Detalye halin sa He Called Me by Name [Gintawag Niya Ako sa Akon Ngalan], ni Michael Malm

Enero 20–26: “Ang mga Tagipusuon sang mga Anak Magaliso sa Ila mga Amay”

Doktrina kag mga Kasugtanan 2; Joseph Smith—Kasaysayan 1:27–65

Tatlo na ka tuig ang nagligad sang nagpakita ang Dios nga Amay kag ang Iya Anak nga si Jesucristo kay Joseph Smith sa kakahuyan, kag wala na makabaton si Joseph sang dugang nga mga rebelasyon pagkatapos sadto. Nagsugod sia nga magpanumdom kon bala naakig ang Ginuo sa iya. Pareho sa aton tanan, may nahimo man sia nga mga kasaypanan, kag pamatyag niya ginkondenar sia tungod sini. Apang may buluhaton pa ang Dios nga ipahimo sa iya. Kag ang buluhaton nga gintawag si Joseph nga iya himuon konektado sa kon ano ang ginapangayo sa aton sang Dios. Ipagwa ni Joseph ang Libro ni Mormon; ginaagda kita nga ipakigbahin ang mensahe sini. Pagabatunon ni Joseph ang mga yabi sang priesthood para lisuon ang mga tagipusuon sang mga anak sa ila mga amay; mabaton na naton karon ang mga ordinansa para sa aton mga katigulangan sa templo. Ginsugiran si Joseph sang mga propesiya nga matuman sa palaabuton; gintawag kita para magbulig nga matuman ining mga propesiya. Kon makigbahin kita sa buluhaton sang Dios, makapaabot kita nga magpangatubang sang oposisyon kag bisan gani sang pagpamigos, pareho sa Propeta. Pero sarang man kita nga mag-angkon sang pagtuo nga himuon kita sang Ginuo nga mga instrumento sa Iya mga kamot, pareho sang Iya ginhimo para kay Joseph.

Mga Ideya sa Pagtuon sa Puluy-an kag sa Simbahan

Joseph Smith—Kasaysayan 1:27–33

Ang Dios may buluhaton nga ipahimo sa akon.

Isa ka butang ang magpati nga may ipaobra ang Dios kay Joseph Smith—pwede naton tan-awon ang iya kabuhi kag makita sing maathag kon ano ang iya nahimo. Pero napensar mo man bala nga may ipaobra man ang Dios sa imo? Samtang ginabasa mo ang Joseph Smith—Kasaysayan 1:27–33, hunahunaa kon ano ayhan ina nga ulobrahon. Paano ini makabulig sa nagapadayon nga Pagpanumbalik sang ebanghelyo sang Manluluwas?

Gintudlo ni Elder Gary E. Stevenson: “Kon magpalapit kita kay Cristo kag buligan ang iban nga himuon man ini, nagapakigbahin kita sa buluhaton sang Dios para sa kaluwasan kag pangkahitaasan, nga nagatutok sa mga responsibilidad nga hinatag sang Dios. … Ini nga mga responsibilidad simple, makainspirar, makapapagsik, kag masarangan himuon. Ang mga ini amo ang:

• Pagpangabuhi sang ebanghelyo ni Jesucristo

• Pag-atipan sinang mga nagakinahanglan

• Pag-agda sa tanan nga batonon ang ebanghelyo

• Pag-hiusa sang mga pamilya sa wala katapusan” (“Simple ang Pagkatahum—Matahum ang Pagkasimple,” Liahona, Nob. 2021, 47).

Binagbinaga ang imo mga eksperiyensya samtang nagapartisipar ka sa tagsa sining hinatag sang Dios nga mga responsibilidad. Ano dayon ang gusto sang Manluluwas nga imo himuon?

Mahimo nga kon kaisa pamatyag mo indi ka magamit sang Ginuo tungod sa mga sayop nga imo nahimo. Ano ang imo natun-an sa eksperiyensya ni Joseph Smith sa Joseph Smith—Kasaysayan 1:28–29? Paano mo mahibal-an ang imo “kahimtangan sa atubang sang [Dios]”?

Magpamangkot sang mga pamangkotanon nga nagatulod sang makahulugan nga diskusyon. Ang mga pamangkot nga may masobra sa isa ka husto nga sabat nagahagad sa mga nagatuon nga magsabat base sa ila personal nga mga panghunahuna, balatyagon, kag mga eksperiyensya. Ang mga pamangkot sa sining outline mga halimbawa sini.

Tan-awa man sa “Youth Responsibility in the Work of Salvation” (video), ChurchofJesusChrist.org; “The Work of Salvation and Exaltation,” Libro sang Pangkabilogan nga Pagsulundan, 1.2.

Youth Responsibility in the Work of Salvation

Elder Bednar wants the youth to recognize that recent adjustments to Young Women classes and Aaronic Priesthood quorums give them operational and executional responsibility in the work of salvation. When the youth are focused, miracles will come.

Joseph Smith—Kasaysayan 1:34–47

Sa pagpanumbalik sang Iya ebanghelyo, gintuman sang Manluluwas ang dumaan nga mga propesiya.

Sang magpakita si Moroni kay Joseph Smith, ginsambit niya ang pila ka mga propesiya sa Daan kag Bag-ong Katipan, pareho sang Isaias 11; Mga Binuhatan 3:22–23; kag Joel 2:28–32. Samtang ginabasa mo ang Joseph Smith—Kasaysayan 1:34–47, hunahunaa kon ngaa importante nga mahibal-an ni Joseph ini nga mga propesiya. Ngaa importante nga mahibal-an mo ini?

Pwede mo man basahon ang gintudlo ni Elder David A. Bednar parte sa una nga pagbisita ni Joseph Smith sa “Kaupod ang Gahum sang Dios sa Dako nga Himaya” (Liahona, Nob. 2021, 28).

Kaupod ang Gahum sang Dios sa Dako nga Himaya

Si Elder Bednar nagatudlo nga ang pagtahod sa aton mga kasugtanan nagabulig sa aton nga mabaton ang gahum sang pagkadiosnon sa aton mga kabuhi.

Joseph Smith—Kasaysayan 1:48–60

Ihanda ako sang Dios sa pagtrabaho sa Iya ginharian.

Si Joseph 17 anyos lamang sang primero niya makita ang mga lamina nga bulawan. Ugaling, wala pa ini gintugyan sa iya pag-atipan, hasta magligad ang apat ka tuig. Basaha ang Joseph Smith—Kasaysayan 1:48–60, nga ginapangita kon ano ang natabo sa kabuhi ni Joseph sina nga panahon. Sa banta mo paano sia ginhanda sining mga hitabo para sa buluhaton nga ginapaobra sang Dios sa iya? Ano nga mga eksperiyensya ang imo naangkon nga naghanda sa imo nga magserbisyo sa Dios kag sa iban? Ano ang ginaagyan mo karon nga makabulig sa imo samtang nagahanda ka para sa pagserbisyo sa palaabuton?

Hill Cumorah [Bungyod sang Cumora], ni Al Rounds

Doktrina kag mga Kasugtanan 2

Ginpadala sang Ginuo si Elias agud lisuon ang akon tagipusuon sa akon mga katigulangan.

Ano ang ginatudlo sa imo sang mga tinaga pareho sang “itanom,” “mga tagipusuon,” kag “lisuon” sa sini nga seksyon parte sa misyon ni Elias kag sang mga bugay sang mga yabi sang priesthood nga iya ginpanumbalik? Paano mo nabatyagan nga nagliso ang imo tagipusuon sa imo mga katigulangan? Magpamensar sang mga paagi nga maeksperiyensyahan mo ang amo nga mga balatyagon sing mas pirme. Ang pagpangita sang imo mga katigulangan kag paghikot sang mga ordinansa para sa ila sa templo isa ka paagi (tan-awa sa FamilySearch.org). Ano pa ang imo napensaran?

Tan-awa man sa Doktrina kag mga Kasugtanan 110:13–16.

Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.

Mga Ideya para sa Pagtudlo sang mga Kabataan

Joseph Smith—Kasaysayan 1:28–29

Pwede ako maghinulsol kag mapatawad.

• Tanan kita kon kaisa makabatyag sang “kabasulanan sa [aton] mga kahuyang kag mga kakulangan,” pareho sa nabatyagan ni Joseph Smith. Pwede ninyo sang imo kabataan tun-an sing ululupod ang Joseph Smith—Kasaysayan 1:29 nga ginapangita kon ano ang ginhimo ni Joseph sang nabatyagan niya ina. Ano ang aton matun-an sa iya ehemplo nga makabulig sa aton kon makahimo kita sang mga sayop? Ngaa importante nga mahibal-an nga si Joseph gintawag sang Dios bisan pa nga indi sia perpekto?

Joseph Smith—Kasaysayan 1:27–54

Gintawag sang Amay nga Langitnon si Joseph Smith para buligan Sia nga himuon ang Iya buluhaton.

• Basi masadyahan ang imo kabataan mag-akto nga kuno-abi si Joseph Smith samtang ginaistorya mo ang mga pagbisita ni Moroni sa Joseph Smith—Kasaysayan 1:27–54. Halimbawa, pwede sila magkursimano nga daw nagapangamuyo ukon kuno-abi nagasaka sa Bungyod sang Cumora, kag iban pa. Dayon pwede mo sila pangabayon nga mag-istorya parte sa kon ano ang ginhambal sang Dios nga himuon ni Joseph Smith kag kon paano kita ginabugayan tungod sini. Halimbawa, paano kita ginbugayan tungod gin-translate ni Joseph Smith ang Libro ni Mormon? Paano kita ginbuligan sang iya buluhaton nga mangin mas malapit sa Amay nga Langitnon kag kay Jesucristo?

Doktrina kag mga Kasugtanan 2

Gusto sang Amay nga Langitnon nga maselyohan sa templo ang mga pamilya.

• Basi masadyahan kamo sang inyo kabataan nga magtan-aw sang mga litrato sang inyo pamilya, kon posible pati ang litrato sang inyo pamilya sa templo (ukon tan-awa sa Libro sang mga Larawan nga Pang-Ebanghelyo, no. 120). Dayon pwede ninyo basahon ang Doktrina kag mga Kasugtanan 2 kag iistorya sa isa kag isa ang inyo panghunahuna kon ngaa may mga templo kita kag kon ngaa gusto sang Amay nga Langitnon nga maselyohan ang mga pamilya.

Templo sang Palmyra New York

Doktrina kag mga Kasugtanan 2

Ang pagtuon parte sa akon mga katigulangan makahatag sa akon sang kalipay.

• Ang mga kabataan pwede nga masadyahan kag makabatyag sang kalipay sa paghimo sang family history. Para buligan sila, pwede mo ipakigbahin ang pila ka mga istorya ukon litrato sang imo mga katigulangan. Hambali upod sa imo kabataan kon daw ano ang pangabuhi sang ila mga katigulangan sang mga bata pa sila. Basi masadyahan man ang imo kabataan sa pila ka aktibidades sa family history nga makita sa FamilySearch.org/discovery.

Para sa dugang nga mga ideya, tan-awa sa isyu sang Abyan nga magasin sini nga bulan.

Joseph Receives the Plates [Si Joseph nga Nagabaton sang mga Lamina], ni Gary E. Smith