Kinatimbeng a Kas ken ni Cristo
“Ket idi a nakariing, tinubngarna ti angin ket kinunana iti baybay: Agulimekka, agtalnaka. Ket nagtalna ti angin, ket immay ti dakkel a linak” (Marcos 4:39).
Iti naudi a panagsaritak iti sapasap a komperensia, impakita kaniak ti manugangko a ni Ryan ti maysa a tweet a kunana, “Talaga? Bragg ti nagan ti lalaki”—kayatna a sawen ti “agpannakkel”—“ken dina isarita ti kinapakumbaba? Anian a pannakasayang a gundaway!” Nagliday, ta agtultuloy ti pannakaupay.
Ti nasayaat nga amak ket maysa nga All-America basketball player iti UCLA babaen ti nalatak a Coach John Wooden. Nagtalinaedda a nasinged iti unos ti panagbiag ni tatangko, ket sagpaminsan a da Coach ken Mrs. Wooden, umayda iti balaymi tapno mangrabii. Kanayon a naragsak isuna a makisarsarita kaniak maipapan iti basketball wenno aniaman a banag nga adda iti panunotko. Naminsan dinamagko kenkuana no ania ti balakadna kaniak iti iseserrekko iti senior year ti high school. Kanayon a kuna ti mannursuro, “Imbaga kaniak ni tatangmo a kimmappengkan iti Simbaan ni Jesucristo, isu nga ammok nga adda pammatim iti Apo. Iti dayta a pammati penkem nga addaanka iti kinatimbeng iti tunggal situasion. Agbalinka a naimbag a tao iti bagyo.”
Iti naglabas a tawtawen, nagtalinaed kaniak dayta a saritaan. Dayta a balakad nga agbalin a natalinaay, natimbeng, ken makontrol ti rikna ken kababalin iti amin a situasion, nangruna iti panawen ti riribuk ken rigat, ket dakkel ti epektona kaniak. Nakitak no kasano a nagay-ayam ti team ni Coach Wooden nga addaan kinatimbeng ken ti dakkel a balligi a napadasanda iti panangabakda iti 10 national championship.
Ngem di unay maisarsarita ti kinatimbeng kadagitoy nga aldaw ken di unay maar-aramid uray kadagiti panawen ti di panagkikinnaawatan. Masansan a matukoy dayta iti isports—ti player a natimbeng ket addaan iti namnama ken kontrol iti bagi ken iti ay-ayam wenno ti team a di natimbeng awanan iti namnama ken kontrol iti bagi. Ngem daytoy nasayaat a kalidad ket nalablabes pay ngem iti isports. Addaan ti kinatimbeng iti nalawlawa nga aplikasion iti biag ken makabendision iti nagannak, lider, misionario, mannursuro, estudiante, ken asino man a maipasango iti bagyo ti biag.
Bendisionannatayo ti naespirituan a kinatimbeng nga agtalinaed a kalmado ken nakapokus iti kapatgan, nangnangruna no maipasangotayo iti pakarigatan. Insuro ni Presidente Hugh B. Brown, “Ti pammati iti Dios ken iti kamaudianan a panagballigi ti umiso, ket makatulong iti mental ken naespirituan a kinatalinaay iti sango dagiti rigat.”1
Ni Presidente Russell M. Nelson ti napintas a pagwadan ti naespirituan a kinatimbeng. Naminsan, bayat idi a ni Dr. Nelson agar-aramid iti quadruple coronary artery bypass, kellaat a bimmaba ti presion ti dara ti pasiente. Ni Dr. Nelson sitatalna a naamirisna ti situasion ket nabigbigna nga aksidente nga inikkat ti maysa a miembro ti team ti maysa a clamp. Dagus a nasukatan dayta, ket liniwliwa ni Dr. Nelson ti miembro ti team, a kunkunana, “Ay-ayatenka pay laeng,” ket kalpasanna innayonna nga inyangaw, “No dadduma ad-adda nga ay-ayatenka ngem iti dadduma a gundaway!” Impakitana no kasano ti panangtaming iti emerhensia—nga addaan iti kinatimbeng, a nakapokus laeng iti kapatgan—a panangtaming iti emerhensia. Kinuna ni Presidente Nelson: “Maysa dayta a napalalo a panangdisiplina iti bagi. Natural a reaksionmo ti, ‘Iruarnak, coach! Kayatko ti agawid.’ Ngem siempre dika makaawid. Naan-anay nga agpannuray ti biag iti intero a surgical team. Gapuna masapul nga agtalinaedka a kalmado ken relaks ken agpanunot a naimbag.”2
Siempre, ti Mangisalakan ti ultimo a pagarigan ti kinatimbeng.
Iti Hardin ti Getsemani, iti di mailadawan a sagaba, idi “agling-et a kasla dadakkel a tedted ti dara,”3 impakitana ti nadiosan a kinatimbeng babaen ti simple ngem nadayag a sasao, “Saan a ti pagayatak, ngem ti pagayatam, ti maaramid.”4 Iti nakaro a panagrigata tapno maisalakan ti intero a sangataw-an, impakita ni Jesus ti tallo a napateg a kondision a mangtulong kadatayo tapno maawatantayo ti naindaklan a kinatimbengna. Umuna, ammona no asino Isuna ken napudno iti nadiosan a misionna. Sumaruno, ammona nga adda dakkel a plano ti ragsak. Ken kamaudiananna, ammona a babaen ti awan patinggana a Pannubbotna, maisalakanto amin a simamatalek a mangisangol iti bagida Kenkuana babaen ti panagaramid ken panagtungpal kadagiti sagrado a katulagan a naawatda babaen ti ordinansa ti priesthood, kas iti nagsayaat a panangisuro ni Elder Dale G. Renlund ita nga aldaw.
Tapno mailasin ti pagdumaan ti pannakapukaw ken panangtaginayon iti kinatimbeng, panunotem ti napasamak bayat ti ipapanaw ni Cristo ken dagiti Apostolna iti Hardin ti Getsemani. Idi naipasango kadagiti soldado a mangikagkagumaan a mangtiliw ken Jesus, napukaw ni Pedro ti kinatimbengna ket naranggas a sinaplitna a pinuted ti lapayag ti adipen ti nangato a saserdote, a ni Malco. Ti reaksion ni Jesucristo, iti sabali a bangir, ket nagtalinaed a natimbeng ken nangyeg iti kinatalna iti nariribuk a kasasaad babaen ti panangagasna ken Malco.5
Ket kadatayo nga agkarigatan a mangtaginayon iti kinatimbengtayo ken nalabit a naupay, ibilangtayo ti dadduma pay nga estoria ni Pedro. Di nagbayag kalpasan daytoy a pasamak ken ti panangilibakna iti pannakilangenna ken Cristo,6 nagtakder ni Pedro iti sanguanan dagiti isu met laeng a lider ti relihion a nangkondena iti Mangisalakan, ket addaan iti kinatimbeng, naipasango iti nakaro a panagsaludsod, nalawag a nagpaneknek isuna maipapan iti kinadios ni Jesucristo.7
Ammuem No Siasinoka ken Agbalinka a Napudno iti Nadiosan a Pakabigbigan
Ibilangtayo dagiti elemento ti kinatimbeng a kas Cristo. Kas rugi, ti pannakaammo no siasinotayo ken ti panagbalin a napudno iti nadiosan a pakabigbigantayo, makayeg daytoy iti talna. Ti kinatimbeng kas ken Cristo agkasapulan a liklikantayo ti mangidilig iti bagitayo iti dadduma wenno agtigtignay iti wagas a saan a pudno a mangibagi iti kinasiasinotayo.8 Insuro ni Joseph Smith, “No di maawatan dagiti tao ti kababalin ti Dios, saanda a maawatan ti bagbagida.”9“ Di laeng posible ti maaddaan iti nadiosan a kinatimbeng no ditay ammo a nadiosantayo nga annak ti naayat a Nailangitan nga Ama.
Iti bitlana a “Pili iti Agnanayon,” insuro ni Presidente Nelson dagitoy agnanayon a kinapudno maipapan iti kinasiasinotayo: annaknatayo ti Dios, datayo dagiti annak ti katulagan, ken datayo ti disipulo ni Cristo. Kalpasanna inkarina, “No awatenyo dagitoy a kinapudno, tulongannakayo ti Amatayo iti langit a mangragpat iti ultimo a panggep a tun-oyen nga agbiag nga agnanayon iti nasantuan nga imatangna.”10 Pudnotayo a nadiosan a naespirituan a parsua nga addaan mortal a padas. Ti pannakaammo iti kinataotayo ken panagbalin a napudno iti nadiosan a pakabigbigantayo ket pundasion ti panangpadur-as iti kinatalimeng kas ken Cristo.
Ammuenyo Nga Adda Nadiosan a Plano
Sumaruno, ti pananglagip nga adda engrande a plano a mangpataud iti tured ken kinatimbeng kadagiti makakarit a kasasaad. Ni Nephi, “mapan ket aramidenna”11 kas imbilin ti Apo “a dina ammo idi damo”12 dagiti banag nga aramidenna gapu ta ammona nga iturong isuna ti Espiritu, iti pannakatungpal ti agnanayon a plano ti naayat a Nailangitan nga Ama. Umay ti kinatimbeng no makitatayo dagiti banag manipud iti agnanayon a pannirigan. Binalakadan ti Apo dagiti disipulona nga “itag-ay dagiti matayo”13 ken “pagtalinaedenyo iti panunotyo dagiti kinangayed ti agnanayon.”14 Babaen ti panangpanunot kadagiti makakarit a panawen iti uneg ti agnanayon a plano, agbalin ti pagkarigatan a maysa a pribilehio nga agayat, agserbi, mangisuro, ken mangbendision. Ti agnanayon a pannirigan tulongannatayo nga agbalin a natimbeng a kas ken Kristo.
Ammuenyo ti Mangpabael a Bileg ni Jesucristo ken ti Pannubbotna
Kamaudiananna, ti makabael a bileg ni Cristo, a naaramid a posible babaen ti pangsubbot a sakripisiona, ti mangted kadatayo iti pigsa nga agibtur ken agballigi. Gapu ken Jesucristo mabalintayo ti makitulag iti Dios ken mapapigsatayo iti panangtungpal iti dayta a katulagan. Mabalintayo ti maibegkes iti Mangisalakan iti rag-o ken talna, ania man ti temporal a kasasaadtayo.15 Alma kapitulo 7 napintas nga isurona ti makabael a bileg ni Cristo. Kas nayon iti panangsubbotna kadatayo iti basol, mapapigsanatayo ti Mangisalakan kadagiti pagkapsutan, buteng ken karittayo ditoy a biag.
No agpokustayo ken Cristo, mapakalmatayo dagiti butengtayo, kas iti inaramid dagiti tao ni Alma iti Helam.16 Bayat nga aguummong ti mangbutbuteng a buyot, impakita dagiti napudno a disipulo ni Cristo ti kinatimbeng. Insuro ni Elder David A. Bednar: “Balbalakadan ni Alma dagiti namati a lagipenda ti Apo ken ti pannakaisalakan nga Isu laeng ti makaited (kitaen iti 2 Nephi 2:8). Ket ti pannakaammo iti manangsalaknib a panangaywan ti Mangisalakan ti nakapagpakalma iti butengda.”17 Daytoy ti pagwadan ti kinatimbeng.
Ti Naindaklan a Tao iti Bagyo
Adu ti insuro kadatayo ni Noe maipapan iti panaganus iti bagyo, ngem ti Apo ti kaindaklanan a mannursuro no kasano ti makalasat iti bagyo. Isu ti naindaklan a tao iti bagyo. Kalpasan ti napaut nga aldaw a panangisuro a kaduana dagiti Apostolna, naginana ti Mangisalakan ket insingasingna a bumallasiwda babaen ti bilog nga agturong iti bangir ti Baybay ti Galilea. Bayat ti panaginana ti Mangisalakan, dimteng ti nakaro a bagyo. Bayat a ti angin ken dalluyon ti nangpeggad a mangpalned iti bilog, nangrugi a nagbuteng dagiti Apostol para iti biagda. Ket laglagipen, adu kadagita Apostol ti mangngalap a makinkabisado kadagiti bagyo iti dayta a baybay! Ngem nagbutengda,18 riniingda ti Apo ket dinamagda, “[Apo], dika kadi maseknan a mapukawkami?” “Ket, addaan iti kinatimbeng, timmakder ti Mangisakalan, ket tinubngarna ti angin, ket kinunana iti baybay, Agtalnakayo. Ket nagtalna ti angin, ket adda … dakkel a linak.”19
Ket kalpasanna maysa a naindaklan a leksion iti kinatimbeng kadagiti Apostolna. Dinamagna, “Apay a mabutengkayo unay? kasano nga awan pammatiyo?”20 Impalagipna kadakuada nga Isu ti Mangisalakan ti lubong, ken imbaon ti Ama a mangipatungpal iti saan nga ipapatay ken agnanayon a biag dagiti annak ti Dios Sigurado a saan a mapukaw ti Anak ti Dios iti bilog. Impagwadanna ti nadiosan a kinatimbeng gapu ta ammona ti kinadiosna ken ammona nga adda plano ti pannakaisalakan ken pannakaitan-ok ken no kasano ti kinapateg ti Pannubbotna iti agnanayon a balligi iti dayta a plano.
Babaen ken Cristo ken ti Pannubbotna nga umay amin a naimbag a banag iti biagtayo. No lagipentayo ti kinasiasinnotayo, nga ammotayo nga adda nadiosan a plano ti asi ken pananggun-od iti tured iti pigsa ti Apo, maaramidtayo ti amin a banag. Masarakantayo ti talna. Agbalintayo a nasayaat a tattao iti ania man a bagyo.
Sapay koma ta sapulentayo dagiti bendision ti kinatimbeng a kas ken Cristo, di laeng tapno matulongantayo ti bagitayo kadagiti mapannubok a panawen ngem tapno mangbendision pay iti dadduma ken mangtulong kadakuada a mangsango kadagiti bagyo iti biagda. Iti daytoy a bisperas ti Domingo Ramos, sirarag-o a paneknekak ni Jesucristo. Nagungaren. Paneknekak ti talna, talinaay, ken nailangitan a kinatimbeng nga Isu laeng ti mangyeg iti biagtayo iti nasantuan a naganna, ni Jesucristo, amen.