Ti Aramid ti Templo ken Family History—Maysa ken Agkadua nga Aramid
Ti maysa a kangrunaan a pokus ti plano ti Nailangitan nga Amatayo ket ti panagkaykaysa ti pamilia para ditoy a biag ken iti kinaagnanayon.
Agyamanak unay iti agtultuloy a pannakaibangon dagiti templo iti daytoy “dispensasion ti pannakatungpal dagiti panawen” (Doktrina ken Katulagan 128:18). Manipud idi immuna nga aldaw ti Pannakaisubli, adu ti inaramid dagiti napudno a Santo a sakripisio tapno umawatda iti ordinansa ken katulagan iti templo. Iti panangsurot iti napintas a pagwadanda, idi 1975, kalpasan ti adu a sakripisio iti ekonomia tapno agbiahe manipud Mexico City, siak ken ti patpatgek nga asawak, ni Evelia, kaduami dagiti nagannakmi, ket nailantip kas agnanayon nga agassawa iti Templo ti Mesa Arizona. Iti dayta nga aldaw, bayat ti panagkaykaysakami babaen ti turay ti priesthood iti balay ti Apo, pudno a napadasanmi ti maysa a taldiap ti langit.
Ti Aramid ken Panggep dagiti Templo
Dayta a padas ti nangpalugod kaniak a mangdayaw unay no kasano, kalpasan ti tallo a tawen a napasnek a panagtrabaho ken panagsakripisio, a naileppas dagiti Santo idiay Kirtland, Ohio, ti napintas a temploda idi panagsusulbod ti 1836 —ti umuna daytoy a dispensasion. Idi Marso iti dayta met la a tawen, nasurok a sangaribu a tattao ti naguummong iti templo ken iti pagserkanna para iti pangidaton a serbisio. Timmakder ni Propeta Joseph Smith a mangted iti pangidaton a kararag, nga inawatna babaen ti paltiing (kitaen iti Doktrina ken Katulagan 109). Iti daytoy inladawanna ti adu kadagiti naisangsangayan a bendision a maited kadagiti maikari a sumrek iti templo ti Apo. Kalpasanna, inkanta ti koro ti himno a “Ti Espiritu ti Dios” ket nagtakder ti kongregasion ket inaramidda ti Hosanna Shout a “buyogen ti kasta [a puersa a kasla] … mangitag-ay iti atep manipud iti pasdek” (Teachings of Presidents of the Church: Joseph Smith [2007], 307).
Maysa a lawas kalpasanna inladawan ti Propeta ti panagparang ti Apo iti templo, a nagkuna:
”Ta adtoy, inawatko daytoy a balay, ket addanto ditoy ti naganko; ket agpakitaakto kadagiti taok a siaasi iti daytoy a balay. …
“Ket agsaknapto kadagiti ganggannaet a daga ti kinalatak daytoy a balay; ket daytoy ti pangrugian ti bendision a maibukbokto kadagiti ulo dagiti taok” (Doktrina ken Katulagan 110:7, 10).
Kalpasan daytoy ken dadduma pay a parmata, ni Elias a propeta, a naipan idiay langit a di nakaraman iti ipapatay, ket nagparang iti sango da Propeta Joseph Smith ken Oliver Cowdery ket kinunana:
“Adtoy, dimtengen ti naan-anay a panawen, a nagtaud a mismo iti ngiwat ni Malakias—a mangipaneknek a nasken a maipatulod ni [Propeta Elias], sakbay ti yaay ti naindaklan ken nakaam-amak nga aldaw ti Apo—
”A mangisubli iti puspuso dagiti amma kadagiti annak; ken dagiti annak kadagiti amma, no saan masaplit ti sibubukel a lubong iti lunod—
”Ngarud, naitalek iti imayo dagiti tulbek daytoy a dispensasion; ket babaen daytoy maammuanyo koma nga asidegen ti naindaklan ken nakaam-amak nga aldaw ti Apo, uray kadagiti ridaw” (Doktrina ken Katulagan 110:14–16).
Ti Templo ken Family History
Kalpasan nga insubli ti Apo dagiti tulbek ti pannakailantip ken ni Joseph Smith, nangrugi ti pannakaisalakan iti agsumbangir ti belo iti dispensasiontayo (kitaen iti 1 Taga-Corinto 15:22, 29; Doktrina ken Katulagan 128:8–18).
Insuro ni presidente Boyd K. Packer a “di impangag ti lubong daytoy a tanda ti pasamak, ngem impluensiaanna ti pagtungpalan ti tunggal kararua a nagbiag wenno agbiagto. Siuulimek a napasamak dagiti banag. Nagbalin ti Simbaan a simbaan nga agbangbangon iti templo.
“Iti lubong adda rimsua ditoy ken sadiay, iti wagas a naipagarup nga espontaneo, dagiti tao ken organisasion ken kagimongan ti tao nga agessem a mangtunton kadagiti kapupuon. Napasamak amin daytoy sipud idi nagparang ni Elias iti Templo ti Kirtland” (The Holy Temple [1980], 141).
“Manipud dayta mismo nga aldaw, Abril 3, 1836, nangrugin a maiturong ti puspuso dagiti annak iti ammada. Kalpasanna saan a tentatibo dagiti ordinansa, ngem manayon. Adda kadakami ti bileg a mangilantip. Awan ti awtorisasion a manglab-aw iti pategna. Mangted dayta a bileg iti kinapudno ken agnanayon a kinatalged iti amin nga ordinansa a maannong nga addaan umno a turay para kadagiti sibibiag ken natay” (Preparing to Enter the Holy Temple [2002], 28).
Patpatgenmi a kakabsat, ti pannakabangon ken umno a pannakausar dagiti templo ket nagbalin iti ania man a dispensasion a tanda ti pudno a Simbaan ni Jesucristo. Kalpasan ti pannakaidaton ti Templo ti Salt Lake idi 1893, pinaregta ni Presidente Wilford Woodruff dagiti miembro ti Simbaan a mangbirok iti rekord dagiti kapuonanda ken mangirekord kadagiti kapupuonanda babaen ti panagsublida agingga a mabalin tapno mayeg dagiti nagan iti templo ken annongen dagiti ordinansa ti pannakaisalakan ken pannakaitan-ok (kitaen iti Teachings of Presidents of the Church: Wilford Woodruff [2004], 174).
Ti Family History ken Aramid iti Templo—Maysa nga Aramid
Maysa a tawen kalpasanna (1894), ni met laeng Presidente Woodruff ti nangimaton iti pannakabuangay iti Genealogical Society of Utah. Sangagasut a tawen kalpasanna, idi 1994 kinuna ni Elder Russell M. Nelson, a miembro idi ti Korum ti Sangapulo-ket-dua nga Apostol, “Dagiti pasamak iti dayta napnuan pakasaritaan a tawen ket nangipasdek iti family history research ken serbisio iti templo kas maysa nga aramid iti Simbaan” (“The Spirit of Elijah,” Ensign, Nob 1994, 85).
Aramid iti Family History
Patpatgenmi a kakabsat, paregtaennatayo ti Apo kas miembro ti Simbaanna a mangtaginayon iti bukodtayo a family history, nga agsursuro kadagiti kapuonantayo, ken mangaramid kadagiti kasapulan nga urnos para kadakuada nga umawat kadagiti ordinansa ti ebanghelio kadagiti templo tapno matulongan ida a rumang-ay iti dana ti katulagan, a mangbendision kadakuada iti agnanayon a pamilia. Dayta ti kangrunaan a pokus ti plano ti Nailangitan nga Amatayo: panagkaykaysa ti pamilia para ditoy a biag ken iti kinaagnanayon.
Kadakayo a di makarikna a kabaelanyo nga aramiden daytoy nga aramid, ammoyo a dikayo agmaymaysa. Mabalintayo amin ti agturong kadagiti ramit nga insagana ti Simbaan ken masarakan kadagiti sentro ti FamilySearch, nga ammotayo a kas family history center. Nadisenio dagitoy a FamilySearch center tapno dandani amin, iti bassit a tulong, masarakanda ti impormasion dagiti kapuonanda ken maurnos a nasayaat tapno maipanda iti balay ti Apo. Kontakenyo koma dagiti family history consultant iti ward wenno branchyo a mangtarabay kadakayo iti tunggal addang.
No surotentayo ti pannarabay dagiti propeta ken sursuruen nga aramiden ti family history ken annongen dagiti ordinansa ti templo para iti kapuonantayo, mapadasantayo ti dakkel a rag-o agingga iti punto a ditayton kayat nga isardeng nga aramiden daytoy. Layusen ti Espiritu ti puspusotayo, riingenna ti kabaelantayo nga aramiden daytoy, ken iturongnatayo bayat ti panagsapultayo ti nagnagan dagiti kapuonantayo. Ngem laglagipen a ti family history ket ad-adda pay ngem iti panagsukisok kadagiti nagan, petsa, ken lugar. Daytoy ti mamagkaykaysa kadagiti pamilia ken rikna ti rag-o manipud iti panangted kadakuada iti ordinansa ti ebanghelio.
Magustuak ti naparegta a pannursuro ti patpatgentayo a propeta, ni Presidente Russell M. Nelson, a nagkuna: “Ti templo ti sentro a pangpapigsaan iti pammatitayo ken naespirituan a pangpatibker gapu ta ti Mangisalakan ken ti doktrinana ti mismo a sentro ti templo. Amin a banag a maisursuro iti templo, babaen ti instruksion ken ti Espiritu, mangnayon iti pannakaawattayo ken Jesucristo. Dagiti napapateg nga ordinansa ti mangibegkes kadatayo Kenkuana kadagiti sagrado a katulagan iti priesthood. Sa, no tungpalentayo dagiti katulagantayo, ipaayannatayo iti pagpaimbag, pangpapigsa a bilegna ” (“The Temple and Your Spiritual Foundation,” Liahona, Nob. 2021, 93–94).
Awan duadua, ti aramid ti Templo ken family history ket maysa ken agkadua nga aramid iti Simbaan.
Paneknekak dagitoy a kinapudno. Ammok a daytoy ti Simbaan ni Apo Jesucristo, ti Mangisalakan ken Mannubbottayo, a laglagipen ken daydayawentayo itoy a panawen ti Paskua ti Panagungar. Ammok a patpatgennatayo, ket no tungpalentayo dagiti katulagantayo ken agtalektayo Kenkuana, ikkannatayo iti makaagas ken makapapigsa a bilegna. Iti nagan ni Jesucristo, amen.