Detalye halin sa Gethsemane’s Path [Dalan sang Getsemani], ni Steve McGinty

Marso 3–9: “Magtuon sa Akon”

Doktrina kag mga Kasugtanan 19

Tinuig antes mabakal ni Martin kag Lucy Harris ang isa sa pinakanami nga mga uma sa Palmyra, New York. Pero sang 1829 nangin maathag nga ang Libro ni Mormon mapaimprinta lamang kon iprenda ni Martin ang iya uma para ibayad sa manug-imprinta. May testimonya si Martin parte sa Libro ni Mormon, pero si Lucy wala. Kon dayunon ni Martin ang pagprenda kag indi mabakal ang Libro ni Mormon, butungon ang iya uma, mabutang sa alang-alang ang ila pag-asawahay, kag maguba ang iya reputasyon sa komunidad. Bisan lain ang aton mga sirkumstansya sangsa iya ni Martin, sa isa ka punto sang aton kabuhi tanan kita nagapangatubang sang mabudlay nga mga pamangkot pareho sa iya: Ano ang bili sang ebanghelyo ni Jesucristo sa akon? Ano ang handa ko isakripisyo para magbulig tukod sang ginharian sang Dios? Sang ulihi nagdesisyon si Martin Harris nga iprenda niya ang iya uma para maimprinta ang una nga 5,000 ka kopya sang Libro ni Mormon. Pero bisan ini nga sakripisyo—kag ang bisan ano nga aton isakripisyo—gamay kon ikumpara sa sakripisyo ni Jesucristo, “ang pinakagamhanan sa tanan” (Doktrina kag mga Kasugtanan 19:18), nga nagdugo ang tanan nga buho-buho sang panit para luwason ang nagahinulsol.

Mga Ideya sa Pagtuon sa Puluy-an kag sa Simbahan

Doktrina kag mga Kasugtanan 19:1–12

“Ako nga Dios, nagapadayon.”

Ginpaathag ni Joseph Smith nga ang rebelasyon sa seksyon 19 isa ka “kasuguan … kay Martin Harris, nga ginhatag niya nga Wala’y Katapusan” (tig-ulo sang seksyon). Pangitaa sa mga bersikulo 1–12 kon diin ginklaro sang Ginuo ang Iya pagka-wala’y katapusan. Ngaa sa banta mo importante kay Martin Harris nga mahibal-an ini parte sa Ginuo? Ngaa importante nga mahibal-an mo ini?

Ngaa sa banta mo nga ginatawag si Jesucristo nga “ang ginsuguran kag ang katapusan”? (bersikulo 1).

Doktrina kag mga Kasugtanan 19:15–20

Nag-antos si Jesucristo para makahinulsol ako kag makapalapit sa Iya.

Ang Bag-ong Katipan nagalaragway sang pag-antos sang Manluluwas sa Getsemani halin sa perspektibo sang mga tawo nga nakakita sini. Sa Doktrina kag mga Kasugtanan 19:15–20, ginsaysay ni Jesucristo ang Iya pag-antos sa Iya kaugalingon nga perspektibo. Samtang ginabasa mo ining sagrado nga personal nga panaysayon, pangitaa kon paano ginlaragway sang Manluluwas ang Iya pag-antos. Pamensara sing maayo ang ginatudlo sang tagsa ka tinaga ukon dinalan sa imo. Ngaa sugot ang Manluluwas nga mag-antos? Madamo ka pa sang madiskubrehan sa Juan 15:13; Mosias 3:7; Alma 7:11–12; Doktrina kag mga Kasugtanan 18:10–13.

Ang imo mga nabatyagan samtang ginatun-an mo ang parte sa pag-antos sang Manluluwas mahimo nga makapukaw sang mga pamangkot pareho sini: Ngaa kinahanglan sang Manluluwas nga mag-antos para sa akon mga sala? Ngaa kinahanglan ko nga maghinulsol para mabaton ang mga bugay sang Iya pagsakripisyo? Samtang nagatuon, ano nga mga ideya ang nagasulod sa imo kaisipan? Pamensara nga isulat ang imo mga nabatyagan parte kay Jesucristo kag sa Iya sakripisyo para sa imo.

Bilang bahin sang imo pagtuon kag pagsimba, pwede ka magpangita sang himno nga pwede mo pamatian ukon kantahon nga nagapahayag sang imo pagpasalamat sa Manluluwas sa Iya pag-antos para sa imo. Ang “Ako Nahalawhaw Gid [I Stand All Amazed]” (Mga Himno Kag mga Ambahanon sang Kabataan) isa ka maayo nga halimbawa.

Ano sa pamatyag mo ang ipahimo sa imo sang Amay nga Langitnon kag ni Jesucristo bilang resulta sang imo nabatyagan kag gintun-an?

Tan-awa man sa “Buligan ka ni Jesucristo,” Para sa Kusog sang mga Lamharon: Giya sa Paghimo sang mga Pagpili (2022), 6–9.

The Savior Suffers in Gethsemane

Jesus, Peter, James, and John retire to the Garden of Gethsemane. Jesus submits to the Father's will and begins to suffer for the sins and afflictions of mankind. He is then betrayed and arrested. Matthew 26:36–57

Doktrina kag mga Kasugtanan 19:23

Ang paghidaet nagaabot paagi sa pagtuon parte kay Jesucristo kag pagsunod sa Iya.

Pamensara ang imbitasyon sang Manluluwas: “Magtuon sa akon.” Ano ang imo matun-an parte kay Jesucristo sa Doktrina kag mga Kasugtanan 19? Isulat ang imo mga panghunahuna, kag binagbinaga kon paano ining mga kamatuoran parte sa Manluluwas makabulig sa imo nga makakita sang paghidaet. Ano para sa imo ang kahulugan sang “maglakat sa kalulo sang [Iya] Espiritu”?

Tan-awa man sa Henry B. Eyring, “Pagpangita sang Personal nga Paghidaet,” Liahona, Mayo 2023, 29–31.

Peace in Christ

Doktrina kag mga Kasugtanan 19:26–41

Ang mga bugay sang Dios mas labaw pa sangsa mga manggad sang duta.

Diutay lang ang nagbakal sang Libro ni Mormon sa Palmyra. Ang resulta, kinahanglan ibaligya ni Martin Harris ang dako nga bahin sang iya uma para mabayran ang utang sa nag-imprinta. Binagbinaga ang sakripisyo ni Martin—kag ang mga bugay nga imo nabaton tungod sina—samtang ginabasa mo ang Doktrina kag mga Kasugtanan 19:26–41. Pwede mo man hunahunaon kon ano ang ginapangayo sang Ginuo nga imo isakripisyo. Ano ang imo nakita sa sining mga bersikulo nga nagainspirar sa imo nga himuon ining mga sakripisyo nga may “kasadya” kag “kalipay”? (tan-awa man sa mga bersikulo 15–20).

Detalye halin sa Martin Harris Farm [Uma ni Martin Harris], ni Al Rounds

Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.

Mga Ideya para sa Pagtudlo sang mga Kabataan

Doktrina kag mga Kasugtanan 19:16–19

Nag-antos si Jesucristo para sa akon.

• Pwede mo buligan ang imo kabataan nga makabatyag sang pagtahod kag pagpasalamat sa Manluluwas paagi sa pagbasa sing ululupod sang Doktrina kag mga Kasugtanan 19:16–19. Pamensara nga magpundo-pundo para siguruhon nga nakaintiendi ang mga kabataan kag tugti sila nga ipahayag ang ila mga nabatyagan. Halimbawa, sa bersikulo 16, ano “ining mga butang” nga gin-antos ni Jesus para sa aton? (tan-awa sa Mosias 3:7; Alma 7:11–12). Ano ang matun-an naton sa Iya paglaragway sang Iya pag-antos? Paano naton ipakita ang aton kapasalamatan para sa Iya ginhimo para sa aton?

Chapter 51: Jesus Suffers in the Garden of Gethsemane

Buligi ang mga kabataan nga makatuon halin sa balaan nga mga kasulatan. Ang iban nga mga bata nabudlayan sa pagbasa sang balaan nga mga kasulatan. Ang pagtutok sa isa lamang ka bersikulo ukon dinalan mahimo nga makabulig sa ila.

• Pwede kamo sang imo mga bata magpangita sa Hymns ukon sa Children’s Songbook sang mga kanta nga makabulig sa inyo nga ipahayag ang inyo nabatyagan parte kay Jesucristo (tan-awa sa mga topic index sining mga libro).

Doktrina kag mga Kasugtanan 19:18–19, 24

Gintuman ni Jesucristo ang Amay nga Langitnon bisan pa nga mabudlay.

• Mabudlay katama ang mag-antos para sa aton mga sala, pero sugot si Jesucristo nga himuon ini para tumanon ang Iya Amay kag para ipakita ang Iya pagpalangga sa Iya kag sa aton. Pwede kamo magtan-aw sang litrato ni Jesucristo nga nagaantos sa Getsemani (pareho sang mga ara sa sining outline) kag ipaistorya sa imo kabataan kon ano ang nahibal-an nila nga nagakatabo sa sining litrato. Pwede ninyo basahon ang Doktrina kag mga Kasugtanan 19:18–19, 24 para ipaathag nga ang mag-antos para sa aton mga sala amo ang pinakamabudlay nga ginhimo sang isa ka persona, pero tungod palangga ni Jesus ang Iya Amay kag kita, gintuman Niya ang pagbuot sang Dios (tan-awa man sa Mosias 3:7). Ano ang mabudlay nga mga butang nga ginapaobra sa aton sang Dios? Paano naton pangitaon ang kaisog para tumanon Sia?

Doktrina kag mga Kasugtanan 19:23

“Magtuon sa akon, kag magpamati sa akon mga pulong.”

• Pwede mo buligan ang imo kabataan nga mamensar sang simple nga mga aksyon nga bagay sa Doktrina kag mga Kasugtanan 19:23. Basaha ang bersikulo sang pila ka beses samtang ginahimo nila ang mga aksyon. Ano ang pila ka mga paagi nga magtuon kita parte kay Cristo kag mamati sa Iya mga pulong?

Doktrina kag mga Kasugtanan 19:38

Ang mga bugay sang Dios mas labaw pa sangsa mga manggad sang duta.

• Pwede kamo magbulos-bulos sang imo kabataan sa pag-uyat sang Libro ni Mormon kag pag-istorya kon ano ang nanamian ninyo parte diri. Hambali makadali ang sakripisyo ni Martin Harris para maimprinta ang Libro ni Mormon. Ano ang ginhambal sang Ginuo kay Martin sa Doktrina kag mga Kasugtanan 19:38 nga mahimo nakabulig sa iya nga magpati kag magtuman? Buligi ang imo kabataan nga magpanumdom sang pwede nila isakripisyo para tumanon ang Dios ukon magbulig sa Iya buluhaton.

  Chapter 7: Witnesses See the Gold Plates: 1829–1830

Para sa dugang nga mga ideya, tan-awa sa isyu sang Abyan nga magasin sini nga bulan.

Christ Praying in the Garden of Gethsemane [Si Cristo nga Nagapangamuyo sa Hardin sang Getsemani], ni Hermann Clementz