Sacred Grove [Sagrado nga Kakahuyan], ni Greg K. Olsen

Enero 13– 19: “Nakakita Ako sang Haligi sang Kasanag”

Joseph Smith—Kasaysayan 1:1–26

Masiling mo nga ang Doktrina kag mga Kasugtanan isa ka libro sang mga sabat sa mga pangamuyo: madamo sa sagrado nga mga rebelasyon sa sining libro nag-abot bilang sabat sa mga pamangkot. Ang pamangkot nga nagsugod sini tanan—ang nagpukaw sang pagbubo sang rebelasyon sa ulihing-adlaw—amo ang ginpamangkot sang isa ka 14-anyos nga solterito. Ang “pagbinaisay sang mga pulong kag kagamo bangod sang lain-lain nga mga opinyon” (Joseph Smith—Kasaysayan 1:10) nagbilin kay Joseph nga naligban parte sa relihiyon kag sa iya relasyon sa Dios. Siguro nakabatyag ka man sina. Makita naton ang madamo nga nagakontrahanay nga mga ideya kag nagapangkumbinsi nga mga tingug sa aton panahon. Kon gusto naton nga usisaon ining mga mensahe kag pangitaon ang kamatuoran, pwede naton himuon ang ginhimo ni Joseph. Mahimo kita magpamangkot, magtuon sang balaan nga mga kasulatan, magbinagbinag, kag sa ulihi magpamangkot sa Dios. Bilang sabat sa pangamuyo ni Joseph, isa ka haligi sang kasanag ang nagpanaog halin sa langit. Ang Dios nga Amay kag si Jesucristo nagpakita kag nagsabat sang iya mga pamangkot. Ang testimonya ni Joseph sinang milagroso nga eksperiyensya maisog nga nagadeklarar nga ang bisan sin-o “nga [nakulangan] sang kaalam sarang magpangayo sa Dios, kag makabaton” (Joseph Smith—Kasaysayan 1:26). Kita tanan pwede makabaton sang rebelasyon, kon indi paagi sa langitnon nga palanan-awon, paagi sa maathag nga pag-intiendi nga may bulig sang langitnon nga impluwensya.

Mga Ideya sa Pagtuon sa Puluy-an kag sa Simbahan

Joseph Smith—Kasaysayan 1:5–26

Si Joseph Smith amo ang Propeta sang Pagpanumbalik.

Ang katuyuan sang kasaysayan ni Joseph Smith amo nga ipahibalo sa aton “ang matuod-tuod nga natabo” tungod ang kamatuoran parte kay Joseph masami nga ginatiko (Joseph Smith—Kasaysayan 1:1). Samtang imo ginabasa ang Joseph Smith—Kasaysayan 1:1–26, ano ang nagapabakod sang imo testimonya parte sa iya diosnon nga buluhaton?

Joseph Smith—Kasaysayan 1:5–25

Paano ako makabaton sang mga sabat sa akon mga pangamuyo?

Nakaagi ka na bala nga “nakulangan sang kaalam” ukon naglibog ang ulo parte sa desisyon nga kinahanglan mo himuon? (Joseph Smith—Kasaysayan 1:13). Ang eksperiyensya ni Joseph Smith sang 1820 pwede magserbe nga maayo nga sulundan para sa imo personal nga rebelasyon. Halimbawa, samtang ginabasa mo ang Joseph Smith—Kasaysayan 1:5–25, pangitaa ang mga eksperiyensya nga daw pareho sang imo mga eksperiyensya. Ano ang imo natun-an parte sa:

• Kon paano naghanda si Joseph para sa sagrado nga eksperiyensya sa pangamuyo? (tan-awa sa mga bersikulo 8, 11, 14–15).

• Papel sang pagtuon sang balaan nga mga kasulatan sa pagpangayo sang rebelasyon? (tan-awa sa mga bersikulo 11–12).

• Anong himuon kon magaatubang ka sang oposisyon? (tan-awa sa mga bersikulo 15–16, 21–26).

• Pagbaton kag pag-akto sa mga sabat nga imo mabaton? (tan-awa sa mga bersikulo 18–25).

Manghagad sa pag-istorya. Ang pag-usisa sang balaan nga kasulatan nagaimbitar sang mga pagpabatyag halin sa Balaan nga Espiritu. Ang pag-istorya sining mga pamatyagan makaimbitar sa Balaan nga Espiritu nga magsaksi sa iban, amo man sa indibidwal nga nagaistorya.

Pwede ka man magpangita sang iban pa nga mga halimbawa sa balaan nga kasulatan sang mga tawo nga nagapakig-istorya sa Dios. Ang mga imahe sa Libro sang mga Larawan nga Pang-Ebanghelyo ukon iban pa nga Dali, Magsunod sa Akon nga mga libro makahatag sa imo sang mga ideya. Tilawi nga sabton ang mga pamangkot nga nalista kagina sa tagsa ka halimbawa nga imo makita. Ano ang imo mga eksperiyensya sa pagbaton sang mga sabat sa pangamuyo? Ano ang pwede mo himuon para buligan ang iban nga makabaton man sang maayo nga mga eksperiyensya?

Tan-awa man sa Russell M. Nelson, “Pamatii Sia,” Liahona, Mayo 2020, 88–92.

Joseph Smith—Kasaysayan 1:15–20

Nakita ni Joseph Smith ang Dios nga Amay kag ang Iya Anak nga si Jesucristo.

Nagsalig si Joseph Smith nga sabton sang Dios ang iya pangamuyo, pero wala gid sia nagpaabot kon paano bag-uhon sinang sabat ang iya kabuhi—kag ang kalibutan. Samtang imo ginabasa ang parte sa eksperiyensya ni Joseph, binagbinaga kon paano ginbag-o sang mga resulta sang Unang Panan-awon ang imo kabuhi.

Halimbawa, ginpahayag sang Unang Panan-awon ang pila ka kamatuoran parte sa Dios nga Amay kag sa Iya Anak nga si Jesucristo, nga lain sa ginapatihan sang madamo nga tawo sang panahon ni Joseph. Samtang ginabasa mo ang Joseph Smith—Kasaysayan 1:15–20, pamensara nga isulat sa lainlain nga pamaagi para kompletuhon ang isa ka pahayag pareho sini: “Tungod natabo ang Unang Panan-awon, nakahibalo ako nga …”

Ano ang imo mga nabatyagan samtang ginabinagbinag mo ang eksperiyensya ni Joseph kag ang tanan nga nagkalatabo tungod sini?

Tan-awa man sa “Ask of God: Joseph Smith’s First Vision [Magpamangkot sa Dios: Ang Unang Panan-awon ni Joseph Smith]” (video), Gospel Library.

Ask of God: Joseph Smith's First Vision

Short film produced for the Church History Museum depicting Joseph Smith's First Vision, including details drawn from each of Joseph Smith's accounts.

Detalye halin sa If Any of You Lack Wisdom [Kon May Yara sa Inyo nga Kulang sang Kaalam], ni Walter Rane

Joseph Smith—Kasaysayan 1:15–20

Ngaa may lain-lain nga mga panaysayon sang Unang Panan-awon?

Sa tion sang iya kabuhi, ginsulat ni Joseph Smith ang iya eksperiyensya sa Sagrado nga Kakahuyan sa indi magnubo apat ka beses, nga masami nagagamit sang manunulat. Dugang pa, pila ka panaysayon ang ginsulat sang iban nga mga tawo nga nakabati kay Joseph Smith nga nagaistorya sang iya panan-awon. Bisan pa nga ining mga panaysayon may kinalain sa pila ka detalye, depende sa nagsulat, tagpalamati, kag lugar, nagasantuanay ini. Kag ang tagsa ka panaysayon may dugang nga mga detalye nga makabulig sa aton nga mas maintiendihan ang eksperiyensya ni Joseph Smith, pareho nga ang apat ka Mga Ebanghelyo nagabulig sa aton nga mas maintiendihan ang pag-alagad sang Manluluwas.

Joseph Smith—Kasaysayan 1:21–26

Pwede ako magpabilin nga tampad sa akon nahibal-an, bisan pa nga sikwayon ako sang iban.

Pagkatapos sang iya dalayawon nga Unang Panan-awon, natural nga gusto ni Joseph Smith iistorya ang iya eksperiyensya sa iban. Nakibot sia sa oposisyon nga iya gin-atubang. Samtang ginabasa mo ang iya panaysayon, ano ang nagainspirar sa imo nga magpabilin nga tampad sa imo testimonya? Ano pa nga mga halimbawa—sa balaan nga mga kasulatan, sa himata, ukon mga tawo nga imo kilala—ang nagahatag sa imo sang kaisog nga magpabilin nga tampad sa espirituhanon nga mga eksperiyensya nga imo nabaton?

Para sa dugang nga mga ideya, tan-awa sa mga isyu sini nga bulan sang Liahona kag Para sa Kusog sang mga Lamharon nga mga magasin.

Mga Ideya para sa Pagtudlo sang mga Kabataan

Joseph Smith—Kasaysayan 1:3–14

Handa si Joseph Smith nga mangin propeta sang Dios.

• Ang pagtuon parte sa pagka-lamharon ni Joseph Smith makabulig sa imo kabataan nga mahangpan sia samtang nagatuon sila sa iya mga eksperiyensya. Basi pwede nila uyatan ang litrato ni Joseph Smith kag iistorya kon ano ang ila nahibal-an parte sa iya. Kon kinahanglan, pwede ka magdugang sang pila ka kamatuoran parte sa iya halin sa Joseph Smith—Kasaysayan 1:3–14. Ano ang naeksperiyensyahan ni Joseph nga nagbulig handa sa iya para mangin propeta? Ano ayhan ang ginahanda sang Dios nga aton himuon?

  Chapter 1: Joseph Smith and His Family: 1805–1820

Detalye halin sa Joseph Smith’s First Vision [Unang Panan-awon ni Joseph Smith], ni Greg Olsen

Joseph Smith—Kasaysayan 1:10–13

Pwede nga sabton sang Dios ang akon mga pamangkot paagi sa balaan nga mga kasulatan.

• Pamensara nga magpakita sa imo kabataan sang lainlain nga mga libro, pati ang balaan nga mga kasulatan. Buligi sila nga mamensar sang mga pamangkot nga masabat sining mga libro. Dayon basaha ninyo sing ululupod ang Joseph Smith—Kasaysayan 1:10–11 para mahibal-an kon ano ang mga pamangkot ni Joseph Smith kag ang mga sabat nga nakita niya sa balaan nga mga kasulatan.

• Basi makakita ang imo kabataan sang mga tinaga sa bersikulo 12 nga nagalaragway kon paano naapektohan si Joseph sang pagbasa sang Santiago 1:5. Dayon pwede ninyo iistorya ang inyo mga eksperiyensya sa isa kag isa kon ano nga dinalan sa balaan nga mga kasulatan ang may dako kaayo nga impluwensya sa inyo.

Joseph Smith—Kasaysayan 1:10–17

Ang Amay nga Langitnon nagapamati kag nagasabat sang akon mga pangamuyo.

• Para sugdan ang diskusyon parte sa kon paano kita nagapakig-angot sa Amay nga Langitnon, basi pwede ninyo sang imo kabataan pamangkuton ang kada isa gamit ang lainlain nga pamaagi sang komunikasyon, pareho sang text message, tawag, ukon sulat. Paano kita nagapamangkot sa Amay nga Langitnon? Paano naton ipakita sa Iya nga palangga kag ginatahod naton Sia sa aton mga pangamuyo? Basaha sing ululupod ang Joseph Smith—Kasaysayan 1:16–19 kag hambali kon paano ginsabat sang Amay nga Langitnon ang pangamuyo ni Joseph Smith. Dayon pwede ninyo istoryahan sang imo kabataan ang inyo mga eksperiyensya sang nangayo kamo sang bulig sa Dios kag nakabaton sang sabat.

Joseph Smith—Kasaysayan 1:17–19

Nakita ni Joseph Smith ang Amay nga Langitnon kag ang Iya Anak nga si Jesucristo.

• Basi manamian ang magagmay nga kabataan nga magtindog nga nagadupa nga daw mga kahoy sa Sagrado nga Kakahuyan samtang ginaistorya mo ang parte sa Unang Panan-awon. Hambala ang mga kabataan nga maghilay-hilay nga daw ginahuyop sang hangin samtang ginaistorya mo ang parte kay Joseph nga nagapangamuyo. Dayon hambala sila nga magtindog sing tadlong kag malinong kon iistorya mo na nga nagpakita ang Amay nga Langitnon kag si Jesus kay Joseph.

• Basi manamian ang medyo dalagko na nga kabataan sa paggamit sang isa ukon madamo pa nga litrato sa sining outline para isugid sa imo kon ano ang ila nahibal-an parte sa Unang Panan-awon. Paisoga sila nga basahon ang Joseph Smith—Kasaysayan 1:14–17 kag iistorya ang ila mga panghunahuna kag mga balatyagon parte sa eksperiyensya ni Joseph.

  Chapter 2: Joseph Smith’s First Vision: 1820

Para sa dugang nga mga ideya, tan-awa sa isyu sang Abyan nga magasin sini nga bulan.

Truth Restored [Ginpanumbalik nga Kamatuoran], ni Leon Parson