Pebrero 3–9: “Ini ang Espiritu sang Rebelasyon”

Doktrina kag mga Kasugtanan 6–9

Sang tiglagas sang 1828, isa ka hubin nga maestro nga ginhingadlan Oliver Cowdery ang nabaton para magtudlo sa Manchester, New York, kag nag-istar upod sa pamilya nanday Lucy kag Joseph Smith Sr. Nakabati si Oliver parte sa ila anak nga si Joseph kag sang iya indi kinaandan nga mga eksperiyensya, kag si Oliver, nga nagkabig sang iya kaugalingon nga nagapangita sang kamatuoran, gusto nga makahibalo pa gid. Ginlaragway sang mga Smith ang mga pagbisita sang mga anghel, isa ka dumaan nga rekord, kag ang bugay sa paglubad paagi sa gahum sang Dios. Nangin interesado si Oliver. Matuod ayhan ini? Ginhatagan sia nanday Lucy kag Joseph Sr. sang laygay nga magamit man sang bisan sin-o nga nagapangita sang kamatuoran: magpangamuyo kag mamangkot sa Ginuo.

Ginhimo ini ni Oliver, kag ang Ginuo nagsabat, nga nagahambal sang paghidaet kag pagpasalig sa [iya] hunahuna” (Doktrina kag mga Kasugtanan 6:23). Ang rebelasyon, natukiban ni Oliver, indi lang para sa mga propeta pareho kay Joseph Smith. Para ini sa bisan sin-o nga gusto sini kag matutom nga nagahandum sini. Kadamo pa sang kinahanglan mahibal-an ni Oliver, pero hustuhan na ang iya nahibal-an agud himuon ang madason niya nga tikang. Nakahibalo sia nga may ginahimo nga importante ang Ginuo paagi kay Joseph Smith, kag gusto ni Oliver nga mangin kabahin sini.

Days of Harmony

Witness Oliver Cowdery’s experience as Joseph Smith’s scribe during the translation of the Book of Mormon.

Mga Ideya sa Pagtuon sa Puluy-an kag sa Simbahan

Doktrina kag mga Kasugtanan 6; 8–9

Nagapakighambal ang Amay nga Langitnon sa akon paagi sa Balaan nga Espiritu.

Sang tigpamulak sang 1829, nagboluntaryo si Oliver Cowdery nga mangin manunulat ni Joseph Smith samtang padayon niya nga ginalubad ang Libro ni Mormon. Nalipay gid sia sa sini nga eksperiyensya, kag nanumdom sia kon bala makabaton man sia sang rebelasyon kag sang bugay sa paglubad. Pero, sang primero niya nga gintilawan, wala sia nagmadinalag-on.

Kon nakaagi ka nga ginbudlayan sa pagbaton ukon pag-intiendi sang rebelasyon, basi maintiendihan mo ang eksperiyensya ni Oliver—kag makatuon bangud sini. Samtang ginabasa mo ang Doktrina kag mga Kasugtanan 6, 8, kag 9, tandai kon ano ang gintudlo sang Ginuo kay Oliver parte sa personal nga rebelasyon. Halimbawa:

• Ano ang ginasiling sa Doktrina kag mga Kasugtanan 6:5–7; 8:1; 9:7–8 nga ginapangayo sang Ginuo sa imo antes Niya ipahayag ang Iya pagbuot?

• Ano ang imo matun-an sa Doktrina kag mga Kasugtanan 6:14–17, 22–24; 8:2–3; 9:7–9 parte sa lainlain nga pamaagi nga mahimo mag-abot ang rebelasyon? Paano mo ini makilala?

• Ano pa ang imo matun-an parte sa rebelasyon sa sining mga seksyon?

Mahimo nga ang mga eksperiyensya ni Oliver makapa“dumdom” sa imo sang mga tinion nga nabatyagan mo nga ang Ginuo nagahambal sa imo (Doktrina kag mga Kasugtanan 6:22). Ginsulat mo bala ang imo mga panghunahuna ukon balatyagon parte sining mga eksperiyensya? Kon ginsulat mo, pamensara nga basahon ang imo ginsulat. Kon wala, hatagi sang tiyempo nga isulat ang imo madumduman. Pamensara kon paano ka magpadayon sa pagkuha sang kusog sa sining mga eksperiyensya. Para sa mga ideya, tan-awa sa mensahe ni Elder Neil L. Andersen nga “Makahulugan nga Espirituhanon nga mga Handurawan” (Liahona, Mayo 2020, 18–22).

Doktrina kag mga Kasugtanan 6:18–21, 29–37

Magtulok kay Cristo sa tagsa ka panghunahuna.

Nahibal-an sang Ginuo nga makaeksperiyensya si Joseph Smith sang “mabudlay nga mga sirkumstansya” sa maabot nga tinuig (Doktrina kag mga Kasugtanan 6:18). Nakahibalo man sia kon ano nga mga pagtilaw ang ara sa imo palaabuton. Ano ang nakita mo sa Iya laygay kay Joseph kag Oliver sa Doktrina kag mga Kasugtanan 6:18–21, 29–37 nga makabulig sa imo nga magsalig sa Iya?

Ano ang nabatyagan mo nga kahulugan sang “magtulok [kay Cristo] sa tagsa ka panghunahuna”? (bersikulo 36). Paano mo ini himuon nga mas sige-sige—sa tiyempo nga maayo kag sa “mabudlay nga mga sirkumstansya”? Hunahunaa ining laygay ni Pangulong Russell M. Nelson: “Mabudlay sa kaisipan ang maghimakas sa pagtulok sa Iya sa tagsa ka panghunahuna. Apang kon buhaton naton, ang aton pagduhaduha kag mga kahadlok madula” (“Ang Pagkuha sang Gahum ni Jesucristo Pasulod sa Aton Mga Kabuhi,” Liahona, 41).

Detalye sang Behold My Hand [Tan-awa ang Akon Kamot], ni Jeffrey Ward

Doktrina kag mga Kasugtanan 6:29–37

“Indi magkahadlok sa paghimo sang maayo.”

Ngaa kon kaisa “nahadlok [kita] … sa paghimo sang maayo”? (bersikulo 33). Ano ang nakita mo sa Doktrina kag mga Kasugtanan 6:29–37 nga nagahatag sa imo sang kaisog sa paghimo sang maayo? Pamensara nga magkanta ukon magpamati sa himno nga nagainspirar sa imo nga mangin maisog kay Cristo.

Doktrina kag mga Kasugtanan 6–7; 9:3, 7–14

“Kon ano ang imo ginapangayo sa akon matuman ini sa imo.”

Tandai kon pila ka beses makita ang tinaga nga “ginapangayo” ukon “mga ginahandum” sa mga seksyon 6 kag 7. Ano ang imo matun-an sa sining mga seksyon parte sa importansya nga ginahatag sang Dios sa imo mga handum? Pamangkuta ang imo kaugalingon sang pamangkot sang Ginuo sa Doktrina kag mga Kasugtanan 7:1: “Ano ang ginahandum mo?”

Isa sa matarong nga mga handum ni Oliver Cowdery—ang maglubad pareho ni Joseph—wala natuman. Samtang imo ginabasa ang Doktrina kag mga Kasugtanan 9:3, 7–14, ano nga mga pagpabatyag ang imo nabaton nga makabulig sa imo kon ang imo matarong nga mga handum indi matuman sa karon?

Tan-awa man sa Doktrina kag mga Kasugtanan 11:8; Dallin H. Oaks, “Handum,” Liahona, Mayo 2011, 42–45.

Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.

Mga Ideya para sa Pagtudlo sang mga Kabataan

Doktrina kag mga Kasugtanan 6:5, 15–16, 22–23; 8:2; 9:7–9

Nagapakighambal ang Amay nga Langitnon sa akon paagi sa Balaan nga Espiritu.

• Ang mga kamatuoran nga natun-an ni Oliver Cowdery parte sa personal nga rebelasyon makabulig sa imo kabataan samtang ginapatubo nila ang ila ikasarang sa pagkilala sang Balaan nga Espiritu. Isugid sa isa kag isa ang paborito ninyo nga parte sang istorya. Samtang ginahimo ninyo ini, hatagi importansya ang mga butang nga gintudlo sang Ginuo kay Oliver parte sa pagpamati sa tingug sang Dios, kag basaha ang konektado nga mga bersikulo, pareho sang Doktrina kag mga Kasugtanan 6:23 ukon 9:7–9.

  Chapter 5: Joseph Smith and Oliver Cowdery: February–April 1829

  

  Natun-an ni Oliver Cowdery ang parte sa rebelasyon samtang nagabulig kay Joseph Smith sa pag-translate sang Libro ni Mormon.

• Pwede mo man hagaron ang imo kabataan nga tandugon ang ila ulo kag dughan samtang ginabasa mo ang mga tinaga nga “panghunahuna” kag “tagipusuon” sa Doktrina kag mga Kasugtanan 8:2. Sugiri ang imo kabataan, halin sa imo mga eksperiyensya, kon paano maghambal ang Balaan nga Espiritu sa imo hunahuna kag tagipusuon. Buligi sila sa pagpangita sang mga sabat sa pamangkot nga “Paano nagahambal sa aton ang Balaan nga Espiritu?” sa sining mga bersikulo: Doktrina kag mga Kasugtanan 6:15–16, 22–23; 8:2; 9:7–9.

Maggamit sang mga sugilanon. Ang mga sugilanon nagabulig sa kabataan nga maintiendihan ang mga prinsipyo sang ebanghelyo tungod ginapakita sini kon paano ginapangabuhi sang iban nga tawo ining mga prinsipyo. Samtang nagatudlo ka, pangitai sang paagi nga maghatag sang mga istorya—halin sa balaan nga mga kasulatan, sa kasaysayan sang Simbahan, ukon sa imo mismo kabuhi—nga nagapakita sang mga prinsipyo sa balaan nga mga kasulatan.

Doktrina kag mga Kasugtanan 6:34

Bangud kay Jesucristo, pwede ako nga “indi magkahadlok.”

• Siling sang Ginuo kay Joseph kag Oliver, “Indi magkahadlok, diutay nga panong” (Doktrina kag mga Kasugtanan 6:34). Basi pwede mo hagaron ang imo kabataan nga suliton ina nga dinalan upod sa imo sing pila ka beses. Basi masadyahan man sila nga mag-akto nga kuno-abi isa ka panong sang nahadlok nga mga karnero. Ano ayhan ang nahadlukan sang karnero? Dayon pwede ninyo tan-awon sang imo kabataan ang litrato sang Manluluwas bilang bakero (may ara sini sa katapusan sining outline) kag hambalan kon paano Niya kita ginabantayan pareho sang pagbantay sang bakero sa Iya mga karnero.

• Pamensara ang pagpatukar ukon pagkanta sang kanta parte sa pagpangita sang kaisog paagi kay Cristo, pareho sang “Dare to Do Right [Magmaisog]” (Mga Himno kag mga Ambahanon sang Kabataan, 64–65). Ano ang ginatudlo sang kanta parte sa kon paano kita ginabuligan sang Manluluwas nga indi mahadlok?

Doktrina kag mga Kasugtanan 6:36

Pwede ako magtulok kay Cristo sa tagsa ka panghunahuna.

• Pagkatapos nga basahon sing ululupod ang Doktrina kag mga Kasugtanan 6:36, pwede kamo magdrowing sang imo kabataan para buligan kamo nga panumdumon nga “magtulok kay [Jesucristo] sa tagsa ka panghunahuna.” Ipakita sa isa kag isa ang inyo mga drowing, kag buligi ang imo kabataan nga manumdom sang butangan sini para makita nila ini pirme.

Para sa dugang nga mga ideya, tan-awa sa isyu sang Abyan nga magasin sini nga bulan.

The Lord Is My Shepherd [Ang Ginuo Akon Manugpahalab], ni Yongsung Kim