Marso 17– 23: “Pangitaon ang mga Butang sang Mas Maayo nga Kalibutan”

Doktrina kag mga Kasugtanan 23–26

Para sa kalabanan, ang mabunyagan isa ka matinahuron, malinong nga eksperiyensya. Pero ang bunyag ni Emma Smith kag sang iban pa, gingamo sang mga buyong nga nagyaguta sa ila, nagpahog sa ila, kag nagpwersa sa ila nga magpalagyo. Sang ulihi, sang hana na nga kumpirmahon ni Joseph ang bag-o nga mga miyembro, gindakop sia kay ginpaakig niya ang komunidad paagi sa iya pagwali. Sa tunga sining tanan nga oposisyon, paano si Emma makakita sang kasanagan nga husto ang iya ginahimo? Sa pareho nga lugar kon diin naton ini makita—paagi sa rebelasyon halin sa Ginuo. Naghambal Sia kay Emma parte sa “mga butang sang mas maayo [nga kalibutan]”—ang Iya ginharian—kag ang iya (ni Emma) lugar sa sini. Ginhambalan Niya sia nga indi mahadlok, nga “magkalipay sa [iya] tagipusuon kag magkasadya,” kag “magtuman sang mga kasugtanan nga [iya] ginhimo.” Kag ining mga pulong sang pagpaisog kag laygay ang Iya “tingug sa tanan” (Doktrina kag mga Kasugtanan 25:9–10, 13, 16).

Tan-awa man sa Saints, 1:89–90, 94–97.

Mga Ideya sa Pagtuon sa Puluy-an kag sa Simbahan

Doktrina kag mga Kasugtanan 24

Sarang ako luwason sang Manluluwas “halin sa [akon] mga pag-antos.”

Ang rebelasyon sa Doktrina kag mga Kasugtanan 24 ginhatag sa “pagpabakod, paglaygay, kag pagtudlo” kay Joseph Smith kag Oliver Cowdery sa oras sang pagtilaw (tig-ulo sang seksyon; tan-awa man sa Saints, 1:94–96). Pangitaa ang mga tinaga sa Doktrina kag mga Kasugtanan 24 nga pamatyag mo nagapabakod kag nagapaisog sa ila.

Ano ang ginapanugyan sa imo sang masunod nga balaan nga mga kasulatan kon paano ka ginabuligan sang Manluluwas sa imo mga kabudlayan?

Doktrina kag mga Kasugtanan 24:1–3

Doktrina kag mga Kasugtanan 24:8

Doktrina kag mga Kasugtanan 121:7–8

Isaias 40:28–31

Mosias 24:14–15

Detalye halin sa He Healed Many of Diverse Diseases [Nagpang-ayo Sia sang Madamo nga Nagkalain-lain nga mga Balatian], ni J. Kirk Richards

Doktrina kag mga Kasugtanan 25

May importante ako nga papel nga dapat himuon sa ginharian sang Dios.

Samtang ginatan-aw ni Emma Smith ang pagbukas sang Pagpanumbalik paagi sa iya bana nga si Joseph Smith, siguro nagapanumdom man sia kon ano ayhan ang iya parte. Pangitaa ang mga sabat nga ginhatag sang Dios sa Doktrina kag mga Kasugtanan 25. May nakita ka bala sa sining seksyon nga pamatyag mo amo ang Iya “tingug sa [imo]”? (bersikulo 16).

Tan-awa man sa Joy D. Jones, “Labi Kadungganon nga Calling,” Liahona, Mayo 2020, 15–18.

"An Elect Lady"

(D&C 25:2-3) Video portraying events in the life of Emma Smith.

Doktrina kag mga Kasugtanan 25:5, 14

“Magpadayon sa espiritu sang kalulo.”

Ano ang kahulugan sa imo sang dinalan nga “espiritu sang kalulo”? Pamensara nga pangitaon sa seksyon 25 ang mga tinaga ukon mga dinalan nga nagabulig sa imo nga maintiendihan kon ano ang kahulugan sang mangin malulo. Ang mensahe ni Elder David A. Bednar nga “Malolo kag Mapainuboson sing Tagipusoon” makabulig man (Liahona, Mayo 2018, 30–33). Paano si Jesucristo nangin ehemplo sang kalulo sa imo? (tan-awa sa Mateo 11:28–30). Panumduma ang mga butang sa imo kabuhi nga pwede mo himuon “sa espiritu sang kalulo.”

Doktrina kag mga Kasugtanan 25:10, 13

“Ipahigad ang mga butang sining kalibutan, kag pangitaon ang mga butang sang mas maayo nga kalibutan.”

Samtang ginabinagbinag mo ang laygay sang Ginuo sa Doktrina kag mga Kasugtanan 25:10, basi makabulig sa imo nga ilista ang “mga butang sining kalibutan” nga gusto Niya nga imo “ipahigad.” Dayon pwede mo ilista ang “mga butang sang mas maayo [nga kalibutan]” nga gusto Niya nga imo pangitaon. Mahimo ka magpili sang bisan isa sa una nga listahan nga imo ipahigad kag isa ka butang sa ikaduha nga listahan nga imo pangitaon.

Si Pangulong Russell M. Nelson naghatag sang laygay kag mga promisa parte sa “[pagpahigad] sang madamo nga mga butang sining kalibutan.” Pangitaa ini sa pahina 77 sang iya mensahe nga “Espirituhanon nga mga Manggad” (Liahona, Nob. 2019). Paano mo sundon ang iya laygay?

Samtang ginabasa ang bersikulo 13, pamensara ang mga kasugtanan nga imo ginhimo upod sa Amay nga Langitnon kag kay Jesucristo. Ano ang buot silingon sang “magtuman” sining mga kasugtanan? Paano makabulig sa imo ang imo mga kasugtanan nga “ipahigad ang mga butang sining kalibutan kag pangitaon ang mga butang sang mas maayo”?

Ari ang iban nga balaan nga mga kasulatan nga makabulig sa imo nga makilala ang “mga butang sining kalibutan” kag “ang mga butang sang mas maayo”: Mateo 6:19, 21, 25–34; Lucas 10:39–42; 2 Nefi 9:51.

Manghagad sa pag-istorya. Kon nagatudlo ka sa iban kon paano “ipahigad ang mga butang sang kalibutan,” magpamensar sang mga paagi kon paano sila hagaron nga iistorya kon ano ang ila ginahimo para sundon ini nga laygay. Makakuha kita sang dako nga kusog kag kaisog halin sa pagpamati sa mga ideya kag eksperiyensya sang iban.

Doktrina kag mga Kasugtanan 25:11–12

Ang Ginuo nagakalipay sa “ambahanon sang tagipusuon.”

Ano ang pila sa imo “[mga] ambahanon sang tagipusuon”—mga kanta nga nagapabutyag sang imo mga nabatyagan para sa Amay nga Langitnon ukon kay Jesucristo? Pamensara nga magkanta ukon magpamati sa pila sini. Ano ang ara sa sining mga kanta nga espesyal ini sa imo?

Pwede mo man binagbinagon kon paano nga daw pareho ining mga himno sa pangamuyo. Ano ang magkapareho sa sagrado nga musika kag pangamuyo? Paano “[ginsabat] nga may pagpakamaayo” ang imo sagrado nga mga kanta?

Doktrina kag mga Kasugtanan 26:2

“Ang tanan nga butang pagahimuon pagkatapos nga makompirma ang pagsugot sang kadam-an sa simbahan.”

Ang dinalan nga “pagpasugot sang kadam-an” sa sining bersikulo nagatumod sa akto sang pag-alsa sang aton mga kamot para ipakita nga ginasakdag naton kag ginasuportahan ang tawo nga nagabaton sang calling ukon ordinasyon sa priesthood. Paano mo ipaathag sa bisita sa miting sang Simbahan kon ano ang buot silingon kon ginasakdag naton ang isa ka tawo. Ano nga mga sabat ang imo nakita sa mensahe ni Pangulong Henry B. Eyring nga “Ang Gahum sang Nagatib-ong nga Pagtuo”? (Liahona, Mayo 2019, 58–60).

Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.

Mga Ideya para sa Pagtudlo sang mga Kabataan

Doktrina kag mga Kasugtanan 24:1, 8

Sarang ako luwason sang Manluluwas “halin sa [akon] mga pag-antos.”

• Pwede ninyo diskubrehon sang imo kabataan kon ano ang ginhambal sang Ginuo kay Joseph parte sa iya mga pag-antos sa Doktrina kag mga Kasugtanan 24:1, 8. Pwede man ninyo iistorya sa isa kag isa kon paano kamo ginabuligan sang Ginuo sa mga panahon sang kabudlayan.

  Chapter 11: More People Join the Church: April–June 1830

• Ano ang ginatudlo sa aton sang Doktrina kag mga Kasugtanan 24:8 parte sa pagpadayon? Paano ginapahibalo sa aton sang Manluluwas nga Sia “kaupod [naton]” sa aton mga pag-antos?

  Continue in Patience

  Patience requires that we obey God's commandments and faithfully wait for His will to be fulfilled.

Doktrina kag mga Kasugtanan 25:11–12

Nanamian si Jesus sang “ambahanon sang tagipusuon.”

• Pagkatapos basahon ang Doktrina kag mga Kasugtanan 25:12, pwede ninyo istoryahan ang inyo paborito nga himno ukon kanta sa Simbahan—ang inyo “ambahanon sang tagipusuon”—kag kantahon ini sing ululupod. Iistorya sa isa kag isa kon ngaa nanamian kamo sini nga mga kanta. Ngaa nalipay ang Ginuo kon kantahon naton ining mga kanta? Paano ang aton pagkanta daw pareho sang “pangamuyo sa [Iya]”?

Doktrina kag mga Kasugtanan 25:13, 15

Ang akon mga kasugtanan upod sa Amay nga Langitnon nagahatag sa akon sang kalipay.

• Para maintiendihan ang buot silingon sang “magtuman sang mga kasugtanan” (Doktrina kag mga Kasugtanan 25:13), pabulos-bulosa ang imo kabataan sa pag-uyat sa isa ka bagay sing hugot-hugot. Dayon hambali upod sa imo kabataan kon paano kamo “magtuman” ukon magkapyot sa inyo mga kasugtanan. Kon kinahanglan, rebyuha upod sa imo kabataan ang mga kasugtanan nga aton ginahimo (tan-awa sa Mosias 18:8–10; Doktrina kag mga Kasugtanan 20:37; kag ang pahina sang kahiwatan sini nga semana).

• Para hatagan ang imo kabataan sang konteksto sang Doktrina kag mga Kasugtanan 25:13, pwede mo ipaathag nga amo ini ang ginhambal sang Ginuo kay Emma Smith pagkatapos sang iya bunyag. Ngaa maayo ini nga laygay para sa tawo nga bag-o lang ginbunyagan?

Para sa dugang nga mga ideya, tan-awa sa isyu sang Abyan nga magasin sini nga bulan.

Emma’s Hymns [Ang mga Himno ni Emma], ni Liz Lemon Swindle