Suba sang Susquehanna malapit sa Harmony, Pennsylvania

Pebrero 17– 23: “Sa Inyo Kapareho Ko nga mga Alagad”

Doktrina kag mga Kasugtanan 12–17; Joseph Smith—Kasaysayan 1:66–75

Siguro kalabanan sa mga tawo sa kalibutan wala makahibalo parte sa Harmony, Pennsylvania. Ang Ginuo masami nagapili sang simple nga mga lugar para sa pinakaimportante nga mga hitabo sa Iya ginharian. Sa masiot nga lugar malapit sa Harmony sang Mayo 15, 1829, si Juan Bautista nagpakita kay Joseph Smith kag Oliver Cowdery. Gintungtong niya ang iya mga kamot sa ila mga ulo kag ginhatag ang Aaronic Priesthood sa ila, nga ginatawag sila nga “kapareho ko nga mga alagad” (Doktrina kag mga Kasugtanan 13:1).

Si Juan Bautista amo ang sinaligan nga alagad sang Dios nga nagbunyag sang Manluluwas kag naghanda sang dalan para sa Iya pag-abot (tan-awa sa Mateo 3:1–6, 13–17). Para sa sining duha ka lamharon nga mga lalaki nga ara sa pangidaron nga beintihon, siguro makapaubos, ukon basi makapalipay gid, nga tawgon nga kapareho nga alagad ni Juan. Sadto nga tion, sanday Joseph kag Oliver halos wala makilal-i, nga pareho man sang Harmony. Pero ang pag-alagad sa buluhaton sang Dios pirme gid parte sa kon paano kita nagaserbisyo, indi sa kon sin-o ang nakatalupangod. Bisan gamay ukon indi makita ang imo kontribusyon kon kaisa, isa ka man ka kapareho nga alagad sa “dako kag dalayawon nga buluhaton” sang Ginuo (Doktrina kag mga Kasugtanan 14:1).

Mga Ideya sa Pagtuon sa Puluy-an kag sa Simbahan

Doktrina kag mga Kasugtanan 12; 14

Pwede ako magpartisipar sa “dako kag dalayawon nga buluhaton” sang Dios.

Gusto ni Joseph Knight kag David Whitmer mahibal-an kon sa ano sila makabulig sa buluhaton sang Ginuo. Samtang ginabasa mo ang sabat sang Ginuo sa ila sa (Doktrina kag mga Kasugtanan 12; 14), hunahunaa kon ano ang buot silingon sa imo sang “ipahanabo kag sigurohon ang kaayohan sang Sion” (12:6; tan-awa man sa 14:6). Ano nga mga prinsipyo kag Cristohanon nga mga kinaiya ang imo makita sa sining mga seksyon nga makabulig sa imo nga himuon ini?

Doktrina kag mga Kasugtanan 13

Ginpadala ni Jesucristo si Juan Bautista para ipanumbalik ang Aaronic Priesthood.

Gintawag ni Juan Bautista sanday Joseph Smith kag Oliver Cowdery nga iya “kapareho nga mga alagad.” Ano sa banta mo ang buot silingon sang mangin kapareho nga alagad ni Juan Bautista? (tan-awa sa Mateo 3:13–17; Lucas 1:13–17; 3:2–20).

Samtang ginabasa mo ang ginahambal ni Juan Bautista parte sa Aaronic Priesthood sa seksyon 13, binagbinaga kon paano makabulig ang mga yabi sining priesthood nga matuman ang misyon ni Juan nga ihanda ang alagyan sang Ginuo. Halimbawa:

• Ano ang “pag-alagad sang mga anghel”? (tan-awa sa 2 Nefi 32:2–3; Moroni 7:29–32; Giya sa Balaan nga mga Kasulatan, “Mga anghel,” Librarya sang Ebanghelyo).

• Ano ang “ebanghelyo sang paghinulsol”? (tan-awa sa Doktrina kag mga Kasugtanan 84:26–27.

Paano makabulig ang mga ordinansa sang Aaronic Priesthood (pareho sang bunyag kag sakramento) sa paghanda sang alagyan para mabaton mo ang Manluluwas sa imo kabuhi?

Ano ang mga yabi sang priesthood?

Si Elder Dale G. Renlund kag ang iya asawa nga si Ruth, nagtanyag sining paathag parte sa mga yabi sang priesthood:

“Ang termino nga mga yabi sang priesthood ginagamit sa duha ka paagi. Ang una nagatumod sa mismo kinamatarong ukon pribelihiyo nga ginhatag sa tanan nga nagabaton sang Aaronic ukon Melchizedek Priesthood. … Halimbawa, ang mga nagakapot sang Aaronic Priesthood nagabaton sang mga yabi sang pag-alagad sang mga anghel kag sang mga yabi sang nagapanghanda nga ebanghelyo sang paghinulsol kag sang bunyag paagi sa pagtugmaw para sa kapatawaran sang mga sala (tan-awa sa Doktrina kag mga Kasugtanan 13:1; 84:26–27). Ang mga nagakapot sang Melchizedek Priesthood nagabaton sang yabi sang mga misteryo sang ginharian, ang yabi sang kaalam sang Dios, kag ang mga yabi sang tanan nga espiritwal nga bugay sang Simbahan (tan-awa sa Doktrina kag mga Kasugtanan 84:19; 107:18). …

“Ang ikaduha nga paggamit sang termino nga mga yabi sang priesthood nagatumod sa pagkalider. Ang mga lider sang priesthood nagabaton sang dugang nga mga yabi sang priesthood, ang kinamatarong nga magpamuno sang isa ka sanga sang organisasyon sang Simbahan ukon sang korum. Sa sini nga bahin, ang mga yabi sang priesthood amo ang awtoridad kag gahum para magpanumo, maggiya, kag magdumala sa Simbahan” (The Melchizedek Priesthood: Understanding the Doctrine, Living the Principles [2018], 26).

Joseph Smith Baptizes Oliver Cowdery [Ginabunyagan ni Joseph Smith si Oliver Cowdery], ni Del Parson

Joseph Smith—Kasaysayan 1:66–75

Ang mga ordinansa nagaangot sa akon sa gahum sang Dios.

Nakapamensar ka na bala kon ano ayhan kon upod ka ni Joseph Smith kag Oliver Cowdery sa mayor nga mga hitabo sang Pagpanumbalik? Samtang ginabasa mo ang Joseph Smith—Kasaysayan 1:66–75, upod ang tanda sa idalom sang bersikulo 71, siguro maintiendihan mo ang iban sang ila nabatyagan. Ano ang nanamian mo sa ila mga ginhambal? Pat-ini, ilabi na gid, ang mga bugay nga ila nabaton tungod ginbaton nila ang priesthood kag nabunyagan. Ano nga mga bugay ang ginhatag sang Manluluwas sa imo paagi sa mga ordinansa sang priesthood?

Para magtuon pa gid, pamensara ang paghimo sang tsart nga may mga tig-ulo nga Mga Ordinansa kag Mga Bugay. Dayon pwede ka magpangita sa balaan nga mga kasulatan nga pareho sini para ilista ang mga ordinansa kag mga bugay nga nagahalin diri: Juan 14:26; Mga Binuhatan 2:38; Doktrina kag mga Kasugtanan 84:19–22; 131:1–4; Joseph Smith—Kasaysayan 1:73–74. Ano ang iban pa nga mga bugay nga gusto mo idugang sa listahan? Paano gindala sang mga ordinansa nga imo nabaton ang gahum sang Manluluwas sa imo kabuhi?

Tan-awa man sa David A. Bednar, “Kaupod ang Gahum sang Dios sa Dako nga Himaya,” Liahona, Nob. 2021, 28–30.

Doktrina kag mga Kasugtanan 15–16

Ang pagdala sang mga kalag kay Cristo labing importante.

Nahunahuna mo bala, pareho kay John kag Peter Whitmer, kon ano ang “labing importante” sa imo kabuhi? (Doktrina kag mga Kasugtanan 15:4; 16:4). Samtang imo ginabasa ang Doktrina kag mga Kasugtanan 15–16, binagbinaga kon ngaa ang pagdala sang mga kalag kay Cristo amo sina kaimportante. Ano ang imo ginahimo para “madala mo ang mga kalag” kay Cristo?

Doktrina kag mga Kasugtanan 17

Nagagamit ang Ginuo sang mga saksi para ipahamtang ang Iya pulong.

Ano ang saksi? Ngaa nagagamit ang Ginuo sang mga saksi sa Iya buluhaton? (tan-awa sa 2 Mga Taga-Corinto 13:1). Binagbinaga ining mga pamangkot samtang imo ginabasa ang mga pulong sang Dios sa Tatlo ka mga Saksi sa Doktrina kag mga Kasugtanan 17. (Tan-awa man sa “Ang Panaksihon sang Tatlo ka mga Saksi” sa Libro ni Mormon. Paano nagabulig ang mga saksi nga mapatuman ang “matarong nga mga katuyuan” sang Dios? (bersikulo 4).

Ano ang pwede mo saksihan?

A Day for the Eternities

This film features the experiences of David Whitmer as Joseph Smith and Oliver Cowdery stay with his family in Fayette, New York, to finish the translation of the Book of Mormon.

Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.

Mga Ideya para sa Pagtudlo sang mga Kabataan

Doktrina kag mga Kasugtanan 13; Joseph Smith—Kasaysayan 1:68–74

Ginpanumbalik ni Juan Bautista ang Aaronic Priesthood.

• Ang artwork sa sining outline makabulig sa imo kabataan nga mapanan-aw ang pagpanumbalik sang Aaronic Priesthood. Masadyahan ayhan sila nga idrowing ang hitabo base sa ginbasa mo sa ila sa Joseph Smith—Kasaysayan 1:68–74?

  Chapter 6: Joseph and Oliver Are Given the Priesthood: May 1829

• Pwede mo man ipakita ang mga litrato ni Juan Bautista mientras upod kamo nga nagabasa sang Mateo 3:13–17; Joseph Smith—Kasaysayan 1:68–70. Ngaa importante nga ipadala sang Ginuo si Juan Bautista para ihatag kay Joseph Smith ang awtoridad sang priesthood sa pagbunyag?

Paghanda sang imo kabataan para sa bilog-kinabuhi nga paglakat sa dalan sang kaasugtanan sang Dios. Para sa dugang nga mga ideya para buligan ang imo kabataan nga matun-an ang parte sa gahum sang priesthood, awtoridad, kag mga yabi, tan-awa sa appendix A ukon appendix B.

Ilustrasyon ni Jesus nga ginabunyagan, ni Dan Burr

Doktrina kag mga Kasugtanan 13

Ginabugayan ako sang Amay nga Langitnon paagi sa Aaronic Priesthood.

• Agud sugdan ang diskusyon parte sa mga yabi nga ginmitlang sa Doktrina kag mga Kasugtanan 13, pwede kamo magtan-aw sang imo kabataan sa isa ka pungpong sang mga yabi kag hambalan kon ano ang ginatugtan sang mga yabi nga obrahon naton. Basi pwede mo sila buligan nga pangitaon ang tinaga nga mga yabi sa seksyon 13. Ano pa nga mga tinaga ukon dinalan sa Doktrina kag mga Kasugtanan 13 ang nagalaragway sang mga bugay sang Aaronic Priesthood?

Blessings of the Priesthood

The priesthood is the power of God, which is given to man to act in His name.

Doktrina kag mga Kasugtanan 15:4–6; 16:4–6

Ang pagbulig sa iban nga magpalapit kay Jesucristo “labing importante.”

• Gusto mahibal-an ni John kag Peter Whitmer kon ano ang mangin labing importante para sa ila (tan-awa sa Doktrina kag mga Kasugtanan 15:4; 16:4). Basi pwede ninyo hambalan sang imo kabataan ang mga butang nga dako kaayo ang importansya para sa inyo. Samtang ginabasa mo ang Doktrina kag mga Kasugtanan 15:6 ukon 16:6, pangabaya ang imo kabataan nga alsahon ang ila mga kamot kon mabatian nila ang ginasiling sang Ginuo nga “labing importante.”

• Ano ang buot silingon sang “magdala sang mga kalag kay [Jesucristo]”? Buligi ang imo kabataan nga maglista sang mga ideya, pareho sang mangin abyan sa iban, makigbahin sang balaan nga kasulatan sa abyan, ukon magpangamuyo para sa nagakinahanglan. Pwede magpangita ang imo kabataan sang mga litrato sining mga butang sa mga magasin sang Simbahan ukon sa Libro sang mga Larawan nga Pang-Ebanghelyo. Ukon pwede sila magdrowing mismo. Hagara sila nga magpili sang isa sa ila listahan nga ila himuon.

Doktrina kag mga Kasugtanan 17

Pwede ako nga mangin saksi sang Libro ni Mormon.

• Pagkatapos nga basahon ang Doktrina kag mga Kasugtanan 17:5–6, ihambal sa imo kabataan kon paano mo n+ahibal-an nga matuod ang Libro ni Mormon. Paano kita mangin mga saksi sang Libro ni Mormon?

  Chapter 7: Witnesses See the Gold Plates: 1829–1830

Para sa dugang nga mga ideya, tan-awa sa isyu sang Abyan nga magasin sini nga bulan.

Upon You My Fellow Servants [Sa Inyo Kapareho Ko nga mga Alagad], ni Linda Curley Christensen