1 Ini ang siling sang Ginuo nga imo Dios nga si Jesucristo, ang Dakong Jehova, ang Alfa kag ang Omega, ang ginsuguran kag ang katapusan, ang mismo nga nagtulok sa masangkad nga kalaparon sang wala’y katapusan, kag tanan nga kasoldadohan sang mga serafin sa langit antes ginhimo ang kalibutan;

2 Ang mismo nga nakahibalo sang tanan nga butang kay ang tanan nga butang yara sa atubang sang akon mga mata;

3 Ako nga mismo ang naghambal, kag nahimo ang kalibutan, kag ang tanan nga butang nagluntad paagi sa akon.

4 Ako ang mismo nga nagdala sa Sion ni Enoc sa akon sabak; kag sa pagkamatuod, ginasiling ko, kay ako si Cristo, paagi sa akon kaugalingon nga ngalan, nagpakitluoy ako sa Amay para sa ila tanan nga nagpati sa akon ngalan paagi sa gahum sang dugo nga akon gin-ula.

5 Apang tan-awa, ang malain nga mga minatay ginpabilin ko nga nakagapos sa mga kadena sang kadulom tubtob sa paghukom nga matabo sa dako nga adlaw nga magaabot sa katapusan sang duta;

6 Kag sa amo man nga paagi ang buhi nga mga malain magapabilin nga nakagapos sa kadena sang kadulom; sila nga indi magpamati sa akon tingug kundi nagapatig-a sang ila mga tagipusuon, kag makahaladlok, makahaladlok, makahaladlok sang ila kapalaran.

7 Apang tan-awa, sa pagkamatuod, sa pagkamatuod, ginasiling ko sa inyo nga ang akon mga mata nagatan-aw sa inyo. Yara ako sa tunga ninyo kag indi ninyo ako makita;

8 Apang magaabot ang adlaw sa indi madugay nga makita ninyo ako, kag makahibalo nga buhi ako; kay ang belo sang kadulom pagagision sa indi madugay, kag sia nga indi matinlo indi makalampuwas sa adlaw kon magpakita ako.

9 Gani, wagkosi ang inyo mga balikawang kag mangin handa. Tan-awa, inyo ang ginharian, kag ang kaaway indi makadaug sa inyo.

10 Sa pagkamatuod ginasiling ko sa inyo, matinlo kamo apang indi tanan; kag wala na sing iban pa nga akon nahamut-an;

11 Kay ang tanan nga unod malain sa akon panulok; kag ang mga gahum sang kadulom nagapangibabaw sa duta, sa mga anak sang katawhan, sa presensya sang tanan nga kasoldadohan sang langit—

12 Nga kabangdanan nga ang kahipos sang langit naghari, kag ang bug-os nga ginharian sang Dios nag-antos, kag ang mga anghel nagahulat sang dako nga sugo nga anihon ang duta, nga tiponon ang mga hilamon agud nga sunogon ang mga ini; kag, tan-awa, nagtingob ang mga kaaway.

13 Kag karon ipakita ko sa inyo ang isa ka misteryo, isa ka sekreto nga butang sa tinago nga mga kwarto agud ipahanabo ang inyo kalaglagan sa ulihi, kag wala ninyo mahibaloan ini;

14 Apang karon ginasugid ko ini sa inyo, kag bulahan kamo indi bangod sang inyo kalainan ukon inyo mga tagipusuon sa pagkawala’y pagtuo; kay sa pagkamatuod ang pila sa inyo balasulon sa akon atubang apang mangin maluluy-on ako sa inyo kaluyahon.

15 Gani, mangin mabakod kamo sugod subong; kag indi magkahadlok kay inyo ang ginharian.

16 Kag ginahatagan ko kamo sing isa ka kasugoan para sa inyo kaluwasan kay nabatian ko ang inyo mga pangamuyo, kag ang mga imol nagreklamo sa akon, kag ang mga manggaranon gintuga ko, kag ang tanan nga tinuga akon, kag wala ako sang ginapasulabi nga mga tawo.

17 Kag ginhimo ko nga bugana ang duta, kag tan-awa ini ang akon palatungan; gani, sa liwat magatindog ako diri.

18 Kag akon ginatanyag kag kabubut-on nga ginahatag sa inyo ang mas dalagko nga mga manggad, bisan pa ang duta sang panaad, ang duta nga nagailig sang gatas kag dugus sa diin wala sang mangin sumpa kon magkari ang Ginuo;

19 Kag ihatag ko ini sa inyo bilang duta nga inyo palanublion kon tinguhaan ninyo nga maangkon ini sa bug-os ninyo nga tagipusuon.

20 Kag amo ini ang akon mangin kasugtanan sa inyo, maangkon ninyo ini bilang duta nga inyo palanublion, kag palanublion sang inyo mga kaliwat tubtob sa wala’y katapusan samtang ang duta magapadayon, kag pagaangkonon ninyo ini sa liwat sa wala’y katapusan, kag indi na ini magtaliwan pa.

21 Apang, sa pagkamatuod ginasiling ko sa inyo nga sa pag-abot sang panahon wala kamo sang hari ukon tagdumala kay ako ang inyo mangin hari kag magabantay sa inyo.

22 Gani, magpamati sa akon tingug kag magsunod sa akon, kag mangin hilway kamo nga katawhan, kag wala kamo sang mangin mga layi kundi ang akon mga layi kon magkari ako kay ako ang inyo manughatag sang kasugoan, kag ano bala ang makapugong sa akon kamot?

23 Apang, sa pagkamatuod ginasiling ko sa inyo, tudloi ang isa kag isa suno sa palangakoan sa diin ginpili ko kamo;

24 Kag ang tagsa ka tawo dapat magkabig sang iya utod (sa simbahan) pareho sang iya kaugalingon, kag mangin matarong kag balaan sa akon atubang.

25 Kag sa liwat ginasiling ko sa inyo, ang tagsa ka tawo dapat magkabig sang iya utod pareho sang iya kaugalingon.

26 Kay ano nga tawo sa inyo nga may dose ka anak nga lalaki, kag wala sang may ginapasulabi sa ila, kag ginaalagaran nila sia sing matinumanon, kag masiling sia sa isa: Magsoksok sing matahum nga mga panapton kag magpungko diri; kag sa isa naman: Magsoksok sing gision nga mga panapton kag magpungko didto—kag magtulok sa iya mga anak kag magsiling nga matarong ako?

27 Tan-awa, ini ginhatag ko sa inyo bilang paanggid, kag ini pareho sa akon. Ginasiling ko sa inyo, mangin isa; kag kon indi kamo isa indi kamo akon.

28 Kag sa liwat, ginasiling ko sa inyo nga ang kaaway sa tinago nga mga kwarto nagatinguha sa pagpatay sa inyo.

29 Nabatian ninyo ang parte sa mga giyera sa malayo nga mga pungsod, kag nagasiling kamo nga sa indi madugay may matabo nga dalagko nga mga giyera sa malayo nga mga pungsod, apang wala kamo makahibalo sang yara sa mga tagipusuon sang mga tawo sa inyo kaugalingon nga duta.

30 Ginasugiran ko kamo sining mga butang bangod sang inyo mga pangamuyo; karon, hupti ang kaalam sa inyo mga tagipusuon agud nga ang kalainan sang mga tawo indi magpahayag sining mga butang sa inyo paagi sa ila kalainan, sa paagi nga magahambal sa inyo mga pamatin-an sa tingug nga mas mabaskog pa sangsa sinang magauyog sang duta; apang kon handa kamo indi kamo mahadlok.

31 Kag agud nga malikawan ninyo ang gahum sang kaaway, kag matipon sa akon nga isa ka matarong nga katawhan nga wala’y sala kag wala’y kabasulanan—

32 Gani, kay sa sini nga rason ginhatag ko sa inyo ang kasugoan nga maglakat kamo sa Ohio; kag didto ihatag ko sa inyo ang akon layi; kag didto pagahatagan kamo sang gahum halin sa kahitaasan;

33 Kag halin didto, kon sin-o man ang pilion ko, magalakat sa tanan nga nasyon kag ipahibalo sa ila kon ano ang ila himuon; kay may ginatigana ako nga dako nga buluhaton, kay ang Israel pagaluwason, kag giyahan ko sila kon sa diin ko man luyag, kag wala sang gahum ang makapugong sa akon kamot.

34 Kag karon, ginahatag ko ang kasugoan sa simbahan sa sining mga bahin nga pila ka mga lalaki sa tunga nila ang pagapilion, kag pagapilion sila suno sa tingug sang simbahan;

35 Kag magtatap sila sang mga imol kag mga nagakinahanglan, kag maghatag sa ila sang kaumpawan agud nga indi sila mag-antos; kag ipadala sila sa lugar nga ginsugo ko sa tanan nga miyembro sang Simbahan;

36 Kag ini ang ila mangin buluhaton, nga magdumala sang mga butang parte sa propiedad sang sining simbahan.

37 Kag sila nga may mga uma nga indi mabaligya, dapat pabay-an ukon ipaarendo ang mga ini suno sa nagakaigo para sa ila.

38 Siguroha nga ang tanan nga butang maamligan; kag kon ang mga tawo mahatagan sang gahum halin sa kahitaasan kag ipadala, ining tanan nga butang pagatiponon sa sabak sang simbahan.

39 Kag kon tinguhaan ninyo nga maangkon ang mga manggad nga pagbuot sang Amay nga ihatag sa inyo, mangin pinakamanggaranon kamo sa tanan nga katawhan kay maangkon ninyo ang mga manggad sang wala’y katapusan; kag ang kamatuoran amo nga ang mga manggad sang duta akon agud ipanagtag; apang mag-andam sa bugal agud nga indi kamo mangin pareho sa mga Nefinhon sang dumaan nga panahon.

40 Kag sa liwat, ginasiling ko sa inyo, ginahatagan ko kamo sing isa ka kasugoan nga ang tagsa ka tawo nga elder, pari, manunudlo, kag miyembro man, maglakat sa iya kusog, sa pagpangabudlay sa iya mga kamot agud ihanda kag tumanon ang mga butang nga akon ginsugo.

41 Kag ang inyo pagwali dapat nga mangin tingug sang pagpaandam sang tagsa ka miyembro sa iya isigkatawo sa paagi nga matawhay kag malulo.

42 Kag magsipak kamo sa mga malain. Luwasa ang inyo mga kaugalingon. Mangin matinlo kamo nga nagadala sang mga gamit sang Ginuo. Kag gani amo sini. Amen.