“Mga Tingug sang Pagpanumbalik: Paglubad sang Libro ni Mormon,” Dali, Magsunod sa Akon—Para sa Puluy-an kag Simbahan: Doktrina kag mga Kasugtanan 2025 (2025)
“Paglubad sang Libro ni Mormon,” Dali, Magsunod sa Akon—Para sa Puluy-an kag Simbahan: 2025
Mga Tingug sang Pagpanumbalik
Paglubad sang Libro ni Mormon
Sang Abril 1829, ang bulan sang nabaton ang mga seksyon 6–9 sang Doktrina kag mga Kasugtanan, ang mayor nga buluhaton ni Joseph Smith amo ang paglubad sang Libro ni Mormon. Wala kita makahibalo sang madamo nga mga detalye parte sa proseso sang milagroso nga paglubad, pero nahibal-an naton nga si Joseph Smith isa ka manugpanan-aw (seer), nga ginbuligan sang mga instrumento nga ginhanda sang Dios: duha ka kristal nga bato nga ginatawag nga Urim kag Tumim kag isa pa ka bato nga ginatawag bato sang manugpanan-aw (seer stone).
Sang ginpangabay sang ulihi nga iistorya kon paano ini ginlubad, nagsiling si Joseph “wala gintuyo nga ibuyagyag sa bilog nga kalibutan ang tanan nga mga detalye.” Masami nga simple lang niya nga ginasiling nga ginlubad ini “paagi sa dulot, kag gahum sang Dios.”
Ang masunod nga mga pahayag, halin sa mga nakakita pakadto sa proseso sang paglubad, nagasuporta sang saksi ni Joseph.
Ginapatihan nga ining kahon, nga ginapanag-iyahan ni Hyrum Smith, gingamit agud temporaryo nga taguon ang bulawan nga mga lamina.
Emma Smith
“Sang ginalubad sang akon bana ang Libro ni Mormon, ginsulat ko ang pila ka bahin sini, samtang iya ginalawag ang tagsa ka dinalan, tinaga sa tinaga, kag kon maglab-ot sia sa mga ngalan nga indi niya masampotan, ukon malagba nga mga tinaga, ginabato-bato niya ini, kag samtang ginasulat ko ini, kon magsala ako sa tigbato, pauntaton niya ako kag tadlungon ang akon pagbato-bato bisan daw imposible nga iya pa makita kon paano ko ini ginsulat sa amo sadto nga tion. Bisan ang tinaga nga Sara indi niya masampotan sang primero, kundi kinahanglan niya batu-batuhon, kag akon ini lawagon para sa iya.”
“Ang mga lamina masami nagatungtong lang sa lamisa nga wala man lang ginatabunan, nga naputos sa gamay nga tela nga mantel, nga akon ginhatag sa iya nga pangputos. Isa ka bes ginhikap ko ang mga lamina, samtang nagahumlad ini sa lamisa, nga ginasunod ang hurma sini kag korte. Daw mabawod ini pareho sang madamol nga papel, kag nagakalas nga may nga tunog sang metal kon buksan ang mga kilid sini sang kamalagko, pareho sang pagbukas sang mga kilid sang libro. …
“Ang akon pagpati amo nga ang Libro ni Mormon may diosnon nga kamatuoran—wala ako sing bisan ano nga pagduhaduha sina. Kumbinsido ako nga wala sing bisan sin-o nga makadikta sang mga sinulat sa manuskrito magluwas kon sia inspirado; tungod, samtang nagaakto bilang iya manunulat, nagadikta si [Joseph] sa akon sing inoras; kag pagbalik pagkatapos magkaon, ukon pagkatapos sang mga sablag, magasugod sia gilayon kon diin sia nagpundo, nga wala ginatan-aw ang manuskrito ukon ginapabasa ang isa ka parte sini sa iya. Amo ina sia pirme. Haloson nga mahimo ini sang tawo nga may alam; kag, para sa isa ka tawo nga ignorante kag wala sing tinapusan, imposible gid ini katama.”
Oliver Cowdery
“Ginsulat ko ang bilog nga Libro ni Mormon gamit ang akon kaugalingon nga inugsulat (magluwas sa pila ka pahina) samtang nagagwa ini sa mga bibig sang propeta, samtang iya ini ginalubad paagi sa dulot kag gahum sang Dios, paagi sa Urim kag Tumim, ukon, suno sa tawag sini sa libro, balaan nga tigpatpat. Nakita ko sa akon mga mata, kag nakaptan sa akon mga kamot, ang bulawan nga mga lamina halin sa diin ini ginlubad. Nakita ko man ang mga manugpatpat.”