Replika sang orihinal nga manuskrito sang Libro ni Mormon

Pebrero 10–16: “Agud nga Mangin Madinalag-on Ka”

Doktrina kag mga Kasugtanan 10–11

Samtang nagapadayon ang paglubad sang Libro ni Mormon, isa ka pamangkot ang nagtuhaw: Ano ang dapat himuon nanday Joseph Smith kag Oliver Cowdery parte sa nadula nga linubad na nga mga pahina? Siguro husto man kon lubaron liwat ina nga parte, pero may nakita ang Ginuo nga indi nila makita: nagaplano ang ila mga kaaway nga islan ang mga tinaga sa amo nga mga pahina para madudahan ang inspirado nga buluhaton ni Joseph. May plano ang Dios para likawan ina nga problema kag padayunon ang pag-abante sang buluhaton. Linibo ka tuig antes, gin-inspirar sang Dios si Nefi nga magsulat sang ikaduha nga rekord nga nagasakop sang pareho nga tinuig “para sa isa ka maalam nga katuyuan sa Iya” (1 Nefi 9:5).

“Ang akon kaalam,” siling sang Ginuo kay Joseph, “mas sobra sangsa katuso sang yawa” (Doktrina kag mga Kasugtanan 10:43). Isa ina ka makaulumpaw nga mensahe sa panahon pareho sang aton karon, kon sa diin ginapabaskog sang kaaway ang iya pagpaninguha nga paluyahon ang pagtuo. Pareho kay Joseph, pwede kita mangin “tampad kag magapadayon” sa buluhaton nga ginapahimo sa aton sang Dios (bersikulo 3). Dayon matukiban naton nga nagpahamtang na gali Sia nga daan sang paagi para ang “pwertahan sang impiyerno indi makadaog” batok sa aton (bersikulo 69).

Mga Ideya sa Pagtuon sa Puluy-an kag sa Simbahan

Doktrina kag mga Kasugtanan 10:1–33

Ang Dios “indi [magtugot] nga matuman ni Satanas ang iya malain nga plano.”

Mas gusto ni Satanas nga kalimtan naton nga ara sia—ukon bisan indi na lang naton matalupangdan ang iya pagpaninguha nga impluwensyahan kita (tan-awa sa 2 Nefi 28:22–23). Pero ang pulong sang Ginuo sa Doktrina kag mga Kasugtanan 10 nagapakita nga si Satanas matuod—kag aktibo sia nga nagakontra sa buluhaton sang Dios. Sa mga bersikulo 1–33, hibal-a kon ano ang nahibal-an sang Dios parte sa pagpaninguha ni Satanas (tan-awa man sa mga bersikulo 62–63). Pwede mo man pangabayon ang Ginuo nga buligan ka nga makita kon paano ka ginatentar ni Satanas. Samtang ginabasa mo ang seksyon 10, binagbinaga kon paano ka mabuligan sang Manluluwas nga batuan ang mga pagtinguha ni Satanas.

Doktrina kag mga Kasugtanan 10:34–52

Ang “kaalam [sang Ginuo] mas sobra sangsa katuso sang yawa.”

Wala kahibalo si Nefi kon ngaa gin-inspirar sia nga maghimo sang duha ka set sang mga rekord sang iya katawhan. Kag wala man kahibalo si Moroni kon ngaa gin-inspirar sia nga iupod ang ikaduha nga set sa bulawan nga mga lamina. Pero ang duha ka propeta nagsalig nga ang Dios may “maalam nga katuyuan” (1 Nefi 9:5; Mga Pulong ni Mormon 1:7). Karon nahibal-an na naton ang isa ka bahin sina nga katuyuan: para buslan ang 116 ka pahina nga nadula sa Libro ni Mormon. Ano sa banta mo ang gusto sang Ginuo nga imo matun-an sa sini tanan? Binagbinaga ina nga pamangkot samtang imo ginabasa ang Doktrina kag mga Kasugtanan 10:34–52. Pwede mo man ilista ang mga kamatuoran nga imo natun-an parte sa Ginuo sa sining mga bersikulo. Paano nakaapekto ang ining mga kamatuoran sa imo relasyon sa Iya? Ano ang nanamian mo sa kaalam kag panan-aw sa palaabuton sang Ginuo sa pagpreparar para sa pagkadula sang 116 ka pahina?

Mahimo nga mangin inspirado ka man nga magpangita sang ebidensya sang Iya kaalam kag panan-aw sa palaabuton sa imo kabuhi. Pamensara nga isulat ang mga ini kon mag-abot ini sa imo. Paano nagahikot ang Ginuo sa imo kabuhi? Halimbawa, ano nga “mga hitabo nga sang primero daw natabuan lang” ang Iya ginhanda? Ano nga mga pundasyon ang Iya ginplastar para sa imo mga bugay? San-o ka Niya gingiyahan para mag-minister sa nagakinahanglan?

Tan-awa man sa Mga Taga-Roma 8:28; Doktrina kag mga Kasugtanan 90:24.

Detalye halin sa Mormon Abridging the Plates [Si Mormon nga Nagapalip-ot sang mga Lamina], ni Tom Lovell

Doktrina kag mga Kasugtanan 11

“Ibutang ang imo pagsalig sa Espiritu [sang Ginuo].”

Ang magulang ni Joseph nga si Hyrum gusto gid makahibalo sang pagbuot sang Ginuo para sa iya, gani ginpangabay niya si Joseph nga magpangayo sang rebelasyon para sa iya. Malipayon ang Propeta nga himuon ini, pero isa sa mensahe sina nga rebelasyon (Doktrina kag mga Kasugtanan 11) amo nga pwede man si Hyrum magpangayo sang rebelasyon para sa iya kaugalingon. Kag amo man ang “tanan nga may maayo nga mga handum, kag nagduso sang ila garab sa pag-ani” (bersikulo 27). Samtang ginabasa mo ang seksyon 11, ano ang nabatyagan mo nga ginatudlo sang Ginuo sa imo parte sa personal nga rebelasyon? Paano ini maangot sa Iya gintudlo kay Oliver Cowdery sa mga seksyon 6–9? Ano ang iban pa Niya nga mga mensahe para sa imo?

Hagara ang mga nagatuon nga magpamangkot. Ang mga pamangkot kasami nagaresulta sa rebelasyon. Kon nagatudlo ka sa imo pamilya ukon sa klase sa Simbahan, paisoga sila nga magpamangkot, kag buligi sila nga mangita sang mga sabat sa balaan nga mga kasulatan. Halimbawa, kon may mga pamangkot sila parte sa personal nga rebelasyon, pangitaa sing ululupod ang mga sabat sa Doktrina kag mga Kasugtanan 11:12–14.

Doktrina kag mga Kasugtanan 11:15–26

Kon tinguhaan ko nga “hibaluon ang pulong sang [Dios],” mabaton ko ang Iya Espiritu kag gahum.

Bisan antes pa ginlubad ang Libro ni Mormon, gusto gid kaayo ni Hyrum Smith nga magbulig sa buluhaton sang Pagpanumbalik. Samtang imo ginabasa ang sabat sang Ginuo sa iya mga handum, pamensara kon ano ang buot silingon sa imo sang “hibaluon ang pulong sang [Dios]” (bersikulo 21). Paano makabulig sa imo ang paghibalo sang pulong sang Dios nga magserbisyo sa Iya nga may gahum?

Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.

Mga Ideya para sa Pagtudlo sang mga Kabataan

Doktrina kag mga Kasugtanan 10:5

Kon magpangamuyo ako pirme, makabaton ako sang kusog halin sa Dios.

• Para ipakilala ini nga bersikulo sa imo kabataan, pwede mo sila pamangkuton parte sa mga butang nga “pirme” nila ginahimo. Ano ang ginasiling sang Ginuo nga dapat naton himuon pirme sa Doktrina kag mga Kasugtanan 10:5? Ngaa gusto Niya nga himuon naton ini?

• Paano mo buligan ang imo kabataan nga madumduman nga magpangamuyo pirme? Basi pwede sila magpanipon sang gagmay, hining nga mga bato kag pintahan ini sang “Doktrina kag mga Kasugtanan 10:5” ukon “Magpangamuyo Pirme.” Pwede nila ibutang ang ila mga bato sa lainlain nga lugar nga gusto nila padumdumon sila nga magpangamuyo, pareho abi sang malapit sa ila hiligdaan, upod sa ila mga libro, ukon kon diin sila nagakaon. Suno sa Doktrina kag mga Kasugtanan 10:5, paano kita ginabugayan sang Dios kon mangamuyo kita? Pwede man mangita ang imo kabataan sang dugang nga mga sabat sa kanta.

Doktrina kag mga Kasugtanan 11:12–13

Ang Balaan nga Espiritu nagagiya sa akon nga maghimo sang maayo.

• Makatuon ang kabataan nga makilala kon ang Espiritu nagahambal sa ila. Para buligan sila, pwede ka magtago sang suga ukon flashlight kag sang litrato sang malipayon nga guya sa isa ka lugar sa kuwarto; dayon ipapangita ini sa imo kabataan. Basaha ang Doktrina kag mga Kasugtanan 11:13, kag buligi ang imo kabataan nga pangitaon ang mga tinaga nga konektado sa mga bagay nga ila nakita. Ano ang ginatudlo sining mga tinaga parte sa kon paano kita ginabuligan sang Balaan nga Espiritu?

• Ang pag-istorya sang imo espirituhanon nga mga eksperiyensya makabulig sa imo kabataan nga makilala ang impluwensya sang Balaan nga Espiritu sa ila mga kabuhi. Kon mag-istorya ka, pangabaya man sila nga mag-istorya man sang ila mga eksperiyensya. Dayon pwede ninyo basahon sing ululupod ang Doktrina kag mga Kasugtanan 11:12–13, nga ginapangita kon paano naton mahibal-an kon ginagiyahan kita sang Balaan nga Espiritu. Magpamatuod nga gusto kita buligan sang Amay nga Langitnon paagi sa Balaan nga Espiritu.

Doktrina kag mga Kasugtanan 11:21, 26

Kinahanglan ko mahibal-an ang ebanghelyo para mabuligan ko ang iban nga makita ang kamatuoran.

• Pareho kay Hyrum Smith, basi ang imo kabataan makaangkon man sang madamo nga oportunidad sa pagpakigbahin sang ebanghelyo sa iban. Pwede ninyo basahon sing dungan ang Doktrina kag mga Kasugtanan 11:21, 26 kag ipapangita sa imo kabataan kon ano ang ginsiling sang Ginuo nga himuon ni Hyrum para pwede niya itudlo ang ebanghelyo. Ano ang buot silingon sang “hibaluon” ang pulong sang Dios? Paano naton himuon ini? Paano naton “huptan” ang pulong sang Dios sa aton mga tagipusuon? Basi pwede ang imo kabataan magrole-play nga nagaistorya sa iban parte kay Jesucristo ukon sa Libro ni Mormon.

Para sa dugang nga mga ideya, tan-awa sa isyu sang Abyan nga magasin sini nga bulan.

Joseph and Hyrum Smith [Si Joseph kag si Hyrum Smith], ni Ken Corbett