Seksyon 23
Ini serye sang lima ka rebelasyon nga ginhatag paagi kay Joseph Smith nga Propeta sa Manchester, New York sang Abril 1830 kanday Oliver Cowdery, Hyrum Smith, Samuel H. Smith, Joseph Smith Sr., kag Joseph Knight Sr. Bilang resulta sing sinsero nga handum sang lima ka tawo nga ginsambit nga makahibalo sang ila kaugalingon nga mga tulumanon, nagpamangkot ang Propeta sa Ginuo kag nakabaton sang rebelasyon para sa tagsa ka tawo.
1–7, Ining una nga mga disipulo gintawag sa pagwali, paglaygay, kag pagpabakod sang Simbahan.
1 Tan-awa, nagahambal ako sa imo, Oliver, sing pila lamang ka pulong. Tan-awa, bulahan ka, kag wala ka sa idalom sang pagkondenar. Apang mag-andam sa bugal, agud indi ka magsulod sa tentasyon.
2 Ipahibalo ang imo tawag sa pag-alagad sa simbahan, kag amo man sa kalibutan, kag pagabuksan ang imo tagipusuon sa pagwali sang kamatuoran sugod subong kag tubtob sa wala’y katapusan. Amen.
3 Tan-awa, nagahambal ako sa imo, Hyrum, sing pila lamang ka pulong; kay wala ka man sa idalom sang pagkondenar, kag ang imo tagipusuon nabuksan, kag ang imo dila nalugakan; kag ang imo tawag amo ang paglaygay, kag pagpabakod sang simbahan sing dalayon. Gani, ang imo tulumanon para sa simbahan sing wala’y katapusan, kag ini bangod sang imo panimalay. Amen.
4 Tan-awa, nagahambal ako sa imo sing pila lamang ka pulong, Samuel; kay wala ka man sa idalom sang pagkondenar, kag ang imo tawag amo ang paglaygay, kag pagpabakod sang simbahan; kag wala ka pa ginatawag sa pagwali sa kalibutan. Amen.
5 Tan-awa, nagahambal ako sa imo sing pila lamang ka pulong, Joseph; kay wala ka man sa idalom sang pagkondenar, kag ang imo man nga tawag amo ang paglaygay, kag pagpabakod sang simbahan; kag ini ang imo tulumanon sugod subong kag tubtob sa wala’y katapusan. Amen.
6 Tan-awa, ginapahayag ko sa imo, Joseph Knight, paagi sining mga pulong nga kinahanglan mo pas-anon ang imo krus paagi sa pagpangamuyo sing mabaskog sa atubang sang kalibutan amo man sing sekreto, kag sa sulod sang imo panimalay, kag upod sang imo mga abyan, kag sa tanan nga lugar.
7 Kag, tan-awa, tulumanon mo ang pagbuylog sa matuod nga simbahan, kag sa paglaygay sing dalayon agud nga mabaton mo ang padya sang sinang nagapangabudlay. Amen.