Ministering
Tulongan ken aywanantayo koma kas iti aramiden ti Mangisalakan, nangruna dagiti nakaparaburantayo iti ayat ken annongen a pagserbian.
Patpatgek a kakabsat ken gagayyem, kablaawankayo iti sapasap a komperensia!
Kalpasan ti sapasap a komperensia idi Oktubre, pinagnami ken Sister Gong ti Conference Center tapno mangumusta ken mangngeganmi dagiti padasyo iti ebanghelio.
Kinuna dagiti miembrotayo idiay Mexico, “Hoy es el tiempo de Mexico.”
Naammuanmi nga aggayyem da Gilly ken Mary iti England. Idi kimmappeng ni Mary iti Simbaan, napukawna ti lugar a pagnaedanna. Siaayaat nga inawis ni Gilly ni Mary a makipagnaed kenkuana. Kuna ni Gilly a napnuan pammati, “Diak nagduadua a kaduak ti Apo.” Iti komperensia, naaddaan pay iti naragsak manen a panagkadua da Gilly ken ti sister missionary a nangbuniag kenkuana 47 a tawenen ti naglabas.
Dinar-ayan ni Jeff ken ti asawana, a ni Melissa, ti sapasap a komperensia iti umuna a gundaway. Nagay-ayam ni Jeff iti professional baseball (maysa a catcher) ket itan physician anesthesiologist. Imbagana kaniak, “Iti pakasdaawak unay, Agsagsaganaak a mabuniagan gapu ta mariknak a daytoy ti kaumnuan ken kapudnuan a wagas iti biag.”
Idi damo, nagpadispensar ni Melissa iti natudingan a ministering brother ni Jeff, “Di kayat ni Jeff dagiti ‘puraw a kamisadentro’ iti balaymi.” Kinuna ti ministering brother, “Ipamuspusak.” Ita nasingeddan nga aggayyem ken ni Jeff. Iti panagbuniag ni Jeff, naam-ammok ti kongregasion dagiti Latter-day Saints nga ipatpateg da Jeff, Melissa ken ni Charlotte nga anakda.
Kas pasurot ni Jesucristo, agministrotayo iti dadduma kas iti inaramidna gapu ta agur-uray ti biag nga agbalbaliw.
Idi imbaga kaniak ni Peggy a mabuniaganen ti asawana a ni John kalpasan ti 31 a tawen a panagasawada, dinamagko no ania ti nagbaliw.
Kinuna ni Peggy, “Ad-adalenmi ken John ti Baro a Tulag Umaykayo, Sumurot Kaniak, ket nagsaludsod ni John maipapan iti doktrina ti Simbaan.”
Kinuna ni Peggy, “Awisenta dagiti misionario.”
Insungbat ni John, “Awan misionario—malaksid no makaumay ti gayyemko.” Iti uneg ti 10 a tawen, nagbalin a mapagtalkan a gayyem ni John ti ministering brotherna. (Napanunotko, ania ngata no nagsardeng a nagbisita ti ministering brother ni John kalpasan ti maysa, dua, wenno siam a tawen?)
Dimngeg ni John. Binasana ti Libro ni Mormon nga addaan pudno a panggep. Idi inawis dagiti misionario ni John nga agpabuniag, insungbatna ti wen. Kinuna ni Peggy, “natnagak iti tugawko ket nagsangitak.”
Kinuna ni John, “Nagbalbaliwak iti yaasidegko iti Apo.” Idi agangay, nailantip iti nasantuan a templo da John ken Peggy. Idi Disiembre, pimmusay ni John iti tawenna a 92. Kinuna ni Peggy, “Kanayon a nasayaat a tao ni John, ngem nagbalbaliw iti napintas a wagas kalpasan ti panagbuniagna.”
Naam-ammomi ken Sister Gong da Meb ken Jenny babaen iti video bayat ti pandemia ti COVID. (Adu ti naam-ammomi a nasasayaat nga agassawa ken indibidual babaen iti video kabayatan ti COVID, sikakararag nga inyam-ammo ti tunggal maysa dagiti stake presidentda.)
Sipapakumbaba a kinuna da Meb ken Jenny a gapu iti pakaseknanda iti biag, napanunotda no mabalin a maisalbar ti kallaysada iti templo, ngem, kasano. Namatida a ti Pannubbot ni Jesucristo ken dagiti panagkumitda iti katulagan ti makatulong kadakuada.
Napalalo ti ragsakko idi naawat da Meb ken Jenny ti baro a temple recommend ket nagsublida a dua iti balay ti Apo. Idi agangay, dandani natay ni Meb. Anian a bendision ta naisubli ti natulagan a relasion da Meb ken Jenny iti Apo ken iti tunggal maysa ket mariknada ti naayat a ministering ti adu a tao iti aglawlawda.
Sadino man ti papanak, pagyamanak dagiti nasursurok kadagiti agministro ken agaywan kas iti Mangisalakantayo.
Idiay Peru, naam-ammomi ken Sister Gong ni Salvador ken dagiti kakabsatna.1 Ulila ni Salvador ken dagiti kakabsatna. Kasangay ni Salvador dayta nga aldaw. Dagiti lider ken miembro ti Simbaan a sipupudno nga agministro iti daytoy a pamilia ti mangparegta kaniak. “Ti natarnaw a relihion ken awan tulawna … ket daytoy, Sarungkaran dagiti ulila iti amma ken dagiti balo a babbai,”3 “saranayen dagiti nakapsut, itag-ay dagiti ima dagiti maidasay, … patibkeren dagiti nalupoy a tumeng.”4
Idiay Hong Kong, sidadayaw nga imbinglay ti elders quorum president no kasano a nagtultuloy ti korumna a nangimaton iti 100 percent a ministering interviews. “Sikakararag a mangbukelkami iti agkompanion tapno makaaywan ti tunggal maysa iti tao ken maaywanan met,” kunana. “Kanayon a saludsodenmi iti tunggal agkompanion no asino ti iministroda. Dikami agusar iti tsek; agministrokami kadagiti ministro a mangay-aywan kadagiti taomi.”
Idiay Kinshasa, Democratic Republic of the Congo, imbinglay ni President Bokolo no kasano a kimmappengda a sangapamilia iti Simbaan idiay France. Maysa nga aldaw, idi basbasaenna ti patriarchal blessingna, pinaregta ti Espiritu ni Brother Bokolo nga agsubli ken ti pamiliana iti DR Congo. Ammo ni Brother Bokolo a maipasangoda iti adu a karit no agsublida. Ken ti simbaanda, Ti Simbaan ni Jesucristo dagiti Santo iti Ud-udina nga Aldaw, di pay a naipasdek idiay Kinshasa.
Ngem, sipapammati, kas iti adu a dadduma, sinurot dagiti Bokolo ti Espiritu ti Apo. Iti Kinshasa, nagministro ken nangbendisionda kadagiti adda iti aglawlawda, naparmekda dagiti karit, immawatda kadagiti naespirituan ken temporal a bendision. Ita, maragsakanda iti kaaddan ti balay ti Apo iti pagilianda.4.
Maysa a convert ti napagserbian babaen ti personal a pagwadan. Kas maysa a barito, binubosna dagiti aldawna nga agpalpaliwa iti igid ti baybay. Maysa nga aldaw, imbagana, “Nakitak ti napintas a balasitang iti disente a swimsuit.” Nasdaaw, ket sinaludsodna no apay nga agkawes ti napintas a balasitang iti disente a swimsuit. Miembro daytoy Ti Simbaan ni Jesucristo dagiti Santo iti Ud-udina nga Aldaw ket dinamagna a nakaisem, “Kayatmo kadi ti makimisa inton Domingo?” Insungbatna ti wen.
Adu a tawenen ti naglabas, imbinglay ni Elder L. Tom Perry no kasano a nagministroda nga agkompanion iti maysa a sister nga agmaymaysa nga agbibiag iti naranggas a sangakaarrubaan idiay Boston. Idi simmangpet ni Elder Perry ken ti kompanionna, siaannad nga imbilin ti sister, “Ipauyasyo ti temple recommendyo iti baba ti ridaw.” Ket naluktanna laeng ti adu a kandado ti ridaw kalpasan a nakitana dagiti temple recommend.5 Siempre, diak sasawen a kasapulan dagiti ministering companionship dagiti temple recommend. Ngem magustuak ti kapanunotan a no agministro dagiti mangdayaw iti katulagan, maluktan dagiti pagtaengan ken puspuso.
Indiaya met ni Elder Perry ti maaramat a balakad. Kinunana, “Ikkan dagiti companionship iti nainkalintegan a bilang ti assignment, nainkararagan a pilien, naragupda maibatay iti lugar no maitutop, tapno mausar a naimbag ti oras ti panagbiahe.” Ibalakadna, “Rugianyo kadagiti agkasapulan unay a mabisita. Bangonenyo kadagiti nalabit a mangpasangbay ken aggusto a mabisita.” Inggibusna, “Ti napudno a panagtultuloy mangyeg iti milagro.”
Umay ti nangatngato ken nasansantuan a ministering6 no ikararagantayo “ti nadalus nga ayat ni Cristo”7 ken suroten ti Espiritu. Umay pay no dagiti panguluen ti elders quorum ken Relief Society, babaen iti direksion ti bishop, imatonanda dagiti ministering effort, karaman ti panangidutok iti ministering companionships. Ikkanyo koma dagiti babbarito ken babbalasitangtayo iti kasapulan a gundaway a kaduaen ken suruan dagiti addan padasna a ministering brother ken sister. Ken bay-an koma a paregtaen dagiti agtutubo a tumantanor a kaputotan dagiti kompanion a ministering brother ken sister.
Iti dadduma a lugar ti Simbaan, addaantayo iti ministering gap. Ad-adu ti agkuna nga agserserbida ngem ti agkuna a paserserbianda. Ditay kayat ti pakaseknan a tseklist. Ngem masansan a kasapulantayo ti ad-adda pay ngem napudno a pakumusta wenno gagangay a “Mabalin a tulonganka?” Iti adu a lugar, makatulongtayo, maawatantayo ti kasasaadda, ken mabangontayo ti linnangen no kanayon a bisitaentayo dagiti miembro iti pagtaenganda. Dagiti naparegta nga awis ti mangbalbaliw iti biag. No tulongandatayo dagiti awis nga agaramid ken agtungpal iti sagrado a katulagan, umas-asidegtayo iti Apo ken iti tunggal maysa.
Makuna a dagiti makaawat iti pudno a kaipapanan ti ministering ket ad-adu ti maaramidda, idinto a dagiti di makaawat basbassit ti maaramidda. Aramidentayo ti ad-adu pay, kas iti inaramid ti Mangisalakantayo. Kas kuna ti himnotayo, daytoy ti “bendision ti rebbengen ken ayat.”8
Dagiti ward council, elders quorum, ken Relief Society, denggenyo koma ti Naimbag a Pastor ken tulonganyo “a mangsapul dayta napukaw, … yawidyo dayta napapanaw, … bedbedanyo dayta nadangran, … papigsaenyo dayta masakit.”9 Mabalin a linglingaytayo “dagiti anghel a di am-ammo”10 no isaganatayo ti pagdagusanna para iti amin.11
Ti naparegta a ministering ti mangbendision kadagiti pamilia ken indibidual; mapatibkerna pay dagiti ward ken branch. Panunotenyo ti ward wenno branchyo kas naespirituan nga ecosytem. Iti kaipapanan ti alegoria ti kayo ti olibo, ti Apo iti bangkag ken dagiti katulonganna mangpataudda iti napateg a bunga ken mangpatibkerda iti tunggal kayo babaen ti sangkamaysa a panangbegkesda iti pigsa ken pagkapuyan ti amin a kayo.12 Ti Apo ti bangkag ken dagiti katulonganna inulitda a dinamag, “Ania pay ti maaramidak?”13 Sangkamaysa a bendisionanda dagiti puso ken pagtaengan, ward ken branch, babaen iti naparegta ken agtultuloy a ministering.14
Ministering—panagpastor—aramidenna ti bangkagtayo a “maysa a bagi”15—sagrado a kakaywan. Tunggal kayo iti kakaywantayo ket sibibiag a family tree. Agsisilpo dagiti ramut ken sanga. Bendisionan ti ministering dagiti kaputotan. No kasapulan ti serbisio, dagiti masirib a bishop ken panguluen ti elders quorum ken Relief Society damagenda, “Asino dagiti ministering brothers ken sisters?” Saan laeng a damagen dagiti ward councl ken ministering interview maipapan iti karit wenno problema ngem kumitada pay ken agrag-o iti adu a nadungngo nga asi ti Apo iti biagtayo no agministrotayo kas Kenkuana.
Ti Mangisalakan ti naan-anay a pagwadantayo.16 Gapu ta naimbag Isuna, mamagpagna nga agar-aramid iti naimbag.17 Bendisionanna ti maysa ken ti 99. Tarigagayanna ti agserbi iti tattao. Agbalintayo kas ken Jesucristo no aramidentayo “iti … maysa kadagitoy kanunumuan” kas Kenkuana,18 no ayatentayo ti padatayo kas iti bagitayo,19 no “agiinnayattayo; kas panagayatko kadakayo,”20 ken no “siasino man nga agtarigagay nga isu ti kaindaklan kadakayo, isu ti agserbi kadakayo.”21
Agministro ni Jesucristo. Agministro dagiti anghel.22 Dagiti pasurot ni Jesucristo “agministro iti tunggal maysa,”23 “makipagrag-o iti agrag-o, makipagsangit iti agsangit,”24 “aywanan [ken] … taraonan [dagiti tao] iti bambanag maipanggep iti kinalinteg,”25 “laglagipen … dagiti napanglaw ken agkasapulan, dagiti masakit ken agsagsagaba,”26 maammuan ti naganna babaen ti panagministrotayo.27 No agministrotayo kas Kenkuana, masaksiantayo dagiti milagro ken bendisionna.28 Magun-odtayo ti “nasaysayaat a panagministro.”29
Mabalin a mabannogtayo. Ngem iti panagserbi Kenkuana ditay “mabannog nga agaramid iti nasayaat.”30 Aramidentayo amin a kabaelantayo, ditay agtaray iti naparpardas ngem iti kabaelantayo,31 ngem agtalek, kas isuro ni Apostol Pablo, a “ti Dios ayatenna ti mangted a siaayat.”32 Ta ti Dios a “mangted bin-i iti agmulmula ken tinapay a taraonyo, ket paaduennanto ti bin-iyo nga imula.”33 Iti sabali a pannao, pabaknangen ti Dios ti “amin a maipaay iti amin a kinawadwad.”34 Dagiti “agmula iti nawadwad aganidanto met iti nawadwad.”35
Sadinotayo man itoy a panawen ti Paskua ti Panagungar, tulongan ken aywanantayo kas iti aramiden ti Mangisalakan, nangruna dagiti nakaparaburantayo iti ayat ken annongen a pagserbian. Iti kasta, umasidegtayo koma ken Jesucristo ken iti tunggal maysa, agbalintayo nga ad-adda kas Kenkuana ken agbalintayo a pasurot ni Jesucristo a kas iti kayatna a pagbalinantayo. Iti sagrado a nagan ni Jesucristo, amen.