Ti Patriarchal Blessingmo—Naparegta a Pangiturong manipud iti Nailangitan nga Ama
Umuna, ti patriarchal blessingko ti nakatulong kaniak a makaawat iti pudno nga agnanayon a kinasiasinok—no siasinoak a talaga ken no siasino ti mabalinko a pagbalinan.
Pinadakkeldak dagiti nasayaat a nagannak a nangayat ken napudno a nangisuro kadakami, nga annakda, iti ebanghelio. Ngem nakalkaldaang ta nagkarigatan dagiti patpatgek a nagannak iti panagdennada nga agassawa iti uneg ti sumagmamano a tawen. Addaak iti Primary idi naammuak a mabalin a maysa nga aldaw ket agdiborsioda ket masapul a piliek no siasino kadakuada ti pagyanak. Kas bungana, iti uneg ti mano a tawen napadasak ti nalaus a panagdandanag; nupay kasta, nagbalbaliw amin daytoy gapu iti sagut ti Nailangitan nga Ama a nangtulong kaniak iti kamaudianan—ti patriarchal blessingko.
Iti edadko nga 11, ad-adda a nagdanagak maipapan iti relasion dagiti dadakkelko, tinarigagayak unay ti patriarchal blessingko. Ammok a naan-anay nga am-ammonak ti Nailangitan nga Amak ken ammona dagiti naipangruna a kasasaadko. Ammok pay nga umawatak iti panangiturong manipud Kenkuana. Kalpasan a dagus ti maika-12 a kasangayko, inawatko ti patriarchal blessingko. Nasuroken a limapulo a tawen ti napalabas, ngem nalawag pay laeng iti lagipko dayta a sagrado a padas.
Agyamantayo, addaantayo iti naparegta a pangiturong maipapan ti patriarchal blessing iti Sapasap a Handbookiti Simbaan.
“Tunggal maikari, a nabautisaran a miembro ket maikari nga umawat iti bendision ti patriarka, a mangted iti napaltiingan a pangiturong manipud iti Nailangitan nga Ama.”
Nasken iti maysa a miembro a “manakmanen tapno maawatanna ti kaipapanan ken sagrado a saguday ti bendision” ken “maawatanna ti kangrunaan a doktrina ti ebanghelio.”
“Kasayaatanna nasken nga umdas ti kinaagtutubo ti miembro nga adu pay laeng dagiti napateg a pangngeddeng iti biag ti agur-uray. … Saan koma nga ipasdek dagiti lider ti priesthood ti kababaan nga edad para iti maysa a miembro nga umawat iti patriarchal blessing. …
“Sagrado, kompidensial, ken personal ti tunggal patriarchal blessing. …
“Ti tao nga umawat iti bendision iti patirarka ket rumbeng nga ipategna dagiti balikasna, utobenna dagitoy, ken agbiag a maikari nga umawat kadagiti naikari a bendision iti daytoy a biag ken iti agnanayon.”1
Maulit-ulit nga insuro ni Presidente Russell M. Nelson maipapan iti kinapateg ti patriarchal blessing,2 nga itedna ti tunggal umawat iti “deklarasion ti kapuonan nga agsubli kada Abraham, Isaac, ken Jacob”3 ken “personal a nasantuan a kasuratan kadakayo.”4
Napateg unay kaniak ti patriarchal blessingko idi ubingak gapu iti adu a rason. Umuna, babaen ti bileg ti Espiritu Santo, ti patriarchal blessingko ti nakatulong kaniak a makaawat iti pudno nga agnanayon a kinasiasinok—no siasinoak a talaga ken no siasino ti mabalinko a pagbalinan. Nakatulong kaniak a makaammo, kas insuro ni Presidente Nelson, a siak ti “maysa nga anak ti Dios,” “maysa nga [anak] ti katulagan,” ken “maysa a disipulo ni Jesucristo.”5 Ammok nga am-ammo ken ay-ayatennak ti Nailangitan nga Amak ken ti Mangisalakanko ken personal a nairamanda iti biagko. Nakatulong daytoy kaniak a mangtarigagay nga ad-adda nga umasideg Kadakuada ken mangpadakkel iti pammatik ken panagtalekko Kadakuada.
Inbinglay ti maysa a patpatgen a gayyem a nagmiembro iti Simbaan kas maysa a young adult: “Idi impatay ti patriarch dagiti imana iti ulok ken insaona ti naganko, nagbalbaliw ti amin, … saan laeng nga idi no di ket iti iti intero a panagbiagko. Dagus a nariknak a—babaen ti pannakabalin iti panagsaona—nasinged ken nauneg ti pannakaammok. Simrek ti intero a kinataok dagiti balikas nga insaona. Ammok nga am-ammonak ti Nailangitan nga Ama, iti uneg ken ruar.”
Ti pannakaammok no siasinoak a talaga ti nakatulong kaniak a makaawat ken mangtarigagay a mangaramid iti namnamaen ti Dios kaniak.6
Daytoy ti nangiturong kaniak a mangadal kadagiti katulagan nga inaramidko ken dagiti naikari a bendision iti katulagan ti Dios ken Abraham.7 Intedna kaniak ti agnanayon a pannirigan a nangparegta kaniak nga ad-adda a naan-anay a mangtungpal kadagiti katulagak.
Masansan nga inadalko ti patriarchal blessingko, ken kas maysa nga agtutubo, dumani inaldaw, a nakatulong kaniak a makarikna iti makaliwliwa, mangiwanwan nga impluensia ti Espiritu Santo, a timmulong a mangpabassit iti dandanagko bayat ti panangsurotko kadagiti pannignayna. Daytoy ti nangpadakkel iti tarigagayko nga aktibo a mangawis iti lawag, kinapudno, ken Espiritu Santo babaen ti panagadal kadagiti nasantuan a kasuratak ken panagkararag iti inaldaw ken napasnek a panagadal ken panangsurot kadagiti pannursuro ti propeta ken dagiti apostol ti Dios. Ti patriarchal blessingko ti nakatulong pay kaniak a mangtarigagay nga ad-adda nga agtulnog iti pagayatan ti Nailangitan nga Amak, ket dayta a pokus ti nangtulong kaniak a mangpadas iti dakkel a rag-o, iti laksid dagiti personal a kasasaadko.8
Nakaawatak iti naespirituan a pigsa tunggal adalek ti patriarchal blessingko. Idi nagdiborsio iti kamaudiananna dagiti dadakkelko, ti patriarchal blessingko, kas insuro ni Presidente Thomas S. Monson, ket nagbalinen a “napateg ken di magatadan a personal a gameng,” uray pay “maysa a personal a Liahona.”9
Ita, didak koma mapagbiddutan. Saanak a perpekto. Naaramidko amin a kita ti biddut. Ti agnanayon a kompanionko ti mangpatalged nga agbiddutak pay laeng. Ngem ti patriarchal blessingko ti nakatulong kaniak ken agtultuloy a mangtulong kaniak a mangtarigagay nga agaramid iti nasaysayaat ken agbalin a nasaysayaat.10 Ti masansan a panangadalko iti patriarchal blessingko ti nangpadakkel iti tarigagayko a mangsarked iti sulisog. Tinulongannak a maaddaan iti tarigagay ken tured nga agbabawi, ket ad-adda a nagbalin a naragsak a proseso ti panagbabawi.
Napateg unay kaniak ti panangawat iti patriarchal blessingko bayat ti kinaagtutubok ken idi dumakdakkel pay laeng ti pammaneknekko. Agnanayon nga agyamanak ta naawatan dagiti dadakkelko ken obispok nga ipakita ti tarigagayko a nakasaganaakon.
Idi agtawenak iti 12, adayo a saan unay a makatikaw ken makasinga ti lubong idi ngem iti lubong ita. Inladawan ni Presidente Nelson ita kas “maysa a komplikado unay a panawen iti pakasaritaan ti lubong,” maysa a lubong a “napno iti basol” ken “managimbubukod.”11 Imbag laengen ta ad-adda a manakman dagiti agtutubotayo ita ngem idi agtawenak iti 12, ken addaanda met kadagiti napapateg a pangngeddeng nga aramiden bayat nga agtutuboda pay laeng! Masapul met nga ammuenda no siasinoda a talaga ken ay-ayaten ida ti Dios ken naan-anay nga am-ammona ida!
Saan a tarigagayan ti amin ti patriarchal blessingda idi inaramidko dayta. Ngem ikararagko a dagiti miembro a saan pay a nakaawat iti patriarchal blessingda ket sikakararagda koma a mangammo no nakasaganadan. Ikarik a no agsaganakayo a naespirituan, ti padasyo, kas iti padasko, ket sagrado kadakayo. Ikararagko pay a dagiti nakaawaten iti patriarchal blessingda ket adalen ken ipategda koma daytoy. Ti panangipategko iti patriarchal blessingko idi ubingak ket nangbendision kaniak iti tured no maupayak, liwliwa no mabutengak, talna no mariknak ti danag, namnama no mariknak nga awan namnamak, ken rag-o no kasapulak unay daytoy. Nakatulong ti patriarchal blessingko a nangpapigsa iti pammatik ken panagtalekko iti Nailangitan nga Amak ken iti Mangisalakanko. Pinadakkel pay daytoy ti panagayatko Kadakuada—ket kasta pay laeng.12
Paneknekak a dagiti patriarchal blessing ket mangipaay iti naparegta a panangiturong manipud iti Nailangitan nga Ama. Paneknekak ti sibibiag a kinapudno ti Amatayo idiay Langit ken ti Anakna a ni Jesucristo, a makaam-ammo, mangay-ayat, ken agtarigagay a mangbendision kadatayo. Paneknekak a ni Presidente Russell M. Nelson ti propeta ti Dios iti lubong ita. Iti nagan ni Jesucristo, amen.