Pudno Kadi a Napakawannak?
Ti kari ti naan-anay ken perpekto a pannakapakawan ket maaramid iti tunggal maysa—iti ken babaen iti awan patinggana a Pannubot ni Jesucristo.
Sumagmamano a tawenen ti napalabas, immakarkami ken ni Sister Natress iti Idaho, a nangrugianmi iti maysa a baro a negosio. Adda dagiti napaut nga aldaw ken rabii iti opisina. Agyamankami ta asideg laeng ti opisina iti pagnaedanmi. Tunggal lawas, ni Shawna ken dagiti tallo nga annakmi a babbai—awan pay innem ti tawenda amin—umayda no kua makipangaldaw iti opisina.
Iti maysa nga aldaw kalpasan ti pangaldaw ti paamiliami, nadlawko ti lima ti tawenna nga anakmi, ni Michelle, a nangibati kaniak iti personal a mensahe, naisurat iti Post-it Note ken naidekket iti teleponok iti opisina.
Mabasa laeng ti, “Dad, laglagipem nga ayatennak. Agayat, Michelle.” Nabileg a palagip daytoy iti naubing nga ama maipapan kadagita a banag a kapatgan.
Kakabsat, paneknekkak a kanayon a laglagipennatayo ti Nailangitan nga Ama ken naan-anay nga ay-ayatennatayo. Daytoy ti saludsodko: Laglagipentayo kadi? Ken ay-ayatentayo kadi?
Napalabas ti adu a tawen, nagserbiak kas lokal leader ti Simbaan. Maysa kadagiti agtutubomi, ni Danny, naisangsangayan iti amin a wagas. Natulnog, nasingpet, nasayaat, ken naindaklan ti pusona. Nupay kasta, idi nagturpos iti haiskul, nangrugi a makikadua iti narusanger a bunggoy. Nairaman isuna iti droga, nangruna iti methamphetamine, ken naiturong iti pannakairuam ken pannakadadael. Di nagbayag, naan-anay a nagbalbaliw ti langana. Narigaten a mailasin pay. Adda iti matana ti kapatgan a panagbalbaliw—naglidem ti lawag dagiti matana. Namin-adu a tinulongak, ngem awan nagbanaganna. Saan nga interesado.
Narigat a kitaen daytoy nakaskasdaaw a barito nga agsagsagaba ken agbiag iti biag a saan a para kenkuana! Kabaelanna iti adu pay a banag.
Kalpasanna iti maysa nga aldaw, nangrugi ti milagro kenkuana.
Dimmar-ay iti miting ti sakramento a nangibinglayan iti ub-ubing a kabsatna iti pammaneknekna sakbay iti ipapanawna a mapan iti mision. Kabayatan ti miting, narikna ni Danny iti saanna pay narikna iti napaut a panawen. Nariknana ti ayat iti Apo. Naaddaan iti namnama iti kamaudiananna.
Nupay adda tarigagayna nga agbalbaliw, narigat para ken ni Danny. Dandani a saanna kabaelan nga ibturan dagiti pannakairuam ken ti kabuyogna a basol.
Iti maysa a malem, idi agtabtabasak iti ruot iti paraangaanmi, rimmuar ni Danny iti luganna a dina naipakaammo. Kasta unay ti panagkarigatanna. Iniddepko ti mower, ket nagtugawkami iti linong iti sango ti beranda. Iti daydi a kanito nga imbinglayna dagiti rikna ti pusona. Pudno a kayatna ti agsubli. Nupay kasta, narigat unay para kenkuana a tallikudan dagiti pannakairuamna ken estilo ti panagbiagna. Mainayon pay ditoy, nariknana a nagbasol iti nakaro, mabain unay iti ikakayakayna. Sinaludsodna, “Pudno kadi a mapakawannak? Adda kadi wagas a makapagsubliak?”
Kalpasan nga inbukbokna ti pusona kadagitoy a pakaseknan, binasami ti Alma kapitulo 36 nga aggiddan:
“Wen, nalagipko amin dagiti basolko ken kinamanagbasolko. …
“Wen, … a ti panagpanunotko a sumaklang iti Dios sinaplitna ti kararuak iti saan mayebkas nga aligawgaw” (dagiti bersikulo 13–14).
Kalpasan dagitoy a bersikulo, kinunana ni Danny, “Daytoy ti husto a mariknak!”
Intuloymi:
“Bayat ti pannakaparparigatko iti lagip ti adu a basbasolko, adtoy, nalagipko met a nangngegko ti padto ti amak kadagiti tao maipanggep iti yaay ti maysa a Jesucristo, ti Anak ti Dios, a mangsubbot iti basbasol ti lubong. …
“Ket o, anian a rag-o, ken anian a nakaskasdaaw a lawag ti nakitak” (dagiti bersikulo 17, 20).
Idi basbasaenmi dagitoy a bersikulo, nagarubos ti luami. Ti rag-o ni Alma isu ti rag-o a sapsapulenna!
Nagsaritaanmi a talaga a nadangkes unay ni Alma. Nupay kasta, idi nagbabawi, saan a pulos a nagsublin nga agbasol. Nagbalin a maysa a napasnek a disipulo ni Jesucristo. Nagbalin a maysa a propeta! Dimakkel ti mata ni Danny. “Maysa a propeta?” kinunana.
Insungbatko, “Wen, maysa a propeta. Awan ti panangpilit kenka!”
Nagsaritaanmi a nupay saan a nakaro a kas ken ni Alma dagiti basolna, maaramid iti tunggal maysa ti kasta met laeng a kari ti naan-anay ken perpekto a pannakapakawan—iti ken babaen iti awan patinggana a Pannubot ni Jesucristo.
Maawatan itan ni Danny. Ammona ti nasken nga aramidenna: masapul a rugianna ti panagdaliasatna babaen iti panagtalek iti Apo ken panangpakawan iti bagina!
Milagro ti nabileg a panagbalbaliw ti puso ni Danny. Naglabas ti panawen, nagbaliw ti langana, ken nagsubli ti lawag dagiti matana. Nagbalin a maikari para iti templo! Nagsubli isuna iti kamaudianan!
Kalpasan ti adu a bulan, dinamagko ken Danny no kayatna nga isumite ti aplikasionna nga agserbi iti full-time mission. Makapakigtot ken makapasiddaaw ti sungbatna.
Kinunana, “Magustuak ti agserbi iti mision, ngem ammom ti saadko idi ken dagiti banag a naaramidko! Panagkunak diak maikari.”
Insungbatko, “Mabalin a hustoka. Nupay kasta, awan ti makalapped kadatayo iti panagkiddaw. No maiparbengka, maammuamto a naipeksam ti napudno a tarigagay nga agserbi iti Apo.” Limmawag dagiti matana. Napalalo ti ragsakna iti daytoy nga ideya. Dakkel a peggad para kenkuana, ngem maysa a gundaway a situtulok nga aramidenna.
Kalpasan ti sumagmamano a lawas, ken iti siddaawna, maysa manen a milagro ti napasamak. Inawat ni Danny ti awag nga agserbi iti full-time mission.
Iti sumagmamano a bulan kalpasan a simmangpet ni Danny iti mision, nakaawatak iti tawag iti telepono. Kinuna laeng ti presidentena, “Ania ti adda kadaytoy a barito? Isu ti naisangsangayan unay a misionario a nakitakon! Kitaenyo, nakaawat daytoy a presidente iti maysa nga Alma nga Ub-ubing iti agdama nga aldaw.
Kalpasan ti dua a tawen, nadayaw a nagawid ni Danny, nagserbi iti Apo iti amin a puso, bileg, panunot, ken pigsana.
Kalpasan ti missionary reportna iti miting ti sakramento, nagawidak, tapno laeng mangngegak ti toktok iti ridaw iti sango. Idiay a nakatakder ni Danny nga aglulua dagiti matana. Kinunana, “Mabalin kadi nga agsaritata iti mabiit?” Rimmuarkami a napan iti dayta met laeng a pangal ti beranda.
Kinunana, “President, panagkunam kadi a pudno a napakawannakon?”
Ita nagluaak met a kas kenkuana. Nakatakder iti sangok ti maysa a napasnek a disipulo ni Jesucristo a nangted iti aminna tapno mangisuro ken mangipaneknek maipapan iti Mangisalakan. Isu ti mangibagi iti makapaimbag ken makapapigsa a bileg ti Pannubot ti Mangisalakan.
Kinunak, “Danny! Kimmitaka kadni iti sarming? Nakitam kadin dagiti matam? Napnuanda iti lawag, ken agsilsilnagkan iti Espiritu ti Apo. Siempre napakawankan! Nakakaskasdaawka! Ita ti masapul nga aramidem ket agtultuloyka iti panagbiagmo. Saanmon a sublian ti agbasol! Agtultuloyka iti sumaruno nga ordinansa nga addaan iti pammati.”
Agtultuloy ti milagro ni Danny ita. Nagkallaysa iti templo ken nagsubli iti eskuela, a nakaawatanna iti master’s degree. Agtultuloy nga agserbi iti Apo nga addaan iti dayaw ken dignidad kadagiti callingna. Ti napatpateg, nagbalin isuna a maysa a naisangsangayan nga asawa ken napudno nga ama. Maysa a napasnek a disipulo ni Jesucristo.
Insuro ni Presidente Russell M. Nelson, “No awan ti awan patinggana a Pannubot ti [Mangisalakan], mapukaw amin a sangkataw-an.”1 Saan a napukaw ni Danny, ket ditayo met mapukaw iti Apo. Nagtakder iti ridaw tapno itag-aynatayo, papigsaennatayo, ken pakawanennatayo. Kanayon a laglagipenna nga ay-ayatennatayo!
Nakaskasdaaw ti impakita nga ayat ti Mangisalakan kadagiti annak ti Dios a naisurat iti Libro ni Mormon: “Ket napasamak nga idi malpas ni Jesus nga agsao, intaliawna manen dagiti matana iti ummong, ket naimatanganna ti panagluluada ket sititibkerda a nangperreng kenkuana a kasla kayatda a dawaten ti panagbayagna pay bassit kadakuada.” (3 Nephi 17:5).
Binusbos ti Mangisalakan ti aldaw a nagministro kadagiti tattao. Nupay kasta, adu pay ti aramidenna—nasken a sarungkaranna dagiti dadduma a karnerona; nasken a mapan iti Amana.
Iti laksid dagitoy nga obligasion, nautobna a tinarigagayan dagiti tao ti panagbayagna pay bassit. Isu a, babaen iti puso ti Mangisalakan a napno iti asi, maysa kadagiti naindaklan unay a milagro ti napasamak iti pakasaritaan iti lubong:
Nagbati.
Binendisionanna ida.
Nagministro kadagiti annakda a saggaysa.
Inkararaganna ida; nakipagsangit a kadakuada.
Ket pinaimbagna ida. (Kitaen iti 3 Nephi 17.)
Agnanayon ti karina. Agasannatayto.
Kadagidiay nayaw-awan manipud iti dana ti katulagan, ammuenyo koma a kanayon nga adda namnama, kanayon nga adda pannakaagas, ken kanayon nga adda maysa a wagas a makapagsublida.
Ti agnanayon a mensahena a namnama isu ti makaagas a balsamo para iti amin nga agbibiag iti nariribuk a lubong. Kinuna ti Mangisalakan, “Siak ti dalan, ti kinapudno, ken ti biag (Juan 14:6).
Kakabsat, laglagipentayo koma a sapulen Isuna, ayaten Isuna, ken laglagipen Isuna.
Paneknekak a sibibiag ti Dios ken ay-ayatennatayo. Paneknekak pay a ni Jesucristo ti Mangisalakan ken Mannubbot ti lubong. Isuna ti nabileg a mangngagas. “Ammok a sibibiag ti Mannubbotko! Iti nagan ni Jesucristo, amen.