Enero 6– 12: “Dungga Ninyo, O Mga Katawhan”

Doktrina kag mga Kasugtanan 1

Sang Nobyembre 1831, ang ginpanumbalik nga Simbahan ni Jesucristo isa pa lang ka tuig kag tunga. Bisan pa nga nagadako, isa ini gihapon ka indi kaayo kilala nga grupo sang mga tumuluo nga nagaistar sa magagmay nga mga banwa, nga ginapangunahan sang propeta nga bientehon lang ang pangidaron. Pero ginkabig sang Dios ining mga tumuluo nga Iya mga alagad kag Iya mga mensahero, kag gusto Niya nga ang mga rebelasyon nga Iya ginhatag sa ila mapalapnag sa kalibutan.

Ang Doktrina kag mga Kasugtanan 1 amo ang pauna sang Ginuo, ukon introduksyon, sa sining mga rebelasyon. Maathag nga ginapakita sini nga bisan diutay pa lang ang mga miyembro sang Simbahan, wala sang indi importante sa mensahe nga gusto sang Dios nga ipakigbahin sang Iya mga Santos. Isa ini ka “tingug sang pagpaandam” sa tanan nga “mga pumuluyo sang duta,” nga nagatudlo sa ila nga maghinulsol kag tukuron ang “wala’y katubtuban nga kasugtanan” sang Dios (mga bersikulo 4, 8, 22). Ang mga alagad nga nagadala sining mensahe “mga mahuyang kag simple.” Pero ang mapainubuson nga mga alagad amo gid ang kinahanglan sang Dios—sadto kag sa karon—agud dalhon ang Iya Simbahan “halin sa kaguom kag halin sa kadulom” (mga bersikulo 23, 30).

Mga Ideya sa Pagtuon sa Puluy-an kag sa Simbahan

Doktrina kag mga Kasugtanan 1

“Dungga Ninyo, O mga katawhan.”

Ang pauna nagapakilala sang isa ka libro. Ginapresentar sini ang mga tema kag katuyuan sang libro kag ginabuligan sini ang mga manugbasa nga maghanda sa pagbasa. Samtang imo ginabasa ang seksyon 1—ang “introduksyon” sang Ginuo sa Doktrina kag mga Kasugtanan (bersikulo 6)—pangitaa ang mga tema kag mga katuyuan nga ginhatag sang Ginuo para sa Iya mga rebelasyon. Ano ang imo natun-an nga magabulig sa imo sa imo pagtuon sang Doktrina kag mga Kasugtanan sini nga tuig? Halimbawa, pwede mo binagbinagon kon ano ang buot silingon sang “magpamati sa tingug sang Ginuo” sa sining mga rebelasyon (bersikulo 14) ukon sang “usisaa ining mga kasugoan” (bersikulo 37).

Tan-awa man sa introduksyon sa Doktrina kag mga Kasugtanan.

Doktrina kag mga Kasugtanan 1:4–6, 23–24, 37–39

Ang Ginuo nagahambal paagi sa Iya mga alagad, pati na sa mga propeta sa ulihing mga adlaw.

Ang seksyon 1 nagasugod kag nagatapos upod ang deklarasyon sang Dios nga nagahambal Sia paagi sa Iya pinili nga mga alagad (tan-awa sa mga bersikulo 4–6, 23–24, 38). Isulat ang imo natun-an sa sining rebelasyon parte sa:

• Ginuo kag sa Iya tingug.

• Ngaa kinahanglan naton sang mga propeta sa aton panahon.

Ano ang ginapabatyag sa imo nga imo himuon bilang resulta sang imo natun-an?

Sang san-o mo nabatian ang tingug sang Ginuo paagi sa tingug sang Iya mga alagad? (tan-awa sa bersikulo 38).

Pwede mo man pamensaron nga kuno abi ang imo abyan nga wala makahibalo parte sa buhi nga mga propeta nagabasa sang seksyon 1 upod sa imo. Ano ayhan ang ipamangkot sang imo abyan? Ano nga mga bersikulo ang gusto mo hambalan upod sa imo abyan para buligan sia nga maintiendihan kon ano ang imo nabatyagan parte sa mga propeta sa aton panahon?

Basi interesado ka nga mahibal-an nga sang nagtipon ang konseho sang mga elder sang 1831 para hambalan ang pag-imprinta sang mga rebelasyon kay Joseph Smith, ang iban nga tawo indi gusto. Nahuya sila sa kahuyang ni Joseph sa pagsulat, kag nabalaka sila nga ang pag-imprinta sang mga rebelasyon magaresulta sa mas madamo pa gid nga problema para sa mga Santos (tan-awa sa Saints, 1:140–43). Kon miyembro ka sadto sining konseho, paano mo atubangon ini nga mga problema? Ano nga mga ideya ang makita mo sa seksyon 1 nga makabulig kuntani? (tan-awa halimbawa, sa mga bersikulo 6, 24, 38).

Ang Ginuo nagahambal sa aton paagi sa Iya mga alagad, ang mga propeta.

Doktrina kag mga Kasugtanan 1:12–30, 34–36

Ang Pagpanumbalik nagabulig sa akon nga atubangon ang mga kabudlayan sa ulihing mga adlaw.

Sa Doktrina kag mga Kasugtanan seksyon 1, ginapaathag sang Ginuo kon ngaa ginpanumbalik Niya ang Iya ebanghelyo. Tan-awa kon pila ka mga rason ang imo malista samtang ginabasa mo ang mga bersikulo 12–23. Sa imo eksperiyensya, paano nagakatuman ang mga katuyuan sang Ginuo para sa Pagpanumbalik?

Nakahibalo ang Ginuo nga ang aton panahon may seryoso nga mga kabudlayan (tan-awa sa bersikulo 17). Ano ang imo nakita sa mga bersikulo 17–30, 34–36 nga nagabulig sa imo nga makabatyag sang kalinong kag pagsalig wala sapayan sining mga kabudlayan?

Tan-awa man sa Russell M. Nelson, “Atubanga ang Palaabuton nga may Pagtuo,” Liahona, Nob. 2020, 73–76.

Doktrina kag mga Kasugtanan 1:19–28

Ginagamit sang Ginuo “ang mga mahuyang kag ang mga simple” para tumanon ang Iya buluhaton.

Samtang imo ginabasa ang Doktrina kag mga Kasugtanan 1:19–28, pwede mo binagbinagon kon ano ang buot silingon sang mangin alagad sang Ginuo. Ano nga mga kinaiya ang gusto sang Ginuo nga ara sa Iya mga alagad? Ano ang ginatuman sang Ginuo paagi sa Iya mga alagad? Paano nagakatuman ang mga propesiya sa sining mga bersikulo sa bilog nga kalibutan kag sa imo kabuhi?

Pangitaa si Jesucristo. Ang katuyuan sang balaan nga mga kasulatan amo ang magpamatuod sa Manluluwas kag sa Iya ebanghelyo. Samtang imo ginabasa ang Doktrina kag mga Kasugtanan 1, pamensara ang pagmarka ukon pagtanda sang mga bersikulo nga nagatudlo sa imo sang isa ka butang parte kay Jesucristo.

Para sa dugang nga mga ideya, tan-awa sa mga isyu sang mga magasin nga Liahona kag Para sa Kusog sang mga Lamharon sini nga bulan.

Mga Ideya para sa Pagtudlo sang mga Kabataan

Doktrina kag mga Kasugtanan 1:4, 37–39

Paagi sa Iya mga propeta, ginapaandaman ako sang Ginuo batok sa espirituhanon nga katalagman.

• Para sugdan ang paghinambalanay parte sa mga paandam halin sa Ginuo, pwede ninyo hambalan ang mga paandam nga aton mabaton halin sa iban parte sa mga peligro nga indi naton makita. Pila ka halimbawa sini amo ang madanlog nga salog, manug-abot nga bagyo, ukon nagapalapit nga salakyan. Basi pwede kamo sang imo kabataan magtan-aw sa mga halimbawa sang abiso kag ikumparar ining mga abiso sa mga paandam nga ginahatag sang Ginuo sa aton. Suno sa Doktrina kag mga Kasugtanan 1:4, 37–39, paano kita ginapaandaman sang Ginuo? Ano ang ginpaandam Niya sa aton sining karon lang? Basi pwede kamo magtan-aw ukon magbasa sang mga bahin sang mga mensahe sang nagligad nga pangkabilogan nga komperensya kag pangitaon ang mga halimbawa sang “tingug sang pagpaandam” sang Dios.

• Magkanta sing ululupod sang kanta parte sa mga propeta. Ipaambit ang imo testimonya nga ang propeta nagahambal sang pulong sang Dios.

Doktrina kag mga Kasugtanan 1:17

Ang Pagpanumbalik nagabulig sa akon nga atubangon ang mga kabudlayan sa ulihing mga adlaw.

• Para papagsikon ang paghinambalanay parte sa Doktrina kag mga Kasugtanan 1:17, pwede ninyo hunahunaon sang imo kabataan nga kuno abi nagahanda kamo nga magbiyahe. Ano ang inyo dalhon? Kon kahibalo na kamo antes pa lang nga maulan ukon ang inyo salakyan ukon bus makuposan sang goma, paano sini maapektuhan ang inyo paghanda para sa biyahe? Basaha sing ululupod ang bersikulo 17, kag hambali kon ano ang nahibal-an sang Ginuo nga matabo sa aton. Paano Niya ini ginhandaan? (Kon kinahanglan, ipaathag nga ang “kalamidad” isa ka kapahamakan ukon kahaladlukan nga butang.) Paano kita ginabuligan sang mga kasuguan sang Dios nga atubangon ang mga kabudlayan sang aton panahon?

Doktrina kag mga Kasugtanan 1:17, 29

Gintawag sang Ginuo si Joseph Smith nga mangin propeta.

• Para tun-an ang papel ni Joseph Smith sa pagpanumbalik sang ebanghelyo sang Manluluwas, pwede kamo magtan-aw upod sang imo kabataan sang litrato sang Manluluwas kag sang litrato ni Joseph Smith (tan-awa ang mga litrato sa sining outline) kag hambali kon ano ang ginhatag sa aton sang Manluluwas paagi kay Joseph Smith. Pwede magpangita ang imo kabataan sang mga halimbawa sa Doktrina kag mga Kasugtanan 1:17, 29. Iistorya sa imo kabataan kon paano mo nahibal-an nga ang Dios “nagtawag sa akon alagad nga si Joseph Smith Jr., kag naghambal sa iya halin sa langit” (bersikulo 17).

© 1998 David Lindsley

Doktrina kag mga Kasugtanan 1:30

Ang Simbahan ni Jesucristo sang mga Santos sa Ulihing mga Adlaw amo ang “matuod kag buhi nga simbahan” sang Ginuo

• Ano ang buot silingon sang ang Simbahan “matuod kag buhi”? Para buligan ang imo kabataan nga mamensar parte sa sining pamangkot, basi pwede mo sila pakitaan sang buhi kag indi buhi nga mga bagay—pareho sang buhi nga tanom kag patay nga tanom. Paano naton mahibal-an nga buhi ang isa ka bagay? Dayon pwede ninyo basahon ang Doktrina kag mga Kasugtanan 1:30 kag hambalan kon ano ayhan ang kahulugan sang Simbahan nga “matuod kag buhi”.

Para sa dugang nga mga ideya, tan-awa sa isyu sang Abyan nga magasin sini nga bulan.

Beside Still Waters [Sa Tupad sang Malinong nga mga Tubig], ni Simon Dewey