Seksyon 57
Rebelasyon nga ginhatag paagi kay Joseph Smith nga Propeta sa Sion, Jackson County, Missouri sang ika-20 sang Hulyo 1831. Bilang pagtuman sa sugo sang Ginuo nga maglakat sa Missouri, sa diin igapahayag Niya ang “duta nga inyo palanublion” (seksyon 52), nagpanglakaton ang mga elder halin sa Ohio pakadto sa weste nga dulonan sang Missouri. Ginbinag-binag ni Joseph Smith ang kahimtangan sang mga Lamanhon kag nagpanumdum: “San-o bala magabuskad ang kamingawan pareho sang rosas? San-o bala magauswag ang Sion sa iya himaya, kag sa diin bala magatindog ang Imo templo nga sa diin magakadto ang tanan nga nasyon sa ulihing mga adlaw?” Dayon nabaton niya ining rebelasyon.
1–3, Ang Independence, Missouri, amo ang lugar para sa Siyudad sang Sion kag sang templo; 4–7, Ang mga Santos dapat magbakal sang mga duta kag magbaton sang mga palanublion sa sina nga lugar; 8–16, Si Sidney Gilbert dapat magtukod sing isa ka tindahan, si William W. Phelps mangin manug-imprinta, kag si Oliver Cowdery ang magtadlong sang mga materyal nga ibantala sang Simbahan.
1 Dungga ninyo, O mga elder sang akon simbahan, siling sang Ginuo nga inyo Dios, nga nagtipon sang inyo mga kaugalingon suno sa akon mga kasugoan sa sining duta nga amo ang duta sang Missouri, nga amo ang duta nga akon ginhatag kag ginkonsagrar para sa pagtipon sang mga santos.
2 Gani, ini ang duta sang panaad, kag ang lugar para sa siyudad sang Sion.
3 Kag ini ang siling sang Ginuo nga inyo Dios, kon handa kamo sa pagbaton sang kaalam yari ang kaalam. Tan-awa, ang lugar nga ginatawag subong nga Independence amo ang sentro nga lugar; kag ang lugar para sa templo nahamtang pa-weste sa duta nga indi malayo sa balay-hukmanan.
4 Gani, kinaalam ini nga dapat baklon sang mga santos ang duta, kag ang tagsa man ka bahin sang duta nga nahamtang pa-weste tubtob sa dulonan nga nagalab-ot sa tunga sang mga Judio kag mga Gentil;
5 Kag ang tagsa man ka bahin nga nagatambi sa mga kapatagan sa malab-otan sang ikasarang sang akon mga disipulo nga magbakal sang mga duta. Tan-awa, kinaalam ini agud nga maangkon nila ini para sa wala’y katubtuban nga palanublion.
6 Kag ipatuman sa akon alagad nga si Sidney Gilbert ang iya palangakoan sa diin ginpili ko sia agud magbaton sang kwarta, agud mangin representante sa simbahan, agud magpamakal sang duta sa tanan nga rehiyon sa palibot suno sa mahimo sa pagkamatarong, kag suno sa imando sang kaalam.
7 Kag ipatuman sa akon alagad nga si Edward Partridge ang iya palangakoan sa diin ginpili ko sia, kag amo man sa sinang mga ginpili niya nga magbulig sa iya, kag bahin-bahinon sa mga santos ang ila palanublion suno sa akon nga ginsugo.
8 Kag sa liwat, sa pagkamatuod ginasiling ko sa inyo, papuy-a ang akon alagad nga si Sidney Gilbert sa sining lugar, kag patukora sing isa ka tindahan agud nga makabaligya sia sang mga balaligyaon nga wala sang pagdaya, agud nga makakwarta sia agud magpamakal sang mga duta para sa kaayohan sang mga santos, kag agud nga makaangkon sia sing ano man nga mga butang nga kinahanglanon sang mga disipulo agud nga mapahamtang sila sa ila palanublion.
9 Kag pakuhaa man ang akon alagad nga si Sidney Gilbert sang lisensya—tan-awa yari ang kaalam, kag dapat hangpon sang sin-o man nga magbasa—agud nga mahimo man sia magpadala sang mga balaligyaon sa mga tawo paagi sa bisan sin-o nga gusto niya nga mga klerk nga iya empleyado;
10 Kag gani magpatigayon para sa akon mga santos agud mawali ang akon ebanghelyo sa sinang nagapungko sa kadulom kag sa lugar kag landong sang kamatayon.
11 Kag sa liwat, sa pagkamatuod ginasiling ko sa inyo, papuy-a ang akon alagad nga si William W. Phelps sa sining lugar, kag ipahamtang bilang isa ka manug-imprinta sa simbahan.
12 Kag yari karon, kon batonon sang kalibutan ang iya mga sinulat—tan-awa yari ang kaalam—paangkona sia sing ano man nga sarang niya maangkon sa pagkamatarong para sa kaayohan sang mga santos.
13 Kag pareho sang akon ginsugo, pabuliga ang akon alagad nga si Oliver Cowdery sa iya sa diin man nga lugar nga igahatag ko sa iya nga magkopya, magtadlong kag magpili sang mga sinulat agud nga ang tanan mangin husto sa akon panulok suno sa pagpamatuod sini sang Espiritu paagi sa iya.
14 Kag gani sa labing madali nga panahon papuy-a inang akon mga ginsambit upod ang ila mga panimalay sa duta sang Sion agud himuon inang mga butang suno sa akon ginhambal.
15 Kag karon parte sa pagtipon—ipahikot ang mga pagpanghanda sa obispo kag sa representante para sinang mga panimalay nga ginsugo nga magkadto sa sining duta sa labing madali nga panahon, kag papuy-a sila sa ila palanublion.
16 Kag ihatag sa mabilin nga mga elder kag mga miyembro ang dugang nga mga direksyon pagkatapos sini. Kag gani amo sini. Amen.