Pagpangita sang Personal nga Paghidaet
Ginapangamuyo ko nga makita ninyo ang paghidaet, buligan ang iban nga makita ini, kag ipasa ini sa iban.
Mahal kong mga kauturan, ginbugayan kita sang inspirado nga pagpanudlo kag matahum nga musika nga nagtandog sa aton sa sining pangbukas nga sesyon sang pangkabilogan nga komperensya. Nagapasalamat kami sa inyo partisipasyon kag sa inyo pagtuo.
Sini nga adlaw magahambal ako parte sa akon natun-an parte sa milagro sang pagpangita sang personal nga paghidaet, sa bisan ano naton nga sirkumstansya. Nahibal-an sang Manluluwas nga ang tanan nga anak sang Amay nga Langitnon nagahandum sang paghidaet, kag siling Niya nga mahatag Niya ina sa aton. Matandaan ninyo ang mga pulong ni Jesucristo nga nasulat sa libro ni Juan: “Ang paghidaet ginabilin ko sa inyo, ang akon paghidaet ginahatag ko sa inyo, indi subong sang paghatag sang kalibutan, ang paghatag ko sa inyo. Dili malisang ang inyo mga tagipusuon, ukon mahadlok.”1
Ang buot Niya silingon sang paghidaet kag kon paano Niya ini ihatag ginpahayag sa mga sirkumstansya sadtong mga nakabati sa Iya nga naghambal sadtong mga pulong. Pamatii ang panaysayon ni Juan sa pagtapos sang dutan-on nga pag-alagad ni Cristo. Ang masingki nga mga pwersa sang kalainan padayon nga nagapugong sa Iya kag magaabot sa indi madugay sa Iya mga disipulo.
Ini ang mga pulong sang Manluluwas:
“Kon nagahigugma kamo sa akon, magabantay kamo sang akon mga sugo.
“Kag ako magapangayo sa Amay, kag magahatag sia sa inyo sing isa pa ka Mananabang, agud nga mag-upud sia sa inyo sa gihapon;
“Bisan ang Espiritu sang kamatooran, nga indi mabaton sang kalibutan, kay wala ini makakita sa iya ukon makakilala sa iya; nakilala ninyo sia, kay nagapabilin sia sa inyo, kag manginyara sia sa inyo.
“Indi ko kamo pagbayaan nga mga ilo: Magabalik ako sa inyo.
“Sa diotay pa nga tion, kag ang kalibutan indi na makakita sa akon, apang kamo makakita sa akon; bangud nga ako nagakabuhi, kamo magakabuhi man.
“Sa sadtong adlaw makahibalo kamo nga ako sa akon Amay, kag kamo sa akon, kag ako sa inyo.
“Ang nagahupot sang akon mga sugo kag nagatuman sa ila, sia amo ang nagahigugma sa akon; kag ang nagahigugma sa akon higugmaon sang akon Amay, kag ako magahigugma sa iya kag magapahayag sang akon kaugalingon sa iya.
“Si Judas (indi ang Iscariote) nagsiling sa iya, “Ginuo, paano bala nga ikaw magapahayag sang imo kaugalingon sa amon, kag indi sa kalibutan?
“Si Jesus nagsabat sa iya, “Kon ang tawo nagahigugma sa akon, magabantay sia sang akon pulong, kag ang akon Amay magahigugma sa iya, kag kami magakari sa iya kag magapuyo kami kaupod niya.
“Ang wala nagahigugma sa akon wala nagabantay sang akon mga pulong; kag ang pulong nga inyo ginapamatian indi akon kundi iya sang Amay nga nagpadala sa akon.
“Ining mga butang napamulong ko sa inyo, sang nagapabilin pa ako sa inyo.
“Apang ang Mananabang, ang Espiritu Santo, nga ipadala sang Amay sa akon ngalan, magatudlo sia sa inyo sang tanan nga butang, kag magapahanumdum sa inyo sang tanan nga akon ginsiling sa inyo.
“Ang paghidait ginabilin ko sa inyo; ang akon paghidait ginahatag ko sa inyo; indi subong sang paghatag sang kalibutan ang paghatag ko sa inyo. Dili malisang ang inyo mga tagipusuon, ukon mahadlok.”2
May natun-an ako nga indi magnubo sa lima ka kamatuoran sa sinang pinanudlo sang Manluluwas.
Una, ang dulot sang paghidaet ginahatag pagkatapos naton maangkon ang pagtuo nga tumanon ang Iya mga kasuguan. Para sa mga miyembro sang Simbahan sang Ginuo nga nagahimo kag nagatipig sang mga kasugtanan, ang pagtuman amo ang ginpromisa naton nga himuon.
Ikaduha, ang Balaan nga Espiritu magaabot kag magaupod sa aton. Nagsiling ang Ginuo nga, kon padayon kita nga magatuo, ang Balaan nga Espiritu nagapuyo sa aton. Ina ang promisa sang pangamuyo sa sakramento nga ang Espiritu mangin kaupod naton kag mabatyagan naton sa aton mga tagipusuon kag kaisipan, ang Iya kaumpawan.
Ikatatlo, nagapromisa sa aton ang Manluluwas nga kon tumanon naton ang aton mga kasugtanan, mabatyagan naton ang pagpalangga sang Amay kag sang Anak para sa kada isa kag para sa aton. Mabatyagan naton ang Ila kalapit sa aton mortal nga mga kabuhi, nga mabatyagan man naton kon mabugayan kita nga makaupod Sila sa katubtuban.
Ikaapat, ang pagtuman sang mga kasuguan sang Ginuo nagakinahanglan sang masobra pa sangsa pagtuman. Kinahanglan naton nga palanggaon ang Dios sa bug-os naton nga tagipusuon, kusog, panghunahuna, kag kalag.3
Ang mga wala nagapalangga sa Iya wala nagatuman sang Iya mga kasuguan. Kag gani, indi nila mabaton ang dulot sang paghidaet sa sining kabuhi kag sa kalibutan nga magaabot.
Ikalima, maathag nga dako ang pagpalangga sa aton sang Ginuo para bayran ang bili sang aton mga sala para kita, paagi sa aton pagtuo sa Iya kag sa aton paghinulsol, makabaton sang dulot sang paghidaet nga “nagalabaw sa tanan nga paghangop,”4 sa sining kabuhi kag upod sa Iya sa wala katubtuban.
Ang iban sa inyo, siguro madamo, ang indi makabatyag sang paghidaet nga ginpromisa sang Ginuo. Mahimo nga nagpangamuyo kamo para sa personal nga paghidaet kag espirituhanon nga kaumpawan. Pero mahimo nga pamatyagan ninyo wala ginasabat sang langit ang inyo pag-ampo.
May kaaway ang inyo mga kalag nga indi gusto nga makita ninyo, kag sang inyo mga pinalangga, ang paghidaet. Indi ini sia malipay. Nagapangabudlay sia para punggan kamo nga maghandum nga pangitaon ang paghidaet nga ginahandum sang Manluluwas kag sang Amay nga Langitnon nga inyo mabaton.
Ang mga pagpaninguha ni Satanas nga magtanom sang dumot kag kagamo sa palibot naton daw padayon nga nagadako. Makita naton ang ebidensya sini nga nagakatabo sa mga nasyon kag siyudad, sa mga komunidad, sa electronic media, sa bilog nga kalibutan.
Pero may rason gid nga maglaum: ini ang Kasanag ni Cristo nga ginbutang sa tagsa ka bag-ong bun-ag nga bata. Upod sinang pangkabilogan nga regalo nagaabot ang balatyagon sang kon ano ang husto, ang handum nga magpalangga kag palanggaon. May duna nga pamatyagan sang hustisya kag kamatuoran sa tagsa ka anak sang Dios sa iya pag-abot sa dutan-on nga kabuhi.
Ang aton paglaum sa personal nga paghidaet para sinang mga kabataan ara sa mga tawo nga nagaatipan sa ila. Kon ang mga nagaatipan sa ila nagtinguha nga mabaton ang dulot sang paghidaet halin sa Manluluwas, sila, paagi sa personal nga ehemplo kag pagpaninguha, magapabakod sang pagtuo sang bata para mangin angayan sa pagbaton sang pinakamataas nga dulot sang paghidaet.
Amo ina ang ginapromisa sang balaan nga mga kasulatan, “Hanasa ang bata sa dalanon nga dapat niya paglaktan: kag bisan tigulang na sia indi sia magtalikod sa sini.”5 Magapangayo ini sa tawo nga nagaatipan sa ila nga mangin angayan sa dulot sang paghidaet.
Ang masubo, tanan kita nakabatyag sang kasakit kon ang kabataan nga ginpadako sang inspirado nga mga gininakan—kon kaisa solo nga ginikanan—magpili, pagkatapos sang bilog-kabuhi nga pagtuo kag paghidaet, sang dalan sang kalisod.
Bisan pa nga matabo ina nga kasubo, ang akon paglaum ara sa isa pa ka dulot halin sa Ginuo. Ini amo: nga nagatigana Sia sang madamo nga mga makigdaeton sa tunga sang Iya sinaligan nga mga disipulo. Nabatyagan nila ang paghidaet kag pagpalangga sang Dios. Ara ang Balaan nga Espiritu sa ila mga tagipusuon, kag magiyahan sila sang Ginuo para lab-uton ang nagtalalang nga mga karnero.
Nakita ko ini sa kalawigon sang akon kabuhi kag sa bilog nga kalibutan. Nakita man ninyo ini. Kon kaisa, kon ginatuytuyan kamo sa pagsagop, daw natabuan lang ini.
Sadto, simple ko nga ginpamangkot ang isa ka tawo nga nakilala ko sa biyahe, “Pwede mo bala ako sugiran sing diutay parte sa imo pamilya?” Ang paghinambalanay namon nagtulod sa akon sa pagpangabay nga makita ang litrato sang iya hamtong nga bata nga babayi, nga siling niya ginabudlayan. Nagdayaw ako sang kabuot sa guya sinang babayi sa litrato. Ginpabatyag sa akon kon pwede pangayuon ang iya email address. Ang bata nga ato nagtalang sadto nga tion kag ginaligban kon bala may mensahe ang Dios para sa iya. May ara gid. Amo ini: “Palangga ka sang Ginuo. Wala ini mag-untat. Gusto sang Ginuo nga magbalik ka. Ara pa gihapon ang ginpromisa sa imo nga mga bugay.”
Ang mga miyembro sa bilog nga Simbahan nakabatyag sang dulot sang Ginuo nga personal nga paghidaet. Ginapaisog niya ang tanan nga buligan ang iban nga makaangkon sang mga oportunidad nga magpalapit sa Iya kag mabaton ang amo man nga paghidaet sa ila kaugalingon. Dayon, bilang balos, pilion nila nga magpangita sang inspirasyon para mahibal-an kon paano nila mapasa ina nga regalo sa iban.
Ang ulihing-tubo mangin manug-atipan sang henerasyon nga masunod. Ang laton-laton nga epekto magatuga sang milagro. Magadako ini kag magatubo sa kadugayan, kag ang ginharian sang Ginuo sa duta mangin handa sa pagsugata sa Iya sang mga pagsininggit sang hosana. Magaluntad ang paghidaet sa duta.
Ginahatag ko ang sigurado ko nga pamatuod nga ang Manluluwas buhi kag ginapangunahan Niya ining Simbahan. Nabatyagan ko ang Iya pagpalangga sa akon kabuhi kag ang Iya pagpalangga kag pag-ulikid sa mga anak sang Amay nga Langitnon. Ang imbitasyon nga magpalapit sa Iya isa ka tanyag sang paghidaet.
Si Pangulong Russell M. Nelson amo ang buhi nga propeta sang Dios sa bilog nga kalibutan. Siling niya, “Ginahatag ko sa inyo ang pasalig nga bisan ano ang kondisyon sang kalibutan kag ang inyo personal nga sirkumstansya, pwede ninyo atubangon ang palaabuton nga may paglaum kag kalipay.”6
Ginapahayag ko ang akon pagpalangga sa inyo. Ang inyo dako nga pagtuo kag pagpalangga nagalab-ot sa mga tawo kag nagatugot sa Ginuo nga bag-uhon ang mga tagipusuon kag makaangkon sang handum nga itanyag sa iban ang dulot sang paghidaet nga labaw pa sa tanan nga paghangop.
Ginapangamuyo ko nga makita ninyo ang paghidaet, buligan ang iban nga makita ini, kag ipasa ini sa iban. Mangin matahum ang isa ka libo ka tuig sang paghidaet kon magbalik na ang Ginuo. Nagasaksi ako sini sa ngalan ni Jesucristo, amen.