Isuronatayo ni Apo Jesucristo nga Agministro
Paneknekak a babaen ti tulong ti Mangisalakan, maayattayo dagiti napateg a karnerona ken pagserbian ida kas iti aramidenna.
Ni Apo a Jesucristo kinunana:
“Siak ti naimbag a pastor: ti naimbag a pastor itedna ti biagna para iti karnero. …
“Kas iti Ama am-ammonak, kasta met a siak am-ammok ti Ama: ket itedko ti biagko para iti karnero.”1
Iti bersion a Griego ti daytoy a nasantuan a kasuratan, ti balikas a naimbag kayatna pay a sawen ti “napintas, natan-ok.” Isu nga ita, kayatko ti agsarita maipapan iti Naimbag a Pastor, Napintas a Pastor, Natan-ok a Pastor, kas ken ni Jesucristo.
Iti Baro a Tulag, naawagan isuna iti “naindaklan a pastor,”2 ti “katan-okan a Pastor,”3 ken “ti Pastor ken Obispo dagiti kararua[tayo].”4
Iti Daan a Tulag, insurat ni Isaias a “pagarabennanto ti arbanna a kas maysa nga agpaspastor.”5
Iti Libro ni Mormon, Isu ti maawagan a “ti naimbag a pastor”6 ken “ti naindaklan ken pudno a pastor.”7
Iti Doktrina ken Katulagan, ipakdaarna, “Gapuna, addaak iti tengngayo, ket siak ti naimbag a pastor.”8
Iti aldawtayo, impakdaar ni President Nelson: “Ti Naimbag a Pastor sidudungngo nga aywananna ti amin a karnero iti ummongna, ket datayo ti pudno a katulonganna a pastor. Pribilehiotayo ti mangiburay iti ayatna ken inayon ti ayattayo kadagiti gagayyem ken kaarruba—tapno mangpakan, mangaywan, ken mangtaraken kadakuada—kas iti kayat ti Mangisalakan nga aramidentayo.”9
Iti saan pay a nabayag, kinuna ni President Nelson: “Ti sagudayen ti pudno ken sibibiag a Simbaan ti Apo ket kanayonto nga agbalin a naurnos, ken naiwanwan a panagkagumaan nga agministro kadagiti annak ti Dios ken iti pamiliada. Gapu ta Simbaanna daytoy, datayo kas katulonganna agministrotayo iti maysa, a kas iti inaramidna. Agministrotayto iti naganna, nga addaan iti bileg ken turayna, ken addaan iti naayat nga asina.”10
Idi nagtanabutob dagiti Fariseo ken eskriba a maibusor iti Apo, “kunkunada, Daytoy awatenna dagiti managbasol ket makipangan kadakuada,”11 Simmungbat babaen ti panangipakitana iti tallo a napipintas nga estoria a naammuantayo a kas ti pangngarig ti napukaw a karnero, pangngarig ti napukaw a sensilio, ken pangngarig ti napukaw nga anak.
Makaay-ayo a maammuan a ni Lucas, ti mannurat iti Ebanghelio, yam-ammona ti tallo nga estoria, usarenna ti balikas a pangngarig iti singular, saan a plural.12 Kasla mangisursuro ti Apo iti naidumduma nga adalen nga addaan iti tallo nga estoria—estoria a mangidatag iti nagduduma a numero, 100 a karnero, 10 a sensilio, ken 2 nga annak a lallaki.
Ti kangrunaan a numero iti tunggal maysa kadagitoy nga estoria, ket ti numero a maysa. Ket ti adalen a mabalin a maalatayo kadayta a numero ket agbalinkayo koma a pudno a katulongan a pastor para iti 100 nga elder ken prospective elders iti elders quorumyo, wenno adviser iti 10 nga agtutubo a babbai, wenno teacher iti 2 a Primary nga ubbing, ngem kanayon, kanayon nga agministrokayo kadakuada, aywananyo ida, ken ayatenyo ida a saggaysa. Diyo kaano man isao ti, “Anian a maag a karnero” wenno “Kinapudnona, diak talaga masapul dayta a sensilio” wenno “Anian a managrebelde nga anak.” No adda kadatayo “ti nadalus nga ayat ni Cristo,”13 datayo, kas iti lalaki iti estoria ti napukaw a karnero, intayo “panawan dagiti siam a pulo ket siam … ket sapulentayo ti napukaw agingga a masarakan[tayo] daytoy.”14 Wenno kas iti babai iti estoria ti napukaw a sensilio, intayo “sindian ti kandela, ken sagadan ti balay, ket sapulen a sipapasnek [… sipapasnek] agingga iti masarakan[tayo] daytoy.”15 No adda kadatayo “ti nadalus nga ayat ni Cristo,” surotentayo ti pagwadan ti ama iti estoria ti napukaw nga anak, nga, idi ti anak “adayo pay laeng nakita ti amana, ket simnek ti kaasina ket timmaray ket inappungolna ti tengngedna, ket inagkanna daytoy.”16
Mariknatayo kadi ti kinaganat iti puso ti lalaki a nakapukaw iti maysa a karnero? Wenno ti kinaganat iti puso ti babai a nakapukaw iti maysa a sensilio? Wenno ti dakkel a panagayat ken panangngaasi iti puso ti ama iti napukaw nga anak?
Nagserbikami iti asawak a ni Maria Isabel, iti Central America, a naisaad iti Guatemala City. Naaddaanak idiay iti gundaway a maam-ammok ni Julia, maysa a napudno a miembro ti Simbaan. Natignayak nga agdamag maipapan iti pamiliana. Natay ni nanangna gapu iti cancer idi 2011. Maysa a napudno a lider ni tatangna iti stakena, nagserserbi a kas maysa a bishop ken kas maysa a counselor iti stake presidentna iti sumagmamano a tawen. Maysa isuna a napudno a katulongan a pastor ti Apo. Imbaga ni Julia kaniak ti saan nga agsarday a panagkagumaan ti amana nga agbisita, agministro, ken agserbi. Pudno a nagrag-o iti panangpakan ken panangaywanna kadagiti napateg a karnero ti Apo. Nakikallaysa manen isuna ket nagtalinaed nga aktibo iti Simbaan.
Kalpasan ti sumagmamano a tawen, nakidiborsio isuna, ket nasken a makimisa manen nga agmaymaysa. Nariknana nga awan ti lugarna ken nariknana pay a managdillaw ti sumagmamano a tao kenkuana gapu iti pannakidiborsiona. Insardengna ti makimisa idi napno iti nagatibo nga espiritu ti pusona.
Dakkel ti panagraem ni Julia iti daytoy nasingpet a katulongan a pastor, a maysa a nagaget, managayat, ken manangngaasi a lalaki. Malagipko la unay ti rikna a panagganat nga immapay kaniak bayat ti panangiladawan ni Julia kenkuana. Kayatko laeng ti mangaramid iti maysa banag para iti dayta a lalaki, lalaki nga adu ti naaramidanna iti unos ti adu a tawen.
Inted ni Julia kaniak ti numero ti teleponona, ket rinugiak ti panangtawag kenkuana, a mangnamnama a maaddaanak iti gundaway a maam-ammok daytoy a lalaki iti personal. Kalpasan ti sumagmamano a lawas, namin-adu a tinawagak ngem napaayak, agingga nga iti maysa nga aldaw sinungbatanna met laeng ti telepono iti kamaudiananna.
Imbagak kenkuana a naam-ammok ni Julia, ti anakna a babai, ken naawis ti riknak iti wagas a panagserbi, panagministro, ken panagayatna kadagiti napateg a karnero ti Apo iti uneg ti adu a tawen. Dina ninammnama ti kasta a komento. Imbagak kenkuana a talaga a kayatko ti sumarungkar kenkuana tapno makitak ken makasangok mismo isuna. Dinamagna no ania ti panggepko iti dayta a panagkitami. Insungbatko, “Kayatko a maam-ammo ti ama ti maysa nasingpet a babai.” Kalpasan ti sumagmamano a segundo nagari ti ulimek iti telepono—sumagmamano a segundo ngem kasla awan patinggana kaniak. Kinunana laeng, “Kaano ken sadino?”
Iti aldaw a panagkitami, inawisko isuna a mangibinglay iti sumagmamano a padasna iti isasarungkar, ministering, ken panagserbi kadagiti napateg a karnero ti Apo. Bayat ti pananglagipna iti sumagmamano a makaabbukay nga estoria, nadlawko a nagbaliw ti tono ti timekna ken ti isu met la nga espiritu a nariknana iti adu a gundaway bayat ti pananglagipna iti panagbalinna idi a kas maysa katulongan a pastor. Itan napno dagiti matana iti lua. Ammok a daytoy ti umno a kanito para kaniak, ngem diak ammo no ania ti isaok. Nagkararagak iti panunotko, “Ama, tulongannak.”
Pagammuan ta kinunak kenkuana, “Brother Florian, kas maysa a katulongan ti Apo, dispensarennak ta awankami idi a tumulong kenka. Pakawanennakami koma. Ikkannakami koma iti sabali pay a gundaway a mangipakita a patpatgendaka. A kasapulandaka. A napategka kadakami.”
Iti simmaruno a Domingo nagsubli isuna. Napaut ti panagsaritada iti bishopna ket nagtalinaed nga aktibo. Sumagmamano a bulan kalpasanna pimmusay isuna—ngem nakapagsubli isuna. Nakapagsubli isuna. Paneknekak a babaen ti tulong ti Mangisalakan, mabalintayo nga ayaten dagiti napateg a karnerona ken makapagministrotayo kadakuada kas iti aramidenna. Ket ngarud, sadiay Siudad ti Guatemala insubli ni Apo Jesucristo ti maysa pay a napateg a karnero iti arbanna. Ket insurona kaniak ti adalen maipapan iti ministering a diak malipatan. Iti nagan ti Naimbag a Pastor, ti Napintas a Pastor, ti Natan-ok a Pastor, kas ken ni Apo a Jesucristo, amen.