Agpokus ken ni Jesucristo

Ni Brother Milton Camargo

Umuna a Mammagbaga iti Sapasap a Panguluen ti Sunday School

Ni Apo Jesucristo ti solusion dagiti problematayo, ngem nasken nga itangadtayo dagiti matatayo ken agpokustayo tapno makitatayo Isuna.

Imbaga kaniak idi ni tatangko, “Saanka unay nga agpokus kadagiti problemam a dimo makita ti solusion.”

Paneknekak a ni Apo Jesucristo ti solusion uray kadagiti karirigatan a problematayo. Nangnangruna, naparmekna ti uppat a problema a pakaipaspasanguantayo ket awan ti uray maysa ti makarisut a bukbukodtayo:

Ti umuna a problema ket ti pisikal nga ipapatay. Mabalintayo nga itantan wenno di ikankano daytoy, ngem ditayo maparmek a bukbukodtayo. Ni Jesucristo, numanpay kasta, naparmekna ti patay para kadatayo, ken ti nagbanaganna, agungartayonto amin iti maysa nga aldaw.¹.
Ti maikadua a problema iramanna dagiti panagrigat, narigat a padas, panagladingit, saem, ken di nainkalintegan daytoy a lubong. Naparmek ni Jesucristo amin daytoy. Para kadagiti mangikagkagumaan a mangsurot Kenkuana, dumtengto ti panawen a “punasennanto ti amin a lulua” ken aturennanto manen dagiti bambanag.² Iti agdama, papigsaennatayo tapno malasattayo dagiti pannuboktayo nga addaan panagtalek, ragsak ken talna.³
Ti maikatlo a problema ket ti naespirituan nga ipapatay nga agtaud iti basol. Naparmek ni Jesucristo daytoy a problema babaen ti panangawatna “ti dusa ti pakaikappiaantayo.”⁴ Gapu iti pannubbot a sakripisiona, mawayawayaantayo iti pagbanagan dagiti basoltayo no adda pammatitayo iti Mangisalakan, sipapasnek nga agbabawi, awaten ti katulagan nga ipaay ti Ama babaen iti kasapulan nga ordinansa kas ti panagbuniag, ken panagibtur iti panungpalan.⁵
Ti maikapat a problema ket dagiti limitado, kinaimperpektotayo. Adda solusion ni Jesucristo iti daytoy pay a problema. Saanna laeng a punasen dagiti bidduttayo ken dalusannatayo manen. Maaramidna ti “naindaklan a panagbalbaliw … iti puspusotayo, nga awanen kadatayo ti tarigagay nga agaramid iti kinadakes, ngem ketdi agtultuloy a panagaramid iti kinaimbag.”⁶ Agbalintayo a naan-anay babaen ti parabur ni Cristo ket dumtengto ti panawen nga agbalintayto a kas Kenkuana.⁷

Daksanggasat ta masansan nga agpokustayo unay iti bukodtayo a problema ket mapukaw ti pokustayo iti solusion, ti Mangisalakantayo, a ni Jesucristo. Kasano a maliklikantayo dayta a biddut? Mamatiak a naibatay ti sungbat kadagiti katulagan a nakaawisantayo nga aramiden Kenkuana ken iti Amatayo iti Langit.

Agpokus ken ni Jesucristo babaen kadagiti Katulagan

Tulongannatayo dagiti katulagantayo a mangipokus iti atensiontayo, kapanunotantayo ken tignaytayo ken ni Cristo. No “kumpettayo kadagiti katulagan nga inaramid[tayo],” nalaklaka a mailasintayo “dagiti banag daytoy a lubong” a nasken nga “iwaksitayo” ken nasken a sipapasnek a sapulentayo “dagiti banag ti nasaysayaat a [lubong].”⁸

Dayta ti inaramid dagiti tao ni Ammon iti Libro ni Mormon. Apaman a nasursuroda ti maipapan ken ni Jesucristo ken rinugian nga impamaysada ti biagda Kenkuana, binigbigda a masapul nga ikalida ti igamda a pakigubat ken agbalin a naan-anay a napudno ket “naam-ammoda babaen iti kinareggetda iti Dios.”⁹

Ti panagtungpal kadagiti katulagan ti mangiturong kadatayo a manggun-od iti ania man a pangawis ti impluensia ti Espiritu ket supringentayo dagiti mangpapanaw iti dayta—“gapu ta ammotayo a no mabalin a maikaritayo iti panangkadkadua ti Espiritu Santo, mabalin a maikaritayo met nga agindeg iti sidong ti Nailangitan nga Ama ken ti Anakna, ni Jesucristo.”¹⁰ Kayatna a sawen a nasken a baliwan ti bokabulariotayo, nga usaren ti nasaysayaat a balikas. Kayatna a sawen a sukatan dagiti di makaay-ayo a naespirituan a kababalin iti baro a kababalin a mangpatibker iti relasiontayo iti Apo, kas iti inaldaw a panagkararag ken panagadal iti nasantuan a kasuratan, agmaymaysa ken kadua ti pamiliatayo.

Kinuna ni Presidente Russell M. Nelson a “Tunggal tao nga agaramid kadagiti katulagan kadagiti puente a pagbuniagan ken kadagiti templo—ken mangtungpal kadagitoy—ket ad-adda a makagun-od iti bileg ni Jesucristo. …

Ti gunggona iti panagtungpal kadagiti katulagan iti Dios ket bileg a naggapu iti langit—pannakabalin a mangpapigsa kadatayo tapno kabaelan a mangsaranget kadagiti pannubok, sulisog, ken leddaangtayo.”¹¹

Ti panangpabaro kadagiti katulagantayo bayat ti sakramento iti kada Domingo ti naindaklan a gundaway tapno maamiristayo ti bagbagitayo¹² ken mangipamaysa manen iti biagtayo ken ni Jesucristo. Babaen ti pannakiranud iti sakramento, ipakdaartayo a “kanayontayo a laglagipen Isuna.”¹³ Ti balikas a kanayon ket napateg la unay. Idanonna ti impluensia ti Mangisalakan iti tunggal paset ti biagtayo. Saantayo lang a laglagipen Isuna iti simbaan wenno kabayatan laeng ti panagkararag iti bigat wenno no marigatantayo laeng ken no adda masapultayo.

Wen, no dadduma masingatayo. Makalipattayo. Mapukaw ti pokustayo. Ngem ti panangpabaro iti katulagantayo, kaipapananna a kayattayo a laglagipen a kanayon ti Mangisalakan, ket aramidentayo daytoy iti intero a lawas, ket agkumit ken agpokustayo manen Kenkuana iti lamisaan ti sakramento iti sumaruno a lawas.

Agpokus ken ni Jesucristo kadagiti Pagtaengantayo

Nalawag a, ti panagpokus ken ni Jesucristo nasken a saan nga iti Domingo laeng. Idi yam-ammo ni Presidente Nelson ti Umaykayo, Sumurot Kaniak idi 2018, imbagana, “Panawenen para iti Simbaan a naisentro iti pagtaengan.”¹⁴ Kinunana pay a nasken nga “agbalin ti pagtaengan[tayo] a santuario ti pammati” ken “maysa a sentro a pagsursuruan iti ebanghelio.” Ket nangted iti uppat a nasasayaat a kari para kadatayo no aramidentayo.¹⁵

Ti umuna a kari: “Pudno nga agbalinto dagiti aldawyo iti Sabbath a maysa a pagragsakan.” Agbalinto a maysa nga aldaw no umas-asidegtayo iti Mangisalakantayo. Kas iti kinuna ti maysa a balasitang iti Peru, “Ti aldaw ti Apo ti pakagun-odak iti kaaduan a sungbat manipud iti Apo.”

Ti maikadua a kari: “Dagiti annakyo aggagardanto nga agsursuro ken agtungpal kadagiti pannursuro ti Mangisalakan.” Dayta ti gapu nga “agsaotayo iti maipanggep ken ni Cristo, agrag-otayo ken ni Cristo, ikasabatayo ni Cristo, … tapno maammuan dagiti annaktayo ti pamuidanda a mangkita iti pakaugasan ti basbasolda.”¹⁶

Aramidentayo daytoy ta iti maysa nga aldaw, no agtrabahonto ti anaktayo a lalaki wenno magna iti bambantay wenno aganup iti kabakiran, kas ti inaramid ni Enos, malagipnanto no ania ti insurotayo kenkuana maipapan ken ni Cristo ken ti rag-o nga agbiag iti ebanghelio. Ket asino ti makaammo? Mabalin a daytoyto ti aldaw a mariknananto ti naespirituan a panagbisin a mangiturong kenkuana ken ni Jesucristo tapno mangngegna ti timek ti Apo a mangibagbaga kenkuana, “Napakawanen dagiti basolmo, ket mabendisionanka.”¹⁷

Ti maikatlo a kari: “Ti impluensia ti kabusor iti biagyo ken iti pagtaenganyo kumapsutto.” Apay? Gapu ta no ad-adda nga agpokustayo ken ni Jesucristo, ad-adda a saanen a makaay-ayo ti agbasol.¹⁸ No mapno dagiti pagtaengantayo iti lawag ti Mangisalakan, bumasbassit ti lugar para iti sipnget ti kabusor.

Ti maikapat a kari: “Maaddaanto iti dakkel ken agtultuloy a panagbalbaliw iti pamiliayo.” Apay? Gapu ta ti panagbalbaliw nga isangbay ni Jesucristo ket “naindaklan a panagbalbaliw.”¹⁹ Baliwanna ti mismo a kadawyantayo; agbalintayo a “baro a parsua.”²⁰ In-inut nga agbalintayo nga ad-adda a kas iti Mangisalakan, a napnuan iti natarnaw a panagayatna para iti amin nga annak ti Dios.

Siasino ti di mangayat a matungpalto amin dagitoy a kari kadagiti biagda ken pamiliada? Ania ti kasapulantayo nga aramiden tapno magun-odtayo dagitoy? Ti sungbat ket pagbalinen dagiti balaytayo a santuario ti pammati ken maysa a sentro a pagsursuruan iti ebanghelio. Ket kasano nga aramidentayo dayta? Babaen ti panagpokus iti Nailangitan nga Ama ken ni Jesucristo, pagbalinen Ida a sentro iti biag ti pamiliatayo, ti kangrunaan unay nga impluensia iti pagtaengantayo.

Mabalin nga isingasingko a rugianyo babaen ti panangaramid kadagiti balikas ni Cristo, a masarakan iti nasantuan a kasuratan, kas paset ti inaldaw a biagyo? Awan ti naituding a wagas para iti naan-anay a panagadal iti nasantuan a kasuratan. Mabalin a 5 wenno 10 a minuto iti tunggal aldaw—wenno ad-adu pay no kabaelan. Mabalin a maysa a kapitulo wenno sumagmamano a bersikulo iti kada aldaw. Kaykayat ti sumagmamano a pamilia ti agadal iti bigat sakbay a mapanda iti eskuela wenno trabaho. Kaykayat ti dadduma nga agbasa iti rabii sakbay a maturogda. Sumagmamano nga ubbing nga agassawa ti nangibaga kaniak nga agadalda iti bukodda bayat ti ipapanda iti trabaho ket kalpasanna ibinglayda dagiti kapanunotanda iti tunggal maysa babaen iti text, tapno mairekord dagiti masao ken pagsarsaritaanda.

Ti Umaykayo, Sumurot Kaniak ket mangipaay iti adu a singasing iti aktibidad ken resources a mangtulong kadagiti indibidual ken pamilia nga agsursuro kadagiti pagbatayan ti ebanghelio manipud iti nasantuan a kasuratan. Dagiti video ti Biblia ken Libro ni Mormon ket makatulong pay tapno al-alisto a magun-od ti pamiliayo dagiti nasantuan a kasuratan. Masansan a maparegta dagiti ubbing ken agtutubo kadagiti nakallalagip nga estoria iti nasantuan a kasuratan. Ti isuro dagitoy nga estoria ken pagbatayan ti ebanghelio ket agtalinaeddanto kadagiti annakyo a kas kadagiti mapagtalkan a gagayyem, no kasapulandanto dagiti nasayaat a pagwadan iti panagserbi, saguday, panagtungpal, kinaanus, bukod a paltiing, asi, kinapakumbaba, ken pammati ken ni Jesucristo. Inton agangay, ti panagtultuloyyo iti panagbussog iti balikas ti Dios ti mangtulongto kadagiti annakyo tapno ad-adda a sumingedda iti Mangisalakan. Ad-adda a maam-ammodanto Isuna ngem idi.

Sibibiag ti Apo a ni Jesucristo ita. Mabalin nga aktibo nga inaldaw a kalanglangen Isuna iti biagtayo. Isuna ti solusion dagiti problematayo, ngem nasken nga itangadtayo dagiti matatayo ken agpokustayo a kumita Kenkuana. Kinunana, “Kitaendak iti tunggal panunot; saankayo nga agduadua, saankayo nga agbuteng.”²¹ No nakapokustayo Kenkuana ken iti Amatayo iti Langit, agaramid ken agtungpaltayo kadagiti katulagan Kadakuada, ken pagbalinen Ida a kangrunanan unay nga impluensia iti pagtaengan ken pamiliatayo, agbalintayto a kas ti kita dagiti tao a nasirmata ni President Nelson: “Dagiti tao a makabael, nakasagana, ken maikari nga umawat iti Apo inton agsubli manen, dagiti tao a nangpilin ken ni Jesucristo ngem iti daytoy dakes a lubong, dagiti tao nga agrag-o iti panangpilida nga agbiag kadagiti nangatngato, nasansantuan a linteg ni Jesucristo.”²² Iti nagan ni Jesucristo, amen.