“Mga Tingug sang Pagpanumbalik: Ang mga Saksi sang Libro ni Mormon,” Dali, Magsunod sa Akon—Para sa Puluy-an kag Simbahan: Doktrina kag mga Kasugtanan 2025 (2025)
“Ang mga Saksi sang Libro ni Mormon,” Dali, Magsunod sa Akon—Para sa Puluy-an kag Simbahan: 2025
Mga Tingug sang Pagpanumbalik
Ang mga Saksi sang Libro ni Mormon
Ginpakita ni anghel Moroni ang bulawan nga mga lamina kay Joseph Smith, Oliver Cowdery, David Whitmer, kag Martin Harris sa kakahuyan malapit sa puluy-an sang mga Whitmer sa Fayette, New York. Ginbisitahan sang mga ginikanan ni Joseph ang pamilya Whitmer sang amo nga tion. Si Lucy Mack Smith, iloy ni Joseph, naglaragway sang epekto sining milagroso nga eksperiyensya sa mga saksi:
“Sa tunga-tunga sang alas tres kag alas kwatro sadto. Si Mrs. Whitmer kag Mr. Smith kag ako nagapungko sa sulod sang kuwarto. Nagapungko ako sa kilid sang katre. Sang magsulod si Joseph, lapyo sia nga nagtupad sa akon. ‘Tay! Nay!’ siling niya. ‘Wala lang kamo kahibalo kon daw ano ako kamalipayon. Gintugtan sang Ginuo nga ipakita ang mga lamina sa tatlo pa ka tawo magluwas sa akon, nga nakakita man sang anghel kag magapamatuod sang kamatuoran sang akon ginsiling. Kay nahibal-an nila sa ila kaugalingon nga wala ako nagalibot sa pagpanginto sang mga tawo. Kag pamatyag ko daw nahaw-asan ako sang tama kadako nga palas-anon, nga mabug-at katama kargahon nga ako lang. Pero karon makigbahin na sila sa palas-anon nga ini, kag malipayon gid ang akon kalag nga wala na ako nagaisahanon sa kalibutan.’ Dayon nagsulod si Martin Harris. Daw halos dag-on sia sang sobra nga kalipay. Dayon nagpamatuod sia sang iya nakita kag nabatian, kag ang iban amo man, sanday Oliver kag David. Ang ila testimonya pareho sa kaundan nga makita sa Libro ni Mormon. …
“Si Martin Harris daw haloson makatusngaw para ilaragway ang iya mga nabatyagan sa tinaga. Siling niya, ‘Nakakita na ako sang anghel halin sa Langit nga wala duda nga nagpamatuod sang kamatuoran sang tanan nga akon nabatian parte sa kasulatan, kag nakita sia sang akon mga mata. Gintulok ko man ang mga lamina kag ginkaptan ini sa akon mga kamot kag makapamatuod sang amo man sa bilog nga kalibutan. Pero nakabaton ako sa akon kaugalingon sang saksi nga indi mapahayag sa pulong, nga indi malaragway sang baba, kag ginadayaw ko ang Dios sing hugot sa akon kalag nga maalwan niya nga ginpili nga himuon ako, bisan ako, nga saksi sa kadako sang iya buluhaton kag mga plano para [sa] mga anak sang katawhan.’ Nag-upod man sa iya sanday Oliver kag David sa maligdong nga pagdayaw sa Dios sa iya kaayo kag kaluoy. Nagpauli kami [sa Palmyra, New York,] sang madason nga adlaw nga isa ka masinadyahon, nagakalipay nga diutay nga guban.”
Si Oliver Cowdery, David Whitmer, kag Martin Harris
Ara man si Lucy Mack Smith sang ang Walo ka mga Saksi nagbalik halin sa ila eksperiyensya:
“Pagkatapos nga nagbalik ining mga saksi sa balay, ang anghel nagpakita liwat kay Joseph; sa tion nga ginbalik na ni Joseph ang mga lamina sa iya poder. Sina nga gab-i nagmiting kami, kon sa diin ang tanan nga mga saksi nagpaambit sang testimonya sa mga kamatuoran nga nasambit sa ibabaw; kag ang tanan namon nga pamilya, bisan pa asta si Don Carlos [Smith], nga 14 anyos lamang ang pangidaron, nagpamatuod sang kamatuoran sang dispensasyon sa ulihing mga adlaw—nga sang amo nga tion lubos nga nag-umpisa.”
Tinigib nga larawan ni Joseph Smith kag sang Walo ka mga Saksi
Dugang pa sa Tatlo ka mga Saksi kag Walo ka mga Saksi, si Mary Whitmer, ang iloy ni David Whitmer, ginbugayan man nga mangin saksi sang bulawan nga mga lamina. Ginpakita ini ni anghel Moroni sa iya bilang pagkilala sang mga sakripisyo nga iya ginhimo samtang si Joseph, Emma, kag Oliver nagatiner sa iya balay. “Nangin tampad ka kaayo kag matutom sa imo pagpangabudlay,” siling ni Moroni sa iya. “Gani, husto lang, nga makabaton ka sang saksi agud nga ang imo pagtuo magbakod.”