Pebrero 24–Marso 2: “Dako ang Bili sang mga Kalag”

Doktrina kag mga Kasugtanan 18

Kadamo sang lainlain nga mga paagi para takson ang bili sang isa ka tawo. Ang talento, edukasyon, manggad, kag pisikal nga hitsura tanan makaapekto kon paano naton ginatimbang ang kada isa—kag ang aton mga kaugalingon. Pero sa mata sang Dios, ang bili naton mas simple, kag maathag ini nga ginhambal sa Doktrina kag mga Kasugtanan 18: “Dumduma nga dako ang bili sang mga kalag sa panan-awan sang Dios” (bersikulo 10). Ginpaathag sining simple nga kamatuoran kon ano ang ginahimo sang Dios kag kon ngaa ginahimo Niya ini. Ngaa ginsugo Niya si Joseph Smith kag Oliver Cowdery nga tukuron ang Simbahan ni Jesucristo sa aton panahon? (tan-awa sa mga bersikulo 1–5). Tungod dako kaayo ang bili sang mga kalag. Ngaa “ginasugo [Niya] ang tanan nga tawo sa bisan diin nga maghinulsol” kag nagpadala sang mga Apostoles para magwali sang paghinulsol? (bersikulo 9). Tungod dako kaayo ang bili sang mga kalag. Kag ngaa nag-antos si Jesucristo sang “kamatayon sa unod” kag sang “kasakit sang tanan nga katawhan”? (bersikulo 11). Tungod dako kaayo ang bili sang mga kalag. Kon bisan isa lang sining mga kalag ang magpili nga batunon ang regalo sang Manluluwas, nagakalipay Sia tungod “[dako] ang iya kalipay sa kalag nga nagahinulsol” (bersikulo 13).

Mga Ideya sa Pagtuon sa Puluy-an kag sa Simbahan

Doktrina kag mga Kasugtanan 18:1–5

“Pauswagon ang akon simbahan.”

Sa seksyon 18, ginhatagan sang Ginuo si Oliver Cowdery sang mga instruksyon sa pagbulig tukod sang pundasyon sang Simbahan ni Jesucristo. Ano ang natalupangdan mo sa laygay nga Iya ginhatag—labi na gid sa mga bersikulo 1–5? Pwede mo man pamensaron kon paano mo gamiton ini nga laygay samtang imo ginapauswag ang imo pagtuo kay Cristo. Halimbawa:

• Ano ang “ginhandum [mo] nga mahibal-an” sa Ginuo? (bersikulo 1).

• Ano ang buot silingon sa imo sang “magsalig ka sa mga butang nga nasulat”? (bersikulo 3). Paano “ginpakita sa imo” sang Espiritu nga ining mga butang matuod? (bersikulo 2; tan-awa man sa Doktrina kag mga Kasugtanan 6:22–24).

• Paano mo pauswagon ang imo kabuhi “sa pundasyon sang ebanghelyo kag bato sang [Manluluwas]”? (bersikulo 5).

Magpamangkot. Ang Doktrina kag mga Kasugtanan isa ka ebidensya nga ang mga pamangkot nagaresulta sa rebelasyon. Samtang imo ginatun-an ang balaan nga mga kasulatan, isulat ang imo mga pamangkot. Dayon binagbinaga kag magpangamuyo sa pagpangita sang mga sabat.

Doktrina kag mga Kasugtanan 18:10–13

“Dako ang bili sang mga kalag sa panan-awan sang Dios.”

Paano naton mahibal-an ang bili sang isa ka butang? Halimbawa, ngaa ang isa ka bagay sa isa ka tindahan mas mahal sangsa isa ka bagay? Sa pagbasa mo sang seksyon 18 sining semana, labi na gid ang mga bersikulo 10–13, pwede mo ikumparar kon paano ginatakos sang tawo ang balor sa kon ano ang nagahatag bili sa isa ka kalag sa panan-awan sang Dios. Pamensara nga islan sang imo ngalan ang mga tinaga nga “kalag,” “mga kalag,” kag “tanan nga katawhan.” Paano makabulig ining mga bersikulo sa tawo nga nagakwestyon sang iya bili?

Ari ang pila ka mga dinalan nga nagatudlo parte sa bili sang kalag: Lucas 15:1–10; Juan 3:16–17; 2 Nefi 26:24–28; Moises 1:39. Base sa sining mga dinalan, paano mo ilaragway ang nabatyagan sang Dios para sa imo?

Paano ginapakita sang Dios nga dako ang imo bili sa Iya? Paano ini nagaapekto sa nabatyagan mo para sa imo kaugalingon kag sa iban?

Doktrina kag mga Kasugtanan 18:11–16

Ang Ginuo nagakasadya kon maghinulsol ako.

Tandai kon kapila gingamit ang mga tinaga nga maghinulsol kag paghinulsol sa bilog nga Doktrina kag mga Kasugtanan 18. Binagbinaga ang imo natun-an tagsa nga ginagamit ini nga mga tinaga. Pamensara labi na gid ang mga bersikulo 11–16. Paano ining mga bersikulo nagaapekto sa imo nabatyagan parte sa paghinulsol—sa imo kaugalingon nga paghinulsol kag sa tulumanon nga hagaron ang iban nga maghinulsol kag mag-uswag? Ari ang isa ka paagi para isulat ang imo natun-an: isulat ang pila ka paagi nga kompletuhon mo ang pahayag nga “Ang paghinulsol .”

Tan-awa man sa Alma 36:18–21; Giya sa Balaan nga mga Kasulatan, “Paghinulsol,” Librarya sang Ebanghelyo.

Detalye halin sa The Prodigal Son [Ang Nadula nga Anak], ni Clark Kelley Price

Doktrina kag mga Kasugtanan 18:14–16

Ang kalipay nagaabot halin sa pagbulig sa iban nga magpalapit kay Cristo.

Samtang ginabasa mo ang mga bersikulo 14–16, binagbinaga kon ano ang buot silingon sang “magwali sang paghinulsol”—kag ngaa nagadala ini sang kalipay. Ano ang iban nga pamaagi nga natukiban mo para buligan ang iban nga magpalapit sa Manluluwas kag magbaton sang kapatawaran? Paano ina ginhimo sang iban para sa imo?

Tan-awa man sa Craig C. Christensen, “Wala na sing Butang nga Tuman Kadako kag Katam-is Pareho sang Akon Kalipay,” Liahona, Mayo 2023, 45–47.

Doktrina kag mga Kasugtanan 18:34–36

Mabatian ko ang tingug sang Ginuo sa balaan nga mga kasulatan.

Kon may magpamangkot sa imo kon daw ano ang tingug sang Ginuo, ano ang imo ihambal? Pamensara ining pamangkot samtang imo ginabasa ang Doktrina kag mga Kasugtanan 18:34–36. Ano ang imo natun-an parte sa tingug sang Ginuo sa imo pagbasa sang Doktrina kag mga Kasugtanan? Ano ang pwede mo himuon para mabatian ang Iya tingug sing mas maathag?

Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.

Mga Ideya para sa Pagtudlo sang mga Kabataan

Doktrina kag mga Kasugtanan 18:10–13

Ang kada isa sa aton dako ang bili sa Dios.

• Samtang ginabasa ninyo sang imo kabataan ang Doktrina kag mga Kasugtanan 18:10–13, pamensara nga ibutang ang ngalan ninyo sa mga tinaga nga “kalag,” “mga kalag,” kag “tanan nga katawhan.” Dayon pwede ninyo hambalan kon paano nagabulig sa aton ining mga bersikulo nga maintiendihan kon ano ang nabatyagan sang Amay nga Langitnon para sa kada isa sa aton.

• Pwede mo man pamangkuton ang imo kabataan parte sa mga butang nga ginakabig sang mga tawo nga may bili. Ukon pwede ka man magpakita sa ila sang butang nga malahalon para sa imo. Paano naton ginatratar ang mga butang nga may bili sa aton? Dayon pabulos-bulosa sila sa pagtan-aw sa espeho. Samtang ginahimo nila ini, hambala ang tagsa ka bata nga anak sila sang Dios kag dako ang ila bili. Paano naton ipakita sa iban nga “dako ang bili sang [ila] mga kalag” sa aton panan-awan?

• Para klaruhon nga ang tanan nga tawo dako ang bili sa Amay nga Langitnon, pwede nga tan-awon sang imo kabataan ang litrato sa katapusan sining outline samtang ginabasa ninyo ang Doktrina kag mga Kasugtanan 18:10–13.

Detalye halin sa Worth of a Soul [Bili sang Kalag], ni Liz Lemon Swindle

Doktrina kag mga Kasugtanan 18:13–16

Ang pagpakigbahin sang ebanghelyo nagahatag sa akon sang kalipay.

• Para papagsikon ang imo kabataan nga ipakigbahin ang ebanghelyo ni Jesucristo, pwede ninyo istoryahan ang inyo mga eksperiyensya sang may nakita kamo nga gusto ninyo ipakigbahin sa inyo mga abyan ukon pamilya. Ngaa gusto mo ini ipakigbahin, kag ano ang nabatyagan mo sa pagpakigbahin sini sa iban? Dayon pwede ninyo basahon ang Doktrina kag mga Kasugtanan 18:13, 16. Ano ang nagapalipay sa Ginuo? Ano ang ginasiling Niya nga magadala sa aton sang kalipay? Pwede ninyo hambalan sang imo kabataan ang bisan ano nga eksperiyensya ninyo sa pagpakigbahin sang kalipay sang ebanghelyo sang Manluluwas.

• Ang kanta parte sa pagpakigbahin sang ebanghelyo makabulig sa imo kabataan nga makapanumdom sang mga paagi nga mapakigbahin nila ang ebanghelyo.

Doktrina kag mga Kasugtanan 18:34–36

Mabatian ko ang tingug sang Ginuo sa balaan nga mga kasulatan.

• Basi masadyahan ang imo kabataan sang hampang nga pakot-pakot sang tingug sang lainlain nga tawo, pareho sang mga miyembro sang pamilya, mga abyan, ukon mga lider sang Simbahan. Paano naton makilala ang tingug sang kada isa? Paano naton makilala ang tingug sang Ginuo? Pwede ninyo basahon ang Doktrina kag mga Kasugtanan 18:34–36 para hambalan ini nga pamangkot. Pwede man ninyo iistorya sa kada isa kon paano ninyo nabatian ang tingug sang Ginuo sa balaan nga mga kasulatan.

Para sa dugang nga mga ideya, tan-awa sa isyu sang Abyan nga magasin sini nga bulan.

Ang tagsa ka kalag malahalon sa Dios.