Enero 27–Pebrero 2: “Ang Akon Buluhaton Magapadayon”

Doktrina kag mga Kasugtanan 3–5

Sa primero niya nga mga tinuig bilang propeta sang Ginuo, wala pa mahibal-i ni Joseph Smith ang tanan parte sa “dalayawon nga buluhaton” nga dapat niya himuon. Pero isa ka bagay nga natun-an niya sa iya una nga mga eksperiyensya amo nga para mahimo niya ang buluhaton sang Dios, ang iya panulok kinahanglan gid nga “tampad sa himaya sang Dios” (Doktrina kag mga Kasugtanan 4:1, 5). Halimbawa, kon ginlaygayan sia sang Ginuo nga himuon ang isa ka butang nga indi sia sigurado nga gusto niya himuon, kinahanglan niya nga sundon ang laygay sang Ginuo. Kag bisan pa nga may “madamo [sia] nga mga rebelasyon, kag … gahum sa paghimo sang madamo nga gamhanan nga mga buhat,” kon pamatyag niya mas importante ang iya kaugalingon nga pagbuot sangsa pagbuot sang Dios, sia “kinahanglan nga malaglag” (Doktrina kag mga Kasugtanan 3:4). Pero may lain pa gid nga natun-an si Joseph nga pareho lang kaimportante parte sa paghimo sang buluhaton sang Dios: “ang Dios maluluy-on,” kag kon sinsero si Joseph nga maghinulsol, sia “ginpili sa gihapon” (bersikulo 10). Ang buluhaton sang Dios, kon panumdumon, buluhaton sang pagtubos. Kag ang inang buluhaton “indi sarang mapaslawan” (bersikulo 1).

Mga Ideya sa Pagtuon sa Puluy-an kag sa Simbahan

Doktrina kag mga Kasugtanan 3:1–16

Makasalig ako sa Dios.

Sa panugod sang pag-alagad ni Joseph Smith, mabudlay mangita sang maayo nga mga abyan—labi na sang mga abyan nga pareho kay Martin Harris, isa ka respetado, manggaranon nga tawo, nga madamo sang ginsakripisyo para suportahan ang buluhaton ni Joseph. Gani sang maglisensya si Martin nga ipakita ang una nga 116 ka pahina sang manuskrito sang Libro ni Mormon sa iya asawa, natural nga gusto ni Joseph tamdon ang iya pangabay, bisan pa nga nagpaandam ang Ginuo batok diri. Sa masubo nga palad, ang mga pahina nadula samtang ara sa poder ni Martin, kag sanday Joseph kag Martin ginpinahan sang Ginuo.

Samtang imo ginabasa ang Doktrina kag mga Kasugtanan 3:1–15, binagbinaga kon ano ang gusto sang Ginuo nga imo matun-an sa ila eksperiyensya. Halimbawa, ano ang imo natun-an parte sa:

• Buluhaton sang Dios? (tan-awa sa mga bersikulo 1–3, 16).

• Mga konsikwensya kon mas kahadlokan ang tawo sangsa magsalig sa Dios? (tan-awa sa mga bersikulo 4–8).

• Mga bugay tungod nagapadayon ka nga tampad? (tan-awa sa bersikulo 8).

• Pamaagi nga gintadlong kag ginpaisog sang Ginuo si Joseph? (tan-awa sa mga bersikulo 9–16).

Sa iya mensahe nga “Sa Diin Kamo Nagatumod?,” nagahatag si Elder Lynn G. Robbins sang madamo nga halimbawa sang mga tawo nga nahadlok sa Dios kag mga tawo nga nagpadala sa hambal sang iban (Liahona, Nob. 2014, 9–11). Pamensara nga basahon ining mga halimbawa sa balaan nga mga kasulatan nga iya ginsambit. Ano ang imo natun-an sa sining mga panaysayon? Ano ang imo mga naeksperiyensya sang nagsalig ka sa Ginuo sa tion nga daw nagakapuwersa ka nga himuon ang lain? Ano ang nangin resulta sang imo mga aksyon?

Tan-awa man sa Dale G. Renlund, “Sadsaran sang Personal nga Rebelasyon,” Liahona, Nob. 2022, 16–19.

Doktrina kag mga Kasugtanan 4

Pwede ko alagaran ang Dios sa bug-os ko nga tagipusuon, ikasarang, panghunahuna, kag kusog.

Ang seksyon 4 masami nga ginagamit para sa full-time nga mga misyonero. Ugaling, manami nga tandaan nga ining rebelasyon ginhatag kay Joseph Smith Sr., nga wala gintawag sa misyon pero sa gihapon may “handum sa pag-alagad sa Dios” (bersikulo 3).

Isa ka paagi para basahon ang ini nga seksyon amo nga hunahunaon ini bilang tulumanon sang tawo nga gusto magbulig sa buluhaton sang Ginuo. Ano ang ginapangita sang Ginuo? Ano ang mga benepisyo nga Iya ginatanyag?

Ano ang imo matun-an parte sa pagserbisyo sa Ginuo sa sining rebelasyon?

Gintawag ni Pangulong Russell M. Nelson ang pagtipon sang Israel bilang “ang pinakadako nga hangkat, ang pinakadako nga kawsa, kag ang pinakadako nga buluhaton sa duta” (“Hope of Israel” [bug-os-kalibutan nga debosyonal sang mga lamharon, Hunyo 3, 2018], Librarya sang Ebanghelyo). Ano ang imo nakita sa iya mensahe nga nagainspirar sa imo nga magpartisipar sa sining buluhaton?

Ang tanan nga may handum sa pagserbisyo sa Dios ginatawag sa buluhaton.

Doktrina kag mga Kasugtanan 5

Paagi sa Balaan nga Espiritu, pwede ako makabaton sang saksi parte sa Libro ni Mormon.

Sang Marso 1829, ang asawa ni Martin Harris nga si Lucy, nagpasaka sang reklamo sa korte nga kuno si Joseph Smith nagapanginto sang mga tawo paagi sa pagpakuno-kuno nga naglubad sang bulawan nga mga lamina. Gani nangayo si Martin kay Joseph sang dugang nga ebidensya nga matuod ang bulawan nga mga lamina. Ang Doktrina kag mga Kasugtanan 5 isa ka rebelasyon nga sabat sa pangabay ni Martin. Ano ang imo matun-an sa sining seksyon parte sa masunod:

• Ano ang ginsiling sang Ginuo nga matabo kon ang bulawan nga lamina ipakita sa bilog nga kalibutan (tan-awa sa Doktrina kag mga Kasugtanan 5:7). Ngaa sa banta mo matabo ina?

• Ang papel sang mga saksi sa buluhaton sang Ginuo (tan-awa sa mga bersikulo 11–15; tan-awa man sa 2 Mga Taga-Corinto 13:1).

• Paano makaangkon sang testimonya parte sa Libro ni Mormon sa imo kaugalingon (tan-awa sa mga bersikulo 16, 24; tan-awa man sa Moroni 10:3–5).

Doktrina kag mga Kasugtanan 5:1–10

Ginhatag ni Jesucristo ang Iya pulong sa aton paagi kay Joseph Smith.

Ano ang ginatudlo sa imo sang Doktrina kag mga Kasugtanan 5:1–10 parte sa papel ni Joseph Smith sa aton panahon—kag sa imo kabuhi? (Tan-awa man sa 2 Nefi 3:6–24.)

Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.

Mga Ideya para sa Pagtudlo sang mga Kabataan

Doktrina kag mga Kasugtanan 3:5–10; 5:21–22

Pwede ko pilion ang husto bisan ginatinguhaan sang iban nga pahimuon ako sang sayop.

• Para sugdan ang paghinambalanay parte sa pagtuon nga magsalig sa Amay nga Langitnon, pwede mo rebyuhon ang istorya sang nadula nga mga pahina sang manuskrito. Dayon pwede ninyo idrama-drama sang imo kabataan ang mga sitwasyon nga pwede sila matentar nga himuon ang nahibal-an nila nga indi husto. Ano nga mga tinaga ukon dinalan sa Doktrina kag mga Kasugtanan 3:5–8; 5:21–22 ang makabulig sa ila sa sining mga sitwasyon?

  Chapter 4: Martin Harris and the Lost Pages: 1827–1828

Doktrina kag mga Kasugtanan 4

Ang Manluluwas nagaimbitar sa akon nga magbulig sa Iya buluhaton.

• Ang kada bersikulo sa Doktrina kag mga Kasugtanan 4 may malahalon nga mga kamatuoran nga makabulig sa imo kabataan nga magtuon parte sa pagserbisyo sa Dios. Ari ang pila ka mga ideya para buligan sila nga madiskubrehan ining mga kamatuoran:

  • Pwede ninyo basahon sing ululupod ang Doktrina kag mga Kasugtanan 4:1 kag magpakita sang mga litrato nga nagalarawan sang “dalayawon” nga buluhaton sang Dios sa ulihing mga adlaw (pareho sang mga misyonero, mga templo, kag Libro ni Mormon).

  • Pwede manumdom ukon magdrowing ang imo kabataan sang mga litrato nga nagalarawan sang dinalan nga “nagaalagad sa iya sa bug-os ninyo nga tagipusuon, ikasarang, kaisipan, kag kusog” (Doktrina kag mga Kasugtanan 4:2).

  • Pwede kamo magtan-aw sang mga ginagamit sa pag-obra sa uma. Paano kita ginabuligan sining mga galamiton? Dayon pwede nga pangitaon sang imo kabataan ang mga butang sa Doktrina kag mga Kasugtanan 4:5–6 nga daw pareho sang mga galamiton sa paghimo sang buluhaton sang Dios.

  • Pwede nga basahon sang mas dalagko na nga kabataan ang Doktrina kag mga Kasugtanan 4 nga sila lang kag ilista ang ila matun-an kon ano ang buot silingon sang magserbisyo sa Dios.

  • Pwede kamo magkanta sang isa ka kanta parte sa pang-misyonaryo nga buluhaton.

Pwede ako magbulig sa buluhaton sang Dios paagi sa pagserbisyo sa iban.

Ibagay ang mga aktibidades para makaentra ang mga tawo nga may mga kasablagan. Ang ginagmay nga pagliwat sang aktibidades makasiguro nga ang tanan may oportunidad sa pagtuon. Halimbawa, kon ang isa ka aktibidades nagapanugyan nga magpakita sang litrato, pwede kamo magkanta sa baylo sini para makaentra ang mga tawo nga may sablag sa panulukan.

Doktrina kag mga Kasugtanan 5:1–7, 11, 16, 23–24

Pwede ako mangin saksi nga ang Libro ni Mormon matuod.

• Para tudloan ang imo kabataan parte sa mga saksi, pwede mo sila pahunahunaon nga may abyan sila nga nagsiling sa ila nga nakakita sila sang kuring nga nagalakat sa duha ka tiil. Mapati ayhan sila sini? Paano kon isa pa gid ka abyan ang naghambal sang pareho man sini? Hambali kon ano ang “saksi” kag ngaa importante ang mga saksi. Dayon pwede mo buligan ang imo kabataan nga basahon ang Doktrina kag mga Kasugtanan 5:1–3, 7, 11 para pangitaon ang mga sabat sa mga pamangkot pareho sini:

  • Ano ang gusto mahibal-an ni Martin Harris?

  • Kay sin-o pwede ipakita ni Joseph Smith ang bulawan nga mga lamina?

  • Ngaa posible nga bisan makita ang mga lamina ang isa ka tawo indi gihapon makumbinsi nga ang Libro ni Mormon matuod?

  • Ano ang pwede naton himuon para mangin mga saksi sa Libro ni Mormon? (tan-awa sa Doktrina kag mga Kasugtanan 5:16; Moroni 10:3–5).

Para sa dugang nga mga ideya, tan-awa sa isyu sang Abyan nga magasin sini nga bulan.

Devastating Weight of 116 Pages [Makahalapay nga Kabug-at sang 116 ka mga Pahina], ni Kwani Povi Winder