Ni Jesucristo ti Pigsa dagiti Nagannak

Ni Elder Dieter F. Uchtdorf

Ti Korum dagiti Sangapulo-ket-dua nga Apostol

Tulonganyo dagiti annakyo a mangbukel iti pammati ken Jesucristo; mangipateg iti ebanghelio ken ti Simbaanna; ken agsagana para iti nalinteg a pili iti tungpal biag.

Naminsan, pumanaw koman ti maysa nga ama para iti miting ti bishopric. Immasideg kenkuana ti uppat ti tawenna nga anakna a babai, naka-pajama ken nakaiggem iti kopia ti Book of Mormon Stories.

“Apay a nasken a mapanka iti miting?” dinamagna.

“Gapu ta maysaak a counselor iti bishopric,” insungbatna.

“Ngem sika ti tatangko!” kinuna ti anakna.

Nagparintumeng iti sangona. “Dungngo,” kinunana, “Ammok a kayatmo nga ibasaanka ken tulonganka a makaturog, ngem ita masapul a tulongak ti bishop.”

Insungbat ti anakna, “Awan kadi ti tatang ti bishop a mangtulong kenkuana a makaturog?”

Agnanayon nga agyamantayo iti di mabilang a miembro nga agserserbi a sipapasnek iti Simbaan ni Jesucristo iti inaldaw. Pudno a sagrado ti sakripisioyo.

Ngem no kasla maawatan daytoy nga ubing a babai, adda banag nga agpada a sagrado—banag a di masukatan—maipapan iti nagannak a mangpatpatanor iti anak. Iparangarangna ti pagtuladan ti langit.¹ Sigurado nga agrag-o ti Amatayo iti Langit, ti Nadiosan a Nagannaktayo, no dagiti annakna, isuro ken patanoren dagiti nagannakda ditoy daga.²

Nagannak, agyamankami iti amin nga ar-aramidenyo a mangpadakkel iti annakyo. Ken dakayo nga annak, agyamankami iti amin nga ar-aramidenyo a mangpadakkel iti dadakkelyo, gapu ta ammo ti tunggal nagannak, masansan nga adu ti masursurotayo iti annaktayo maipapan iti pammati, namnama, ken asi a kas iti masursuroda kadatayo!³

Adda Sagrado a Pagrebbengan dagiti Nagannak

Napanunotyo kadin ti dakkel a peggad nga awaten ti Amatayo iti Langit tunggal mangibaon iti anak ditoy daga? Dagitoy ti espiritu nga annakna a lallaki ken babbai. Awan patinggana ti potensialda. Naikeddengda nga agbalin a nadayag a parsua ti kinaimbag, parabur, ken kinapudno. Ngem umayda ditoy daga a naan-anay nga awan gawayda, a dumani dida makaaramid ti ania man malaksid iti panagpakaasi iti tulong. Saandan a malagip ti panawenda iti sidong ti Dios, kasta met ti pannakaammoda iti pudno a kinasiasinoda ken ti mabalin a pagbalinanda. Buklenda ti pannakaawat ti biag, ayat, Dios, ken ti planona maibatay iti mapaliiwda iti tattao iti aglawlawda—nangruna dagiti nagannakda, a, sipupudnoda pay laeng a mangpadpadas a mangpattapatta iti bambanag.

Inikkan ti Dios dagiti nagannak iti “sagrado a pagrebbengan a mangpatanor iti annakda iti ayat ken kinalinteg, mangted kadagiti pisikal ken naespirituan a kasapulanda, ken mangisuro kadakuada nga … agtungpal iti bilin ti Dios.”⁴

Umdasen dayta tapno siririing iti rabii uray dagiti kasayaatan a nagannak.

Daytoy ti mensahek iti amin a nagannak:

Ay-ayatennakayo ti Apo.

Kaduanakayo.

Nakatakder iti sibayyo.

Isu ti pigsayo iti panangtarabay kadagiti annakyo nga agpili iti nalinteg.

Situtured ken siraragsak nga awatenyo daytoy a pribilehio ken responsibilidad. Diyo ipakumit iti sabali daytoy a paggapuan dagiti nailangitan a bendision. Iti balangkas dagiti pagalagadan ken pagbatayan ti ebanghelio, dakayo ti mangiwanwan iti anakyo kadagiti detalye ti inaldaw a pangngeddeng. Tulonganyo dagiti annakyo a mangbukel iti pammati ken Jesucristo; mangipateg iti ebanghelio ken ti Simbaanna; ken agsagana para iti nalinteg a pili iti tungpal biag. Kinapudnona, dayta ti plano ti Dios para kadagiti nagannak.

Ni Satanas suppiatennakayo, singaennakayo, ken upayennakayo.

Ngem immawat ti tunggal anak iti Silaw ni Cristo kas direkta a linia iti langit. Ken tulongannakayo, tarabayennakayo, ken allukoyennakayo ti Mangisalakan. Agpatulongkayo. Agdamag iti Apo!

No ni Jesucristo ti pigsa dagiti agtutubo, ni Jesucristo pay ti pigsa dagiti nagannak.

Padakkelenna ti Ayat

No dadduma nalabit a panunotentayo no adda maysa a nasaysayaat a maikari a mangtarabay ken mangisuro kadagiti annaktayo. Ngem kasano man ti kinakurang ti mariknayo, addaankayo iti banag a naidumduma a mangpaikari kadakayo: ti ayatyo iti anakyo.

Ti pammateg ti nagannak iti anak ti maysa a kapigsaan a puersa iti uniberso. Maysa daytoy iti manmano a banag ditoy daga a pudno a mabalin nga agnanayon.

Ita, nalabit a mariknayo a saan a nasayaat ti relasionyo iti anakyo. Dita a sumrek ti bileg ti Mangisalakan. Agasanna dagiti masakit, ken maagasanna dagiti relasion. Paaduenna ti tinapay ken ikan, ket mapadakkel ti ayat ken rag-o iti pagtaenganyo.

Ti pammategyo iti annakyo parnuayenna ti makaay-ayo nga aglawlaw a pangisuruan iti kinapudno ken pangbuklan iti pammati. Aramidenyo ti pagtaenganyo a balay a pagkararagan, pagsursuruan, ken pammati; balay ti narag-o a padpadas, lugar a pagkamengan, balay ti Dios.⁵ Ken, “agkararagkayo iti Ama iti amin a kabaelan ti pusoyo, tapno mapno[kayo] iti ayat[na], nga [ipaay]na kadagiti … pasurot ti Anakna, ni Jesucristo.”⁶

Padakkelenna dagiti Babassit ken Gagangay a Panagkagumaan

Ti sabali pay a pigsayo, kas nagannak, ket ti gundaway para iti inaldaw, agtultuloy nga impluensia. Temporario dagiti kapatada, mannursuro, ken media influencers. Ngem mabalin a dakayo ti katalgedan nga impluensia iti biag ti anakyo.

Mabalin a kasla bassit dagiti reggetyo no idilig iti nalatak a tattao a mangngegan dagiti annakyo ditoy lubong. No dadduma mariknayo a kasla bassit lang ti maaramidanyo. Ngem laglagipen a “babaen ti bassit a pamuspusan makaipaay ti Apo iti dadakkel a banag.”⁷ Maysa a home evening, maysa a saritaan iti ebanghelio, wenno napintas a pagwadan ket saan a mangbalbaliw iti biag ti anakyo iti apagkanito, a kas met no kasano a ti maysa a tedted ti tudo ti gapu ti panagdakkel a dagus ti mula. Ngem ti babassit ken simple nga aramid iti inaldaw, ti ad-adda a naespirituan a mangtaraon iti annakyo ngem iti sagpaminsan a panangted iti adu a naespirituan nga impluensia.⁸

Dayta ti wagas ti Apo. Kasaonakayo ken ti anakyo iti naulimek, bassit a timek, saan a timek ti gurruod.⁹ Inagasanna ni Naaman saan a babaen ti “maysa a naindaklan a banag” ngem babaen ti simple, naulit-ulit a panagbuggo.¹⁰ Nagustuan dagiti annak ti Israel ti piesta ti pugo iti let-ang, ngem ti namagtalinaed kadakuada a sibibiag ket ti bassit ken simple a milagro ti mana—ti inaldaw a tinapayda.¹¹

Kakabsat, ti inaldaw a tinapay ti kasayaatan a maisagana ken maidasar iti pagtaengan. Ti kapintasan a wagas a mangsuporta iti pammati ken pammaneknek ket panagaramid iti normal ken natural a wagas, saggaysa iti maminsan, iti babassit ken simple a kanito, iti inaldaw a biag.¹²

Kanito ti panangisuro ti tunggal kanito. Mabalin a pangiwanwan iti panagpili ti tunggal sao ken tignay.¹³

Mabalin a diyo makita ti dagus nga epekto dagiti reggetyo. Ngem dikayo sumuko. “Lumabas amin a banag iti panawenda,” kinuna ti Apo. “Gapuna, saankayo koma a mabannog nga agaramid iti nasayaat, ta isagsaganayo ti pamuon ti naindaklan nga aramid.”¹⁴ Ania ti dakdakkel a trabaho ngem panangtulong iti napapateg nga annak ti Dios a mangammo iti kinasiasinoda ken mangbukel iti pammatida ken Jesucristo, ti ebangheliona, ken ti Simbaanna? Bendisionan ken padaklento ni Jesucristo ti agtultuloy a reggetyo.

Mangted iti Paltiing

Ti sabali pay a nabileg a wagas a panangsuporta ti Apo iti nagannak ket babaen ti sagut ti bukod a paltiing. Magagaran ti Dios a mangibukbok iti Espirituna a mangiwanwan kadagiti nagannak.

No managkararag ken sensitibokayo iti Espiritu, ballaagannakayo kadagiti nalimed a peggad.¹⁵ Ipalgaknanto dagiti sagut, pigsa, ken saan a maisao a pakaseknan dagiti annakyo.¹⁶ Tulongannakayto ti Dios a mangkita kadagiti annakyo a kas iti panangkitana kadakuada—iti labes ti akinruar a langada ken iti pusoda.¹⁷

Iti tulong ti Dios, masursuroyo nga am-ammuen dagiti annakyo iti natarnaw ken nailangitan a wagas. Awisenkayo nga umawat iti diaya ti Dios a mangtarabay iti pamiliayo babaen ti bukod a paltiing. Sapulen ti pannarabayna iti kararagyo.¹⁸

Naindaklan a Panagbalbaliw

Nalabit a ti kapatgan a tulong nga idiaya ni Jesucristo iti nagannak ket ti “naindaklan a panagbalbaliw” ti puso.¹⁹ Milagro daytoy a kasapulantayo amin.

Iti apagkanito, panunoten daytoy a kasasaad: Addakayo iti simbaan, dumdumngeg iti mensahe maipapan kadagiti pamilia. Iladawan ti speaker ti naan-anay a pagtaengan ken ti ad-adda pay a naan-anay a pamilia. Di pulos agapa dagiti agassawa. Agsardeng laeng dagiti ubbing a mangbasa iti scriptures no orasen nga agaramid iti homework. Ket agtokar ti musika ti “Love One Another”²⁰ iti background. Sakbay a makadanon ti speaker iti paset maipapan iti pannakikadua ti amin a siraragsak a mangdalus iti banio, pampanunotenyon ti, “Awan namnama ti pamiliak.”

Patpatgek a kakabsatko, relaks! Agpampanunot ti amin iti kongregasion iti kasta met laeng! Kinapudnona, madanagan ti amin a nagannak no di umdas ti kinasayaatda.

Nagasat ta adda nadiosan a paggapuan ti tulong para kadagiti nagannak: Isu ni Jesucristo. Isu ti gubuayan ti nabileg a panagbalbaliw ti pusotayo.

No luktam ti pusom iti Mangisalakan ken iti pannursurona, ipakitananto kenka ti pagkapsutam. No agtalekka ken Jesucristo iti napakumbaba a puso, pagbalinenna a napigsa dagiti nakapsut a banag.²¹ Isu ti Dios dagiti milagro.

Kayatna kadi a sawen nga agbalinkayo a naan-anay ken ti pamiliayo? Saan. Ngem nasaysayaatto ti pagbanaganyo. Babaen ti parabur ti Mangisalakan, in-inut, nga ad-adunto ti mapadur-asyo a kababalin a kasapulan dagiti nagannak: ayat iti Dios ken iti annakna, anus, kinamanagparabur, pammati ken Cristo, ken tured nga agaramid iti umno.

Mangidiaya ni Jesucristo iti Suporta babaen ti Simbaanna

Ti reggettayo a mangbukel iti pammati ken Jesucristo ket naisentro iti pagtaengan, naipamaysa iti indibidual. Ket suportado ti Simbaan daytoy. Malaksid iti panangipaay kadagiti sagrado a scripture ken balikas dagiti propeta, idiaya ti Simbaan ti Mangisalakan ti adu a resources a tumulong kadagiti nagannak ken annak nga agpili iti nalinteg:

• TiPara iti Pigsa dagiti Agtutubo: Maysa a Pangiwanwan iti Panagpili ket saan a mangted iti listaan dagiti aramiden ken saan nga aramiden. Isurona dagiti agnanayon a kinapudno tapno tumulong a mangaramid kadagiti pili a naisentro iti biag ken pannursuro ni Jesucristo. Basaenyo daytoy kadagiti annakyo. Pagsaritaenyo ida maipapan daytoy. Tulonganyo ida a maaddaan kadagitoy nga agnanayon ken nadiosan a kinapudno tapno mangiwanwan kadagiti pilida.²²

• Dagiti komperensia ti FSY ti maysa pay a napintas a resource. Namnamaek a dumar-ayto ti tunggal agtutubo. Awisek dagiti young single adults a kumappeng kadagitoy a komperensia kas mentor ken mamagbaga. Awisek dagiti nagannak nga itultuloyda a papigsaen ti naespirituan a momentum a yawid dagiti agtutuboda manipud iti komperensia ti FSY.

• Dagiti ubbing ken agtutubo ti Ti Simbaan ni Jesucristo dagiti Santo iti Ud-udina nga Aldaw addaanda iti mannursuro, lider, ken mentor. Masansan a sumrekkayo iti biag ti maysa nga agtutubo iti napateg a kanito tapno mangbukel ken mangsuporta iti pammati ken pammaneknek. Sumagmamano kadakayo ti single adult. Sumagmamano ti awanan annak a bukodyo. Sagrado iti imatang ti Dios ti naragsak a panagserbiyo iti annak ti Dios.²³

Saan a Kaano Man a Sumuko iti Milagro

Patpatgek a gagayyemko ken kakabsatko, ti panangbukel iti pammati iti ubing kasla panangtulong iti sabong a dumakkel. Saanyo a maguyod ti puon tapno nataytayag. Dimo maungap ti busel tapno nasapsapa nga agsabong. Ken diyo mabaybay-an ti sabong ken namnamaen nga agtubo wenno dumakkel a dagus.

Ti mabalin ken nasken nga aramidenyo para iti tumantanor a kaputotan ket mangipaay iti nataba, nasustansia a daga, a makagun-od iti agay-ayus a nailangitan a danum. Ikkaten dagiti ruot ken ania man a manglapped iti nailangitan a lawag ti init. Mangparnuay iti kasayaatan a kondision para iti panagdakkel. Palugodan ti tumantanor a kaputotan nga agaramid iti naparegta a pili ken bay-an ti Dios nga agaramid iti milagrona. Napimpintas ken ad-adda a makapasiddaaw ken naragragsak ti resultana ngem iti ania man a maipatungpalyo a bukbukodyo laeng.

Iti plano ti Nailangitan nga Ama, nairanta nga agnanayon dagiti relasion dagiti pamilia. Daytoy ti gapuna, kas nagannak, dikay sumuko, nupay diyo ipannakkel no kasano a naglabas dagiti banag iti napalabas.

Babaen ken Jesucristo, ti Apo a Mangngagas, mabalin a kanayon nga adda baro a pangrugian; Kanayon a mangipanamnama.

Ni Jesucristo ti pigsa dagiti pamilia.

Ni Jesucristo ti pigsa dagiti agtutubo.

Ni Jesucristo ti pigsa dagiti nagannak.

Paneknekak daytoy iti nagan ni Jesucristo, amen.

Dagiti Nagadawan

1. “Nainkasigudan iti dandani tunggal nagannak ti tarigagay a mangisuro kadagiti annakna kadagiti saguday ti moralidad. Daytoy ti paset ti milagro ti plano ti Nailangitan nga Ama. Kayatna nga umay dagiti annakna ditoy daga, a sumurot iti agnanayon a pagtuladan dagiti pamilia nga adda iti langit. Dagiti pamilia ti kangrunaan a yunit ti organisasion dagiti agnanayon a sakup, ket ngarud panggepna nga isuda met ti kangrunaan a yunit ditoy daga. Nupay adayo iti perpekto dagiti naindagaan a pamilia, mangtedda kadagiti annak ti Dios iti kasayaatan a gundaway a mapasangbayda iti lubong iti kakaisuna nga ayat iti daga nga umas-asideg iti nariknatayo iti langit—ayat ti nagannak. Dagiti pamilia ti kasayaatan pay a wagas tapno mataginayon ken maipasa dagiti saguday ti moralidad ken pudno a pagbatayan a nalabit mangiturong kadatayo nga agsubli iti imatang ti Dios” (Henry B. Eyring, “Gathering the Family of God,” Liahona, Mayo 2017, 20).

2. Siempre, ammotayo a ti pagayatan ti Dios ket saan a kanayon a maibanag “idiay daga, kas sadi langit” (Mateo 6:10). Sigurado a kurang ti mortal a nagannak no idilig iti ideal ti Dios. Sigurado a makitana dayta. Masapul nga agsangit gapu iti amin a ladingit ken sakit ti nakem kadagiti relasion ti pamilia. Ngem, saan a simmuko Isuna iti pamilia. Ken saanto pulos, gapu ta addaan ti Dios iti nadayag a plano para iti agnanayon a pangtungpalan dagiti annakna. Ken ti sentro iti dayta a plano ket ti pamilia.

3. Kitaen iti Mateo 18:1–5; Mosiah 3:19.

4. “The Family: A Proclamation to the World,” ChurchofJesusChrist.org; see also Doktrina ken Katulagan 68:25–28.

5. Kitaen iti “Learning at Home Is Founded on Relationships,” Teaching in the Savior’s Way: For All Who Teach in the Home and in the Church (2022), 30–31; kitaen met iti Doktrina ken Katulagan 109:8.

6. Moroni 7:48.

7. 1 Nephi 16:29; kitaen met iti Alma 37:6–7.

8. Kitaen iti “Learning at Home Consists of Small, Simple, Consistent Efforts,” Teaching in the Savior’s Way, 31. Insuro ni President David O. McKay: “Saantayo a panunoten dayta, gapu ta ti dadduma [a banag] … kasla babassit ken awan mamaayda, saan a napateg dagitoy. Ti biag, ngamin, buklen dagiti babassit a banag. Ti biagtayo, ti kinataotayo, iti pisikal, ket buklen dagiti babassit a panagbitek ti puso. Bay-anyo nga agsardeng ti panagbitek dayta bassit a puso, ket agsardeng ti biag iti daytoy a lubong. Ti dakkel nga init ket maysa a nabileg a puersa iti uniberso, ngem awatentayo dagiti bendision dagiti sinamar[na] gapu ta umayda kadatayo kas babassit a silnag, a no pagtitiponen, punnuenda ti intero a lubong iti lawag ti init. Ti nasipnget a rabii ket mapagbalin a makaay-ayo babaen ti silnag dagiti kasla babassit a bituen; ket ngarud ti pudno a biag a Kristiano ket buklen dagiti babassit nga aramid a kasla Cristo a naaramid iti daytoy nga oras, daytoy a minuto—iti pagtaengan” (Teachings of Presidents of the Church: David O. McKay [2003], 219).

9. Kitaen iti Helaman 5:30.

10. Kitaen iti 2 Ar-ari 5:9–14.

11. Kitaen iti Exodo 16.

12. Kitaen iti “Preparing Your Children for a Lifetime on God’s Covenant Path,” Come, Follow Me—For Individuals and Families: New Testament 2023appendix (digital only).

13. Kitaen iti “Learning at Home Can Be Planned but Also Spontaneous,” Teaching in the Savior’s Way, 31; 1 Pedro 3:15.

14. Doktrina ken Katulagan 64:32–33.

15. Kitaen iti Mateo 2:13.

16. Kitaen iti Alma 40:1; 41:1; 42:1.

17. Kitaen iti 1 Samuel 16:7.

18. Kitaen iti 1 Nephi 15:8.

19. Alma 5:13.

20. Kitaen iti “Love One Another,” Hymns, no. 308.

21. Kitaen iti Ether 12:27.

22. “Iti kaso dagiti ubbing, adda kadagiti nagannak ti pagrebbengan a mangted iti moral a panangiwanwan Ammoda ti disposision, pannakaawat, ken kinasaririt ti tunggal ubing. Bubosen dagiti nagannak ti tungpal biag a mangsapsapul a mangipasdek ken mangtaginayon iti nasayaat a komunikasion iti tunggal maysa kadagiti annakda. Addada iti kasayaatan a kasasaad a mangaramid kadagiti ultimo a moral a pangngeddeng no maipapan iti pagsayaatan ken pagimbagan dagiti annakda” (James E. Faust, “The Weightier Matters of the Law: Judgment, Mercy, and Faith,” Ensign, Nob.1997, 54).

23. Dua a dadduma pay a resources ti napateg a dakamaten: Ti digital version ti Come, Follow Me resource daytoy a tawen iramanna ti baro a benneg a napauluan iti “Preparing Your Children for a Lifetime on God’s Covenant Path.” Isingasingna dagiti simple, naisentro iti pagtaengan a kapanunotan para iti panangtulong kadagiti ubbing nga agsagana para iti panagbuniag ken dadduma pay a katulagan ken ordinansa. Ken ti kabarbaro a narebisar a Teaching in the Savior’s Way addaan iti benneg a napauluan iti “Home and Family” a mangiladawan no kasano a mayaplikar dagiti pagbatayan ti panangisuro a kas ken Cristo iti pagtaengan (kitaen kadagiti panid 30–31).