Panagtalek iti Doktrina ni Cristo
No nabangontayo dagiti balaytayo iti pundasion ti natulagan a relasion ken ni Cristo, agtalektayo iti doktrina ni Cristo.
Iti imatang ti panunotko, makitak ti lumakayen a propeta Nephi iti lamisaanna, naiwaras dagiti pinanid a balitok iti sanguananna, nga iggemna ti stylusna.
Adda ni Nephi iti proseso ti panangileppasna iti maudi a panagkitikitna iti kasuratan. Insuratna, “Ket ita, patpatgek a kakabsatko, igibuskon ti panagsaritak.”1 Ngem di nagbayag kalpasanna, indagadag ti Espiritu ken ni Nephi nga agsubli iti kasuratanna ken mangisurat iti panggibus a mensahe. Iti babaen ti nabileg nga impluensia ti Espiritu Santo, innala manen ni Nephi ti stylusna ket insuratna, “Gapuna, umdasen kaniak dagiti banag … a naisuratko, malaksid iti sumagmamano a banag a … nasken a sawek a maipapan iti doktrina ni Cristo.”2
Anian nga agnanayon a panagyamantayo kadagiti “sumagmamano a balikas”3 ken iti panangpilit ti Espiritu ken ni Nephi a mangisurat kadagitoy. Ti salaysay ni Nephi maipapan iti doktrina ni Cristo ket maysa a gameng kadagiti agbussog iti daytoy. Naglaon daytoy iti maysa a parmata ti panagbuniag ti Mangisalakan4 ken ti timek ti Anak a mangaw-awis iti amin a sumurot Kenkuana5 ken “aramiden dagiti banag a nakita[tayo] nga inaramid[na].”6 Naglaon daytoy iti pammaneknek ni Nephi a dagiti adaan iti pammati ken Cristo, sipupudno nga agbabawi kadagiti basolda ken sumurot iti Mangisalakan kadagiti danum ti panagbuniag ket “awatenda ti Espiritu Santo; wen, … ti panagbuniag iti apuy ken ti Espiritu Santo.”7 Mangngegantayo pay ti timek ti Ama a mangipampaneknek: “Wen, agpayso ken pudno dagiti balikas ti Ay-ayatek. Asino man a makapagibtur agingga iti panungpalan, isunto met laeng ti maisalakan.”8
Impaganetget ni Presidente Russell M. Nelson ti maysa a pateg ti doktrina ni Cristo bayat ti panagsaona kadagiti baro a naawagan a mission leaders: “Nagnangruna ngem iti ania man a banag, kayatmi a dagiti misionariotayo … a maikitikit koma ti doktrina ni Cristo iti puspusoda—a nairamut … iti pata dagiti tulangda.”9
Gupgopen tiPreach My Gospel ti lima a napapateg nga elemento ti doktrina ni Cristo. Kunana, “Awisen[mi] dagiti dadduma nga umay ken Cristo babaen ti panangtulong kadakuada nga umawat iti naisubli nga ebanghelio babaen ti pammati ken ni Jesucristo ken ti Pannubbotna, panagbabawi, panagbuniag, panangawat iti sagut ti Espiritu Santo, ken panagibtur agingga iti panungpalan.”10
Ngem ti kinapateg ti doktrina ni Cristo ket saan laeng a para kadagiti misionario! Ket naun-uneg nga amang daytoy ngem ti pakagupgopan laeng a panangulit iti lima a kangrunaan nga elementona. Sakupenna ti linteg ti ebanghelio. Dayta ti naindaklan a plano para iti biag nga agnanayon.
Kakabsat, no nasken nga awatentayo ti awis ni Presidente Nelson a mairamut ti doktrina ni Cristo iti pata dagiti tulang tayo nasken a paunegentayo ti kumbersiontayo iti Apo babaen ti panagadal, kararag, napudno a panagbiag, ken agtultuloy a panagbabawi. Masapul nga awisentayo ti Espiritu Santo a mangikitikit iti doktrina ni Cristo kadagiti “naglasag a lamisaan ti puso[tayo]”11 a kas iti kauneg ken manayon kas iti inkitikit ni Nephi kadagiti pinanid a balitok.
Iti napalabas nga Oktubre, dinamag ni Presidente Nelson, “Ania ti kayat a sawen ti panangparmek iti lubong?” Maibilang iti dadduma pay a banag, kinunana, “Kayatna a sawen ti panagtalek iti doktrina ni Cristo nga ad-adda ngem kadagiti pilosopia dagiti tao.”12
Nailawlawag ti kaipapanan ti balikas a panagtalek a kas “naipatalged a panagpannuray iti kinatao, kabaelan, pigsa, wenno kinapudno ti maysa a tao wenno maysa a banag.”13 Ni Jesucristo dayta maysa a tao, ket ti doktrinana dayta a banag.
Kasano a mangbalbaliw iti wagas ti panagbiagtayo ti naigagara a panagtalek iti doktrina ni Cristo ?
No agtalektayo iti doktrina ni Cristo, umdas nga agtalektayto ken Cristo tapno agbiag iti tunggal balikasna.14 Adalentayo ni Jesucristo iti unos ti biagtayo,15 ti panagministrona, dagiti pannursurona, ken ti awan patinggana a Pannubbotna, agraman ti nadayag a Panagungarna. Adalentayto dagiti karina ken dagiti kondision a nakaitedan dagita a kari.16 Bayat ti panagadaltayo, mapnotayto iti nain-indaklan nga ayat para iti Apo.
No agtalektayo iti doktrina ni Cristo, inaldaw nga umasidegtayto iti Nailangitan nga Amatayo iti napakumbaba, nalimed a kararag, a pakaipeksaantayo iti panagyaman iti sagut ti Anakna ken iti amin a bendisiontayo.17 Maikararagantayo ti napaltiingan a panangkadkadua ti Espiritu Santo,18 ikararagan a maitunos ti pagayatantayo iti pagayatanna,19 ikararagan a mautob dagiti katulagantayo ken mapabaro ti panagkumittayo a mangtungpal kadagitoy.20 Maikararagantayo a mangkanunong ken mangyebkas iti ayat kadagiti propetatayo, mammadto, ken mammaltiing;21 ikararagantayo ti mangdaldalus a bileg ti pammakawan;22 ken ikararagantayo ti pigsa a mangkedked iti sulisog.23 Awisenkayo a mangipangpangruna iti kararag iti biagyo, nga inaldaw a pasayaatenyo ti pannakisaritayo iti Dios.
No agtalektayo iti doktrina ni Cristo, ipaknitayto dagiti nasileng a banag ti lubong tapno maipamaysatayo ti Mannubbot ti lubong.24 Limitaran wenno pabassitentayo ti oras a mabubos iti social media; dagiti ay-ayam iti internet; masayang, nalabes, wenno di maitutop a paglinglingayan; ti pannakaallukoy kadagiti gameng ken kinaubbaw daytoy a lubong; ken ania man a dadduma pay nga aktibidad a mangted iti lugar kadagiti ulbod a tradision ken di umiso a pilosopia dagiti tao. Ken ni Cristo laeng ti pakasarakantayo iti kinapudno ken manayon a pannakatungpal.
Ti napasnek a panagbabawi25 agbalinto a naragsak26 a paset ti biagtayo—agpadpada a mapakawan iti basol ken mabalbaliwan iti ladawan ni Cristo.27 Ti panagbabawi nga addaan pammati ken Cristo ket mangpagun-od kadatayo iti Pannubbot ni Cristo. Insuro ni Presidente Dallin H. Oaks a no mamakawan ti Mangisalakan, Isu ket “saanna[tayo] laeng a dalusan manipud iti basol. Ikkanna[tayo] pay iti baro a pigsa.”28 Kasapulan ti tunggal maysa kadatayo daytoy a pigsa nga agtulnog kadagiti bilin ti Dios ken tapno maipatungpal ti agnanayon a panggep ti biagtayo.
Makasaraktayo iti pigsa ken ni Jesus ken iti doktrinana Kinunana, “Pudno, pudno, kunak kadakayo, a daytoy ti doktrinak, ken siasino man nga agipatakder ditoy agipatakder iti batok, ket saan nga agballigi ti ruangan ti impierno a mangallukoy kadakuada.”29
Makitatayo a naipatungpal daytoy a kari iti biag dagiti napudno a tao. Nasurok bassit a makatawen ti napalabas, naam-ammok da Travis ken Kacie. Nagkallaysada iti sibil idi 2007. Iti dayta a tiempo, saan a miembro ti Simbaan ni Travis. Ni Kacie, nupay dimmakkel iti aktibo a pagtaengan dagiti Santo iti Ud-udina nga Aldaw, kimmayakay iti pammatina iti kinaagtutubona ken simmina iti pundasionna.
Idi 2018, naam-ammo ni Travis dagiti misionario, ken nabuniagan idi 2019. Nagbalin a misionario ni Travis ken Kacie, a nakapadas pay iti panagbalbaliw ti biagna. Nailantipda iti templo idi Septiembre 2020. Agarup dua a tawen kalpasan ti pannakabuniagna, naawagan ni Travis nga agserbi iti bishopric.
Adda manmano a sakit ni Travis nga agtultuloy a mangporma kadagiti cluster ti tumor iti internal organna. Adun ti operasionna tapno maikkat dagiti maulit-ulit a tumor, ngem saan a maagasan ti sakit. Sumagmamano a tawenen ti napalabas, naikkan ni Travis ti nakurang a 10 a tawenen nga agbiag.
Adda retinitis pigmentosa, ni Kacie, maysa a manmano a genetiko a sakit a pakaigapuan ti di agbaliw a panagbassit ti panagkita agingga nga agbalin a naan-anay a panagbulsek.
Nagsao ni Kacie maipapan iti masakbayanna. Inur-urayna ti panawen, nga asidegen, a mabalonto, mabulsek, awanan iti pinansial a suporta, ken mabati nga agmaymaysa a mangpadakkel iti uppat a dumakdakkelen nga annak. Dinamagko ken ni Kacie no kasano a matamingna ti kasta a nalidem a masakbayan. Sitatalna nga immisem ket kinunana, “Diak pay kaano man nagbalin a naragragsak wenno naaddaan iti namnama iti biagko. Tungtungpalenmi dagiti kari nga inawatmi idiay templo.”
Bishop itan ni Travis. Dua a bulan ti napalabas adda sabali a dakkel nga operasionna. Ngem mangnamnama ken natalna isuna. Kimmaro ti panagkita ni Kacie. Addaan itan iti guide dog ken saanen a makamaneho. Ngem kontento, a mangpadakkel kadagiti annakna ken agserserbi a kas mamalbalakad iti kinapresidente dagiti Agtutubo a Babbai.
Naibangon da Travis ken Kacie ti balayda iti rabaw ti bato. Agtalek da Travis ken Kacie iti doktrina ni Cristo ken ti kari a ti Dios “ket konsagrarenna dagiti rigat [tayo] para iti gunggona [tayo].”30 Iti naan-anay a plano ti Dios, ti panagsagaba nga addaan pammati ken Cristo ket naisilpo iti panagbalintayo a naan-anay ken Cristo.31 Kas iti masirib a tao iti pangngarig a nangibangon iti balayna iti rabaw ti bato,32 idi bimmaba ti tudo, ket dimteng dagiti layus, ket nagpuyot dagiti angin ken nangdalapus iti balay nga imbangon da Travis ken Kacie, saanto a matumba, ta mabangonto iti maysa a bato.33
Saan a nagsao ni Jesus maipapan iti posibilidad nga agtudo ken aglayus ken agangin iti biagtayo; nagsao maipapan iti kinaawan duadua a tumaudto dagiti bagyo. Ti pagdumaan iti pangngarig ket saan a no dumteng dagiti bagyo no di ket no kasano a simmungbattayo iti awisna nga agpada a dumngeg ken mangaramid iti insurona.34 Awanen ti sabali a wagas tapno agbiag.
No nabangontayo dagiti balaytayo iti pundasion ti natulagan a relasion ken Cristo, agtalektayo iti doktrina ni Cristo, ket bayat ti yaasidegtayo Kenkuana, addaantayo iti karina a biag nga agnanayon. Agibtur dagiti tao nga agtalek iti doktrina ni Cristo ken agtultuloy a sitatalingenngen, agingga iti panungpalan. Awan ti sabali a wagas “a pakaisalakanantayo iti pagarian ti Dios.35
Personal a paneknekak ti sibibiag, nagungar a kinapudno ni Jesucristo. Paneknekak nga inayat unay ti Dios ti lubong isu nga imbaonna ti Anakna tapno subbotennatayo manipud iti basol36 ken paimbagennatayo manipud iti ladingit.37 Paneknekak nga inawaganna ti maysa a propeta ti Dios iti panawentayo, kas ken ni Presidente Russell M. Nelson, a babaen kenkuana agsasao ken iwanwannatayo.
Naimpusuan nga awisenkayo nga agtalek iti doktrina ni Cristo ken bangonenyo iti biagyo iti bato ti Mannubbot. Saannakayonto a baybay-an. Iti nagan ni Jesucristo, amen.