“Awanen ti Nain-inaka ken Nasamsam-it Pay Ngem iti Rag-ok”
Ti inaldaw a panagbabawi ken yaasideg ken Jesucristo ket ti wagas a mangpadas iti rag-o—rag-o a nalablabes ngem iti arapaaptayo.
Iti unos ti mortal a panagserbina, impakita ti Mangisalakan ti dakkel a panangngaasi iti amin nga annak ti Dios—nangruna kadagiti agsagsagaba wenno kimmayakay. Idi binabalaw dagiti Fariseo ti pannakikadua ken pannakilanglangna kadagiti managbasol, simmungbat ni Jesus babaen ti panangisurona iti tallo a pamiliar a pangngarig.1 Iti tunggal maysa kadagitoy a pangngarig, inyunay-unayna ti pateg ti panangbirok kadagiti naiwawa ken ti rag-o a marikna no agsublida. Kas pagarigan, iti pangngarig ti napukaw a karnero kinunana, “[Dakkel] a rag-o ti addanto idiay langit gapu iti maysa a managbasol nga agbabawi.”2
Ti tarigagayko ita a saritaen ket ti pagnaigan ti rag-o ken panagbabawi—nangruna, ti rag-o nga umay no agbabawitayo ken ti rikna ti rag-o a mapadasantayo no awisentayo ti dadduma nga umay ken Cristo ken yaplikar ti pangsubbot a sakripisiona iti biagda.
Addatayo Tapno Maaddaantayo iti Rag-o
Iti nasantuan a kasuratan, ad-adu nga amang ti kaipapanan ti rag-o ngem ti panaglabas dagiti kanito ti pannakapnek wenno uray pay ti rikna ti kinaragsak. Ti rag-o itoy a konteksto ket nadiosan a kababalin, a masarakan iti pakabuklanna no agsublitayo a makidenna iti Dios.3 Naun-uneg, natantan-ok, manmanayon, ken mamagbalbaliw-iti-biag ngem iti ania man a ragsak wenno gin-awa a maidiaya daytoy a lubong.
Naparsuatayo a maaddaan iti rag-o. Daytoy ti naisangrat a pagturongantayo kas annak ti managayat a Nailangitan nga Ama. Kayatna nga iranud ti rag-ona kadatayo. Insuro ni propeta Lehi a plano ti Dios kadatayo amin a “maaddaantayo iti rag-o.”4 Gapu ta agbibiagtayo iti natnag a lubong, masansan a kasla ditay maragpat ti manayon a rag-o wenno agnanayon a rag-o. Ngem iti sumaruno a bersikulo, intuloy ni Lehi babaen ti panangilawlawagna nga “immay ti Mesias … tapno subbotenna [tayo] manipud iti pannakatnag.”5 Ti pannakasubbot, babaen ti Mangisalakan a ni Jesucristo, ti mangaramid a posible ti rag-o.
Ti mensahe ti ebanghelio ket ti mensahe ti namnama, ti “naimbag a damag ti dakkel a rag-o,”6 ken ti wagas a pakapadasantayo amin iti talna ken gundaway ti rag-o ditoy a biag ken umawat iti pakabuklan ti rag-o iti sumuno a biag.7
Ti rag-o a saritaentayo ket sagut para kadagiti napudno, ngem adda gatadna. Ti rag-o ket saan a nalaka wenno gagangay a maited. Ketdi, nagatang daytoy “iti napateg a dara ni [Jesus] Cristo.”8 No talaga a naawatantayo ti pateg ti pudno, nadiosan a rag-o, ditay agkedked a mangisakripisio iti ania man a nailubongan a sanikua wenno mangaramid iti ania man a nasken a panagbalbaliw iti biag tapno maawat daytoy.
Naawatan daytoy ti nabileg ngem napakumbaba nga ari iti Libro ni Mormon. “Ania ti aramidek,” dinamagna, “tapno maipasngayak iti Dios, iti baet ti kaadda daytoy nadangkes nga espiritu a nagramut iti barukongko, ket maawatko ti Espirituna, tapno mapnoak iti rag-o … ?, Adtoy, kinunana, itedko amin a kukuak, wen, tallikudak ti pagariak, tapno maawatko daytoy naindaklan a rag-o.”9
Kas sungbat iti saludsod ti ari, kinuna ti misionario a ni Aaron, “No tarigagayam daytoy a banag, … agruknoyka iti sangoanan ti Dios … [ken] agbabawika iti amin a basolmo.”I10 Ti panagbabawi ti dalan iti rag-o11 gapu ta isu ti dalan nga agturong iti Mangisalakan a ni Jesucristo.12
Umay ti Rag-o babaen ti Napasnek a Panagbabawi
Para iti dadduma, nalabit a kasla maisupadi ti mangpanunot iti panagbabawi kas dalan iti rag-o. No dadduma, mabalin a nasaem ken narigat ti panagbabawi. Agkasapulan iti panangako a nagbiddut ti dadduma a pampanunot ken tignaytayo—uray ti dadduma a panamatitayo. Ti panagbabawi agkasapulan pay iti panagbalbaliw, a no dadduma, saan a komportable. Ngem saan nga agpada ti rag-o ken gin-awa. Ti basol—agraman ti basol a kompiansa—ti mangpabassit iti rag-otayo.
Kas iti kinuna ti salmista, “Ti sangit mabalin nga agpatnag, ngem ti rag-o umay iti bumigat.”13 No agbabawitayo iti basbasoltayo, nasken nga agpokustayo iti dakkel a rag-o a sumaruno. Nalabit a kasla atiddog dagiti rabii ngem dumteng ti bigat ngem, anian a nagpintasen ti talna ken nagraniagen ti rag-o a mariknatayo no wayawayaannatayo ti Pannubbot ti Mangisalakan iti basol ken panagsagaba.
Awanen ti Nain-inaka ken Nasamsam-it Pay
Panunotenyo ti padas ni Alma iti Libro ni Mormon. Isu ket “nagsagaba iti agnanayon a saem” ken “naparigat” ti kararuana gapu iti basbasolna. Ngem apaman a nagpatulong iti Mangisalakan para iti asi, “saannan a malagip pay dagiti saem[na].”14
“Ket o, anian a rag-o,” ken anian a nakaskasdaaw a lawag ti nakitak; wen, … awanen ti nain-inaka ken nasamsam-it pay ngem iti rag-ok.”15
Daytoy ti kita ti rag-o a magun-od dagiti umay ken ni Jesucristo babaen ti panagbabawi.16 Kas insuro ni Presidente Russel M. Nelson:
Ti panagbabawi ti pakagun-odantayo ti bileg ti Pannubbot ni Jesucristo. …
“No pilientayo ti agbabawi, pilientayo ti agbalbaliw! Palugodantayo ti Mangisalakan a mangbalbaliw kadatayo nga agbalin a kasingpetan. Pilientayo ti dumur-as a naespirituan ken umawat iti rag-o—rag-o ti pannubbotna. No pilientayo ti agbabawi, pilientayo ti agbalin nga ad-adda a kas ken Jesucristo!”17
Ti panagbabawi mangyeg iti rag-o gapu ta isaganana ti pusotayo nga umawat iti impluensia ti Espiritu Santo. Ti mapno iti Espiritu Santo kaipapananna ti mapno iti rag-o. Ken ti mapno iti rag-o kaipapananna ti mapno iti Espiritu Santo.18 Dumakkel ti rag-otayo no agtrabahotayo iti inaldaw a mangyeg iti Espiritu iti biagtayo. Kas insuro ni propeta Mormon: “Nupay kasta masansanda a nagayuno ken nagkararag, ket pimmigsa a pimmigsada iti kinapakumbaba ken timmibkerda a timmibker iti pammati[da] [ken] ni Cristo, agingga iti napno ti kararuada iti rag-o ken linglingay.”19 Ikari ti Apo iti amin a sumurot Kenkuana, “Itdekto kenka … ti Espirituk, a mangpalawag iti panunotmo, a mangpunno iti kararuam iti rag-o.”20
Ti Rag-o ti Panagtulong iti Dadduma nga Agbabawi
Kalpasan a nariknatayo ti rag-o nga aggapu iti napasnek a panagbabawi, gagangay a kayattayo nga ibinglay dayta a rag-o iti dadduma. No aramidentayo, dumakkel ti rag-otayo. Kasta a mismo ti napasamak ken ni Alma.
“Daytoy ti idaydayawko,” kinunana, “ta nalabit a siak ti ramit dagiti ima ti Dios a mamagbabawi iti sumagmamano a kararua; ket daytoy ti rag-ok.
“Ket adtoy, iti pannakakitak iti adu a kakabsatko a sipapasnek nga agbabawi a silaladingit, ken umasideg iti Apo a Diosda, iti dayta napno ti kararuak iti rag-o; iti dayta nalagipko ti inaramid kaniak ti Apo, … wen, iti dayta nalagipko ti manangngaasi a takiagna a naitanggaya kaniak.”21
Ti panangtulong iti dadduma nga agbabawi ket panangipeksa iti panagyamantayo iti Apo; daytoy ti paggapuan ti dakkel a rag-o. Inkari ti Apo:
“Ket no pudno a kasapulan … yegyo, uray no maysa la a kararua kaniak, anianton a rag-oyo iti sibayna iti pagarian ti Amak!
“Ket ita, no nalausto ti rag-oyo iti maysa a kararua a mayegyo kaniak … , anianto la ketdin a rag-oyo no mangyegkayo kaniak iti adu a kararua!”22
Nalaus ti Rag-ona iti Kararua nga Agbabawi
Makitak a makatulong a mangpadas a mangiladawan iti rag-o a marikna ti Mangisalakan tunggal umawattayo kadagiti bendision ti panangsubbot a sakripisiona iti biagtayo.23 Kas dinakamat ni President Nelson,24 imbinglay ni Apostol Pablo iti Suratna kadagiti Hebreo daytoy nalawag a pannakaawat: “Iwaksiyo ti tunggal … basol a nalaka unay a mangsaplit kadatayo, … a mangkitkita ken Jesus nga autor ken nangileppas iti pammatitayo; a gapu iti rag-o a naikabil iti sanguananna nagibtur iti krus … ket naikabil iti makannawan ti trono ti Dios.”25 Masansan a saritaentayo ti saem ken panagsagaba iti Getsemani ken Calvario, ngem manmano a saritaentayo ti dakkel a rag-o a ninamnama ti Mangisalakan idi indiayana ti biagna para kadatayo. Nalawag, para kadatayo ti saem ken panagsagabana, tapno mapasarantayo ti rag-o ti panagsubli Kenkuana iti sidong ti Dios.
Kalpasan ti panangisurona kadagiti tao iti nagkauna nga America, inyebkas ti Mangisalakan ti dakkel nga ayatna kadakuada babaen ti panangisaona:
“Ita, adtoy, dakkel ti rag-ok, uray iti pakabuklanna, gapu kadakayo … ; wen, ket uray ti Ama agrag-o, ken kasta met ti amin a nasantuan nga anghel. …
“… [Kadakayo] addaanak pakabuklan ti rag-o.”26
Umay ken Cristo ken Umawat iti Rag-ona
Kakabsat, gibusak babaen ti panangibinglayko iti bukodko a saksi, nga ibilangko a sagrado a sagut. Paneknekak a ni Jesucristo ti Mangisalakan ken Mannubbot ti lubong. Ammok a patpatgennatayo amin. Maysa a pokusna, ti “aramid ken gloriana,”25 ket tulongannatayo nga umawat iti pakabuklan ti gloria Kenkuana. Paneknekak mismo a ti inaldaw a panagbabawi ken yaasideg ken Jesucristo ket ti wagas a mangpadas iti rag-o—rag-o a nalablabes ngem iti arapaaptayo.28 Dayta ti gapuna nga addatayo ditoy daga. Dayta ti gapu nga insagana ti Dios ti naindaklan a planona iti ragsak para kadatayo. Ni Jesucristo “ti dalan, ti kinapudno, ken ti biag”29 ken ti kakaisuna a “nagan a naited iti sirok ti langit a pakaisalakanan ti tao iti pagarian ti Dios.”30 Paneknekak daytoy iti sagrado a nagan ni Jesucristo, amen.