Seksyon 60
Rebelasyon nga ginhatag paagi kay Joseph Smith nga Propeta sa Independence, Jackson County, Missouri sang ika-8 sang Agosto 1831. Sa sini nga tion ang mga elder nga naglakat sa Jackson County kag nagpartisipar sa pagdedikar sang duta kag sang lugar sang templo luyag makahibalo kon ano ang ila dapat himuon.
1–9, Ang mga elder dapat magwali sang ebanghelyo sa mga kongregasyon sang mga malain; 10–14, Indi sila dapat mag-usik sang ila tiempo sa katamad ukon maglubong sang ila mga talento; 15–17, Mahimo nila hugasan ang ila mga tiil bilang testimonya batok sinang mga nagasikway sang ebanghelyo.
1 Tan-awa, ini ang siling sang Ginuo sa mga elder sang iya simbahan nga dapat magbalik sing gilayon sa duta kon sa diin sila naghalin: Tan-awa, nagapalipay sa akon nga nagkadto kamo diri;
2 Apang wala ako nahamuot sa pila kay indi nila pagbuksan ang ila mga baba kundi ginatago nila ang talento nga ginhatag ko sa ila bangod sang kahadlok sa tawo. Kalisud sa ila kay ang akon kaakig nagadabadaba batok sa ila.
3 Kag matabo ini nga kon indi sila labi katampad sa akon, pagabawion ini bisan pa inang yara sa ila.
4 Kay ako, nga Ginuo, nagahari sa kalangitan sa ibabaw, kag sa mga kasoldadohan sang duta; kag sa adlaw nga pagapilion ko ang akon mga hiyas, makahibalo ang tanan nga tawo kon ano ang nagapamatuod sang gahum sang Dios.
5 Apang, sa pagkamatuod, magahambal ako sa inyo parte sa inyo pagpanglakaton sa duta kon sa diin kamo naghalin. Magpahimo sang sakayan-dagat ukon magbakal sini suno sa nagakaigo para sa inyo, indi ini importante sa akon, kag maglakat sing gilayon pakadto sa lugar nga ginatawag nga St. Louis.
6 Kag halin sa sina nga lugar palakta ang akon mga alagad nga sanday Sidney Rigdon, Joseph Smith Jr., kag Oliver Cowdery sa Cincinnati;
7 Kag sa sini nga lugar ipabayaw sa ila ang ila tingug kag ipapahayag ang akon pulong sa mabaskog nga mga tingug nga wala sang kaakig ukon pagpangduhaduha, nga nagabayaw sang balaan nga mga kamot sa ila. Kay sarang ko kamo pakabalaanon, kag napatawad na ang inyo mga sala.
8 Kag palakta ang nabilin nga mga elder halin sa St. Louis sing tagduha-duha, kag pawaliha sang pulong nga indi dali-dali sa tunga sang mga kongregasyon sang mga malain tubtob nga magbalik sila sa mga simbahan kon sa diin sila naghalin.
9 Kag ini tanan para sa kaayohan sang mga simbahan; ginapadala ko sila para sa sining katuyoan.
10 Kag pahataga ang akon alagad nga si Edward Partridge sang bahin sang kwarta nga ginhatag ko sa iya sa akon mga elder nga ginsugo nga magbalik;
11 Kag sia nga makasarang magbayad, pabayara sia paagi sa representante; kag sia nga indi makasarang, indi na kinahanglan magbayad.
12 Kag karon nagahambal ako parte sa nabilin nga mga elder nga nagapakadto sa sining duta.
13 Tan-awa, ginpalakat sila agud iwali ang akon ebanghelyo sa mga kongregasyon sang mga malain; karon, ginahatagan ko sila sang kasugoan nga nagasiling: Indi kamo dapat mag-usik sang inyo tiempo sa katamad ni maglubong sang inyo mga talento agud nga indi ini mahibaloan.
14 Kag pagkatapos nga makaabot kamo sa duta sang Sion, kag nakabantala sang akon pulong, magbalik kamo sing gilayon nga nagabantala sang akon pulong sa tunga sang mga kongregasyon sang mga malain nga indi sa dali-dali, ni sa kaakig ukon sa pagbinaisay.
15 Kag itaktak ang yab-ok sa inyo mga tiil batok sa ila nga indi magbaton sa inyo, indi sa atubang nila agud nga indi ninyo sila mapaakig, kundi sing sekreto; kag hugasi ang inyo mga tiil bilang testimonya batok sa ila sa adlaw sang paghukom.
16 Tan-awa, nagakaigo ini sa inyo, kag ini ang iya pagbuot nga nagpadala sa inyo.
17 Kag paagi sa baba sang akon alagad nga si Joseph Smith Jr. igapahibalo ang parte kanday Sidney Rigdon kag Oliver Cowdery. Igapahayag ang nabilin pagkatapos sini. Kag gani amo sini. Amen.