surat nga iti sumuno a Domingo—Paskua ti Panagungar—agtataripnong laeng iti sacrament miting ti amin a ward ken branch, a mangibati iti nayon nga oras nga agdaydayaw iti pagtaengan kas pamilia tapno lagipen daytoy kapatgan a holiday.¹

Naawis ti pasnekko iti surat ti Umuna a Panguluen, ket nangpautob kaniak ti wagas a panangrambak ti pamiliak iti Paskua ti Panagungar iti panaglabas dagiti tawen. No ad-adda a pampanunotek dagiti parambaktayo, ad-adda a mapanunotko ti pudno a kaipapanan daytoy a holiday, a napateg unay iti amin a mamati ken Jesucristo.

Tradision iti Paskua ken Paskua ti Panagungar

Dagidiay a kapanunotan ti nangpautob kaniak ti pagdumaan ti panangrambaktayo iti Paskua no idilig iti Paskua ti Panagungar. Iti Disiembre, no iramantayo ti ragsak ti “Jingle Bells,” Christmas stockings, ken sagsagut ken dadduma pay a napili a tradision—kas iti panangaywan iti agkasapulan, panangkanta iti paggugustotayo a Christmas carol ken himno ti Paskua, ken siempre pananglukib iti nasantuan a kasuratan ken panangbasa iti estoria ti Paskua iti Lucas 2. Tunggal tawen basaenmi daytoy napintas nga estoria iti dakkel a daan a Biblia, ar-aramiden ti pamiliami ti nalabit nga ar-aramiden met ti pamiliayo—nakadalungdong ken nakakagay iti tualia ken naka-bathrobe tapno mangibagi kada Jose, Maria, ken ti adu nga immay a nagdaydayaw iti ubing a Jesus, ipabuyami ti estoria ti Paskua ti pannakayanak ti Mangisalakan.

Nupay kasta, kasla naiduma ti panangrambak ti pamiliami iti Paskua ti Panagungar. Mariknak a nagpannuray ti pamiliami iti “pannakimisa” a mangipaay iti napnuan kaipapanan, naisentro ken Cristo a paset ti Paskua ti Panagungar; sa, kas pamilia, nagtitiponkami nga agaramid iti sabali pay a tradision a mainaig iti Paskua ti Panagungar. Magustuak a buybuyaen dagiti annakmi idi, ket itan dagiti appokomi nga agsapul kadagiti itlog iti Paskua ti Panagungar.

Ngem maysa a wake up call ti surat ti Umuna a Panguluen. Didatay lang inawis amin tapno penken a ti panangrambaktayo iti kapatgan a pasamak ditoy daga—ti Pannubbot ken Panagungar ni Jesucristo—iramanna ti panagraem ken respeto a pakaikarian ti Apo, ngem inikkandatayo pay iti ad-adu nga oras a kadua ti pamilia ken gagayyemtayo iti Easter Sunday.

Dagitoy balikas ni Propeta Joseph Smith ti mangnayon iti konteksto iti pateg dagiti pasamak iti Paskua ti Panagungar: “Dagiti kangrunaan a pagbatayan ti relihiontayo ket ti pammaneknek dagiti Apostol ken Propeta, maipanggep ken Jesucristo, a natay, naitanem, ken nagungar iti maikatlo nga aldaw, ket immuli sadi langit; ken amin a dadduma pay a banag a mainaig iti relihiontayo ket nayonna laeng.”²

Napagsaritaanmi ken Lesa dagiti wagas a nasaysayaat a makaaramid ti pamiliami iti panawen ti Paskua ti Panagungar. Nalabit a dinamagtayon iti bagitayo ti mautobtayo amin: Kasano nga ipagwadantayo ti pannursuro ken rambak ti Panagungar ni Jesucristo, ti estoria ti Paskua ti Panagungar, iti isu met la a timbeng, pakabuklan, ken nabaknang a tradision ti relihion ti pannakayanak ni Jesucristo, ti estoria ti Paskua?

Kasla agpadpadastayo amin. Makitak ti dumakdakkel a panagregget dagiti Latter-day Saints iti Paskua ti Panagungar a naisentro ken Cristo. Iraman daytoy ti dakdakkel ken ad-addan a mabigbig iti Domingo de Ramos ken Biernes Santo kas ar-aramiden ti dadduma a kasinsintayo a Kristiano. Mabalin met a tuladentayo dagiti maitutop a tradision ti Paskua ti Panagungar a naisentro ken Cristo nga adda kadagiti kultura ken kannawidan dagiti nasion iti sangalubongan.

Insingasing ti New Testament scholar a ni N. T. Wright: “Masapul nga iti panangselebrar ti Easter mangparnuaytayo kadagiti baro a napintas nga aramid: iti arte, literatura, ay-ayam dagiti ubbing, daniw, musika, sala, fiesta, bells, espesial a konsierto. … Daytoy ti kapatgan a piestatayo. Ikkatenyo ti Paskua, ket iti biblia, mapukawyo dagiti dua nga umuna a kapitulo iti Mateo ken Lucas, awan sabalin. Ikkatenyo ti Paskua ti Panagungar, ket awan ti Baro a Tulagyo; awan ti Kristianismoyo.”³

Ti Paskua ti Panagungar, ti Biblia ken ti Libro ni Mormon

Ipatpategtayo ti Biblia ken ti amin nga isurona maipapan iti pannakayanak, panagministerio, Pannakailansa iti Krus ken Panagungar ni Jesucristo. Awanen ti tallo a balikas a mangbukel iti ad-adu a namnama ken agnanayon a bunga iti amin a sangkataw-an ngem ti insawang ti maysa a nailangitan nga anghel iti agsapa ti Paskua ti Panagungar iti Tanem iti Minuyongan: “Nagungaren.”⁴ Pagyamanantayo unay ti nasantuan a kasuratan iti Baro a Tulag a mangtaginayon iti estoria ti Paskua ti Panagungar ken ti panagministro ditoy ti Mangisalakan iti Judea and Galilee.

Iti panagtultuloymi ken ni Lesa a nangutob ken nangsukisok iti wagwagas a nalawlawa a panangselebrar ti Easter ti pamiliami tapno ad-adda a maisentro ken ni Cristo, nagsaritaanmi no ania ti basaen iti nasantuan a kasuratan kas tradision a mabalin nga ipakaammomi iti pamiliami—ti Lucas 2 a katupag para iti Paskua ti Panagungar, no kayatyo.

Kalpasanna naaddankami itoy nailangitan a pannakaawat: Mainayon pay kadagiti napateg a bersikulo maipapan iti Paskua ti Panagungar iti Baro a Tulag, datayo a Latter-day Saints addaantayo iti naisangsangayan unay a sagut iti Paskua ti Panagungar! Sagut a naidumduma a pammaneknek, mainayon a pammaneknek iti milagro ti Paskua ti Panagungar a nalabit a naglaon iti kadadaegan a nasantuan a kasuratan iti Paskua ti Panagungar iti amin a Kristianismo. Ti tuktukoyek siempre ket ti Libro ni Mormon, nangnangruna ti pakasaritaan a nagparang ni Jesucristo kadagiti agnanaed iti Baro a Lubong, iti nagungar a dayagna.

Inladawan ni Propeta Joseph Smith a ti Libro ni Mormon ti “kalintegan a libro iti ania man a libro ”⁵ ken mangrugi iti 3 Nephi 11, ibagana ti natan-ok nga estoria a panagbisita ti nagungar a Cristo kadagiti Nephite, ti panagministerio ti Mangisalaka iti Paskua ti Panagungar. Dagitoy a nasantuan a kasuratan iti Paskua ti Panagungar ti mangipaneknek iti Panagungar ni Apo Jesucristo.

Kadagitoy a kapitulo, inawagan ni Cristo ti sangapulo-ket-dua nga Apostolna, kas ti inaramidna iti Sermon iti Bantay, ipakaammona a natungpalnan ti linteg ni Moises, ken impadtona maipapan iti panaguummong ti Israel iti ud-udina nga aldaw. Agasanna dagiti masakit ken ikararaganna dagiti tao iti nadayag a wagas nga “awan dila a makaisao, wenno awan insurat ti tao, wenno di maipalawag ti puso dagiti tao ti naindaklan ken nakaskasdaaw a bambanag a nakita ken nangngegmi nga insao ni Jesus; ket awan ti makaipalawag iti ragsak a nangpunno iti kararuami iti kanito a nangngegmi nga inkararagannakami iti Ama.”⁶

Iti daytoy a Paskua ti Panagungar, agpokus ti pamiliatayo iti umuna a 17 a bersikulo ti 3 Nephi 11, nga ammoyon. Lagipenyo ti adu a tao iti aglawlaw ti templo ti Bountiful a nakangngeg iti timek ti Dios Ama ken nakakita ken Jesucristo a bumabbaba manipud iti langit tapno ited ti kapintasan nga awis ti Paskua ti Panagungar:

“Bumangonkayo ket umaykayo kaniak, … tapno mariknayo ti lamma ti lansa iti imak ken iti sakak, tapno ammuenyo a siak ti Dios … ti Dios ti sangalubongan, ket napapatay gapu iti basbasol ti lubong.

“Ket… immasideg ti ummong, … saggaysa … ket nakitada kadagiti matada ken nariknada kadagiti imada, … ket nagpaneknekda, nga isu. …

“Ket … nagkaykaysada a nangipukkaw, a kinunada:

“Hosanna! Madaydayaw ti nagan ti Kangatuan a Dios! Ket nagruknoyda iti sakaanan ni Jesus, ket nagdaydayawda kenkuana.”⁷.

Panunotenyo: pudno a sinagid dagiti Nephite iti templo dagiti ima ti nagungar nga Apo! Pagbalinentayo koma dagitoy a kapitulo iti 3 Nephi kas paset iti tradisiontayo iti Paskua ti Panagungar a kas iti Lucas 2 a tradisiontayo iti Paskua. Kinapudnona, ibinglay ti Libro ni Mormon ti kaindaklan nga estoria ti Paskua ti Panagungar a naisarita. Saan koma a kaindaklan nga estoria ti Paskua ti Panagungar a di pay pulos naisarita.

Awisenkayo a kumita iti Libro ni Mormon iti baro a lawag ket utobenyo ti nabileg a pammaneknekna maipapan iti kinapudno ti nagungar a Cristo kasta met ti kinabaknang ken kinauneg ti doktrina ni Cristo.

Paneknekan ti Libro ni Mormon ni Jesucristo

Masaludsodtayo, kasano a ti panagbasa iti nasantuan a kasuratan ti Libro ni Mormon iti Paskua ti Panagungar bendisionanna ti biagtayo ken ti biag dagiti patpatgentayo iti napateg a wagas? Ad-adda pay ngem ti maamiristayo. Ania man nga oras a basaen ken adalentayo ti Libro ni Mormon, manamnamatayo dagiti nakaskasdaaw a bunga.

Itay nabiit, dinar-ayanmi ken Lesa ti viewing ti ipatpateg a gayyem, maysa a napudno a babai, a pimmusay gapu iti sakit. Nakiummongkami iti pamilia ken nasinged a gagayyemna, a napagsasaritaanmi dagiti nararagsak a kanito daytoy nasingpet a tao a nangparagsak iti biagmi.

Idi nakatakderak iti di unay adayo iti lungon, a nakisarsarita iti dadduma, nadlawko ti dua nga ubbing a babbai a Primary a napan iti lungon ket nagtil-ayda—ngem naibatog lang ti matada iti igid ti lungon—tapno mangted ti maudi a respetoda iti ipatpategda nga ikit. Awan sabali iti asideg, immasideg ken nagrukob ni Lesa iti abayda tapno mangted iti liwliwa ken mangisuro. Sinaludsodna no kumustadan ken no ammoda no sadino ti ayan ti ikitda itan. Imbinglayda ti kinaladingitda, ngem dagitoy napateg nga annak ti Dios, nga addaan panagtalek a napno iti matada, kinunada nga ammoda a naragsak itan ti ikitda ken nalabit a kaduana ni Jesus.

Iti daytoy a kinaubingda, nasarakanda ti talna iti naindaklan a plano ti ragsak ken, iti bukodda a wagas, impaneknekda ti nauneg a kinapudno ken gagangay a kinapintas ti Panagungar ti Mangisalakan. Ammoda daytoy iti pusoda gapu iti napipintas a pannursuro dagiti managayat a nagannak, pamilia, ken liderda iti Primary a nangimula iti bukel ti pammati ken Jesucristo ken agnanayon a biag. Masiribda uray ubbingda, naawatan dagitoy nga ubbing ti adu a kinapudno nga umay kadatayo babaen ti mensahe ti Paskua ti Panagungar ken panagserbi ti nagungar a Mangisalakan ken ti balikas dagiti propeta kas naisarita iti Libro ni Mormon.

Napaliiwko a no mangted ni President Russell M. Nelson iti sagut ti Libro ni Mormon iti maysa a tao a ditay kapammatian, karaman dagiti lider iti lubong, masansan nga usarenna ti 3 Nephi ket basaenna ti panagparang ti nagungar a Cristo kadagiti Nephite. Gapuna, iburburay ti sibibiag a propeta ti pammaneknekna maipapan iti sibibiag a Cristo.

Ditay makapagtakder a saksi ni Jesucristo agingga a ditay makapagpaneknek Kenkuana. Ti Libro ni Mormon ti mainayon a pammaneknek ken ni Jesucristo gapu ta iti unos dagiti sagrado a panidna, nagpaneknek ti nagsasaruno a propeta a di laeng umay ni Cristo, ngem immay idin.

Gapu Kenkuana

Iggemko ti maysa kopia ti umuna nga edision ti Libro ni Mormon. No aramidek kanayon a matignayak. Iti kaaduan a paset ti biagko kas nataengan, maayatannak, ken maguyugoyak iti inaramid ti agtutubo a Joseph Smith a nangipatarus ken nangipablaak itoy sagrado a libro ti nasantuan a kasuratan. Nakakaskasdaaw a panunoten dagiti milagro a napasamak.

Ngem saan a dayta ti gapu a natignaynak daytoy a libro. Gapu ta daytoy a libro, ad-adda pay ngem iti ania man a sabali a naipablaak ditoy daga, paneknekanna ti biag, panagministro, pannursuro, Pannubbot, ken Panagungar ni Jesucristo. Patpatgek a kakabsatko, ti kanayon a panagadal iti daytoy a libro maipapan ken Jesucristo ket mangbalbaliwto iti biagyo. Luktannanto dagiti matayo kadagiti baro a posibilidad. Padakkelennanto ti namanamayo ken punnuennakayo iti asi. Kangrunaanna, papigsaen ken patibkerennanto ti pammatiyo ken Jesucristo ken bendisionannakayo iti pudno a pannakaammo nga Isu ken ti Amatayo am-ammodakayo, ay-ayatendakayo ken kayatda a makitayo ti dalanyo nga agawid, iti dakkel a letra A.

Patpatgek a kakabsat, dimtengen ti panawen, nga impadto dagiti nagkauna a propeta, “dumtengto ti kanito nga agwarasto ti pannakaammo iti Mangisalakan iti amin a pagilian, kakabagian, pagsasao, ken umili.”⁸ Makitkitatayon ti pannakatungpal daytoy a padto iti mismo nga imatangtayo, babaen ti pammaneknek ni Jesucristo a masarakan iti Libro ni Mormon.

Awan ti sabalin a libro a mangipakita iti dayta:

Gapu ken ni Jesucristo, agbalbaliw ti amin.
Gapu Kenkuana, nasaysayaat ti amin.
Gapu Kenkuana, maimatonan ti biag—nangruna dagiti nasaem a kanito.
Gapu Kenkuana, posible ti amin a banag.

Ti isasarungkarna kas nagungar a Mangisalakan, nga inyam-ammo ti Dios Ama, ti kadayagan ken kaballigian a mensahe iti Paskua ti Panagungar. Tulongannanto dagiti kameng ti pamiliatayo a manggun-od iti bukodda a pammaneknek ken Jesucristo kas Mangisalakan ken Manubbottayo, a nangpekka iti begkes ni patay.

Gibusak babaen iti pammaneknekko iti kinapudno ti Libro ni Mormon ken ni Jesucristo kas Anak ti sibibiag a Dios. Iti nagan ni Jesucristo, amen.