Apendiks C

Para iti Primary—Dagiti Pangiturong para iti Oras ti Panagkanta ken ti Pabuya dagiti Ubbing iti Miting iti Sakramento

Ti sagrado a musika ti nabileg a ramit a makatulong kadagiti ubbing a masursuruan maipapan iti plano ti Nailangitan nga Ama iti ragsak ken dagiti pundasion iti kinapudno ti ebanghelio ni Jesucristo. Kabayatan ti panagkanta dagiti ubbing maipapan kadagiti pagbatayan ti ebanghelio, paneknekanto ti Espiritu Santo maipapan iti kinapudno dagitoy. Agtalinaedto dagiti balikas ken musika iti pampanunot ken puspuso dagiti ubbing iti unos ti panagbiagda.

Ikarigatanyo a gun-oden ti tulong ti Espiritu bayat ti panagsaganayo a mangisuro iti ebanghelio babaen iti musika. Ibinglayyo ti pammaneknekyo maipapan kadagiti kinapudno a kantaenyo. Tulonganyo dagiti ubbing a mangkita no kasano a mainaig ti musika iti no ania dagiti masursuro ken mapadpadasanda iti pagtaengan ken kadagiti klase iti Primary.

Dagiti Pangiwanwan [Guidelines] para iti Pabuya iti Miting iti Sakramento

Babaen ti panangiturong ti bishop, gagangay a maang-angay ti pabuya dagiti ubbing iti miting iti sakramento kabayatan ti maikapat a kuarter ti tawen. Kas panguluen ti Primary ken lider iti musika, makitinnulong iti mamagbaga iti bishopric a mangimaton iti Primary tapno mangplano iti pabuya.

Nasken a ti pabuya ket mangpalugod kadagiti ubbing a mangidatag wenno mangipabuya iti no ania dagiti nasursuroda ken ti pamiliada manipud iti Doktrina ken Katulagan iti pagtaengan ken iti Primary, agraman dagiti kanta iti Primary a kinantada kabayatan ti tawen. Kabayatan ti panagplanoyo iti pabuya, panunoten dagiti wagas a makatulong daytoy iti kongregasion a mangipokus iti Mangisalakan ken dagiti pannursurona.

Dagiti yunit nga addaan iti bassit a bilang dagiti ubbing ket mabalinda nga ibilang dagiti wagas a mabalin a makiraman dagiti miembro ti pamilia a kaduada dagiti annakda. Mabalin nga igibus ti maysa a miembro ti bishopric ti miting iti ababa a panagsaritana.

Kabayatan ti panangisaganayo iti pabuya, laglagipen dagiti sumaganad a pangiwanwan:

• Nasken a saan a mangala iti saan a kasapulan nga oras dagiti panagpraktis manipud kadagiti klase ti Primary wenno pamilia.

• Saan a maitutop para iti miting iti sakramento dagiti ladawan [visuals], kawes [costumes], ken dagiti pabuya iti media.

Kitaen iti Sapasap a Handbook: Panagserbi iti Ti Simbaan ni Jesucristo dagiti Santo iti Ud-udina nga Aldaw, 12.2.1.2, Gospel Library.

Dagiti Instruksion para iti Oras ti Panagkanta

5 minuto (panguluen ti Primary): Panglukat a kararag, nasantuan a kasuratan wenno pagannurotan ti pammati, ken maysa a panagsarita [talk]

20 minuto (lider iti musika): Oras ti panagkanta

Pumili ti panguluen ti Primary ken lider iti musika kadagiti kanta para iti tunggal bulan tapno mapatibker dagiti pagbatayan [principles] a sursuruen dagiti ubbing kadagiti klaseda ken iti pagtaengan. Nairaman iti daytoy a pangiwanwan ti maysa a listaan dagiti kanta a mangpatibker kadagitoy a pagbatayan.

Bayat ti panangisuroyo kadagiti kanta iti ubbing, awisenyo ida a mangibinglay no ania ti nasursurodan maipapan kadagiti estoria ken pagbatayan iti doktrina nga isursuro ti kanta. Awisenyo dagiti ubbing a mangibinglay kadagiti kapanunotan ken riknada maipapan kadagiti kinapudno a masarakan kadagiti kanta.

Ti Children’s Songbook ti pangrugian a resource para iti musika iti Primary. Maitutop pay dagiti himno manipud iti hymnbook ken kankanta manipud iti Friend . Nasken nga anamongan ti bishopric ti pannakausar ti ania man a sabali pay a musika iti Primary (kitaen iti Sapasap a Handbook, 12.3.4)

Musika para iti Oras ti Panagkanta

Enero

• “Follow the Prophet,” Children’s Songbook110–11

• “Search, Ponder, and Pray,” Children’s Songbook, 109

Pebrero

• “Dare to Do Right,” Children’s Songbook, 158

• “A Child’s Prayer,” Children’s Songbook, 12–13

Marso

• “Every Star Is Different,” Children’s Songbook, 142

• “When I Am Baptized,” Children’s Songbook, 103

Abril

• “When He Comes Again,” Children’s Songbook, 82–83

• “Did Jesus Really Live Again?,” Children’s Songbook, 64

Mayo

• “‘Give,’ Said the Little Stream,” Children’s Songbook, 236

• “Shine On,” Children’s Songbook, 144

Hunio

• “The Holy Ghost,” Children’s Songbook, 105

• “I Want to Be a Missionary Now,” Children’s Songbook, 168

Hulio

• “Stand for the Right,” Children’s Songbook, 159

• “He Sent His Son,” Children’s Songbook, 34–35

Agosto

• “I’m Trying to Be like Jesus,” Children’s Songbook, 78–79

• “I Feel My Savior’s Love,” Children’s Songbook, 74–75

Septiembre

• “I Love to See the Temple,” Children’s Songbook, 95

• “To Think about Jesus,” Children’s Songbook, 71

Oktubre

• “Family History—I Am Doing It,” Children’s Songbook, 94

• “The Church of Jesus Christ,” Children’s Songbook, 77

Nobiembre

• “Keep the Commandments,” Children’s Songbook, 146

• “To Be a Pioneer,” Children’s Songbook, 218–19

Disiembre

• “I Am a Child of God,” Children’s Songbook, 2–3

• “O Little Town of Bethlehem,” Hymns, no. 208

Panangusar iti Musika a Mangisuro iti Doktrina

Nairanta ti oras iti panagkanta a mangtulong kadagiti ubbing a masursuruan kadagiti kinapudno ti ebanghelio. Mabalin a mangparegta kadakayo dagiti sumaganad a kapanunotan kabayatan ti panagplanoyo kadagiti wagas a pakaisuruan dagiti pagbatayan ti ebanghelio a masarakan kadagiti himno ken kanta iti Primary.

Basaen dagiti mainaig a nasantuan a kasuratan. Para iti adu a kanta iti Children’s Songbook ken iti hymnbook, nailista dagiti reperensia a mainaig kadagiti nasantuan a kasuratan. Tulonganyo dagiti ubbing a mangbasa iti sumagmamano kadagitoy a binatog iti nasantuan a kasuratan, ket isaritayo no kasano a mainaig dagiti nasantuan a kasuratan iti kanta. Mabalin met nga ilistayo iti pisarra ti sumagmamano a reperensia iti nasantuan a kasuratan ket awisenyo dagiti ubbing a mangiparis iti tunggal reperensia iti maysa a kanta wenno maysa a berso manipud iti maysa a kanta.

Punnuen ti blangko. Mangisurat iti maysa a berso ti kanta iti pisarra nga awan dagiti sumagmamano a kangrunaan a balikas [key words]. Kalpasanna kiddawen kadagiti ubbing nga agkansion iti kanta, a dumdumngeg kadagiti balikas a mangpunno kadagiti blangko. Bayat ti panangpunnoda iti tunggal blangko, ilawlawag no ania dagiti pagbatayan ti ebanghelio a masursuroyo manipud kadagiti awan a balikas.

Agpaneknek. Mangiburay iti ababa a pammaneknek kadagiti ubbing maipapan kadagiti kinapudno ti ebanghelio a masarakan iti kanta iti Primary. Tulonganyo dagiti ubbing a makaawat a ti panagkanta ket maysa a wagas a mabalin a pangiburayanda iti pammaneknek ken pakariknaanda iti Espiritu.

Agtakder a kas maysa a saksi. Awisen dagiti ubbing nga agsisinnublatda iti panagtakder ken panangibinglay iti no ania ti masursuroda manipud iti kanta a kankansionenda wenno kasano a mariknada maipapan kadagiti kinapudno a naisuro iti kanta. Saludsodenyo kadakuada no ania ti riknada bayat ti panagkansionda iti kanta, ken tulonganyo ida a mangilasin iti impluensia ti Espiritu Santo.

Agusar kadagiti ladawan. Kiddawenyo kadagiti ubbing a tulongandakayo nga agsapul wenno agaramid kadagiti ladawan a maikadua kadagiti napapateg a balikas wenno ragup ti balikas iti kanta. Awisenyo ida a mangibinglay no kasano a mainaig dagiti ladawan iti kanta ken no ania ti isuro ti kanta. Kas pagarigan, no isursuroyo ti kanta a “When He Comes Again” (Children’s Songbook, 82–83), mabalinyo nga ikabil dagiti ladawan iti intero a siled a mangiladawan kadagiti napapateg a balikas manipud iti kanta (kas dagiti anghel, niebe, ken bituen). Kiddawen kadagiti ubbing a mangummong kadagiti ladawan ken mangingato kadagitoy iti husto nga urnos bayat ti aggigiddan a panagkantayo.

Ibinglay ti maysa a banag nga adalen [object lesson]. Mabalinyo nga usaren ti maysa a banag a mangparegta iti panaglilinnawag maipapan iti maysa a kanta. Kas pagarigan, no agkankansion iti kanta “‘Give,’ Said the Little Stream” (Children’s Songbook, 236), mabalinyo nga ipakita kadagiti ubbing ti ladawan dagiti banag a kas iti karayan, ruot, tudo, ken sabong. Mabalin a makaiturong daytoy iti panaglilinnawag no kasano nga uray dagiti babassit nga aramid ti panagserbi ket makabendision iti dadduma iti napapateg a wagas.

Yawis ti panagbibinninglay kadagiti bukod a padas. Tulonganyo dagiti ubbing a manginaig kadagiti pagbatayan a maisursuro iti kanta kadagiti padasda kadagitoy a pagbatayan. Kas pagarigan, sakbay ti panangkanta iti “I Love to See the Temple” (Children’s Songbook, 95), mabalinyo a kiddawen kadagiti ubbing a mangingato kadagiti imada no nakakitadan iti maysa a templo. Awisenyo ida nga agpanunot bayat ti panagkantada maipapan iti no kasano ti mariknada no makitada ti maysa a templo.

Agdamag kadagiti saludsod. Adu dagiti saludsod a mabalinyo a damagen bayat ti panagkansionyo kadagiti kanta. Kas pagarigan, mabalinyo a saludsoden kadagiti ubbing no ania ti masursuroda manipud iti tunggal berso iti kanta. Mabalinyo pay a kiddawem kadakuada nga agpanunot kadagiti saludsod a sungbatan ti kanta. Makaiturong daytoy iti panaglilinnawag maipapan kadagiti kinapudno a naisuro iti kanta.

Agusar kadagiti simple a garaw ti ima. Awisenyo dagiti ubbing a mangpanunot kadagiti simple a garaw ti ima a mangtulong kadakuada a manglagip kadagiti balikas ken mensahe ti maysa a kanta. Kas pagarigan, no kankantaenyo ti “Search, Ponder, and Pray” (Children’s Songbook, 109), mabalinyo nga awisen dagiti ubbing a mangitudo kadagiti matada bayat ti panagkantada maipapan iti panagsukisok kadagiti nasantuan a kasuratan, itudoda dagiti uloda bayat ti panagkantada maipapan iti panagutob, ken idalikepkep dagiti takiagda bayat ti panagkantada maipapan iti panagkararag.